Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:

Yehova naatuteeraho ky’okureeberaho ki aha ku twine kutwariza abakazi?

Tarikushoroora abakazi kandi tarikusiima abashaija kukira abakazi. Ruhanga naahurikiza abakazi, naafayo aha nyehurira zaabo n’ebirikubeerarikiriza. Kandi naabeesiga kuhikiiriza omurimo gwe.—w24.01, rup. 15-16.

Nitubaasa kugyendera tuta aha Abaefeso 5:​7, aharikugira hati: “Mutarikwatanisa nabo”?

Entumwa Paulo akaba naaturabura aha nshonga y’okutakwatanisa n’abantu abarikutureetera kugumirwa kuhamira aha mitindo ya Yehova. Abanywani nk’abo abatashemeire nibatwariramu abu turikumara nabo obwire, n’abu turikugamba nabo aha mikura y’empurizana.—w24.03, rup. 22-23.

Ni bitebyo ki ebitahikire ebi twine kwerinda?

Twine kwerinda ebitebyo ebitaine buhame ebirikuruga aha bu turikutwara nka banywani baitu, obutumwa obu tutashabire oburikuruga aha bantu abu tutarikumanya, nari obw’abeehagwire aha mazima abarikwetwara nk’abarikukunda amazima. —w24.04, rup. 12.

Niki eki turikumanya, kandi niki eki tutarikumanya aha bikwatiraine n’oku Yehova araacwere orubanja Omugabe Sulemaani, abaafeereire Sodoma na Gomora, n’omu Mwegyemure?

Titurikuhamya yaaba Yehova abacwereire orubanja rw’okucwekyererezibwa kimwe. Kwonka, nitumanya ngu naamanya ekihikire kandi aine embabazi nyingi.—w24.05, rup. 3-4.

Ruhanga okuba ‘nk’Orukiri’ nikituhamiza ki? (Bir. 32:4)

Nitubaasa kuhungira ahari Yehova. N’orikwesigwa, ahakuba butoosha naahikiiriza ebi arikuraganisa. Tarikutengyetsibwa, ahakuba emitwarize ye n’ekigyendererwa kye tibirikuhinduka.—w24.06, rup. 26-28.

Niki ekirikubaasa kukuhwera kumanyiira ekibiina ekisya?

Yesigye Yehova, naija kukuhwera nk’oku yahwereire abaheereza be aba ira. Yetantare kugyeragyeranisa ekibiina kyawe n’eki waabaire orimu. Yejumbire omu mirimo y’ekibiina kyawe ekisya, kandi oteereho kutunga abanywani abasya. —w24.07, rup. 26-28.

Ni mashomo ki agari omu nfumu ishatu za Yesu ezirikugambwaho omuri Matayo eshuura 25?

Enfumu ey’entaama n’embuzi neetwegyesa aha bukuru bw’okuguma tuhamiire ahari Yehova kandi turi abeesigwa. Enfumu ey’abaishiki abanyabwengye n’abashema neetwegyesa obukuru bw’okuguma tweteekateekire kandi turikureeba. Kandi enfumu y’etalanta neetwegyesa obukuru bw’okuba abakozi abeeziriki.—w24.09, rup. 20-24.

Ekisasi kya hekalu ya Sulemaani kikaba nikiingana ki obwemi?

Omu 2 Obusingye 3:​4, ebihandiiko bimwe ebya ira nibyooreka ngu obwemi bw’ekisasi bukaba buri ‘mikono 120,’ nizo mita 53 (fuuti 175). Kwonka ebihandiiko ebindi nibyoreka ngu obwemi bwakyo bukaba buri ‘mikono 20,’ nari shi mita 9 (fuuti 30) Eki nikyo kirikuhikaana n’obuhango bw’ekisiika kya hekalu —w24.10, rup. 31.

Nikimanyisa ki omuheereza kugira ‘omukazi omwe’? (1 Tim. 3:12)

Nikimanyisa ngu ari omu bushwere n’omukazi omwe, kandi tashemereire kuba naashambana. Ekindi, tashemereire kurigira abakazi abandi.—w24.11, rup. 19.

Ahabw’enki nitubaasa kugira ngu Yohaana 6:53 ekaba etarikugamba ebiine kukorwa aha Kiihuro kya Mukama waitu?

Yohaana 6:53 neeyoreka ngu nikyetengyesa kurya omubiri gwa Yesu n’eshagama ye. Ebigambo ebyo Yesu akabigambira Abayudaaya ab’omuri Galilaaya omuri 32 Y.A.K., abaabaire nibakyetenga kumwikiririzamu. Kwonka, Ekiihuro kya Mukama waitu akakitandikaho omwaka ogwakuratsireho omuri Yerusaalemu. Aha kiihuro ekyo, Yesu akaba naagambira abaabaire nibaija kutegyeka nawe omu iguru.—w24.12, rup. 10-11.