1. Twena twine kukora ki?

MBWENU shi noobaasa kwejumba omu mpaka ezigumire, na munonga waaba orwaire nari oruhire? Obundi ngaaha. Entumwa Paulo, akagira ngu Abakristaayo boona bari omu mpaka z’okwiruka. (Heb. 12:1) Kandi twena abato n’abakuru, abaine amaani n’abaruhire, twine kugumisiriza kuhitsya aha muheru twaba nitwenda kutunga ekihembo eki Yehova atwiniire.​—Mat. 24:13.

2. Nk’oku kiri omu 2 Timoseo 4:7, 8, ahabw’enki Paulo yaabaire naagamba atarikwekyengyera?

² Paulo akaba naagamba aine obumanzi obu yaagira ati: “Mperize orugyendo rwangye.” (Shoma 2 Timoseo 4:7, 8.) Kwonka shi ni rugyendo ki nari ni mpaka za muringo ki ezi Paulo yaabaire naagambaho?

3. Ni mpaka za muringo ki ezi Paulo yaagambireho?

³ Obumwe Paulo akaba naagyeragyeranisa ebyabaire nibibaho omu mizaano y’Abagriika kwegyesa amashomo makuru. (1 Kor. 9:25-27; 2 Tim. 2:5) Emirundi mingi, akaba akakoresa empaka z’okwiruka kwegyesa aha buheereza bw’Ekikristaayo. (1 Kor. 9:24; Gal. 2:2; Fil. 2:16) Omuntu naatandika kwejumba omu mpaka ezi ku arikwehayo ahari Yehova kandi akabatizibwa. (1 Pet. 3:21) Omuntu ogwo ku arikwiruka akahika aha kimariro, Yehova naamuha ekihembo ky’amagara agatahwaho.​—Mat. 25:31-34, 46; 2 Tim. 4:8.

4. Nituza kushwijuma ki omu kicweka eki?

⁴ Ni bintu ki ebirikushushana omu mpaka z’okwiruka mahiro nyingi n’obuheereza bw’Ekikristaayo? Empaka ezi nizishushana omu miringo mingi. Ka tureebe ebintu bishatu aharibyo. Eky’okubanza,  twine kuza omu muhanda oguhikire, ekya kabiri, twine kuta omutima aha kuhika aha kimariro, kandi ekya kashatu, twine kusingura oburemeezi omu kwiruka kwaitu.

5. Twine kukuratira muhanda ki, kandi ahabw’enki?

⁵ Kubaasa kuheebwa ekihembo omu mpaka z’okwiruka eza butoosha, abairuki baine kwirukira omu muhanda ogu abatebeekanisa batooraine. Nikyo kimwe, twaba nitwenda kutunga ekiconco ky’amagara agatahwaho, twine kukuratira entwaza y’Ekikristaayo nari omuhanda gw’amagara. (Byak. 20:24; 1 Pet. 2:21) Kwonka Sitaane n’abarikumushagika nibenda ngu tutwaze omu muringo gw’omutaano, nibenda ngu tugumizemu ‘nitukwatanisa nabo.’ (1 Pet. 4:4) Nibatujuma ahabw’entwaza yaitu barikugira ngu entwaza eyaabo niyo nungi, ngu neebaha obugabe. Kwonka ekyo kigwire.​—2 Pet. 2:19.

6. Nooyegyera ki aha ky’okureeberaho kya Brian?

⁶ Weena orikwiruka n’abaine omwoyo gw’ensi juba naija kwetegyereza ngu omuhanda ogu arimu tigurikureeta obugabe, kureka nigutwara omu buhuuku. (Rom. 6:16) Teekateeka aha ky’okureeberaho kya Brian. Abazaire be bakamuhiga kugyendera omu muhanda gw’Ekikristaayo. Kwonka ku yaahikire omu myaka y’obushogoyo, akatandika kubangaanisa yaaba omuhanda ogwo nigwija kumuhitsya aha kushemererwa. Brian akacwamu kugyenda n’abarikugyendera aha mitindo ya Sitaane. Naagira ati: “Nkaba ntarikumanya ngu obugabe obu naabaire ninsherura bukaba nibumpindura omuhuuku w’emize mibi. Bwanyima, nkatandika kukoresa kubi emibazi, amaarwa n’okwejumba omu bikorwa by’obuhwanshoni. Kumara emyaka mingi, nkongyera kukoresa emibazi y’akabi, kandi yaampindura omuhuuku waayo. . . . Nkatandika kuguza emibazi egyo kwebaisaho.” Bwanyima, Brian akacwamu kugyendera aha mitindo ya Yehova. Akahindura emihanda ye kandi yaabatizibwa omu 2001. Hati buzima ashemereirwe ahabw’okukuratira omuhanda gw’Ekikristaayo. *

7. Kurugiirira ahari Matayo 7:13, 14, ni mihanda ki ebiri ei turikubaasa kutooranaho gumwe?

⁷ Ka ni kikuru kucwamu kugyendera omu muhanda oguhikire! Sitaane naayenda ngu twena turekyere aho kwirukira omu kahanda akagumire ‘arikutaasya omu magara,’ reero tuze omu muhanda omuhango ogurikutoorwamu abantu baingi omu nsi egi. Omuhanda ogu gurimu abantu baingi kandi gworobi kugyenderamu. Kwonka niguhitsya “omu kucwekyerera.” (Shoma Matayo 7:13, 14.) Kubaasa kuguma omu muhanda oguhikire kandi  tutarikuhugibwa, twine kwesiga Yehova kandi tukamuhurikiza.

8. Omwiruki ku arikuteerwa entsibo akagwa, naakora ki?

⁸ Abairuki omu mpaka z’okwiruka mahiro nyingi nibaguma nibareeba haihi omu maisho gaabo kugira ngu batateerwa entsibo. Kwonka nabwo, omuntu naabaasa kutomera mugyenzi we atakigyendereire, nari naabaasa kuribata omu kiina. Ku arikugwa ahansi, naimuka ahonaaho agumizamu nairuka. Tarikuta omutima aha kyamureetera kugwa, beitu kuhika aha kimariro, akatunga ekihembo ekimureeteire kuza omu mpaka.

9. Twateera entsibo, tushemereire kukora ki?

⁹ Omu kwiruka kwaitu, nitubaasa kugwa emirundi mingi, turikukora enshobe omu bi turikugamba n’ebi turikukora. Nari bagyenzi baitu nibabaasa kukora enshobe zitugwise kubi. Eki kyabaho titwine kutangaara. Twena tituhikiriire, kandi twena nitwirukira omu kahanda akafunzire. N’ahabw’ekyo obumwe n’obumwe nitwija “kutomerana.” Paulo akagira ngu obumwe nitugira eki ‘twafa na mugyenzi waitu.’ (Kol. 3:13) Kwonka omu mwanya gw’okuta omutima aha kitureeteire kuteerwa entsibo, ka tugute aha kihembo eki tworekyeire. Twateerwa entsibo, ahonaaho ka twimukye tugumizemu nitwiruka! Kwonka twagira ekiniga nari tukagira enziika tukanga kwimuka, titurikwija kuhika aha kimariro, reero tukaheebwa ekiconco. Okwongyera ahari ekyo, nitubaasa kukiingira abandi abarikuteeraho kwirukira omu kahanda akafunzire akarikutaasya omu magara.

10. Nitubaasa kwetantara tuta ‘kuteeza abandi entsibo’?

¹⁰ Omuringo ogundi oku turikubaasa kwetantara kuteeza abairuki bagyenzi baitu “entsibo,” n’okwikiriza ebyabo ebi barikukunda kyaba nikibaasika, omu mwanya gw’okuremera aha bugabe bwaitu. (Rom. 14:13, 19-21; 1 Kor. 8:9, 13) Eki nikyo kirikututaanisa aha bairuki b’empaka eza butoosha. Ahakuba bo nibahayahayana na bagyenzi baabo, kandi buri omwe naaba naayeyendeza ekiconco wenka. Buri omwe naaba naayeteekateekaho oku araasingure ekiconco. N’ahabw’ekyo omuntu naabaasa kutsindika mugyenzi we kugira ngu  amuze omu maisho. Kwonka itwe, tituri omu mpaka z’okuhayahayana. (Gal. 5:26; 6:4) Ekigyendererwa kyaitu n’okureeba ngu twahwera baingi kuhika aha muheru kubaasa kutunga ekihembo ky’amagara naitwe. Niyo nshonga ahabw’enki nitukuratira obuhabuzi bwa Paulo turikwetantara kweta aha byaitu twenka, ‘kureka turikweta n’aha by’abandi.’​—Fil. 2:4.

11. Omwiruki naaguma ataire omutima ahari ki, kandi ahabw’enki?

¹¹ Kandi abairuki oyihireho okureeba haihi omu maisho gaabo, nibaguma bataire omutima aha kimariro. N’obu baraabe batarikubaasa kureeba n’amaisho gaabo ahu akaguha k’ekimariro kari, nibabaasa kuteera akashushani barikukarabaho kandi bakaheebwa ekiconco. Eki nikibahiga kwiruka baine ekigyendererwa ky’okutunga ekiconco.

12. Yehova atuhaire buhame ki omu muringo gw’embabazi?

¹² Omu mpaka ezi turimu, Yehova omu muringo gw’embabazi atuhaire obuhame ngu boona abarahikye aha muheru naija kubaha ekihembo, nigo magara agatahwaho yaaba omu iguru nari paradiso omu nsi. Ebyahandiikirwe nibishoboorora gye ebiconco ebi, kugira ngu tubaase kuteera akashushani kureeba embeera nungi eziraabe ziriho. Twaguma twine amatsiko aga omu biteekateeko byaitu n’omu mitima yaitu, titurikwija kwikiriza ekintu kyona kututeeza entsibo ebiro byona.

13. Niki eki turikukiza abairuki aba butoosha?

¹³ Abairuki b’omu mizaano y’Abagriika bakaba baine kusingura embeera ezigumire ezirikutwariramu oburuhe n’obusaasi. Kwonka bakaba baine kwesiga okutendekwa kwabo n’amaani gaabo gonka. Turi nk’abairuki abo ahabw’okugira ngu nitutunga okutendekwa omu mpaka zaitu. Kwonka twine eki turikukiza abairuki abo. Nitubaasa kutunga amaani kuruga ahari Yehova obukomooko bw’amaani agataine bugarukiro. Twayesiga Yehova, naaturaganisa kututendeka n’okutuha amaani!​—1 Pet. 5:10.

14. Ebiri omu 2 Abakorinso 12:9, 10 nibituhwera bita kusingura emirabanamu?

¹⁴ Entumwa Paulo akaba aine kusingura emirabanamu mingi. Okwongyera aha kujumwa n’okuhiiganisibwa, obumwe akaba naahurira ataine maani, kandi akaba aine kwemera eki yaayetsire “eihwa omu mubiri.” (2 Kor. 12:7) Omu mwanya gw’okwikiriza oburemeezi obwo kumureetera kuhanika akabirugaho, akakoresa omugisha ogwo kwesiga Yehova. (Shoma 2 Abakorinso 12:9, 10.) Ahabw’okugira ngu Paulo akaba aine emiteekateekyere egi, Yehova akamuhwera omu kugyezibwa kwe kwona.

15. Twatooreza entumwa Paulo, nitwija kugasirwa tuta?

¹⁵ Naitwe nitubaasa kujumwa nari kuhiiganisibwa ahabw’okwikiriza kwaitu. Nitubaasa kuba twine amagara mabi nari oburuhe. Kwonka twatooreza Paulo, buri mbeera egumire ei twine nigubaasa kuba omugisha gw’okureeba obushagiki bwa Yehova.

16. Noobaasa kukora ki n’obu waakuba oine amagara mabi?

¹⁶ Ori aha kitanda nari omu kagaari? Oine obusaasi omu maju nari torikuhweza gye? Ku kiraabe kiri kityo, mbwenu shi noobaasa kwiruka n’abaine amagara marungi kandi abato? Buzima noobaasa! Baingi abaine emyaka ya bukuru n’omunyangararo nibagumizamu nibairuka omu ruguuto rw’amagara. Tibarikubaasa kukora eki ahabw’amaani gaabo bonka. Kureka, Yehova niwe arikubahwera arikubaha amaani kurabira omu enteerane ezi barikuhurikiza aha simu nari barikureeba vidiyo z’enteerane. Kandi nibeejumba omu murimo gw’okuhindura abantu abeegi barikubuurira abashaho, abajanjabi, n’abanyabuzaare.

17. Yehova aine miteekateekyere ki aha baine amagara mabi?

 ¹⁷ Otakaahwamu amaani orikuteekateeka ngu ahabw’okugira amagara mabi toine maani g’okwiruka omu mpaka z’okutunga amagara. Yehova naakukunda ahabw’okumwikiririzamu n’ahabw’okugumisiriza kwawe. Hati nooyetenga obuhwezi bwe kukira obundi bwona, kandi tarikwija kukutsigaho. (Zab. 9:10) Kureka, Yehova naija kwongyera kukwirira haihi. Yetegyereze ebi munyaanyazi-itwe oine amagara mabi arikugamba: “Ahabw’okugira ngu amagara gangye nigoongyera kuba mabi, ninshanga ngu emigisha y’okubagana n’abandi amazima neeguma neetuuba. Kwonka nnimanya ngu Yehova naashemererwa kureeba kakye aku ndikukora, kandi eki naanye nikinshemeza.” Ku oraagire enaku, ijuka ngu tori wenka. Teekateeka aha ky’okureeberaho kya Paulo, kandi ijuka ebigambo bye ebirikuhuumuriza ebi: ‘Ninshemererwa ahabw’obweremwa, ahakuba ku ndikuba omweremwa, nibwo ndikugira amaani.’​—2 Kor. 12:10.

18. Abamwe baine mbeera ki egumire munonga?

¹⁸ Bamwe abarikwirukira omu ruguuto rw’amagara nibahikwaho embeera egumire endiijo. Nibabaasa kuba baine embeera zaabo ezigumire ezi abandi batarikubaasa kureeba nari kwetegyereza. Nk’eky’okureeberaho, nibabaasa kuba baine amaganya nari okwerarikirira kw’amaani. Ahabw’enki embeera z’abaheereza ba Yehova aba zirikuba zigumire munonga? Ahakuba omuntu yaaba ahendekire omukono nari ari omu kagaari, buri omwe naabaasa kureeba oburemeezi bwe, kandi ekyo nikibaasa kumuhiga kuhwera. Kwonka abaine obusaasi omu nyehurira nari abarikuteeganisibwa omu biteekateeko nibabaasa kuba bataine kamanyiso koona akarikureebwa butunu. Amaganya gaabo nigaba gataine ntaaniso n’ag’omuntu ohendekire okuguru, kwonka abantu nibabaasa kutabafaho munonga nk’oku barikufayo ahari abo abaine oburemeezi oburikureebwa butunu.

19. Nitubaasa kwegyera ki ahari Mefiboshesi?

¹⁹ Waaba oine oburemeezi kandi orikuteekateeka ngu abandi tibarikukwetegyereza, eky’okureeberaho kya Mefiboshesi nikibaasa kukugumya. (2 Sam. 4:4) Akaba amugire kandi omugabe Daudi akamucwera orubanja atabandize kumanya ekihikire. Mefiboshesi tiwe yaayereeteire oburemeezi obwamuhikireho. Kwonka, taraikiriize ekiniga kumusingura, kureka akata omutima aha bintu birungi ebyamuhikireho. Akaba naijuka embabazi ezi Daudi yaabaire yaamugiriire enyima. (2 Sam. 9:6-10) N’ahabw’ekyo Daudi ku yaamucwereire orubanja, Mefibosheshi akacwamu kureeba ekishushani kyona. Taragiriire Daudi ekiniga ahabw’enshobe ezi yaakozire. Kandi taracwereire Yehova orubanja ahabw’enshobe za Daudi.  Mefiboshesi akata omutima aha ki yaabaire naabaasa kukora kushagika omugabe otoorainwe Yehova. (2 Sam. 16:1-4; 19:24-30) Eky’okureeberaho kirungi kya Mefiboshesi Yehova akakihandiikisa omu Kigambo kye kugira ngu tubaase kumwegyeraho.​—Rom. 15:4.

20. Okwerarikirira nikukwata kuta aha bandi, kwonka nibabaasa kugira buhame ki?

²⁰ Ahabw’okwerarikirira munonga, ab’eishe-emwe na banyaanyazi-itwe abamwe nibatiina kuba omu bandi. Nikibaasa kubagumira kuba n’abantu baingi abeerundaniire hamwe, kwonka nibagumizamu kuza omu nteerane z’ekibiina, n’empango ez’ekiro kimwe nari bishatu. Tikirikuboorobera kugamba n’abu batarikumanya, kwonka nibateeraho kugaaniira n’abantu omu kubuurira. Ku oraabe ori omu mbeera nk’egi, gira obuhame ngu tori wenka. Hariho baingi abari nkaiwe. Ijuka ngu Yehova naasiima okuteeraho kwawe kumuheereza n’omutima gwawe gwona. Ahabw’okugira ngu nookigumizamu kumuheereza n’obuhame ngu naakuha emigisha, kandi naakuha amaani. * (Fil. 4:6, 7; 1 Pet. 5:7) Waaba nooheereza Yehova n’obu oraabe oine obumuga nari amaganya, gira obuhame ngu Yehova naakusiima.

21. Ahabw’obuhwezi bwa Yehova, twena nitwija kubaasa kukora ki?

²¹ Nikishemeza kumanya ngu hariho entaaniso aha gati y’empaka z’okwiruka eza butoosha n’ezi Paulo yaagambireho. Omu mpaka z’okwiruka eza butoosha omu bwire bwa ira, omwe wenka niwe yaabaire naasinga akatwara ekihembo. Okutashushana n’empaka ezo, buri omwe orikugumisiriza omu buheereza bw’Ekikristaayo naija kutunga ekihembo ky’amagara agatahwaho. (Yoh. 3:16) Boona omu mpaka z’okwiruka eza butoosha, abairuki boona baine kuba baine amagara marungi n’amaani, kitari ekyo tibarikubaasa kusinga omu mpaka ezo. Okutaana n’ekyo, baingi ahariitwe twine amagara mabi, kwonka tugumisiriize. (2 Kor. 4:16) Turikuhwerwa Yehova, twena nitwija kwiruka tuhikye aha muheru!