TWENA nitwikiriza ngu Yehova naayebembera abaheereza be kandi abareeberera omu by’omwoyo omu biro ebi ‘eby’aha mperu.’ (2 Tim. 3:1) Kwonka buri omwe ahariitwe aine kworobera Yehova. Nitubaasa kugyeragyeranisa embeera yaitu n’ey’Abaisraeli obu baabaire bari omu ihamba. Bakaba baine kworobera eiraka ry’enzamba.

Yehova akagambira Musa kuheesha enzamba ibiri omu feeza kugira ngu ‘agume ozeetese eihanga ryona, n’okuziimukisa abari omu rusiisira kugyenda.’ (Kub. 10:2) Abanyamurwa bakaba baine kuteera enzamba omu miringo etarikushushana kumanyisa abantu eki baine kukora. (Kub. 10:3-8) Obunaku obu abantu ba Ruhanga nibaheebwa obuhabuzi omu miringo mingi. Yetegyereze emiringo eshatu erikutwijutsya enzamba za ira. Abaheereza ba Ruhanga hati nibeetwa aha nteerane empango, abareeberezi nibeetwa kuza kutendekwa, n’omu kibiina nituheebwa obuhabuzi busya nari obuhindwirwemu.

Yehova ku yaabaire ayenda ngu “eihanga ryona” ribuganire aha muryango gw’eihema, abanyamurwa bakaba bateera enzamba zombi. (Kub. 10:3) Enganda zoona ezaabaire ziba zicumbiikire kwetoorora ihema omu bicweka bina, zikaba zihurira eiraka ry’enzamba. Abacumbikire haihi n’eihema bakaba nibabaasa kurahuka kworobera eiraka ry’enzamba ahonaaho. Abandi bakaba bari hare kandi kikaba nikibeetengyesa obwire n’amaani kuhika aha mwanya gw’okubuganiramu. N’obu kiraabe kiri kityo Yehova akaba naayenda ngu boona bateeranire hamwe bagasirwe.

Obunaku obu, titurikwerundaana aha ihema, kwonka nitwetwa omu nteerane z’abaheereza ba Ruhanga. Ezi nizitwariramu enteerane empango n’emikoro y’omutaano endiijo, ahu turikuheebwa obuhabuzi n’obutumwa bukuru. Omu nsi yoona, abaheereza ba Yehova nibatunga eby’okurya by’omwoyo nibyo bimwe. N’ahabw’ekyo, abo boona abarikwetwa aha nteerane bakaija nibatunga okushemererwa ahabw’okuteeranira hamwe nka guruupu. Abamwe nibaba baine kugyenda engyendo ndaingwa kukira abandi. Kwonka, boona abarikwetwa kandi bakaija bwanyima nibagasirwa.

Kandi shi abari omu guruupu eza hare ahu kitoorobi kuhika nabo nibagasirwa? Ahabw’ebyoma by’omurembe, abari omu myanya nk’egyo nibagasirwa omu ntebeekanisa niyo emwe, kandi nibeehurira nk’abandi abari n’abandi omu nteerane ezo. Nk’eky’okureeberaho, omu kutaayaaya kumwe okw’omujwekyerwa w’aha Kakiiko Akareeberezi, ofiisi y’eitaagi omuri Benin ekakoresa ebyoma by’omurembe kuhwera ab’eishe-emwe omuri Arlit, Niger, omu tauni ya Sahara Desert, kugasirwa omu ruteerane. Abantu 21 bakeerundaana hamwe abaabaire barimu ab’eishe-emwe, banyaanyazi-itwe,  n’abasya. N’obu baraabe baabaire bari hare, bakeehurira nk’abari hamwe n’ab’eishe-emwe 44,131 aha ruteerane orundi oruhango. Ow’eishe-emwe omwe akahandiika ati: “Nitubasiima twihire aha mutima ahabw’okutuhitsyaho omukoro ogu. Eki kyorekire ngu nimutukunda munonga.”

Omunyamurwa ku yaabaire ateera enzamba emwe, ‘abeebembezi n’abakuru b’enganda z’Abaisraeli,’ nibo baabaire baija ah’eihema ry’okubugaabuganiramu. (Kub. 10:4) Reero Musa akaba abaha obutumwa n’okutendekwa. Eki kikaba nikibahwera omu kuhikiiriza gye obujunaanizibwa bwabo omu nganda zaabo. Kuri waabaire ori omwe aha bakuru b’enganda ezo, okaba otarikwija kuteeraho kuza aha ruteerane orwo okagasirwa?

Obunaku obu, abareeberezi omu kibiina ti ‘beebembezi,’ kandi tibarikutegyekyesa eikama obusyo bwa Ruhanga. (1 Pet. 5:1-3) Kwonka nibakora kyona ekirikubaasika kuriisa obusyo. N’ahabw’ekyo, baayetwa kwongyera kutendekwa nk’okuza omu Ishomero ry’Obuheereza bw’Obukama nibazayo. Omu ishomero, abareeberezi nibeega oku baine kwongyera kureeberera gye ekibiina. Ekirikurugamu boona omu kibiina nibongyera kukura omu by’omwoyo. N’obu waakuba otakagiire omu ishomero nk’eri, noobaasa kugira eki waayegyera ahari abo abaagiireyo.

Abanyamurwa omu Israeli obumwe bakaba bateera enzamba ey’akasirikiriro. Eki kikaba nikimanyisa ngu Yehova naayenda boona baimukye batandikye orugyendo. (Kub. 10:5, 6) Boona kubaasa kwimukira hamwe bakagyenda kikaba nikyoreka ngu batebeekanisiibwe gye, kwonka buri omwe akaba aine kugira eki yaakora. Obumwe abandi bakaba nibabaasa kugira emitima ebiri. Ahabw’enki?

Obundi bakaba nibabaasa kuteekateeka ngu enzamba z’okutandika orugyendo, zaarahuka kuteerwa kandi obundi kitaraariire. Obumwe ekicu kikaba “kigumaho okwiha omu mwabazyo okuhitsya omu kasheeshe.” Kandi obundi kikaba kigumaho “ebiro bibiri nari okwezi nari omwaka.” (Kub. 9:21, 22) N’emirundi engahi ei Abaisraeli baabaire baine kwimuka bakagyenda? Okubara eshuura 33 neegamba aha myanya 40 ei baateiremu ensiisira.

Obumwe, abamwe nibabaasa kuba baabaire nibareeba ngu bari omu mwanya murungi ogwine ekibunda. Kandi omwanya nk’ogwo gukaba nikushemeza waagugyeragyeranisa n’eihamba “ryona erihango eririkutiinisa” eri baabaire barimu. (Bir. 1:19) N’ahabw’ekyo, kikaba kyorobi kugwa omu mutego gw’okuteekateeka ngu bariyo nibaza omu mwanya mubi.

Enganda zoona ku zaabaire zitsimbura, ezimwe nizibaasa kuba zaabaire zigumirwa kutegyereza. Boona bakaba bahurira eiraka ry’enzamba ey’akasirikiriro kwonka boona bakaba batatsimbura omurundi gumwe. Eiraka ry’enzamba ey’akasirikiriro rikaba nirimanyisa ngu enganda ezaabaire ziri oburugwa-izooba, nk’eza Yuda, Isakari, na Zebuluuni zishemereire kutsimbura. (Kub. 2:3-7; 10:5, 6) Bwanyima y’okutsimbura, abanyamurwa bakaba bateera enzamba ya kabiri kumanyisa enganda ishatu omu bukiizi-bwa-buryo kugyenda. Abanyamurwa bakaba bateera enzamba kuhitsya enganda zoona zaatsimbura.

Obundi oreebire nihabaho empinduka omu kibiina ezi orikugumirwa kwikiriza. Kandi nihabaasa kuba habaireho empinduka nyingi ezi obaire otarikuteekateeka zikakurenga okashoberwa. Nari obundi noobaasa kuba obaire nookunda entebeekanisa ezimwe kandi ezi obaire otarikwenda ngu zihinduke. Enshonga yoona erikukureetera kugumirwa, noobaasa kuba oreebire ngu okwikiriza kwawe kugyeziibwe, kikakutwarira obwire kumanyiira. N’obu kyakuba kiri kityo, twateeraho kworobera empinduka ezi, nitwija kureeba ngu Yehova naatuha emigisha.

Omu biro bya Musa, Yehova akeebembera obukaikuru bw’abashaija, abakazi, n’abaana kuraba omu ihamba. Bakaba batarikwija kugumaho bahuriire ku ogire ngu bakaba bataine bureeberezi bwe n’obuhabuzi bwe. Obunaku obu, obuhabuzi bwa Yehova nibutuhwera kuguma tuhami omu by’omwoyo. Kandi nangwa, nituba gye! N’ahabw’ekyo, twena ka tumariirire kworobera amaraka g’enzamba ez’akasirikiriro nk’Abaisraeli abeesigwa!