EKICWEKA EKY’OKWEGA 8
EKYESHONGORO 130 Saasira Abandi
Oku Orikubaasa Kutooreza Okusaasira kwa Yehova
“Nk’oku [Yehova] yaabasaasiire, mube nikwo mwatwaza.”—KOL. 3:13.
ENTIMA
Ekicweka eki nikiza kworeka ebi twine kukora kusaasira omuntu otugwisize kubi.
1-2. (a) Ni ryari obu turikugumirwa kusaasira omuntu? (b) Denise akooreka ata ngu ayeteekateekire kusaasira?
NOOGUMIRWA kusaasira abandi? Baingi ahariitwe nikwo turikwehurira haagira owaagamba nari akakora ekintu ekirikutusaasa. Kwonka, nitubaasa kusingura enyehurira zaitu, kandi tumusaasire. Nk’eky’okureeberaho, teekateeka ahari munyaanyazi-itwe orikwetwa Denise, a owaasaasire omu muringo gw’omutaano. Omu 2017, Denise n’eka ye bakaba nibaruga kutaayaaya aha ofiisi Enkuru ey’Abajurizi ba Yehova ensya. Ku baabaire nibagaruka omu ka, omushaija owaabaire naavuga emotoka endiijo akaremwa kugitsiba yaatoomera eyaabo. Denise akagwa kihuumura ahabwa butandu. Ku yaagarukirwemu obwengye, akeetegyereza ngu abaana be bahuutaire munonga, kandi iba, Brian afiire. Denise ku arikuteekateeka aha byabaireho naagira ati: “Nkahwa amaani, kandi naashoberwa.” Kandi, ku yaamanyire ngu omuvugi ogwo akaba ari gye ataine kyamuhugize, akashaba Yehova kumuhwera kugira obusingye.
2 Owaabaire naavuga akateebwaho omushango gw’okwita otakigyendereire. Ku ogire ngu akashangwa aine orubanja, akaba naija kuteebwa omu kihome. Kwonka, kooti ekamanyisa Denise ngu obujurizi obu araahe nibwo baraihirireho eki baraakorere omushaija ogwo. Denise naagira ati: “Okaba nooshusha ngu haine owaashara ehuuzi z’ekironda kyangye reero akatamu omwonyo mwingi, ahakuba nkaba nyine kugamba aha mbeera y’obusaasi eyaampikireho.” Bwanyima ya saabiiti nkye, Denise akaza omu kooti kuha obujurizi aha mushaija owaareeteire eka ye kugira obusaasi bwingi. Akagamba ki? Denise akashaba omuramuzi kugirira omushaija ogwo embabazi. b Ku yaaherize kugamba, omuramuzi akarira yaagira ati: “Emyaka yoona 25 ei mmazire ndi omuramuzi, tinkahurirahoga ekintu nk’eki. Tindikukira kuhurira eka ya kihababa erikweshengyereza ngu otabariziibwe agirirwe embabazi. Tindikukira kuhurira ebigambo bya rukundo n’okusaasira.”
3. Niki ekyahweraire Denise kusaasira?
3 Niki ekyahweraire Denise kusaasira? Akateekateeka aha kusaasira kwa Yehova. (Mik. 7:18) Twasiima oku Yehova arikutusaasira, nikituhiga kusaasira abandi.
4. Yehova naayenda ngu tukore ki? (Abaefeso 4:32)
4 Yehova naayenda ngu tusaasire abandi twekundiire nk’oku nawe arikutusaasira. (Shoma Abaefeso 4:32.) Naayenda ngu tube tweteekateekire kusaasira abarikutugwisa kubi. (Zab. 86:5; Luk. 17:4) Omu kicweka eki, nituza kureeba ebintu bishatu ebiraatuhwere kwongyera kusaasira.
OTEEHUZYA ENYEHURIRA ZAAWE
5. Kurugiirira aha Enfumu 12:18, nitubaasa kwehurira tuta omuntu yaatugwisa kubi?
5 Nitubaasa kwehurira kubi ahabw’ebi omuntu yaagamba nari yaakora, na munonga yaaba ari munywani waitu ow’aha mara nari omunyabuzaare. (Zab. 55:12-14) Obumwe, obusaasi obu turikugira ni nk’obw’omuntu owaacumitwa rurara. (Shoma Enfumu 12:18.) Nitubaasa kuteeraho kwehuzya enyehurira zaitu. Kwonka okukora ekyo kiri nk’okucumitwa rurara, reero okagireka omu kironda. Nikyo kimwe, titwine kuteekateeka ngu twayehuzya enyehurira zaitu nitwija kwehurira gye.
6. Nitubaasa kutwaza tuta omuntu yaatugwisa kubi?
6 Haagira owaatugwisa kubi, omu kubanza nitugira ekiniga. Baibuli neeyoreka ngu nitubaasa kugira ekiniga. Kwonka, neeturabura kutaikiriza enyehurira zaitu kututegyeka. (Zab. 4:4; Efe. 4:26) Ahabw’enki? Ahabw’okugira ngu obwire obwingi nizitureetera kugira eki twakora. Kandi ekiniga tikirikurugamu karungi koona. (Yak. 1:20) Ijuka ngu, ekiniga nikireetwa enyehurira, kwonka niitwe turikucwamu yaaba tuguma tugwirwe kubi.
Ekiniga nikireetwa enyehurira, kwonka naitwe turikucwamu yaaba tuguma tugwirwe kubi
7. Nitubaasa kugira nyehurira ki ezindi omuntu yaatugwisa?
7 Ku turikutwarizibwa kubi, nitubaasa kwehurira kubi omu miringo endiijo. Nk’eky’okureeberaho, munyaanyazi-itwe Ann naagira ati: “Obu naabaire ndi omuto, tata akatsigaho maawe yaashwera omukozi waitu. Nkeehurira nk’otsigirweho. Ku baazaire abaana, nkeereeba nk’otakiine mwanya omu ka. Nkakura ntarikuhurira ngu niinkundwa.” Munyaanyazi-itwe Georgette naashoboorora oku yaayehuriire obu iba yaamureebya, arikugira ati: “Tukaba tutwire turi abanywani kuruga omu buto, kandi tukaheereza hamwe nka baapayoniya. Ekyo kikancwa omutima.” Munyaanyazi-itwe Naomi naagira ati: “Nkaba ntarikuteekateeka ngu ibanyi naabaasa kundeebya. N’ahabw’ekyo ku yaangambiire ngu atwire naareeba eby’enshoni bwesherekye, nkehurira nk’ou babeihire, kandi ou bareebize.”
8. (a) Ahabw’enki twine kusaasira abandi? (b) Nitugasirwa tuta twasaasirana? (Reeba akabokusi “ Mbwenu shi ku Haakuba Hariho Okureeteire Kwehurira Kubi?”)
8 Titurikubaasa kuzibira abantu kugamba nari kutwaza nk’oku barikwenda, kwonka nitubaasa kutegyeka oku turikubatwariza. Kandi obwire obwingi okusaasira nikyo kirikukirayo oburungi. Ahabw’enki? Ahakuba nitukunda Yehova, kandi naayenda ngu tube abarikusaasira. Twaguma twine ekiniga tukanga kusaasira, kyorobi kutwaza omu muringo gw’obushema, kandi tukehitsyaho akabi. (Enf. 14:17, 29, 30) Teekateeka ahari munyaanyazi-itwe Christine. Naagira ati: “Ku ndikuguubwa kubi, niimwenya kakye. Ninkira kurya kubi. Tindikubyama kirikumara, kandi ningumirwa kutegyeka enyehurira zangye. Eki nikikwata aha bushwere bwangye n’omukago gwangye n’abandi.”
9. Ahabw’enki tutaine kubiika enziika?
9 N’obu otugwisize kubi yaakuba atatushabire okusaasirwa, nitubaasa kutuubya obusaasi obu atureeteire. Tuta? Georgette, owaaba yaagambirweho naagira ati: “Kikatwara obwire, kwonka bwanyima nkarekyera aho kugirira owaabaire ari ibanyi enziika, n’ekiniga. N’ekyarugiremu nkagira obusingye bwingi.” Twarekyera aho kubiika enziika, niturinda omutima gwaitu kutashiishwa ekiniga. Kandi nitweha ekiconco ky’okugaruka kwesiimira amagara. (Enf. 11:17) Kwonka shi ku waakuba otakeenzire kusaasira?
OKU ORIKUBAASA KUSINGURA ENYEHURIRA MBI
10. Ahabw’enki twine kweha obwire kubaasa kukira omu nyehurira? (Reeba n’ebishushani.)
10 Noobaasa kusingura ota okwehurira kubi? Omuringo gumwe oku orikubaasa kukikora, n’okweha obwire kubanza waakira. Omuntu orikuba ahutaire munonga ku arikutunga obujanjabi, nikyetengyesa obwire kugira ngu omubiri gwe gukire. Nikyo kimwe, nikibaasa kutwara obwire kubaasa kuba tweteekateekire kusaasira kuruga aha mutima.—Mub. 3:3; 1 Pet. 1:22.
Nikyetengyesa obwire omubiri oguhutaire kukira, nikyo kimwe n’okukira omu nyehurira (Reeba akacweka 10)
11. Okushaba nikubaasa kukuhwera kuta kusaasira?
11 Shaba Yehova kukuhwera kusaasira. c Ann, owaaba yaagambirweho, naashoboorora oku okushaba kwamuhweraire. Naagira ati: “Nkashaba Yehova kutusaasira twena omu ka ahabw’ebitahikire ebi twagambire nari ebi twakozire. Bwanyima nkahandiikira tata, na muka tata ebaruha kubamanyisa ngu nkabasaasira.” Ann naagira ngu okukora ekyo kikaba kitoorobi. Naagira ati: “Ahabw’okutooreza Yehova nkasaasira tata n’omukazi we, nyine amatsiko ngu nibaija kwenda kwega ebirikukiraho ebirikukwata ahari Yehova.”
12. Ahabw’enki twine kwesiga Yehova omu mwanya gw’enyehurira zaitu? (Enfumu 3:5, 6)
12 Yesigye Yehova, zitari nyehurira zaawe. (Shoma Enfumu 3:5, 6.) Butoosha Yehova naamanya ekirikukirayo oburungi. (Isa. 55:8, 9) Kandi tarikubaasa kutushaba kukora ekiraatuhitsyeho akabi. N’ahabw’ekyo ku arikutugambira kusaasirana, nitubaasa kuhamiza kimwe ngu twakora tutyo nitugasirwa. (Zab. 40:4; Isa. 48:17, 18) Kwonka, twayesiga enyehurira zaitu, nitubaasa kutasaasira. (Enf. 14:12; Yer. 17:9) Naomi, owaaba yaagambirweho, naagira ati: “Omu kubanza, nkateekateeka ngu nkaba mpikire kutasaasira ibanyi ahabw’okureeba eby’enshoni. Nkaba nintiina ngu naabaasa kwebwa agaruke andeetere kugira obusaasi. Nkateekateeka ngu Yehova naayetegyereza enyehurira zangye. Kwonka nkamanya ngu Yehova okwetegyereza enyehurira zangye tikirikumanyisa ngu naikirizana nazo. Naamanya oku ndikwehurira, kandi ngu nikyetengyesa obwire kubaasa kukira, kwonka naayenda ngu nsaasire abandi.” d
TEERAHO KUGIRA ENYEHURIRA NUNGI
13. Kurugiirira aha Abarooma 12:18-21, twine kukora ki?
13 Twasaasira otugwisize kubi, titurikwenda kugarukira aha kutagamba aha kyabaireho. Omuntu ogwo yaaba ari ow’eishe-emwe nari munyaanyazi-itwe, ekigyendererwa kyaitu kiine kuba kiri okugaruraho obusingye. (Mat. 5:23, 24) Twine kugira embabazi omu mwanya gw’ekiniga, kandi tukasaasira omu mwanya gw’okubiika enziika. (Shoma Abarooma 12:18-21; 1 Pet. 3:9) Niki ekirikubaasa kutuhwera kukora ekyo?
14. Twine kuteeraho kukora ki, kandi ahabw’enki?
14 Twine kuteeraho kureeba omuntu otugwise kubi nk’oku Yehova arikumureeba. Yehova naacwamu kureeba ebirungi omu bantu. (2 Bus. 16:9; Zab. 130:3) Naitwe nitubaasa kucwamu ebi turikwenda kureeba omu bantu, yaaba ebirungi nari ebibi. Twateeraho kureeba ebirungi omu bandi, nikiija kutworobera kubasaasira. Nk’eky’okureeberaho, ow’eishe-emwe Jarrod naagira ati: “Nikinyorobera kusaasira ow’eishe-emwe naagyeragyeranisa enshobe ye, n’ebirungi bingi ebi ndikumukundaho.”
15. Ahabw’enki ni kikuru kugambira omuntu ngu omusaasiire?
15 Ekindi kintu kikuru eki orikubaasa kukora n’okugambira omuntu ogwo ngu omusaasiire. Ahabw’enki? Naomi owaaba yaagambirweho naagira ati: “Ibanyi akambuuza ngu ‘waansaasira?’ Ku naabaire ndi haihi kumugarukamu ngu ‘naakusaasira,’ nkaremwa. Nketegyereza ngu buzima nkaba ntamusaasire kuruga aha mutima. Bwanyima y’obwire nkabaasa kumugambira ngu, ‘naakusaasira.’ Ekyo kikareetera ibanyi owaabaire aine amarira omu maisho kugira oburuhuuko, kandi naanye nkehurira gye. Kuruga obwo, nkagaruka kumwesiga, kandi tugarukire twaba abanywani ab’aha mara.”
16. Waayega ki aha bikwatiraine n’okusaasira?
16 Yehova naayenda ngu tusaasirane. (Kol. 3:13) Nitubaasa kugumirwa kusaasira abandi. Kwonka nikibaasika twaba tuteehugize enyehurira zaitu, tukateeraho kuzisingura, kandi tukagira enyehurira nungi.—Reeba akabokusi “ Ebintu Bishatu ebi Orikubaasa Kukora Kusaasira.”
TA OMUTIMA AHA KU ORIKUGASIRWA WAASAASIRA
17. Nitugasirwa tuta twasaasira abandi?
17 Hariho enshonga nyingi ahabw’enki twine kusaasira. Yetegyereze zimwe aharizo. Ey’okubanza, nitushemeza Tataitwe Yehova, oine esaasi. (Luk. 6:36) Eya kabiri, nitworeka ngu nitusiima Yehova ahabw’okutusaasira. (Mat. 6:12) Eya kashatu, nitugira emikago mirungi, kandi twongyera kugihamya.
18-19. Niki ekirikubaasa kurugamu twasaasira?
18 Twasaasira abandi, nitutunga ebirungi ebi tutakateekateekahoga. Nk’eky’okureeberaho, yetegyereze ekyahikire ahari Denise, owaaba yaagambirweho. Akaba atarikumanya ngu omushaija owaabatomeire akaba naayenda kweita bwanyima y’okuhozesibwa. Kwonka, Denise ku yaamusaasire kikamuhiga kutandika kwegyesibwa Baibuli Abajurizi ba Yehova.
19 Nitubaasa kureeba okusaasira omuntu nk’ekigumire munonga, kwonka twakikora niharugamu ebirungi. (Mat. 5:7) N’ahabw’ekyo, twena ka tuteereho kutooreza Yehova, tusaasire abandi!
EKYESHONGORO 125 Abanyambabazi Baine Okushemererwa
a Amaziina agamwe gahindwirwe.
b Omu mbeera nk’egyo, buri Mukristaayo niwe aine kwecweramu eki araakore.
c Reeba vidiyo ez’ebyeshongoro ebihimbirwe “Forgive One Another,” “Forgive Freely,” na “Friends Again” aha jw.org.
d N’obu okureeba eby’enshoni kiri ekibi kandi kirikusaasa, kurugiirira aha byahandiikirwe, tikirikuha ori omu bushwere otakikozire obugabe bw’okugaitururwa.
