1. N’obu obushwere buraabe nibutandika burimu okushemererwa, abarikubuzamu nibatunga buremeezi ki? (Reeba ekishushani aha kutandika.)

AHA izooba ry’okugaitwa kishwera n’omugore we nibaba nibareebana aha maisho, buzima barikworeka ngu bashemereirwe munonga. Omu bwire bw’okweriima, rukundo yaabo neeba eyeyongyeire kuhama, n’ahabw’ekyo nibaba beteekateekire kuraganisa kuguma bari abeesigwa omu bushwere. Kwonka, nibaba baine kukora empindahinduka ahabw’okugira ngu nibaba bari abantu babiri batarikushushana abaagaitwa hamwe kukora eka. Kwonka Ekigambo kya Ruhanga nikiha obuhabuzi burungi abarikuza omu bushwere, ahabw’okuba Owaatandikireho obushwere naayenda ngu omushaija n’omukazi we bagire obusinguzi n’okushemererwa omu bushwere bwabo. (Enf. 18:22) Kwonka Ebyahandiikirwe nibitugambira butunu ngu abantu abatahikiriire baaza omu bushwere nibaija kugira “obusaasi omu mubiri.” (1 Kor. 7:28) Mbwenu shi nibabaasa kurinda bata obusaasi obwo kutaba bwingi? Kandi ni bintu ki ebirikureetera obushwere bw’Abakristaayo kusingura?

2. Omushaija n’omukazi we bashemereire kugirirana rukundo za muringo ki?

 ² Baibuli neegamba aha bukuru bwa rukundo. Okufayo (omu Rugriika, phi·liʹa) nikwetengyesa omu bushwere. Baine n’okugira rukundo y’omushaija n’omukazi (eʹros) kandi baaba baine abaana, rukundo ey’ab’eka emwe (stor·geʹ) neeba eri nkuru. Kwonka, rukundo erikwegamira aha misingye (a·gaʹpe) niyo erikureetera obushwere kusingura. Aha bikwatiraine na rukundo egi, entumwa Paulo akahandiika ati: “Omuntu weena omuriimwe akunde omukazi we, nk’oku ayekunda; n’omukazi nawe ashemereire kutiina iba.”—Efe. 5:33.

3. Abari omu bushwere bashemereire kukunda kirikwingana ki?

³ Paulo akagira ngu “abashaija, mukunde abakazi baanyu, nk’oku Kristo yaakunzire” ekibiina akeehayo ahabwakyo. (Efe. 5:25) Abakuratsi ba Yesu kubaasa kumutooreza, baine kukundana nk’oku yaabakunzire. (Shoma Yohaana 13:34, 35; 15:12, 13.) N’ahabw’ekyo Abakristaayo abari hamwe omu bushwere bashemereire kuba nibakundana munonga, kugira ngu omwe aharibo aine kuba ayeteekateekire kufeera mugyenzi we kyaba nikyetengyesa. Kwonka abari omu bushwere baaba baine oburemeezi, nibabaasa kutaikiriza kukora ekyo. Oyihireho ekyo, okukunda okurikwegamira aha misingye (a·gaʹpe) “kwemera byona, kwikiriza byona, kugira amatsiko ahari byona, kugumisiririza byona.” Buzima, “okukunda tikuhwaho” nari tikuremwa. (1 Kor. 13:7, 8) Omushaija n’omukazi abarikutiina Ruhanga baijuka ekiragaano kyabo eky’okukundana n’okwesigana, nikibahwera kukwatanisa omu kushoboorora oburemeezi bwabo barikugyendera aha misingye ya Yehova.      

4, 5. (a) Omushaija omutwe gw’eka aine bujunaanizibwa ki? (b) Omukazi aine kureeba ata obwebembezi omu ka? (c) Omushaija n’omukazi we bakakora mpindahinduka ki?

⁴ Paulo arikugamba aha bujunaanizibwa bwa buri omwe omu bushwere, akagira ngu “abakazi mworobere baabaroimwe nk’oku mworobera Mukama. Ahakuba omushaija niwe mutwe gw’omukazi, nk’oku Kristo ari omutwe” gw’ekibiina. (Efe. 5:22, 23) Entebeekanisa egi terikureetera omukazi kuba ow’ahansi ahari iba. Kureka neereetera omukazi kuhikiiriza obujunaanizibwa obu Ruhanga yaamuhaire obu yaagira ati: “Ti kirungi omuntu [Adamu] kuguma wenka; ka mmukorere omuhwezi omushemereire.” (Kut. 2:18) Nka Kristo omutwe gw’ekibiina oku akiiniire rukundo, omushaija Omukristaayo ashemereire kwebembera omukazi we omu muringo gwa rukundo. Ku arikutwaza atyo, omukazi we naahurira aine oburinzi, kandi naagira okumarwa, kimureetera kuha iba ekitiinisa, kumushagika, n’okumworobera.

⁵ Cathy ^[1] arikworeka ngu obushwere nibwetengyesa okukora empindahinduka, naagira ati: “Obu naabaire ntakagiire omu bushwere, nkaba ninyetegyeka, kandi nkaba ninyereeberera. Okutaaha omu bushwere ekaba eri empinduka y’amaani ahakuba nkaba nyine kwega kwegamira ahari ibanyi. Tikirikunyorobera, kwonka tubaasize kwirirana haihi nyowe na ibanyi ahabw’okukora ebintu nk’oku Yehova arikwenda.” Iba Fred, naagira ati: “Nyowe tikirikunyorobera kucwamu. Omu bushwere, okucwamu enshonga ezirikukwata aha bantu babiri nikyongyera kuguma. Kwonka ahabw’okushaba Yehova obuhabuzi kandi nkahurikiza gye omukazi wangye, okucwamu nikweyongyera kworoba buri izooba. Hati nindeeba ngu nitukorera hamwe!”

6. Haabaho oburemeezi omu bushwere rukundo ‘neekomerana eta byona bikwatanisibwa kimwe’?

⁶ Obushwere obuhami nibukorwa abantu babiri abarikumanya ngu bombi tibahikiriire. Nibagumizamu ‘nibagumisiririzana kandi nibasaasirana’  batataireho bushonshorekye. Buzima, bombi nibakora enshobe. Kwonka ekyo ku kirikubaho, nibaba baine kwegyera aha nshobe ezo, bakasaasirana, kandi bakaikiriza rukundo “kukomerana byona bikakwatanisibwa kimwe.” (Kol. 3:13, 14) Kandi, “okukunda kugumisiriza, kugira embabazi,” kandi tikuguma nikwijuka enshobe z’abandi. (1 Kor. 13:4, 5) Obuteetegyereza bushemereire kushoboororwa ahonaaho. N’ahabw’ekyo, Omukristaayo omushaija n’omukazi we bashemereire kushoboorora enshonga zaabo eizooba ritakarengire. (Efe. 4:26, 27) Okugamba kuruga omu mutima ngu “nsaasira ahabw’okukugwisa kubi” nikyetengyesa obucureezi n’obumanzi, kwonka nikikora munonga omu kushoboorora oburemeezi n’okureetera omushaija n’omukazi we kwirirana haihi.

7, 8. (a) Baibuli neeha buhabuzi ki aha bikwatiraine n’okuteerana omu bushwere? (b) Ahabw’enki omushaija n’omukazi we baine kutwarizana omu muringo gw’embabazi?

⁷ Baibuli neeha obuhabuzi burungi oburikubaasa kuhwera omushaija n’omukazi we kuhaana ekishemeire omu bushwere. (Shoma 1 Abakorinso 7:3-5.) Okufayo aha nyehurira n’ebyetengo by’ou ori nawe omu bushwere ni kikuru. Omukazi yaaba atatwariziibwe omu muringo gw’embabazi, nikibaasa kumugumira kushemererwa baaba nibahaana ekishemeire omu bushwere. Abashaija nibagambirwa ngu baine kutwariza abakazi baabo “nk’abarikwetegyereza.” (1 Pet. 3:7) Tihaine oshemereire kugyema mutaahi we kuteerana, kureka bombi bashemereire kuba nibakikora beekundiire. Omushaija naabaasa kurahuka kwenda kuteerana kukira omukazi, kwonka omu nyehurira zaabo bombi, bushemereire kuba buri obwire buhikire.

⁸ N’obu Baibuli eraabe etarikutaho ebiragiro aha bikwatiraine na rukundo eshemereire kworekwa omu nshonga y’okuteerana, neegamba aha bikorwa bya rukundo. (Kyesh. 1:2; 2:6) Omushaija n’omukazi we Abakristaayo bashemereire kutwarizana omu muringo gw’embabazi.

9. Ahabw’enki okurigira omuntu ou otari nawe omu bushwere kiine kwetantarwa?

⁹ Twaba nitukunda munonga Ruhanga n’abataahi, titurikwija kwikiriza ekintu kyona kushiisha omukago gwaitu omu bushwere. Obushwere nibusiisikara ahabw’okugira ngu omwe aha baburimu naaba aine omuze gw’okukunda ebirikwitsa enshoni. Omuze gwona ogw’okukunda ebirikwitsa enshoni nari okwenda kuteerana omu muringo ogutahikire, kishemereire kwetantarirwa kimwe. Nangwa n’okweshunga n’omuntu ou otari nawe omu bushwere ti kikorwa kya rukundo, n’ahabw’ekyo kishemereire kwetantarwa. Twaijuka ngu Ruhanga naamanya ebiteekateeko n’ebikorwa byaitu byona nitwija kweyongyera kwenda kumushemeza n’okuguma turi abashemeire.—Shoma Matayo 5:27, 28; Abaheburaayo 4:13.

10, 11. (a) Omu mahanga agamwe nibatwara bata okugaitururwa? (b) Baibuli neegamba ki aha kutaana? (c) Niki ekirikuhwera ori omu bushwere kutarahuka kucwamu kutaana?

¹⁰ Oburemeezi bw’amaani bwaba butashobooroirwe, abamwe nibabaasa kucwamu kutaana nari kugaitururwa. Omu mahanga agamwe, abantu boona abari omu bushwere kimwe kya kabiri aharibo nibahendera bagaituriirwe. Omuze ogu tigurikukira kubaho omu kibiina Ekikristaayo, kwonka obushwere bw’Abakristaayo nibweyongyera kubamu oburemeezi bw’amaani.

¹¹ Baibuli neeha obuhabuzi obu: “Omukazi arekye kutaana na iba; kandi ku araabe yaataine nawe, agumire aho atashwerwa ondiijo, nari shi agarukane na iba, kandi omushaija atarishenda omukazi we.” (1 Kor. 7:10, 11) Omuntu okutaana ahari mutaahi we omu bushwere tikishemereire kutwarwa nk’enshonga nkye. N’obu okutaana kuraabe nikureebeka nk’okurikwetengyesa obushwere bwaba burimu oburemeezi  bw’amaani, nikwongyera aha buremeezi. Yesu bwanyima y’okugarukamu ebigambo ebi Ruhanga yaabaire agambire ngu omushaija aine kutsigaho ishe na nyine akaguma n’omukazi we, akagira ati: “Eki Ruhanga yaateeraine hamwe, omuntu atarikitaanisa.” (Mat. 19:3-6; Kut. 2:24) Kandi eki nikimanyisa ngu n’obu yaakuba omushaija nari omukazi we taine ‘kutaanisa eki Ruhanga yaateeraine hamwe.’ Yehova naayenda ngu omushaija n’omukazi we bagume kumwe. (1 Kor. 7:39) Okwijuka ngu twena nitujunaanizibwa omu maisho ga Ruhanga ahabw’ebi turikukora, kishemereire kuhiga abari omu bushwere kuteeraho kushoboorora oburemeezi ahonaaho kugira ngu butaba obw’amaani.

12. Niki ekirikubaasa kureetera ori omu bushwere kutaana?

¹² Abari omu bushwere obumwe nibagira oburemeezi, ahabw’okugira ngu eki baabaire nibateekateeka kushanga omu bushwere tikyo bashangiremu. Ebiteekateeko ebyo byaba bitahikiriire, omwe naabaasa kuhurira atamazirwe, ayereebe nk’ou bareebize, nari agire ekiniga. Enyehurira zitarikushushana, oku baakuziibwe, okutaikirizana omu by’esente, abakwe, n’okworora abaana, nibibaasa kureeta oburemeezi. Kwonka nitusiima Abakristaayo baingi abari omu bushwere abarikushoboorora oburemeezi bwabo bwona barikuhwerwa Ruhanga.

13. Ni nshonga ki ezirikureetera ori omu bushwere kwikirizibwa kutaana?

¹³ Obumwe nikibaasa kwetengyesa ngu omushaija n’omukazi we bataane. Okwanga nkana kureeberera ou ori nawe omu bushwere, okumubonabonesa, n’okumuremesa kwejumba omu by’omwoyo, ni bimwe ebireeteire abamwe kucwamu kutaana. Abakristaayo abari omu bushwere baaba baine oburemeezi bw’amaani omu bushwere bwabo, baine kusherura obuhwezi aha bareeberezi. Ab’eishe-emwe aba abaine okumanya, nibabaasa kuhwera omushaija n’omukazi we kugyendera aha buhabuzi oburi omu Kigambo kya Ruhanga. Twaba nitushoboorora oburemeezi omu bushwere, twine n’okushaba Yehova kutuha omwoyo gwe gurikwera n’obuhwezi bwe kugyendera aha misingye ya Baibuli n’okugira emitwarize y’omwoyo gurikwera.—Gal. 5:22, 23. ^[2]

14. Baibuli neegambira ki Abakristaayo abari omu bushwere n’abatari baheereza ba Yehova?

¹⁴ Obumwe, Omukristaayo naaba ari omu bushwere n’omuntu otakabaire muheereza wa Yehova. Omu mbeera nk’ezi, Baibuli neeha enshonga nungi ahabw’enki bashemereire kuguma kumwe. (Shoma 1 Abakorinso 7:12-14.) Ogwo otari muheereza wa Yehova ‘naayezibwa’ ahabw’okuba omu bushwere n’omuheereza wa Yehova. Abaana bato abu barikuzaara nibeetwa ‘abarikwera’ n’ahabw’ebyo nibaba bari ahansi y’oburinzi bwa Ruhanga. Paulo naaha enshonga egi: “Iwe mukazi ’we, noomanya ota ku otarijuna baro? Nari shi iwe mushaija ’we, noomanya ota ku otarijuna mukazi waawe?” (1 Kor. 7:16) Haihi buri kibiina ky’Abajurizi ba Yehova kirimu ab’eishe-emwe abashaija nari abakazi abaahwereire abu bari nabo omu bushwere kuhinduka abaheereza ba Yehova.

15, 16. (a) Baibuli neeha buhabuzi ki abakazi Abakristaayo abu baibabo batarikuheereza Ruhanga? (b) Omukristaayo naabaasa kukora ki mutaahi we ‘otarikwikiriza yaaba naayenda kutaana’?

¹⁵ Entumwa Petero akahabura abakazi Abakristaayo kworobera baibabo ngu “ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire, ahabw’okureeba emitwarize yaanyu mirungi ey’okutiina Ruhanga.” Omukazi yaayoreka ‘omwoyo omucureezi ogutuurize ogw’obuguzi bwingi omu maisho ga Ruhanga,’ naabaasa kusingura iba aije omu kuramya okw’amazima, okukira okugamba butunu aha nyikiriza z’Ekikristaayo.—1 Pet. 3:1-4.

¹⁶ Kandi otari Mukristaayo ku yaakucwamu kutaana? Baibuli neegira eti: “Otarikwikiriza ku araabe naayenda kutaana, ataane. Ku birikuba  bityo, ow’eishe-emwe omushaija nari omukazi naaba atakibohwa. Ahakuba Ruhanga akatwetera obusingye.” (1 Kor. 7:15) Eki tikirikumanyisa ngu Omukristaayo naaba aine obugabe bw’okugaruka kushwera nari kushwerwa, kandi tikirikwetengyesa kugyema otari Mukristaayo ngu atagyenda. Okutaana nikubaasa kureetaho obusingye oburinganiire. Bwanyima, otari mu mazima owaataanire naabaasa kucwamu kugaruka, arikwenda kutereeza obushwere. Kandi omu biro by’omumaisho, naabaasa n’okuba omuheereza wa Yehova.

17. Abakristaayo abari omu bushwere baine kwebembeza ki?

¹⁷ Ahabw’okugira ngu turi ahagati omu ‘biro by’emperu,’ nituraba omu bwire ‘bw’akabi kaingi’ obugumire kwemera. (2 Tim. 3:1-5) Kwonka, okuguma tuhami omu by’omwoyo nikiija kutubaasisa kusingura emiteekateekyere mibi y’ensi. Paulo akahandiika ati: “Hatsigaire ebiro bikye” nari obwire bukye. Akongyeraho ati: “Okuruga hati abaine abakazi babe nk’abatabaine, . . . n’abarikukoresa eby’ensi barekye kurengyesereza.” (1 Kor. 7:29-31) Paulo akaba atarikugambira abari omu bushwere kutafayo kuhaana ekishemeire omu bushwere. Kwonka ahabw’okugira ngu obwire obutsigaireyo ni bukye, baine kwebembeza eby’omwoyo.—Mat. 6:33.

18. Ahabw’enki kirikubaasika Abakristaayo kugira obushwere oburimu okushemererwa n’obusinguzi?

¹⁸ N’obu turaabe turi omu biro bigumire turikureeba n’obushwere bwingi burikushenyuka, nitubaasa kugira obushwere oburimu okushemererwa n’obusinguzi. Buzima, abari omu bushwere abarikwirira haihi Yehova n’abaheereza be, bakagyendera aha buhabuzi bw’Ebyahandiikirwe, kandi bakaikiriza kwebembwerwa omwoyo gurikwera nibabaasa kurinda “eki Ruhanga yaateeraine hamwe.”—Mak. 10:9.