Baibuli neeyoreka ngu Yehova naabaasa kumanya ebiraabeho omu biro by’omumaisho. (Isa. 45:21) Kwonka terikworeka omu bwijwire oku arikukikora, obu arikukikora, n’ebi arikucwamu kumanya. N’ahabw’ekyo titurikumanya byona ebirikukwata aha kubaasa kwa Yehova okw’okumanya ebiraabeho. Kwonka, yetegyereze bimwe aha bi turikumanya.

Yehova naakora kyona eki arikwenda, kwonka obumwe naayeteeraho obugarukiro. Ahabw’obwengye bwe obutaine bugarukiro, naabaasa kucwamu kugamba kyona eki ekiraabeho. (Rom. 11:33) Kwonka ahabw’okugira ngu ahikiriire omu kwezibira, naabaasa n’okucwamu kutagira eki yaamanya aha birikuza kubaho.

Yehova naabaasisa ebi arikukunda kukorwa. Mbwenu shi eki kiine kakwate ki n’okubaasa kwe kw’okumanya ebiraabeho omu biro by’omumaisho? Isaaya 46:10 nihashoboorora hati: ‘Okwiha aha kutandika nkaranga eby’emperu, naiha omu biro bya ira nindanga ebitakabaireho, ningira nti: Enaama yangye neija kuhama, mpikiirize ebi naamaririire kukora byona.’

N’ahabw’ekyo, enshonga emwe ahabw’enki Yehova naabaasa kugamba ebiraabeho, n’ahabw’okugira ngu aine amaani g’okureetera ebintu kubaho. Tikirikumwetengyesa kubanza yaareeba ebiraabeho omu biro by’omumaisho kugira ngu amanye ekirikwija kubaho. Kureka, Yehova naabaasa kucwamu eki arikwenda ngu kibeho omu biro by’omumaisho, reero akireetere kubaho obwire bwahika.—Kur. 9:​5, 6; Mat. 24:36; Byak. 17:31.

Ahabw’enshonga egyo, Baibuli neekoresa ebigambo ‘nk’okucuma enaama, n’okumariirira’ kushoboorora eki Yehova arikukora aha bikwatiraine n’ebiraabeho omu biro by’omumaisho. (2 Bag. 19:25; Isa. 46:11) Ebigambo ebi nibivunuurwa kuruga omu kigambo ekirikumanyisa “omubumbi.” (Yer. 18:4) Nk’oku omubumbi omukugu arikubumba enyungu eboneire omu ibumba, na Yehova naabaasa kukoresa ekintu kyona kuhikiiriza ekigyendererwa kye.—Efe. 1:11.

Yehova naikiriza abantu kwecweramu. Tarikucweramu buri muntu ekiraamuhikyeho omu biro by’omumaisho, kandi tarikureetera abantu abataine rubanja kukora ekiraabareetere kucwekyerezibwa. Kureka akaha buri omwe obugabe bw’okwecweramu eki arikwenda kukora, kandi naahiga buri omwe kucwamu kukora ekihikire.

Teekateeka aha by’okureeberaho bibiri ebi: Eky’okubanza n’eky’abantu ba Nineeve. Yehova akagira ngu orurembo orwo rukaba nirwija kucwekyerezibwa ahabw’ebikorwa byabo bibi. Kwonka abantu b’orurembo orwo ku baayeteisize, Yehova ‘akareka akabi aku yaabaire agambire kubareetaho tiyaakabareetaho.’ (Yon. 3:​1-10) Yehova akahindura emiteekateekyere ye aha ki yaabaire agambire, ahabw’okugira ngu abatuuzi ba Nineeve bakakoresa obugabe bwabo bw’okwecweramu baayeteisa ku baahuriire obutumwa obu Yehova yaabaire aboohereize.

Eky’okureeberaho ekya kabiri n’eky’obunabi oburikukwata aha musinguzi Kuuro, owaabaire naija kurekura Abayudaaya kuruga omu bukwatwa, kandi akataho ekiragiro ky’okugaruka kwombeka hekalu ya Yehova. (Isa. 44:26–45:4) Omugabe Kuuro owa Buperisi akahikiiriza obunabi obwo. (Ezr. 1:​1-4) Kwonka, Kuuro akaba atarikuramya Ruhanga ow’amazima. Yehova akakoresa Kuuro kuhikiiriza obunabi atagyemesereize Kuuro kucwamu kumuramya.—Enf. 21:1.

Amazima gari ngu, ezi tizo nshonga zonka ezirikutwarirwamu aha ku Yehova arikukoresa okubaasa kwe kw’okumanya ebiraabeho omu biro by’omumaisho. Kandi tihariho orikubaasa kumanya byona ebi Yehova arikuteekateeka n’ebi arikukora. (Isa. 55:​8, 9) Kwonka, ebi turikumanya ahari Yehova nibihamya okwikiriza kwaitu ngu butoosha ebi arikukora bihikire otwariiremu n’ebi arikugamba aha biraabeho omu biro by’omumaisho.