Obundi ngaaha. Omuregi taragambiire Haawa ngu ku araarye aha muti ogu Ruhanga yaabazibiire kuryaho naija kushusha nk’owaafa, reero hagire ekyamurugamu ekitarikureebwa (eki abamwe hati barikweta omwoyo ogutarikufa) kigume kihuriire ahandi. Sitaane arikugamba kurabira omu njoka, akagira ngu Haawa yaarya aha kijuma ky’omuti ogwo, buzima ‘tarikwija kufa’ na kakye. Sitaane akaba naamanyisa ngu naija kuguma ahuriire, aine amagara marungi omu nsi, atarikutegyekwa Ruhanga.​—Kut. 2:17; 3:3-5.

Mbwenu shi enyikiriza y’omwoyo ogutarikufa ku eraabe etaratandikiire omuri Edeni, abantu bakatandika ryari kugimanya? Titurikubaasa kuhamya. Kwonka nitumanya ngu okuramya kw’ebishuba kwona kukacwekyerezibwa omu bwire bw’Omwegyemure gwa Noa. Tihaine diini y’ebishuba eyaahonokireho omu Mwegyemure ogwo, ahakuba Noa n’eka ye abaheereza abeesigwa, nibo bonka abaahonokireho.

N’ahabw’ekyo, enyegyesa egwire ey’omwoyo ogutarikufa, eshemereire kuba yaatandikire bwanyima y’Omwegyemure. Obu Ruhanga yaahindura endimi aha munaara gwa Babeeli reero abantu bakatandika ‘kubuga ensi yoona,’ nooshanga obwo nibwo baajanjaaza enyikiriza y’omwoyo ogutarikufa. (Kub. 11:8, 9) Yaaba enyegyesa egyo ekatandika ryari, nituhamya ngu “ishe w’ebishuba” Sitaane Omuregi, akaba naagishagika, kandi akashemererwa ku yaajanjaire buri hamwe.​—Yoh. 8:44.