‘Ekitebe ky’obukama kikaba kitairwe omu iguru, naareeba n’Owaabaire akishutamiho; kandi ogwo owaabaire akishutamiho akaba naashusha nk’eibaare rya yasipi n’erya Sarudi, kandi ekyo kitebe ky’obukama kikaba kyehinguririziibwe omuhanganzima, ogwabaire nigushusha simaragido.’​—Okushuuruurwa 4:2, 3.

“Nk’oku omuhanganzima gureebeka aha kicu aha izooba ry’enjura, nikwo okureebeka kw’okumurinkana kwabaire kumwehinguririize. Ebyo bikaba biri ekishushani ky’ekitiinisa kya Mukama. Ku naakireebire, naagwa ahansi njuumaire, naahurira eiraka ry’orikugamba.”​—Ezekieli 1:27, 28.

Okworekwa oku entumwa Yohaana na nabi Ezekieli baatungire, kukaba nikworeka ekitiinisa kya Rukira Boona Ruhanga, Yehova, okwabaire kurimu ebintu ebi turikubaasa kwetegyereza, nk’eibaare rya yasipi n’erya Sarudi, omuhanganzima, n’ekitiinisa ky’ekitebe ky’obukama. Okworekwa oku nikutuhwera kwetegyereza ngu omwanya gwa Yehova n’ogw’ekitiinisa, ni murungi munonga, kandi n’ogw’obuteeka.

Ebirikukwata ahari Ruhanga nibihikaana n’ebigambo by’omuhandiiki wa Zaaburi owaagizire ati: “Ahakuba Mukama ni mukuru, ashemereire kuhimbisibwa munonga, kandi n’okutiinwa okukira baaruhanga boona. Ahabw’okuba baaruhanga boona ab’abantu baba ebishushani; kwonka Ruhanga niwe yaahangire eiguru. Ekitiinisa n’obukuru bimwebembeire, amaani n’oburungi biri omu mwanya gwe ogurikwera.”​—Zaaburi 96:4-6.

N’obu Yehova ari Rukira Boona, naatweta kumushaba kandi naatuhamiza ngu naija kutuhurira. (Zaaburi 65:2) Ruhanga naatukunda kandi naatufaho munonga kandi entumwa Yohaana akahandiika ati: “Ruhanga aba rukundo.”​—1 Yohaana 4:8.

‘[Omukristaayo Stefano], aijwire omwoyo gurikwera, yaagumya amaisho ge ahaiguru, yaareeba ekitiinisa kya Ruhanga na Yesu ayemereire aha rubaju rwa buryo rwa Ruhanga; yaagira ati: Reeba, nindeeba eiguru rikinguukire, n’Omwana w’omuntu ayemereire aha rubaju rwa buryo rwa Ruhanga.’​—Ebyakozirwe 7:55, 56.

Omu bwire bukye Stefano atakatungire okworekwa oku, Yesu akaitwa abo benyine abu Stefano yaabaire naagambira, abeebembezi b’Abayudaaya. Okworekwa oku nikuhamya ngu Yesu akaba ahuriire kandi ngu akaba azookire ahairwe ekitiinisa. Entumwa  Paulo akahandiika ngu Yehova ‘akazoora Yesu omu bafu, akamushutamya aha rubaju rwe rwa buryo omu iguru, ahaiguru munonga y’obutegyeki bwona n’obushoboorozi bwona n’amaani goona n’obugabe bwona, kandi ahaiguru y’eiziina ryona erigambwa, ti mu busingye obu bwonka kureka n’omu buriija.’​—Abaefeso 1:20, 21.

Ebyahandiikirwe birikugamba aha mwanya gwa Yesu ogw’ekitiinisa, nibyoreka ngu nawe naakunda abantu munonga nka Yehova. Yesu omu buheereza bwe omu nsi, akakiza abarwaire, abamugire, kandi yaazoora abafu. Okwehayo akafa, akooreka ngu naakunda munonga Ruhanga n’abantu. (Abaefeso 2:4, 5) Yesu okuba aha mukono gwa buryo gwa Ruhanga, naija kukoresa obushoboorozi bwe ahwere abantu abacureezi omu nsi yoona kutunga emigisha mingi.

“[Nyowe nabi Danieli] ku naabaire ninkyetegyereza, naareeba ebitebe by’obukama byateebwaho, omukuru owa iranaira [Yehova] yaashutama . . . . Omu maisho ge haarugamu omugyera gw’omuriro, rukumi emirundi enkumi baamuheereza, n’akakumi emirundi obukumi baayemerera omu maisho ge.”​—Danieli 7:9, 10.

Omu kworekwa okurikukwata aha by’omu iguru, Danieli akareeba baamaraika baingi munonga. Buzima okworekwa okwo kukaba nikugaruramu amaani! Baamaraika n’ebihangirwe eby’omwoyo ebiine ekitiinisa obwengye n’amaani. Abamwe nibeetwa baaseraafi na baakerubi. Baibuli neegamba ahari baamaraika emirundi erikurenga ahari 250.

Baamaraika ti bantu abaabaire bari omu nsi reero bakarugamu. Ruhanga akahanga baamaraika emyaka mingi enyima atakahangire bantu. Obu ensi yaabaire neehangwa, baamaraika bakaba bariho barikureeba kandi bakashemererwa munonga.​—Yobu 38:4-7.

Omuringo gumwe ogu baamaraika abeesigwa barikuheereza Ruhanga n’okwejumba omu murimo omukuru ogw’okubuurira amakuru marungi ag’Obukama bwa Ruhanga ogurikukorwa omu nsi yoona. (Matayo 24:14) Okwejumba kwabo omu murimo ogu kukagambwaho omu kworekwa oku Yohaana yaatungire, owaahandiikire ati: “Kandi naareeba ondiijo maraika naagyendera ahaiguru ahagati omu mwanya, aine engiri ey’ebiro n’ebiro okubuurira abatuura omu nsi amahanga goona n’enganda zoona n’endimi n’abantu.” (Okushuuruurwa 14:6) N’obu baamaraika baraabe batarikugamba n’abantu omu bwire obu  nk’oku baabaire nibakora ira, nibahwera abo abarikubuurira amakuru marungi.

“Hakabaho orugamba omu iguru, Mikaeli [Yesu Kristo] na baamaraika be nibarwanisa ekijoka; kandi ekijoka na baamaraika baakyo baabarwanisa; baabingwa, kandi okuruga obwo tibaratungire mwanya omu iguru obundi. Ekijoka ekyo ekihango ekya ira, ekirikwetwa Omuregi kandi Sitaane, orikugobeza ensi yoona, yaanagwa aha nsi na baamaraika be.”​—Okushuuruurwa 12:7-9.

Hariho obwire obu omu iguru haabaire hatariyo busingye. Obu omuntu yaahangwa, omwe ahari baamaraika, akagira ekyetengo ky’okwenda kuramibwa, yaagomera Yehova, yaahinduka Sitaane, ekirikumanyisa “Omuhakanisa.” Baamaraika abamwe bwanyima bakamwegaitaho kandi baahinduka ba baadaimoni. N’abashaarizi, kandi nibahakanisa Yehova kandi baareetaire abantu baingi kwanga obuhabuzi bwe.

Sitaane na baadaimoni be n’abashaarizi. N’abazigu b’abantu kandi baareetaire abantu baingi kubonabona. Nk’eky’okureeberaho, Sitaane akaita amatungo n’abaheereza ba Yobu. Ekyakuratsireho akaita abaana ikumi ba Yobu arikukoresa “omuyaga gw’amaani” kushenya enju ei baabaire barimu. Bwanyima, Sitaane “yaarwaza Yobu ebihuute bibi, okuruga aha mara g’ebigyere okuhika aha kazingiriro k’eishokye.”​—Yobu 1:7-19; 2:7.

Kwonka Sitaane ari haihi kucwekyerezibwa. Okwiha obu yaanagwa omu nsi, naamanya ngu “aine omwanya mukye.” (Okushuuruurwa 12:12) Sitaane buzima naija kuhwerekyerera, kandi ago buzima n’amakuru marungi!

“Oshemereire [Yesu] kutwara ekitabo n’okubambuura obumanyiso bwakyo, ahabw’okuba okaitwa, waacungurira Ruhanga abantu n’eshagama yaawe ab’enganda zoona n’endimi zoona n’abantu boona n’amahanga goona.”​—Okushuuruurwa 5:9, 10.

Nk’oku Yesu yaazookire akaruga omu nsi akaza omu iguru, hariho n’abandi abaraazooke bakaza omu iguru. Yesu akagambira entumwa ze abeesigwa ati: “Ninza kubashemereza omwanya, . . . ndyagaruka aha, mbatware ei ndi; okwo ei ndi, naimwe mube niyo mwatuura.”​—Yohaana 14:2, 3.

Abo abarikuza omu iguru nibazayo ahabw’ekigyendererwa. Bari kumwe na Yesu, nibaija kukora gavumenti eraije kutegyeka ensi yoona kandi ekahwera abantu kutunga emigisha. Obu nibwo Bukama obu Yesu yaagambiire abakuratsi be kushaba ngu bwije omu kushaba kw’eky’okureeberaho ati: “Tataitwe ow’omu iguru, eiziina ryawe ryezibwe, Obukama bwawe bwije; ebi okunda bikorwe omu nsi nk’oku bikorwa omu iguru.”​—Matayo 6:9, 10.

“Naahurira [entumwa Yohaana] eiraka rihango niriruga omu kitebe ky’obukama nirigira riti: Reeba eihema rya Ruhanga riri omu bantu, . . . aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”​—Okushuuruurwa 21:3, 4.

Okworekwa oku okuri omu bunabi nibukwata aha bwire obu Obukama bwa Ruhanga, oburikutegyekwa Yesu n’abarikuruga omu nsi, buraacwekyereze obutegyeki bwa Sitaane kandi bakahindura ensi egi paradiso. Ebintu ebireetaire abantu kubonabona munonga nibiza kuba bitakiriho. Nangwa n’okufa nikwija kuhwaho.

Kandi obuhumbi bw’abandi abaafiire abataraazorwe kutuura omu iguru? Omu biro by’omumaisho, nibaija kuzoorwa baine amatsiko g’okutuura omu Paradiso omu nsi ebiro byona.​—Luka 23:43.