Juba, gavumenti ya Ruhanga ey’omu iguru ku eraategyeke abantu boona, ensi neija kuba omwanya murungi ahu bantu barikubaasa kutuura hamwe, baine obumwe n’emirimo erikureeta okumarwa. Ruhanga atooraine Yesu Kristo kutegyeka ensi. Yesu okutashushana n’abategyeki baingi ab’ebiro ebi, we naija kuba naafayo munonga aha byetengo by’abantu. N’omugabe orikwija kutegyeka omu muringo gwa rukundo, gw’embabazi, esaasi, n’oburingaaniza.—Isaaya 11:4.

Omu ensi ensya abantu tibarikwija kubaganisibwamu amahanga nari enganda. Nibaija kuba baine obumwe. (Okushuuruurwa 7:9, 10) Abantu boona abaraatuure omu nsi nibaija kuba nibakunda Ruhanga n’abataahi, kandi nibaija kukorera hamwe kuhikiiriza ekigyendererwa kya Ruhanga barikureeberera eka yaabo, niyo nsi.—Zaaburi 115:16.

Obukama bwa Ruhanga ku buraatandike kutegyeka ensi, Omuhangi naija kutereeza gye embeera y’obwire egume eri nungi. (Zaaburi 24:1, 2) Obu Yesu yaabaire ari omu nsi, akatworeka kakye aha maani agu Ruhanga yaamuhaire obu yaacureeza eihunga ry’amaani. (Mako 4:39, 41) Kristo ku araabe naategyeka, tihaine oraabe naatiina ebihikiirizi. Kandi Obukama bwa Ruhanga nibwija kugaruraho obumwe aha gati y’abantu n’enyamaishwa.—Hosea 2:18.

Buri omwe naija kuba aine amagara agahikiirire. Tihaine orikwija kurwara, kukaikura, nari kufa. (Isaaya 35:5, 6) Abantu nibaija kwesiima ahabw’okutuura omu nsi eboneire, kandi ecumire gye nk’ei omushaija n’omukazi ab’okubanza baabaire nibeesiimiramu omu musiri Edeni. Omu nsi ensya, nk’oku kyabaire kiri omuri Edeni, itaka niriija kweza eby’okurya omu bwingi kubaisaho abantu boona. (Okutandika 2:9) Nk’eihanga rya Israeli eya ira, buri omwe omu Paradiso naija ‘kurya ahaagye.’—Abaleevi 26:4, 5.

Gavumenti ya Ruhanga ku eraabe neetegyeka ensi yoona, abantu boona nibaija kugira obusingye kandi batwarizane gye. Tiharikwija kugaruka kubaho entaro, kukoresa kubi obushoboorozi, kandi tihaine oragarukye kutegana kutunga eby’okwebaisaho. Baibuli neeraganisa eti: ‘Buri muntu naija kushutama ahansi y’omuzaabibu gwe n’ahansi y’omutiini gwe, kandi tihaine orikwija kubakangisa.’—Miika 4:3, 4.

Buri ka neija kwombeka enju yaayo, kandi buri murimo nigwija kurugamu ebirungi. Baibuli neegira ngu, abaraabe nibatuura omu nsi ya Ruhanga ensya ‘nibaija kuba batarikuhendekyera busha.’—Isaaya 65:21-23.

Baibuli neeraganisa eti: ‘Okumanya [Yehova] nikwija kubuga ensi yoona.’ (Isaaya 11:9) Abantu abaraabe nibategyekwa Obukama bwa Ruhanga nibaija kwega aha bwengye bw’Omuhangi waabo, Yehova obutaine bugarukiro, n’aha bintu birungi ebi yaahangire. Tibarikwija kukoresa obwengye bwabo kukora eby’okurwanisa nari kukora kubi abantu. (Isaaya 2:4) Kureka, nibaija kwega kutuurana omu busingye barikureeberera ensi.—Zaaburi 37:11.

Ruhanga akafayo munonga kutebeekanisa gye ensi kugira ngu twesiime kugituuramu buri izooba. Naayenda ngu abantu batuure omu nsi ebiro byona. (Zaaburi 37:29; Isaaya 45:18) Kubaasa kuhikiiriza ekigyendererwa ekyo, Ruhanga ‘naija kumirira kimwe rufu.’ (Isaaya 25:8) ‘Tiharikwija kubaho okufa bundi, n’obu kwakuba okucura nari okurira nari obusaasi,’ nikwo Baibuli erikuraganisa. (Okushuuruurwa 21:4) Boona abaraahonokeho Ruhanga yaaba naacwekyereza ensi egi embi, n’abandi nyamwingi abaraazookye naija kubaha omugisha gw’okutuuraho ebiro byona omu nsi ensya eri haihi kubaho.—Yohaana 5:28, 29; Ebyakozirwe 24:15.

 Nangwa na hati, abantu obukaikuru n’obukaikuru bariyo nibetebeekanisa kwija kutuura omu ensya eri haihi kubaho. N’obu baraabe batahikiriire, nibateeraho kuba abantu barungi abu Ruhanga arikwenda ngu batuure omu nsi ye ensya. Mu muringo ki? Barikwega ebirikukwata ahari Yehova Ruhanga n’ogwo ou yaatumire, Yesu Kristo.—Yohaana 17:3.

Yongyera kumanya oku orikubaasa kuhonokaho aha mperu y’ensi egi reero okatuura omu nsi nungi eri haihi kubaho. Ikiriza Abajurizi ba Yehova kukwegyesa Baibuli otashashwire, nari yega kurabira ahari Online Bible Study Lessons aha jw.org.