Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:

Yakobo 5:11 nihatuha buhame ki, ku harikugira ngu Yehova “aine embabazi nyingi” kandi ngu naafayo?

Nitumanya ngu Yehova, omu mbabazi ze naatusaasira eby’okushiisha byaitu. Yakobo 5:11 nihatuhamiza ngu naafayo n’okutuha obuhwezi. Ni kirungi kumutooreza.—w21.01, rup. 21.

Ahabw’enki Yehova yaataireho entebeekanisa ngu abamwe babe emitwe y’abandi?

Akakikora ahabwa rukundo. Entebeekanisa egi neebaasisa eka ye ey’eby’omwoyo kugyenda gye omu busingye n’obuteeka. Buri omwe omu ka orikutwaza omu muringo ogurikuhikaana n’entebeekanisa egi naamanya ogwo oine obujunaanizibwa bw’okucwamu eky’aha muheru n’okukihikiiriza.—w21.02, rup. 3.

Ahabw’enki Abakristaayo baine kwegyendesereza omu kukoresa emiringo y’okwohererezana obutumwa?

Omuntu yaacwamu kukoresa emiringo egi, aine kwegyendesereza omu kutoorana abu araakoragane nabo. Eki kigumire eikora aha guruupu mpango y’abantu. (1 Tim. 5:13) Hariho n’akabi k’okujanjaaza amakuru agataine buhame, n’okukoresa endagiriro z’ekibiina omu by’obushuubuzi.—w21.03, rup. 31.

Ni nshonga ki ezimwe ahabw’enki Ruhanga yaarekire Yesu kubonabona n’okwitwa?

Enshonga emwe eri ngu Yesu ku yaahanikirwe aha muti, kikabaasisa Abayudaaya kucungurwa omu mukyeeno. (Gal. 3:10, 13) Eya kabiri eri ngu, Yehova akaba naatendeka Yesu kwija kukora gye omurimo gwe nk’Omunyamurwa Omukuru. Kandi eya kashatu eri ngu, Yesu okuguma ahamiire ahari Yehova kuhitsya aha kufa, kikooreka ngu abantu nibabaasa kuguma bari abeesigwa n’omu kugyezibwa kw’amaani. (Yob. 1:9-11)—w21.04, kacw. 16-17.

Noobaasa kukora ki kyaba kigumire kushanga abantu omuka omu kicweka kyanyu?

Noobaasa kuteeraho kuzayo omu bwire obundi obu barikubaasa kuba bari omuka. Noobaasa n’okuteeraho kubuurira omu myanya endiijo. Kandi noobaasa n’okukoresa emiringo endiijo, nk’okuhandiika amabaruha.—w21.05, kacw. 15-16.

Entumwa Paulo akaba naamanyisa ki kugira ngu kurabira omu ‘biragiro nkafa ahabw’ebiragiro’? (Gal. 2:19)

Ebiragiro bikaba nibyoreka obutahikiirira bw’abantu, kandi bikahitsya Abaisraeli ahari Kristo. (Gal. 3:19, 24) Eki kikareetera Paulo kwikiriza Kristo. Paulo omu kukora atyo, ‘akafa ahabw’ebiragiro,’ akaba atakiri hansi yaabyo.—w21.06, rup. 31.

Yehova atuteeraireho ata eky’okureeberaho omu kugumisiriza?

Yehova agumisiriize ahabw’eiziina rye kujumwa, okuhakanisa obushoboorozi bwe bw’okutegyeka, obugomi bwa bamwe aha baana be, Sitaane okuguma naamubeiherera, okubonabona kw’abaheereza be, okufeerwa banywani be, okwitsa omwaga abantu, n’okushiisha ebi yaahangire.—w21.07, kacw. 9-12.

Yosefu akataho ky’okureeberaho ki kirungi eky’okugumisiriza?

Akagumisiriza okutwarizibwa kubi beene-ishe. Eki kikamurugiramu okubeihererwa n’okukomerwa omuri Misri kumara emyaka.—w21.08, rup. 12.

Hagai 2:6-9, 20-22 nihagamba aha kutengyetsa kwa muringo ki?

Amahanga tigarikwikiriza omurimo gw’okubuurira amakuru marungi g’Obukama, kwonka abantu baingi baikiriize amazima. Juba amahanga nigaija kutengyetsibwa omurundi ogw’aha muheru gaaba nigacwekyerezibwa.—w21.09, kacw. 15-19.

Ahabw’enki tutashemereire kuhanika omu kuhikiiriza obuheereza bwaitu?

Yehova naareeba okuteeraho kwaitu, kandi naatusiima. Twaba tutaruhire nari tutahanikire, nitwija kutunga amagara agatahwaho.—w21.10, kacw. 25-26.

Abaleevi eshuura 19 neebaasa kutuhwera eta kugyendera aha buhabuzi obu: ‘Mube abarikwera omu micwe yaanyu yoona’? (1 Pet. 1:15)

Ebigambo ebi nibibaasa kuba byajuriziibwe kuruga omu Abaleevi 19:2. Abaleevi eshuura 19 neetuha eby’okureeberaho bingi oku turikubaasa kugyendera ahari 1 Petero 1:15 omu mbeera zaitu eza butoosha.—w21.12, kacw. 3-4.