1. Ni nshonga ki emwe eyaareeteire Yesu kugyeragyeranisa abakuratsi be n’entaama?

YESU akagyeragyeranisa omukago gwe n’abakuratsi be n’omukago murungi ogu omuriisa aine n’entaama ze. (Yoh. 10:14) Okugyeragyeranisa oku kuhikire. Entaama nizimanya omuriisa waazo kandi nizihurira eiraka rye. Eki omurambuzi omwe akakyereebera gye n’amaisho ge. Akagira ati: “Tukaba nitwenda kukwata vidiyo turi n’entaama kandi tukateeraho kuhika haihi nazo. Kwonka tiziratukuratiire ahakuba zikaba zitarikumanya amaraka gaitu. Kwonka omutsigazi omuriisa waazo ku yaizire, zikatandika kumukurata ataine kihango ki akozire.”

2-3. (a) Abakuratsi ba Yesu bakooreka bata ngu nibahurikiza eiraka rye? (b) Nituza kushwijuma ki omu kicweka eki n’ekirikukurataho?

² Eky’okureeberaho ky’omurambuzi ogwo nikitwijutsya ebigambo bya Yesu ebirikukwata aha ntaama ze nari abeegi be. Akagira ati: ‘Nizihurira eiraka ryangye.’ (Yoh. 10:16) Kwonka Yesu ari omu iguru. Mbwenu shi nitumuhurira tuta? Omuringo mukuru ogu turikworeka ngu nituhurira eiraka rya Mukama waitu n’okugyendera aha nyegyesa ze.—Mat. 7:24, 25.

³ Omu kicweka eki n’ekirikukurataho, nituza kushwijuma zimwe aha nyegyesa za Yesu. Nk’oku turikuza kureeba, Yesu akatwegyesa ngu, hariho ebi tushemereire kukora n’ebi tutashemereire kukora. Nituza kubanza kushwijuma ebintu bibiri ebi omuriisa waitu omurungi atarikwenda ngu tukore.

4. Kurugiirira ahari Luka 12:29, niki ekirikubaasa kutureetera ‘kwemereza emitima’?

⁴ Shoma Luka 12:29. Yesu akahiga abakuratsi be ‘kuteemereza emitima’ aha by’okwebaisaho. Nitumanya ngu obuhabuzi  bwa Yesu butoosha nibuba buri obw’obwengye kandi buhikire. Nitwenda kubugyenderaho, kwonka obumwe nitushanga kigumire kukikora. Ahabw’enki?

5. Ahabw’enki abamwe barikubaasa kwerarikirira aha by’okwebaisaho?

 ⁵ Abamwe nibabaasa kwerarikirira aha by’omubiri, ebirikutwariramu eby’okurya, emyenda, n’oburaaro. Nibabaasa kuba nibatuura omu mahanga amooro. Nikibaasa kuba nikibagumira kukora esente z’okureeberera amaka gaabo. Nari nyineeka naabaasa kuba yaafiire, reero abandi omuka baaguma bataine ntaatsya yoona. Muyego erikwetwa COVID-19 neebaasa kuba erugiiremu abamwe kufeerwa emirimo bakaburwa entaatsya. (Mub. 9:11) Ku turaabe tuhikirweho bumwe aha buremeezi obu nari obundi, nitubaasa kukuratira tuta obuhabuzi bwa Yesu obw’okureka kwerarikirira?

6. Shoboorora ekyahikire aha ntumwa Petero eizooba rimwe.

⁶ Eizooba rimwe, entumwa Petero n’entumwa ezindi bakaba bari omu bwato aha Nyanja ya Galilaaya omu bwire bw’eihunga, reero baareeba Yesu arikugyendera aha maizi. Petero akagira ati: “Mukama wangye, ku oraabe ori iwe, ndagiira, nyije aho ningyendera aha maizi.” Yesu ku yaayetsire Petero ngu ‘aije,’ Petero ‘akaruga omu bwato, yaagyendera aha maizi kushanga Yesu.’ Yetegyereze ekyakuratsireho. ‘Ku yaareebire omuyaga gwaba mwingi, akatiina. Ku yaatandikire kutobera, yaataka ati: Mukama wangye, njuna.’ Yesu akagorora omukono gwe kandi yaamujuna. Buzima, Petero akabaasa kugyendera aha maizi omu bwire bw’eihunga obu yaabaire akitaire omutima ahari Yesu. Kwonka ku yaareebire eihunga, akagira okutiina n’okubangaanisa, yaatandika kutobera.—Mat. 14:24-31.

7. Nitubaasa kwegyera ki aha ntumwa Petero?

 ⁷ Nitubaasa kwegyera aha ky’okureeberaho kya Petero. Obu Petero yaaruga omu bwato akandika kugyendera aha maizi, akaba atarikuteekateeka ngu nihaija kugira ekyamuhuzya reero atobere. Akaba naayenda kuguma aha mutwe gw’amaizi kuhitsya yaahika ahari Mukama we. Kwonka akaremwa kuguma ataire omutima aha kigyendererwa kye. Itwe, titurikubaasa kugyendera aha maizi, kwonka okwikiriza kwaitu nikubaasa kugyezibwa. Twaba tutagumire nitureeba Yehova n’ebi arikuraganisa, nitwija kutandika kutobera omu by’omwoyo. N’obu twakuhikwaho eihunga ry’akamanyiso erya muringo ki, twine kuguma tutaire omutima ahari Yehova n’okubaasa kwe kw’okutuhwera. Eki nitubaasa kukikora tuta?

8. Niki ekirikubaasa kutuhwera kuteerarikirira ekirenga aha by’omubiri?

⁸ Twayesiga Yehova, nitwija kugasirwa omu mwanya gw’okwerarikirira. Ijuka ngu Tataitwe owa rukundo Yehova, naatuha obuhame ngu naija kutureeberera omu by’omubiri twayebembeza eby’omwoyo. (Mat. 6:32, 33) Okuruga ira atwire naahikiiriza ebi arikuraganisa. (Bir. 8:4, 15, 16; Zab. 37:25) Yehova ku araabe naareeberera ebinyonyi n’ebimuri, buzima titwine kwerarikirira aha by’okurya n’ebijwaro! (Mat. 6:26-30; Fil. 4:6, 7) Rukundo erikuhiga abazaire kureeberera abaana baabo omu by’omubiri, niyo erikuhiga Tataitwe ow’omu iguru kureeberera abantu be omu by’omubiri. Eego, buzima nitubaasa kuhamya ngu Yehova naija kutureeberera!

9. Nitubaasa kwegyera ki aha byahikire aha mushaija omwe n’omukazi we?

⁹ Teekateeka aha ky’okureeberaho ekirikworeka oku Yehova arikutureeberera omu by’omubiri. Omushaija n’omukazi we abari omu buheereza obw’obutwire bakavuga emotoka yaabo kwakiira banyaanyazi-itwe abaabaire nibatuura omu nkambi y’empungi, kubatwara omu ruteerane rw’ekibiina. Ow’eishe-emwe naashoboorora ati: “Bwanyima y’oruteerane, tukeeta banyaanyazi-itwe abo owaitu kugira eki baarya, kwonka tukaijuka ngu titwine ky’okubaha.” Mbwenu shi hakabaho ki? Ow’eishe-emwe naagumizamu ati: “Ku twahikire omuka, tukashangayo ebishaho bibiri bihango by’eby’okurya biri aha muryango gwaitu. Tituramanyire owaabitsigaho. Yehova akatureeberera.” Bwanyima y’obwire, emotoka yaabo ekafa. Emotoka egyo ekaba neebahwera omu buheereza, kwonka bakaba bataine esente z’okugikanikisa. Ku baagitwaire omu garagi kumanya esente ezirikwetengyesa kugikanika, omushaija akaija reero yaabuuza ati: “Emotoka egyo n’ey’oha?” Ow’eishe-emwe akamugira ngu n’eye kandi ngu agireetsire kugikanikisa. Omushaija akagarukamu ati: “Ekyo tikiine nshonga. Omukazi wangye naayenda emotoka ey’ekika nk’eki, kandi ey’erangi egi yenyini. Nooyendamu zingahi?” Ow’eishe-emwe akahendera aine esente zirikumara kugura emotoka endiijo. Akagira ati: “Tikirikwetengyesa kubagambira oku twabaire nitwehurira aha muheru gw’eizooba eryo. Tukamanya ngu eki tikyabaho bubaho. Ogu gukaba guri omukono gwa Yehova.”

10. Zaaburi 37:5 nihatuhiga hata kuteerarikirira aha by’omubiri?

¹⁰ Twahurira omuriisa waitu omurungi kandi tukareka kwerarikirira ekirenga aha by’omubiri, nitubaasa kuhamya ngu Yehova naija kutureeberera. (Shoma Zaaburi 37:5; 1 Pet. 5:7) Teekateeka aha mbeera ezaagambwaho omu  kacweka 5. Okuhitsya na hati, Yehova naabaasa kuba atwire naakoresa omutwe gw’eka nari mukama waitu aha murimo kutuhwera kutunga eby’okwebaisaho. Omutwe  gw’eka yaaba atakibaasa kukikora nari omurimo gwahwaho, Yehova naija kutureeberera omu muringo ogundi. Eki nitubaasa kukihamya. Hati ka tureebe ekintu ekindi eki omuriisa murungi arikutugambira kureka kukora.

11. Kurugiirira ahari Matayo 7:1, 2, Yesu akagira ngu turekye kukora ki, kandi ahabw’enki eki kigumire?

¹¹ Shoma Matayo 7:1, 2. Yesu akaba naamanya ngu abantu abatahikiriire baine omuze gw’okucwera abandi orubanja. Yetegyereze eki yaagambire. Akagira ngu murekye ‘kucwa orubanja.’ Nitubaasa kuteeraho nk’oku kirikubaasika kutacwera ab’eishe-emwe bagyenzi baitu orubanja. Kwonka, twena tituhikiriire. Twashanga ngu obumwe nitucwera abandi orubanja, tushemereire kukora ki? Twine kuhurira Yesu, kandi tukore n’amaani kureka omuze ogwo.

12-13. Twateekateeka aha ku Yehova yaabaire naareeba Mugabe Daudi nikituhwera kita kureka kucwera abandi orubanja?

¹² Nitubaasa kugasirwa twateekateeka aha ky’okureeberaho kya Yehova. Naata omutima aha mitwarize mirungi y’abantu. Eki nitukireebera aha ku yaabaire naakoragana n’Omugabe Daudi, owaakozire enshobe z’amaani. Nk’eky’okureeberaho, akashambana na Batisheba, kandi yaitisa na iba. (2 Sam. 11:2-4, 14, 15, 24) N’ekyarugiremu, Daudi akeereetera obusaasi hamwe n’eka ye, otwariiremu n’abakazi be abandi. (2 Sam. 12:10, 11) Aha izooba erindi, Daudi akaremwa kwesigira kimwe Yehova, obu yaaragiira ngu eihanga rya Israeli ribarwe ataine rusa kuruga ahari Yehova. Naabaasa kuba yaakozire eki ahabw’omwetunguuro n’okwesiga obuhango bw’eihe rye. Hakarugamu ki? Abaisraeli nka 70,000 bakaitwa endwara!—2 Sam. 24:2-4, 10-15.

¹³ Ku ogire ngu okaba nootuura omuri Israeli obwire obwo, okaba noija kureeba ota Daudi? Okaba noija kuteekateeka ngu Yehova tashemereire kumusaasira? Yehova tikwo yaabaire naamureeba atyo. Akata omutima aha birungi ebi Daudi yaabaire atwire naakora n’okweteisiza kimwe kwe. N’ekyarugiremu, Yehova akasaasira Daudi ebibi ebi eby’amaani. Akaba naamanya ngu Daudi naamukunda munonga, kandi ngu naayenda kukora ekihikire. Tikirikukushemeza kureeba ngu Yehova naatureebamu ebirungi?—1 Bag. 9:4; 1 Bus. 29:10, 17.

14. Niki ekirikuhwera Abakristaayo kureka kucwera abandi orubanja?

¹⁴ Yehova ku araabe naamanya ngu turi abatahikiriire, buzima naitwe tushemereire kumanya ngu abandi tibahikiriire, kandi tubareebemu ebirungi. Butoosha kyorobi kureeba obutahikiirira bw’abandi reero tukabacwera orubanja. Kwonka, omuntu ow’eby’omwoyo, naabaasa kureeba obutahikiirira obwo, kandi agumizemu naakoragana gye n’abandi. Daimandi etaboneziibwe neebaasa kuba etarikushemeza, kwonka omuntu omunyabwengye naareeba ekirikukira aha ndeebeka yaayo ey’aha ruguru, naateekateeka aha burungi bwayo yaaheza kubonezibwa. Naitwe kushushana na Yehova na Yesu, titwine kuta omutima aha butahikiirira bw’abandi oburikureebwa butunu, beitu emitwarize yaabo mirungi ey’omunda.

15. Okuteekateeka aha mbeera z’abantu nikibaasa kutuhwera kita kutabacwera orubanja?

¹⁵ Okwongyera aha kureeba emitwarize mirungi, niki ekirikubaasa kutuhwera kureka kucwera abandi orubanja? Teeraho kuteebereza oku embeera zaabo ziri. Teekateeka  aha ky’okureeberaho eki. Eizooba rimwe aha hekalu, Yesu akareeba omukazi efaakazi omworo arikuta otunushu tubiri tw’omuhendo mukye omu kabokusi. Tarabuurize ati: “Ahabw’enki ataatamu esente nyingi?” Yesu omu mwanya gw’okuta omutima aha ki omufaakazi ogwo yaahaireyo, akata omutima aha bigyendererwa bye n’embeera ze, kandi yaamusiima ahabw’okukora eki arikubaasa.—Luk. 21:1-4.

16. Noobaasa kwegyera ki aha kyahikire ahari Veronica?

¹⁶ Nitubaasa kureeba obukuru bw’okuteekateeka aha mbeera z’abantu turikushwijuma ekyahikire ahari munyaanyazi-itwe Veronica. Omu kibiina eki yaabaire arimu hakaba harimu omukazi ori omuzaire omwe n’omutabani. Veronica naagira ati: “Nyowe nkaba nindeeba ngu tibarikwejumbira kimwe omu mirimo y’ekibiina. Ahabw’enshonga egi, nkaba mbaineho emiteekateekyere mibi. Kwonka eizooba rimwe nkabuuriraho na munyaanyazi-itwe ogwo. Akashoboorora oburemeezi obu arikurabamu ahabw’endwara y’omutabani. Akaba naakora eki arikubaasa kwereeberera hamwe n’omutabani omu by’omubiri n’omu by’omwoyo. Obumwe, ahabw’amagara mabi g’omutabani, kikaba nikimwetengyesa kuza omu ruteerane orw’ekibiina ekindi.” Veronica naahendera ati: “Nkaba ntarikumanya ngu naaraaba omu buremeezi. Hati munyaanyazi-itwe ogu niimwesiimisa munonga, kandi niimuha ekitiinisa ahabwa byona ebi arikukora kuheereza Yehova.”

17. Yakobo 2:8 nihatuhiga kukora ki, kandi nitubaasa kukikora tuta?

 ¹⁷ Nooba oine kukora ki waamanya ngu hariho ow’eishe-emwe mugyenzi waawe ou ocwereire orubanja? Nooba oine kumanya ngu twine kukunda ab’eishe-emwe. (Shoma Yakobo 2:8.) Kandi nooba oine kushaba munonga Yehova, orikumweshengyereza kukuhwera kurekyera aho kucwera abandi emanja. Noobaasa kukora ebirikuhikaana n’okushaba kwawe orikwehabura kugambaho n’omuntu ou obaire noocwera orubanja. Eki nikibaasa kukuhwera kumumanya. Noobaasa kumushaba kubuuriraho nawe nari kumwetera eky’okurya. Twateeraho kumanya gye ab’eishe-emwe, nikituhwera kutooreza Yehova na Yesu turikubareebamu ebirungi. Omu muringo ogu, nitworeka ngu nituhurira ekiragiro ky’omuriisa waitu omurungi eky’okureka kucwa emanja.

18. Nitubaasa kworeka tuta ngu nituhurira eiraka ry’omuriisa murungi?

¹⁸ Nk’oku entaama eza butoosha zirikuhurira eiraka ry’omuriisa, abakuratsi ba Yesu nibahurira eiraka rye. Twateeraho kureka kwerarikirira aha by’omubiri n’okucwera abandi orubanja, Yehova na Yesu nibaija kutuha omugisha. Yaaba turi ‘ab’obusyo obukye,’ nari ‘ab’entaama ezindi,’ ka tugumizemu nituhurira eiraka ry’omuriisa murungi kandi turikumworobera. (Luk. 12:32; Yoh. 10:11, 14, 16) Omu kicweka ekirikukurataho, nituza kureeba ebintu bibiri ebi Yesu yaagambiire abakuratsi be kukora.