1. Ha eky’okureeberaho kworeka ahabw’enki twine kukuratira Yehova nk’omwebembezi waitu.

 KA TUGIRE ngu waabura ori omu kibira. Oyeetooroirwe ebirikubaasa kukuhitsyaho akabi nk’enyamaishwa, obukooko oburikuturira endwara, ebimera by’obutwa n’enengo. Buzima nooshemererwa waaba oine omuntu orikubaasa kukwebembera gye kandi orikumanya ahu akabi kari n’oku orikubaasa kukeetantara! Ensi egi eri nk’ekibira. Eijwiremu ebirikutiinisa ebirikubaasa kuta eby’omwoyo byaitu omu kabi. Kwonka twine Omwebembezi ohikiriire, Yehova. Naatwebembera kandi aturinda akabi kuhitsya obu turaatugye amagara agatahwaho omu nsi ensya.

2. Yehova naatwebembera ata?

² Yehova naatwebembera ata? Omuringo mukuru ogu arikukoresa n’Ekigambo kye, Baibuli. Kwonka, naakoresa n’abantu abarikumujwekyera. Nk’eky’okureeberaho, naakoresa ‘omwambari omwesigwa kandi ow’obwengye’ kutuha eby’okurya ebirikutuhwera kucwamu gye. (Mat. 24:45) Kandi naakoresa n’abashaija abeesigwa kutwebembera. Nk’eky’okureeberaho, abareeberezi ba saketi n’ab’ekibiina nibatugumya kandi batuha obuhabuzi oburikubaasa kutuhwera kuraba omu mbeera zigumire. Ka nikitushemeza kutunga obuhabuzi oburikwesigwa na munonga omu biro ebi eby’akabi kaingi! Obuhabuzi obwo nibutuhwera kuguma nitusiimwa Yehova n’okuguma omu muhanda gw’amagara.

3. Nituza kureeba ki omu kicweka eki?

³ Kwonka, obumwe nitubaasa kugumirwa kugyendera aha buhabuzi bwa Yehova, na munonga bwaheebwa abantu abatahikiriire. Ahabw’enki? Obuhabuzi obwo nibubaasa kuba nibutaahataaha omu bugabe bwaitu. Nari nitubaasa kureeba obuhabuzi obwo nk’obutari bw’obwengye, kandi tubutware nk’obutarikuruga ahari Yehova. Omu bwire nk’obwo, ni kikuru  kukuratira obuhabuzi bwe, kandi twakikora nikirugamu ebirungi. Ekicweka eki nikiza kutuhwera kwongyera kuhamya obwesigye bwaitu kirikworeka (1) oku Yehova yaayebembeire abantu be omu bwire bwa Baibuli, (2) oku arikutwebembera hati, (3) n’oku turikugasirwa twagumizamu nitukuratira obuhabuzi bwe.

OKU YEHOVA YAAYEBEEMBEIRE ABAISRAELI

4-5. Yehova akooreka ata ngu naakoresa Musa kwebembera Abaisraeli? (Reeba ekishushani ekiri aha kipampagare.)

⁴ Yehova akatoorana Musa kwebembera Abaisraeli kubaiha Misri. Kandi akabaha akamanyiso akarikureebwa butunu kubahamiza ngu naabeebembera arikukoresa Musa. Nk’eky’okureeberaho, akabaha enyomyo y’ekicu kubeebembera nyomushana n’enyomyo y’omuriro kubeebembera nyekiro. (Kur. 13:21) Musa akakuratira enyomyo eyaamwebembeire n’Abaisraeli kuhika aha Nyanja Erikutukura. Abantu bakahahaara emitima ku baahikire aha nyanja, kandi obwo bakuratiirwe eihe ry’Abanyamisri. Bakateekateeka ngu Musa akaba akozire enshobe kubareeta aha Nyanja Erikutukura. Kwonka ekaba etari nshobe. Yehova akakoresa Musa kuhitsya abantu be omu mwanya ogwo akigyendereire. (Kur. 14:2) Bwanyima akabajuna omu muringo gw’eky’okutangaaza.—Kur. 14:​26-28.

⁵ Omu myaka 40 eyaakuratsireho, Musa akagumizamu naakuratira enyomyo y’ekicu kwebembera abantu ba Ruhanga kuraba omu ihamba. a Kumara obwire, Yehova akata enyomyo egyo aha iguru y’eihema rya Musa, ahu Abaisraeli boona baabaire nibabaasa kugireeba. (Kur. 33:​7, 9, 10) Yehova akaba agamba na Musa kurabira omu nyomyo egi, reero Musa agambira abantu obuhabuzi bwa Yehova. (Zab. 99:7) Abaisraeli bakaba baine obuhame burikumara kubahamiza ngu Yehova naakoresa Musa kubeebembera.

6. Abaisraeli bakorobera bata obuhabuzi bwa Yehova? (Okubara 14:​2, 10, 11)

⁶ Eky’obusaasi, Abaisraeli abarikukira obwingi tibaraikiriize obuhame oburikworeka ngu Yehova akaba naakoresa Musa kumujwekyera. (Shoma Okubara 14:​2, 10, 11.) Kaingi, bakanga kwikiriza obujunaanizibwa obu Musa yaabaire aine. N’ekyarugiremu, Abaisraeli abo, tibaraikiriziibwe kutaaha omu Nsi Eyaaraganisiibwe.—Kub. 14:30.

7. Ha eby’okureeberaho by’abaakuratiire obuhabuzi bwa Yehova. (Okubara 14:24) (Reeba n’ekishushani.)

⁷ Kwonka, Abaisraeli abamwe bakakuratira obuhabuzi bwa Yehova. Nk’eky’okureeberaho, Yehova akagira ati: “Kalebu . . . akankuratirira kimwe.” (Shoma Okubara 14:24.) Ruhanga akashumbuusha Kalebu, kandi yaamuha omugisha gw’okwetooranira eitaka omuri Kanaani. (Yos. 14:​12-14) Kandi Abaisraeli abaataahire omu Nsi Eyaaraganisiibwe bakataho eky’okureeberaho kirungi barikukuratira obuhabuzi bwa Yehova. Obu Yoshua yaahungurira Musa, kandi akatooranwa kwebembera Abaisraeli bakaguma “nibamutiina ebiro byona eby’amagara ge.” (Yos. 4:14) N’ekyarugiremu, Yehova akabaha omugisha, kandi yaabahwera kuhungura ensi ei yaabaire abaraganiise.—Yos. 21:​43, 44.

8. Shoboorora oku abantu baagyendeire aha buhabuzi bwa Yehova omu bwire bw’abagabe. (Reeba n’ekishushani.)

⁸ Emyaka eyaakuratsireho, Yehova akakoresa abaramuzi kwebembera abantu be. Bwanyima, omu bwire bw’abagabe, Yehova akatoorana baanabi kwebembera abantu be. Abagabe abeesigwa bakagyendera aha buhabuzi bwa baanabi. Nk’eky’okureeberaho,  Omugabe Daudi omu bucureezi akaikiriza okuhana kwa nabi Nasani. (2 Sam. 12:​7, 13; 1 Bus. 17:​3, 4) Omugabe Yehoshafaati akeesiga obuhabuzi bwa nabi Yahazieli, kandi yaahiga Abayudaaya kwesiga baanabi ba Ruhanga. (2 Bus. 20:​14, 15, 20) Omu bwire bw’obusaasi Omugabe Hezekia akasherura obuhabuzi ahari nabi Isaaya. (Isa. 37:​1-6) Abagabe ku baabaire bakuratira obuhabuzi bwa Yehova, bakaba batunga emigisha, kandi n’eihanga rikaba riguma riine oburinzi. (2 Bus. 20:​29, 30; 32:22) Buzima, nikibaasa kuba kyabaire nikireebwa butunu ngu Yehova akaba naakoresa baanabi kwebembera abantu be. Kwonka, baingi aha bagabe, bakanga obuhabuzi obu bahairwe baanabi ba Yehova.—Yer. 35:​12-15.

OKU YEHOVA YAAYEBEMBEIRE ABAKRISTAAYO ABA IRA

9. Yehova akakoresa baahi kureeberera Abakristaayo b’ekyasha ky’okubanza? (Reeba n’ekishushani.)

⁹ Omu kyasha ky’okubanza Y.A.K., Yehova akatandikaho ekibiina Ekikristaayo. Mbwenu shi akeebembera ata Abakristaayo abo? Akatoorana Yesu kuba omutwe gw’ekibiina. (Efe. 5:23) Kwonka, Yesu akaba atarikugamba na buri omwe aha beegi be butunu. Akakoresa entumwa n’abakuru omuri Yerusaalemu kureeberera Abakristaayo. (Byak. 15:​1, 2) Kandi, n’abareeberezi bakatooranwa kureeberera ebibiina.—1 Tes. 5:12; Tit 1:5.

10. (a) Abakristaayo b’ekyasha ky’okubanza bakatwaza bata ku baahairwe obuhabuzi? (Ebyakozirwe15:​30, 31) (b) Ahabw’enki bamwe baaremirwe kworobera abaabaire nibajwekyera Yehova? (Reeba akabokusi “ Ekitwire Nikireetera Abamwe Kwanga Kwikiriza Obuhame.”)

¹⁰ Mbwenu shi Abakristaayo ab’ekyasha ky’okubanza bakatwaza bata? Baingi bakasiima obuhabuzi obu baatungire. Kandi bakashemererwa ahabw’okuhuumurizibwa okubahairwe. (Shoma Ebyakozirwe 15:​30, 31.) Kwonka shi Yehova atwire naayebembera ata abantu be?

OKU YEHOVA ARIKUTWEBEMBERA HATI

11. Ha eky’okureeberaho ekirikworeka oku Yehova ahaire obuhabuzi abarikureeberera ekibiina obunaku obu.

¹¹ Yehova naagumizamu kwebembera abantu be obunaku obu. Ekyo atwire naakikora kurabira omu Kigambo kye n’Omwana we kandi omutwe gw’ekibiina. Mbwenu shi nitureeba obuhame oburikworeka ngu naagumizamu  kutwebembera arikukoresa abantu abarikumujwekyera? Eego. Teekateeka aha byabaireho emyaka ya 1800, erikuza kuhendera. Charles Taze Russell na bagyenzi be bakeetegyereza ngu 1914 n’omwaka mukuru obu Obukama bwa Ruhanga bwabaire nibwija kutandika kutegyeka. (Dan. 4:​25, 26) Kubaasa kwetegyereza ekyo, bakashwijuma obunabi bw’omu Baibuli. Mbwenu shi Yehova akaba naabeebembera omu kucondooza kwabo ahari Baibuli? Eego buzima. Ebyabaireho omu nsi omuri 1914 bikahamya ngu Obukama bwa Ruhanga bukaba butandikire kutegyeka. Hakabaho Orutaro rw’Ensi Yoona I, haakurataho endwara, emitsitsa n’eibura ry’eby’okurya. (Luk. 21:​10, 11) Buzima, Yehova akaba naakoresa abashaija abo abeesigwa kuhwera abantu be.

12-13. Ni ntebeekanisa ki ezaatairweho kwongyera kubuurira n’okwegyesa omu Rutaro rw’Ensi Yoona II?

¹² Teekateeka aha byabaireho omu Rutaro rw’Ensi Yoona II. Bwanyima y’okwega ebiri omu Okushuuruurwa 17:​8, ab’eishe-emwe abaabaire baine obujunaanizibwa aha ofiisi enkuru bakeetegyereza ngu orutaro rukaba rutarikwija kureetaho Haramagedoni, kureka hakaba nihaija kubaho obwire bw’obusingye buringaniire obwabaire nibwija kubabaasisa kwongyera kubuurira. N’ahabw’ekyo, ekibiina kya Yehova kikatandikaho Eishomero rya Gileadi kutendeka abamiisani kubuurira n’okwegyesa omu mahanga gatari gamwe omu nsi yoona, ekintu ekyabaire nikireebeka nk’ekitari ky’obwengye. Abamiisani bakooherezibwa omu myanya etari emwe omu bwire bw’orutaro. Kandi, omwambari omwesigwa akatebeekanisa Eishomero ry’Obuheereza  b kutendeka boona omu bibiina kwegyesa n’okubuurira gye. Omu miringo egi, abantu ba Ruhanga bakaba nibatebeekanisibwa ahabw’omurimo ogu baabaire baine kukora.

¹³ Ebyabaireho enyima, nibituhamiza ngu Yehova akaba naayebembera abaheereza be omu bwire obwo obwabaire bugumire. Kuruga obu haabaho Orutaro rw’Ensi Yoona II, abaheereza ba Yehova omu mahanga maingi batwire nibeesiimira obusingye n’obugabe obu baine barikwejumba omu murimo gw’okubuurira. Kandi omurimo ogwo, gurugiremu ebirungi.

14. Ahabw’enki turikubaasa kwesiga obuhabuzi obu turikuheebwa ekibiina kya Yehova n’abareeberezi abarikutooranwa? (Okushuuruurwa 2:1) (Reeba n’ekishushani.)

¹⁴ Obunaku obu, Akakiiko Akareeberezi nikagumizamu kusherura obuhabuzi ahari Kristo. Nibenda ngu obuhabuzi obu baraahe ab’eishe-emwe bube nibworeka emiteekateekyere ya Yehova aha nshonga. Abareeberezi ba saketi na b’ebibiina nabo nibakora nikyo kimwe baaba nibaha obuhabuzi ebibiina. c Abareeberezi entoore bari omu mukono gwa Kristo ogwa “buryo.” (Shoma Okushuuruurwa 2:1.) Amazima gari ngu, abareeberezi aba tibahikiriire, kandi nibakora enshobe. Musa, Yoshua n’entumwa, obumwe bakaba nibakora enshobe. (Kub. 20:12; Yos. 9:​14, 15; Rom. 3:23) Kwonka, Kristo naayebembera omwambari omwesigwa n’abareeberezi abatoorainwe, kandi naija kugumizamu naakora atyo kuhitsya aha muheru gw’entebeekanisa y’obusingye obu. (Mat. 28:20) N’ahabw’ekyo, twine enshonga nungi ezirikutureetera kwesiga obuhabuzi obu arikutuha kurabira omu barikutooranwa kutureeberera.

NITUGASIRWA TWAGUMIZAMU NITWEBEMBERWA YEHOVA

15-16. Nooyegyera ki aha baakuratiire obuhabuzi bwa Yehova?

¹⁵ Twagumizamu nitugyendera aha buhabuzi bwa Yehova nitutunga emigisha. Nk’eky’okureeberaho, Andy na Robyn bakagyendera aha buhabuzi bw’okworobya embeera zaabo. N’ekyarugiremu, bakeehayo kuhwera omu murimo gw’okwombeka ebyombeko by’ekibiina. Robyn naagira ati: “Tubaasize kutuura omu maju obumwe agataine kiyungu. Kandi, nkaba ninkunda munonga kuteera ebishushani, kwonka nkaba nyine kuguza ebyoma bingi ebi naabaire ninkoresa. Ekyo kikandeetera kurira. Kwonka nka Abrahamu na Saara nkaba mmaririire kutagaruza ebigyere enyima.” (Heb. 11:15) Mbwenu shi batungire migisha ki? Robyn naagira ati: “Twine okumarwa ahabw’okumanya ngu nituha Yehova buri kimwe eki twine. Twaba nitwombeka nituteera akashushani, oku embeera ziraabe ziri omu nsi ensya.” Omukazi we Andy, naagira ati: “Twine okumarwa ahabw’okuhayo buri kimwe kushagika Obukama.”

¹⁶ Ni mu miringo ki endiijo oku turikugasirwa twagyendera aha buhabuzi bwa Yehova? Marcia ku yaaherize siniya akagyendera aha buhabuzi bw’okwebembeza okuheereza Yehova  obu yaahairwe. (Mat. 6:33; Rom. 12:11) Naagira ati: “Nkatunga omugisha gw’okushomera busha aha yunivasite. Kwonka, nkaba niinyenda kuhika aha bigyendererwa byangye eby’omwoyo. N’ahabw’ekyo, nkacwamu kuza omu itendekyero ry’eby’emikono kwega omwoga gw’okumpwera kwebaisaho omu buheereza bwangye. Okwo kuba kuri okucwamu kurungi. Hati nyine okushemererwa ahabw’okuheereza nka payoniya kandi entebeekanisa yangye neembaasisa kutunga obwire bw’okuhwera aha Beseeli n’okwejumba omu mirimo endiijo ey’omutaano.”

17. Ni migisha ki endiijo ei turikutunga twagumizamu nitukuratira obuhabuzi bwa Yehova? (Isaaya 48:​17, 18)

¹⁷ Obumwe, nituheebwa obuhabuzi oburikutuhwera kwetantara kukunda eby’obugaiga, n’ebirikubaasa kutureetera kuhenda ebiragiro bya Ruhanga. Twagyendera aha buhabuzi obu Yehova arikutuha nitugasirwa. Nituguma twine omuntu murungi ow’omunda kandi nitwetantara amaganya agatarikwetengyesa. (1 Tim. 6:​9, 10) N’ekirikurugamu, nitubaasa kuta omutima aha kwebembeza okuheereza Yehova, ekirikutureetera kugira okushemererwa kwingi, obusingye n’okumarwa.—Shoma Isaaya 48:​17, 18.

18. Ahabw’enki omaririire kugumizamu noogyendera aha buhabuzi bwa Yehova?

¹⁸ Hatariho kubangaanisa, Yehova naija kugumizamu naakoresa abantu abarikumujwekyera kutuha obuhabuzi omu bwire bw’okubonabona kwingi, n’omu Butegyeki bw’Emyaka Rukumi. (Zab. 45:16) Mbwenu shi nitwija kugyendera aha buhabuzi obwo n’obu kyakutwetengyesa kwefeerereza ebi turikukunda? Ekyo nikiija kurugiirira aha ku turikutwaza Yehova yaatuha obuhabuzi hati. N’ahabw’ekyo, ka tugumizemu nitukuratira obuhabuzi bwa Yehova, otwariiremu n’obu arikutuha kurabira omu bashaija abarikutooranwa kutureeberera. (Isa. 32:​1, 2; Heb. 13:17) Kandi twakora tutyo, nituba twine enshonga nungi ezirikutureetera kwesiga Omwebembezi waitu, Yehova, orikutwebembera kuruga omu kabi k’eby’omwoyo kuhitsya obu turaatungye amagara agatahwaho omu nsi ensya.