YOMARA na banyaanya babiri, Marcelo na Hiver nibatuura omu kyaro kikye omuri Guatemala. Abajurizi ba Yehova bakatandika kwegyesa Yomara Baibuli, bwanyima na banyaanya bakamwegaitaho. Kwonka hakaba hariho oburemeezi. Bonshatu bakaba bari empumi, kandi batarikumanya kushoma braille. N’ahabw’ekyo, owaabaire naabeegyesa Baibuli niwe yaabaire naabashomera eby’okwega n’Ebyahandiikirwe.

Kandi bakaba nibagumirwa n’okuza omu nteerane z’ekibiina. Bakaba batarikubaasa kugyenda bonka orugyendo rw’edakiika 40 kuza aha Kyombeko ky’Obukama. Kwonka ab’eishe-emwe omu kibiina bakatebeekanisa kubatwara omu nteerane zoona. Ku baatandikire kuha embazo omu nteerane ez’aha gati ya saabiiti, ab’eishe-emwe bakaba babahwera kuzikwata omu mutwe.

Omuri Mei 2019, bakatandika kugirira enteerane z’ekibiina omu kyaro kyabo. Omu bwire obwo, omushaija n’omukazi we baapayoniya ab’obutwire bakaija kuheereza omu kyaro ekyo. Baapayoniya abo bakataho ekigyendererwa ky’okwegyesa enyinemwe abo kushoma n’okuhandiika braille, n’obu baraabe baabaire batarikumanya oku baraakikore. Bakaza omu raiburare kwega kukoresa braille n’okwega obukoryo bw’okugyegyesa abandi.

Omu meezi makye, enyinemwe abo bashatu bakaba nibabaasa kushoma gye braille, kandi ekyo kikabahwera kwongyera kutunguuka omu by’omwoyo. a Hati, Yomara, Marcelo, na Hiver ni baapayoniya ab’obutwire. Kandi Marcelo n’omuheereza omu kibiina. Haihi buri izooba nibeejumbira kimwe omu kuheereza Yehova. Omuhimbo ogu baine omu kuheereza nigureetera n’abandi kuheereza n’obweziriki.

Enyinemwe abo bonshatu nibasiima munonga ekibiina ahabw’okubashagika. Yomara naagira ati: “Okwiha obu tugaaniira n’Abajurizi ba Yehova, batworekire rukundo eyaabuzima ey’Ekikristaayo.” “Twine abanywani barungi omu kibiina, kandi turi bamwe aha ruganda rw’eishe-emwe omu nsi yoona abateerainwe rukundo,” nikwo Marcelo arikugira. Yomara na beene ishe baine ekihika ky’okureeba ensi neehinduka paradiso.—Zab. 37:10, 11; Isa. 35:5.