1-2. Ahabw’enki Abakristaayo boona baine kumanya ebikwatiraine n’abaraazoorwe kuza omu iguru?

BAINGI aha baheereza ba Yehova baine amatsiko g’okutuura omu nsi ebiro byona. Kwonka, Abakristaayo entoore abakiri omu nsi baine amatsiko g’okuzoorwa bakaza omu iguru. Abakristaayo aba bainiire ekihika ebiro byabo eby’omumaisho. Kandi shi abo abaine amatsiko g’okutuura omu nsi? Nk’oku turikuza kureeba, abaraazoorwe kuza omu iguru nibaija kubaasisa abaraatuure omu nsi ebiro byona kutunga emigisha mingi. N’ahabw’ekyo, yaaba amatsiko gaitu n’ag’okuza omu iguru nari ag’okutuura omu nsi, tushemereire kugira ekihika ky’okumanya ebirikukwata aha baraazoorwe kuza omu iguru.

² Ruhanga akahwera bamwe aha beegi ba Yesu omu kyasha ky’okubanza kuhandiika aha matsiko g’okuza omu iguru. Entumwa Yohaana akashoboorora ati: ‘Hati turi abaana ba Ruhanga, oku turaije kuba, tikukamanyirwe, kwonka nitumanya, ngu ku araashuuruurwe, nitwija kushushana nawe.’ (1 Yoh. 3:2) N’ahabw’ekyo Abakristaayo entoore nibaba batarikumanya oku embeera ziraabe nizishusha omu iguru obu baraabe baine emibiri y’omwoyo. Kwonka, omu muringo gwa butunu nibaija kureeba Yehova baatunga omugabo gwabo. Baibuli terikworeka obushonshorekye bwona oburikukwata aha kuzooka kuza omu iguru, kwonka entumwa Paulo akagamba bimwe ebirikukukwataho. Abashukirweho omwoyo gurikwera nibaija kuba na Kristo obu araabe naamaraho “obutegyeki bwona n’obushoboorozi bwona n’amaani goona.” Eki nikitwariramu  ‘omuzigu orikuhererukayo, rufu.’ Aha muheru, Yesu n’abu araategyekye nabo nibaija kweta ahansi y’obushoboorozi bwa Yehova hamwe n’ebintu byona. (1 Kor. 15:24-28) Obwo ka nibwija kuba obwire bukuru! *

3. Nk’oku kirikworekwa omu 1 Abakorinso 15:30-32, Paulo okwikiririza omu kuzooka kikamuhwera kukora ki?

³ Paulo okwikiririza omu kuzooka kukamuhwera kwemera okugyezibwa kw’amaani. (Shoma 1 Abakorinso 15:30-32.) Akagambira Abakorinso ati: ‘Buri izooba nimba ndi ow’okufa.’ Kandi Paulo akahandiika ati: ‘Nkarwana n’enyamaishwa omuri Efeso.’ Obundi akaba naagamba aha kurwana kwe n’enyamaishwa zenyini omu mazaaniro omuri Efeso. (2 Kor. 1:8; 4:10; 11:23) Nari naabaasa kuba yaabaire naamanyisa Abayudaaya abakambwe n’abandi abaabaire bari ‘nk’enyamaishwa.’ (Byak. 19:26-34; 1 Kor. 16:9) Kyona eki kyabaire kiri, Paulo akahikwaho akabi k’amaani. Kwonka nabwo akaguma aine amatsiko aha biro by’omumaisho.​—2 Kor. 4:16-18.

4. Amatsiko g’okuzooka gareeteire gata Abakristaayo kuhama obunaku obu? (Reeba ekishushani ekiri aha kipampagare.)

⁴ Turi omu biro by’akabi kaingi. Bamwe aha b’eishe-emwe bagyenzi baitu batwire nibabonabonesibwa abarikuhenda ebiragiro. Abamwe nibatuura omu bicweka ebirimu entaro ei barikuba batarikuhamya yaaba baraatungye oburinzi. Abamwe nibaheereza Yehova barikwoga amagara gaabo nari obugabe bwabo omu mahanga ahu omurimo gwaitu gw’okubuurira gurikuzibirwa nari ahu gwemereziibwe. Kwonka nabwo, ab’eishe-emwe aba boona na banyaanyazi-itwe nibagumisiriza omu kuramya Yehova, batuteeraho eby’okureeberaho. Nibahurira baine oburinzi ahabw’okumanya ngu n’obu baakufeerwa amagara gaabo hati, Yehova abatebeekanisiize ekirikukirayo oburungi omu biro by’omumaisho.

5. Ni miteekateekyere ki egwire erikubaasa kutuubya okwikiriza kwaitu omu kuzooka?

⁵ Paulo akarabura ab’eishe-emwe aha miteekateekyere y’akabi ei abamwe baabaire baine: ‘Abafu ku baarabe bataraazooke, reka tweriire, twenywere, ahakuba nyencakare turi ab’okufa.’ Nangwa emiteekateekyere nk’egyo ekaba eriho ira na Paulo atakabaireho. Naabaasa kuba yaabaire naajuriza Isaaya 22:13, aharikugamba aha miteekateekyere y’Abaisraeli. Omu mwanya gw’okwirira haihi na Ruhanga, bakeejumbira kimwe omu by’okweshemeza. Abaisraeli abo bakaba baine emiteekateekyere erikugira ngu “turiho hati, kwonka nyenkyakare nitwegyendera,” ei baingi baine ebiro ebi. Kwonka Baibuli neeyoreka ebibi ebyarugire omu miteekateekyere egwire ey’eihanga ry’Abaisraeli.​—2 Bus. 36:15-20.

6. Amatsiko g’okuzooka gaine kutuhwera gata omu kutoorana abanywani?

⁶ Buzima, ahabw’okugira ngu Yehova naija kuzoora abafu kishemereire kutuhwera kwegyendesereza omu kutoorana abanywani. Ab’eishe-emwe omuri Korinso bakaba baine kwegyendesereza kutanywana abaabaire nibahakanisa okuzooka. Eri n’eishomo ahariitwe obunaku obu: Tihariho karungi akarikuruga omu kunywana abarikuteekateeka ngu turi ab’okubaho akaire kakye. Okuba n’abantu nk’abo nikibaasa kushiisha emiteekateekyere n’emicwe mirungi y’Omukristaayo. Nangwa nikibaasa kureetera omuntu kukora ebi Ruhanga arikwanga. N’ahabw’ekyo, Paulo akarabura ati: ‘[Muhuguukye], mube abahikiriire, murekye [kuguma] nimushiisha.’​—1 Kor. 15:33, 34.

7. Abamwe nibabaasa kuba baabuurize kibuuzo ki aha bikwatiraine n’okuzooka nk’oku kirikworekwa omu 1 Abakorinso 15:35-38?

⁷ Shoma 1 Abakorinso 15:35-38. Omuntu owaabaire naayenda kureetera abandi kubangaanisa aha kuzooka, akaba naabaasa kubuuza ati: ‘Abafu nibaija kuzooka bata?’ Nikiba kiri kirungi kuteekateeka aha ku Paulo yaagarukiremu, ahakuba abantu baingi obunaku obu baine emiteekateekyere eyaabo aha bikwatiraine n’ekirikubaho omuntu yaafa. Kwonka shi Baibuli neeyegyesa ki?

8. Ni ky’okureeberaho ki ekirikubaasa kutuhwera kwetegyereza okuzooka kw’abaraaze omu iguru?

⁸ Omuntu ku arikufa, omubiri gwe nigujunda guhwerera. Kwonka Ogwo owaahangire ensi n’eiguru kuruga ahari busha naabaasa kuzoora omuntu, omuhe n’omubiri oguhikire. (Kut. 1:1; 2:7) Paulo akakoresa eky’okureeberaho kworeka ngu Ruhanga tikirikumwetengyesa kugaruraho omubiri nigwo gumwe. Teekateeka aha ‘njuma’ nari embibo y’ekimera. Enjuma y’ekimera ku erikubyarwa omu itaka neemera erugamu ekimera kisya. Ekimera ekirikuruga omu njuma egyo nikiba nikitaaniira kimwe n’enjuma nkye erikuba ebyairwe. Paulo akakoresa okugyeragyeranisa oku kworeka ngu Omuhangi waitu naabaasa kuha abantu ‘omubiri, nk’oku arikukunda.’

9. Aha bikwatiraine n’emibiri, 1 Abakorinso 15:39-41 nihooreka ntaaniso ki?

⁹ Shoma 1 Abakorinso 15:39-41. Paulo akeetegyereza ngu ebihangirwe nibitaana. Nk’eky’okureeberaho, emibiri y’ebihangirwe nk’enyamaishwa, ebinyonyi, n’eby’enyanja neetaana. Akagira ngu twareeba ahaiguru, nitureeba ngu eizooba niritaana n’okwezi. Kandi akeetegyereza ngu ‘enyonyoozi nazo nizikizakizana ekitiinisa.’ N’amazima, n’obu twakuba tutarikubaasa kukireeba n’amaisho gaitu, hariho enyonyoozi ezi aba saayansi barikweta enyonyoozi empango ezirikutukura, ezirikwera engufu, n’eza kinekye, nk’eizooba ryaitu. Kandi Paulo akagira ngu hariho emibiri  ey’omu iguru n’ey’omu nsi. Mu muringo ki? Omu nsi, twine emibiri y’abantu, kwonka omu iguru hariyo emibiri ey’omwoyo, nk’ei baamaraika baine.

10. Okutaana kw’emibiri kwine kakwate ki n’okuzooka?

¹⁰ Yetegyereze eki Paulo yaagambire ati: ‘N’okuzooka kw’abafu nikwo kuri. Omubiri nigubibwa guri ogw’okujunda, guzoorwa guri ogw’okutajunda.’ Amazima gari ngu, omuntu yaafa, omubiri nigujunda gugaruka guba omucuucu. (Kut. 3:19) Mbwenu shi nikibaasika kita omubiri ‘kuzoorwa guri ogw’okutajunda’? Paulo akaba atarikumanyisa abantu abarikuzoorwa kutuura omu nsi, nk’abo abaazoirwe Eliya, Elisa, na Yesu. Paulo akaba naamanyisa omuntu orikuzooka aine omubiri ogw’okuza omu iguru, nari shi omubiri “ogw’omwoyo.”​—1 Kor. 15:42-44.

11-12. Yesu akahinduka ata obu yaazooka, kandi entoore bakaba nibaija kuhinduka bata nka Yesu?

¹¹ Obu Yesu yaabaire naatuura omu nsi, akaba aine omubiri gw’obuntu. Kwonka ku yaazookire akahinduka ‘omwoyo ogurikureeta amagara,’ reero yaagaruka omu iguru. Omu muringo nigwo gumwe, Abakristaayo abashukirweho omwoyo gurikwera bakaazookire baine omubiri gw’omwoyo. Paulo akashoboorora ati: ‘Nk’oku twashushaine n’ow’omu itaka, nikwo turikwija kushushana n’ow’omu iguru.’​—1 Kor. 15:45-49.

¹² Paulo akaba ariyo naahika aha mbugiro y’okushoboorora aha kuzooka. Ni kikuru kumanya ngu Yesu tarazookire aine omubiri gw’abantu. Paulo akagamba butunu ati: ‘Omubiri n’eshagama tibirikubaasa kuhungura Obukama bwa Ruhanga’ omu iguru. (1 Kor. 15:50) Entumwa bakaba batarikwija kuzoorwa baine emibiri erikujunda, ey’enyama n’eshagama. Mbwenu shi bakaba nibaija kuzoorwa ryari? Paulo akooreka ngu okuzooka oku kukaba nikwija kubaho omu biro by’omumaisho, bakaba batarikwija kuzoorwa ahonaaho baaheza kufa. Obu Paulo yaahandiika 1 Abakorinso, abeegi abamwe bakaba baaherize ‘kugwejegyerera’ omu kufa, nk’entumwa Yakobo. (Byak. 12:1, 2) Kandi entumwa ezindi  nabo bakaba nibaija ‘kugwejegyerera’ omu kufa.​—1 Kor. 15:6.

13. Ni bintu ki ebyabaire nibiija kubaho omu bwire bw’okubaho kwa Yesu?

¹³ Yesu na Paulo bombi bakagamba aha bwire bw’omutaano omu byafaayo obw’okubaho kwa Kristo. Okubaho kwe kukaamanyiirwe aha ntaro, emitsitsa, endwara nyamwita, n’ebindi bigwererezi. Tureebire obunabi bwa Baibuli obu nibuhikiirira kuruga 1914. Hakaabaire hariho ekindi kintu kikuru eky’akamanyiso aka. Yesu akagira ngu amakuru marungi g’Obukama bwa Ruhanga gakaba nigaija kubuurirwa omu nsi yoona okuba obujurizi aha mahanga goona, reero obwo nibwo emperu yaakuhikire. (Mat. 24:3, 7-14) Paulo akooreka ngu omu bwire bw’okubaho “kwa Mukama” hakaabaireho n’okuzooka kw’Abakristaayo abashukirweho omwoyo gurikwera ‘abaagwejegyereire’ omu kufa.​—1 Tes. 4:14-16; 1 Kor. 15:23.

14. Niki ekirikuhika aha bashukirweho omwoyo gurikwera abarikufa omu bwire bw’okubaho kwa Kristo?

¹⁴ Abashukirweho omwoyo gurikwera abarikufa hati omu nsi, ahonaaho nibazoorwa baza omu iguru. Eki nikihamibwa ebigambo bya Paulo ebiri omu 1 Abakorinso 15:51, 52: ‘Twena titurikwija kugwejegyerera [omu kufa], kwonka twena nitwija kuhindurwa, omu kaanya kakye, nk’ak’okuhumbya eriisho, aha nzamba ey’aha mperu.’ Ebigambo bya Paulo ebi biriyo nibihikiirira hati! Beene ishe Yesu aba ku barikuzoorwa, nibatunga okushemererwa omu bwijwire, ahakuba nibaija kuguma na “Mukama ebiro byona.”​—1 Tes. 4:17.

15. Abo abarikuhindurwa omu kaanya kakye “nk’ak’okuhumbya eriisho” nibaija kukora murimo ki?

¹⁵ Baibuli neetugambira omurimo ogu abo abarikuhindurwa omu kaanya kakye “nk’ak’okuhumbya eriisho” baraakore omu iguru.  Yesu naabagira ati: ‘Orikusingura, akaguma naakora emirimo yangye okuhitsya aha muheru, ninyija kumuha obutegyeki aha mahanga goona, kandi naija kubategyeka n’enkoni y’ekyoma, nk’oku omuntu arikwatagura enyabya z’eibumba, nkaanye oku naahairwe Tata obutegyeki.’ (Kush. 2:26, 27) Nibaija kukuratira Omuduumizi waabo omu murimo gw’okutegyeka nari ogw’okuriisa amahanga barikukoresa enkoni y’ekyoma.​—Kush. 19:11-15.

16. Abantu nyamwingi nibaija kusingura bata rufu?

¹⁶ Buzima, entoore nibaija kusingura rufu. (1 Kor. 15:54-57) Okuzooka kwabo nikwija kubabaasisa kwejumba omu businguzi bw’amaani obw’okwihaho ebintu bibi omu rutaro oruri haihi kubaho orwa Haramagedoni. Abakristaayo abandi nyamwingi abashaija n’abakazi nibaija kuruga “omu kubonabona kwingi” baze omu nsi ensya. (Kush. 7:14) Abo abaraahonokeho bakaza omu nsi ensya nibaija kuba baakareebi b’okuzooka kw’obuhumbi bw’abantu abaafiire ira, kandi obwo n’obusinguzi obundi ahari rufu. Teekateeka aha kushemererwa oku turaagire ku haraabeho okuzooka! (Byak. 24:15) Kandi abo abaraayorekye ngu bahamiire ahari Yehova nibaija n’okusingura okufa oku twahungwire ahari Adamu. Nibaija kubaasa kuguma bahuriire ebiro byona.

17. Obuhabuzi oburi omu 1 Abakorinso 15:58, nibutuhiga kukora ki hati?

¹⁷ Buri Mukristaayo ohuriire hati aine kuba naashemererwa ahabw’ebigambo bya Paulo ebirikuhuumuriza ebi yaahandiikiire Abakorinso ebirikukwata aha kuzooka. Twine bingi ebirikutureetera kworeka ngu nitwikiriza okuhiga kwa Paulo okw’okwejumbira kimwe omu ‘murimo gwa Mukama’ hati. (Shoma 1 Abakorinso 15:58.) Twahamira aha murimo ogwo kandi tukagwejumbiramu kimwe, nitwija kugira ekihika ky’okutunga ebiro birungi by’omumaisho ebijwire okushemererwa. Obwire obwo nibwija kuba buri burungi munonga kukira ekintu kyona eki turikubaasa kuteekateekaho. Eki buzima nikiija kuhamya ngu okukora kwaitu n’amaani ti kwa busha omuri Mukama.