EKICWEKA EKY’OKWEGA 31
Omugisha Gwawe gw’Okushaba Gutware Nk’ogw’omuhendo
“Okushaba kwangye kube nk’omugaju omu maisho gaawe.” —ZAB. 141:2.
EKYESHONGORO 47 Shaba Yehova Buri Izooba
EBIRAAGAMBWEHO *
1. Twine kutwara tuta omugisha gwaitu ogw’okushaba Yehova?
TUHAIRWE omugisha gw’omuhendo, ogw’okugamba n’Omuhangi w’eiguru n’ensi kurabira omu kushaba. Kiteekateekyeho: Nitubaasa kugambira Yehova ekiri omu mitima yaitu, obwire bwona, omu rurimi rwona, tutaragaine nawe. Nitubaasa kushaba turi aha kitanda omu irwariro nari omu kihome, twine obwesigye ngu Tataitwe orikutukunda naija kutuhurira. Titurikuzaanazaanisa omugisha ogu.
2. Omugabe Daudi akooreka ata ngu naasiima munonga omugisha gw’okushaba?
2 Omugabe Daudi akaba naasiima munonga omugisha gw’okushaba. Akeeshongora ati: “Okushaba kwangye kube nk’omugaju omu maisho gaawe.” (Zab. 141:1, 2) Omu bwire bwa Daudi, obubaane obwabaire nibukoresibwa abanyamurwa omu kuramya okw’amazima bukaba bwine kutebeekanisibwa gye. (Kur. 30:34, 35) Daudi okugamba aha bubaane nikyoreka ngu akaba naayenda kutebeekanisa ebi arikuza kugambira Ishe ow’omu iguru. Kandi ekyo naitwe nikyo turikwenda kukora. Nitwenda okushaba kwaitu kushemeze Yehova.
3. Tushemerere kuba twine miteekateekyere ki twaba nitushaba Yehova, kandi ahabw’enki?
3 Twaba nitushaba Yehova twine kwetantara omweshungo. Kureka twine kumushaba omu muringo gw’ekitiinisa. Teekateeka aha kworekwa okurikushemeza okwahairwe Isaaya, Ezekieli, Danieli, na Yohaana. Ebi baareebire nibitaana, kwonka haine eki birikushushanisa. Byona nibyoreka ngu Yehova n’Omugabe oine ekitiinisa. Isaaya akareeba Yehova “ashutami aha kitebe ky’obukama kiraingwa ekitairwe ahaiguru.” (Isa. 6:1-3) Ezekieli akareeba Yehova ayetooroirwe ‘okumurinkana nk’okw’omuhanganzima.’ (Ezk. 1:26-28) Danieli akareeba “omukuru owa iranaira” ajwire ebirikwera kandi ekitebe kye kikaba kiine endimi z’omuriro. (Dan. 7:9, 10) Kandi Yohaana akareeba Yehova ashutami aha kitebe ekyehinguririziibwe omuhanganzima ogurikushusha simaragido. (Kush. 4:2-4) Twateekateeka aha kitiinisa kya Yehova ekitarikubaasa kugyeragyeranisibwa, nitwijukibwa omugisha gw’amaani ogw’okugamba nawe kurabira omu kushaba, n’obukuru bw’okukikora omu muringo gw’ekitiinisa. Kwonka shi tushemereire kushaba tuta?
“N’AHABW’EKYO, MUSHABE MUTI”
4. Nitubaasa kwegyera ki aha bigambo by’okubanza eby’okushaba kw’eky’okureeberaho ebiri omu Matayo 6:9, 10?
4 Shoma Matayo 6:9, 10. Yesu omu rubazo rwe orw’aha rushozi, akeegyesa abeegi be kushaba omu muringo ogurikushemeza Ruhanga. Yesu bwanyima y’okugira ngu “n’ahabw’ekyo, mushabe muti,” akabanza kworeka ebikuru ebirikukwata aha kigyendererwa kya Yehova, okweza eiziina rye, okwija kw’Obukama bwe oburaacwekyereze boona abarikumuhakanisa, n’emigisha ei ari haihi kuha abantu. Twagamba aha bintu nk’ebyo omu kushaba kwaitu, nitworeka ngu ekigyendererwa kya Ruhanga ni kikuru ahariitwe.
5. Kihikire shi kushaba aha bikwatiraine n’enshonga ezirikutukwataho?
5 Omu bigambo ebirikukurataho omu kushaba okwo, Yesu akooreka ngu kihikire kugamba aha nshonga ezirikutukwataho. Nitubaasa kushaba Yehova kutuha eby’okurya buri izooba, kutusaasira ebibi byaitu, kuturinda okwohibwa, n’okutujuna Omubi. (Mat. 6:11-13) Twashaba Yehova ebintu ebyo, nitworeka ngu nitumwesiga kutubaisaho, kandi nitworeka ngu nitwenda atusiime.
Omushaija n’omukazi we nibabaasa kushaba aha bikwatiraine naki? (Reeba akacweka 6) *
6. Ebiri omu kushaba kw’eky’okureeberaho nibyo byonka ebi twine kugambaho omu kushaba? Shoboorora.
6 Yesu akaba atarikwenda ngu abakuratsi be bagume nibagarukamu ebigambo byenyini ebiri omu kushaba kw’eky’okureeberaho. Omu kushaba kwe okundi, akagamba aha nshonga ezindi ezaabaire nizimukwataho omu bwire obwo. (Mat. 26:39, 42; Yoh. 17:1-26) Nikyo kimwe, naitwe nitubaasa kugamba aha kintu kyona ekirikutwerarikiriza. Twaba nituza kucwamu aha nshonga nkuru, nitubaasa kushaba obwengye n’okwetegyereza. (Zab. 119:33, 34) Twaba nituza kutandika obuheereza bugumire, nitubaasa kushaba okumanya n’okwetegyereza. (Enf. 2:6) Abazaire nibabaasa kushabira abaana baabo, abaana nibabaasa kushabira abazaire baabo, kandi twena nitubaasa kushabira abeegi ba Baibuli n’abu turikubuurira. Buzima, okushaba kwaitu tikushemereire kugarukira aha kushaba obuhwezi.
Ni bintu ki ebi turikubaasa kusiimira Yehova kandi tukamuhimbisa omu kushaba? (Reeba akacweka 7-9) *
7. Ahabw’enki twine kuhimbisa Yehova omu kushaba?
7 Twine kwijuka kuhimbisa Yehova omu kushaba kwaitu. Tihaine ondiijo ou twine kuhimbisa kukira Ruhanga. ‘Ni murungi, kandi naarahuka kusaasira.’ Kandi ‘aijwire embabazi, tarikurahuka kuguubwa kubi, aine [rukundo etarikuhinduka] n’amazima.’ (Zab. 86:5, 15) Buzima twine enshonga zihikire ezirikutureetera kuhimbisa Yehova ahabw’eki ari, n’ebi arikukora.
8. Ni bintu ki ebimwe ebi turikubaasa kwebariza Yehova? (Zaaburi 104:12-15, 24)
8 Oyihireho okuhimbisa Yehova omu kushaba kwaitu, nitwenda n’okumwebaza ahabw’ebirungi ebi arikutuha. Nk’eky’okureeberaho, nitubaasa kumusiima ahabw’erangi nungi ezi turikureeba omu bimuri, eby’okurya binuzire, n’okugira abanywani barungi abarikuturuhuura. Tataitwe omukundwa atuhaire ebintu ebi n’okukiraho kutureetera kushemererwa. (Shoma Zaaburi 104:12-15, 24.) Okukira munonga, nitwebaza Yehova ahabw’okutuha eby’okurya bingi eby’omwoyo n’amatsiko g’omuhendo aga nyentsya.
9. Niki ekirikubaasa kutuhwera kwijuka kusiima Yehova? (1 Abatesalonika 5:17, 18)
9 Nitubaasa kurahuka kwebwa kwebaza Yehova ahabwa byona ebi arikutukorera. Niki ekirikubaasa kukuhwera kwijuka? Noobaasa kuhandiika byona ebi oshabire Yehova, kandi butoosha ogume nooshwijuma kureeba oku akugarukiremu. Bwanyima oshabe kumwebaza ahabw’okukuhwera. (Shoma 1 Abatesalonika 5:17, 18.) Teekateeka ahari eki: Nituhurira twine okushemererwa kandi turikukundwa, abandi baatusiima. Nikyo kimwe, twaijuka kusiima Yehova ahabw’okugarukamu okushaba kwaitu, nikimushemeza munonga. (Kol. 3:15) Ni nshonga ki endiijo nkuru ei twine kwebariza Ruhanga waitu?
YEBAZA YEHOVA AHABW’OMWANA WE OMUKUNDWA
10. Kurugiirira ahari 1 Petero 2:21, ahabw’enki twine kwebaza Yehova ahabw’okwohereza Yesu omu nsi?
10 Shoma 1 Petero 2:21. Tushemereire kwebaza Yehova ahabw’okwohereza Omwana we kutwegyesa. Twayega ebirikukwata ahari Yesu n’ebi yaarabiremu nitwetegyereza gye Yehova, kandi nitumanya n’oku turikubaasa kumushemeza. Twikiririza omu kitambo kya Kristo, nitubaasa kugira omukago murungi na Yehova Ruhanga, kandi nitugira n’obusingye nawe.—Rom. 5:1.
11. Ahabw’enki twine kushaba Yehova kurabira omuri Yesu?
11 Nitwebaza Yehova ahabw’okugira ngu nitubaasa kumushaba kurabira omu Mwana we. Yehova naagarukamu okushaba kwaitu kurabira omuri Yesu. Twashaba kurabira omu iziina rya Yesu, buzima Yehova naahurira okushaba kwaitu kandi naakugarukamu. Yesu akashoboorora ati: ‘Kyona eki muraashabe omu iziina ryangye, niinyija kukikora, Isheboona abone kuhimbisibwa omu Mwana.’—Yoh. 14:13, 14.
12. Ni nshonga ki endiijo ei twine kwebariza Yehova ahabw’Omwana we?
12 Yehova naatusaasira ebibi byaitu kurabira omu kitambo kya Yesu. Ebyahandiikirwe nibigira ngu Yesu ‘Omunyamurwa omukuru, ashutami aha rubaju rwa buryo orw’ekitebe ky’obukama obw’Ow’ekitiinisa omu iguru.’ (Heb. 8:1) Yesu “n’Omutonganizi [waitu] ahari Isheboona.” (1 Yoh. 2:1) Ka nitusiima munonga Yehova ahabw’okutuha Omunyamurwa Omukuru oine embabazi, orikwetegyereza gye obweremwa bwaitu kandi ‘orikututonganira’! (Rom. 8:34; Heb. 4:15) Tituhikiriire n’ahabw’ekyo okushaba kwaitu tikurikubaasa kuhika ahari Yehova butunu haaba hatariho kitambo kya Yesu. Buzima, nitwikiriza ngu titurikubaasa kwebaza Yehova ekirikumara ahabw’ekitambo ky’Omwana we eki yaahaireyo ahabwaitu!
SHABIRA AB’EISHE-EMWE NA BANYAANYAKO
13. Aha kiro eky’enyima Yesu atakafiire, akooreka ata ngu naakunda abeegi be?
13 Aha kiro ekyahereerukireyo Yesu atakafiire, akashaba n’abeegi be kumara obwire buraingwa, arikushaba ngu Ishe “abarinde Omubi.” (Yoh. 17:15) Yesu ka yaayorekire ngu naabakunda munonga! Akaba ariyo naaza kugyezibwa munonga, kwonka nabwo akata omutima aha kuhwera entumwa ze.
Nitubaasa kugamba ahari ki twaba nitushabira ab’eishe-emwe na banyaanyazi-itwe? (Reeba akacweka 14-16) *
14. Nitubaasa kworeka tuta ngu nitukunda ab’eishe-emwe na banyaanyazi-itwe?
14 Naitwe nitutooreza Yesu, tutarikuta omutima aha byaitu twenka. Kureka butoosha nitushabira ab’eishe-emwe na banyaanyazi-itwe. Twakora tutyo, nituba nitworobera ekiragiro kya Yesu eky’okuguma nitukundana, kandi nituba nitworeka Yehova oku turikukunda munonga Abakristaayo bagyenzi baitu. (Yoh. 13:34) Okushabira ab’eishe-emwe na banyaanyazi-itwe tikushiisha bwire. Ekigambo kya Ruhanga nikigira ngu “okushaba kw’ohikiriire [kwine] amaani maingi omu kukora kwakwo.”—Yak. 5:16.
15. Ahabw’enki twine kushabira ab’eishe-emwe bagyenzi baitu?
15 Twine kushabira ab’eishe-emwe ahakuba nibagyezibwa omu miringo mingi. Nitubaasa kushaba Yehova kubahwera kwemera endwara, ebihikiirizi, entaro, okuhiiganisibwa, nari obundi buremeezi. Nitubaasa n’okushabira ab’eishe-emwe na banyaanyazi-itwe abarikwefeerereza kuhwera abahikirweho ebihikiirizi. Obundi haine abu orikumanya abarikuraba omu mbeera zigumire nk’ezo. Ahabw’enki otarikugamba amaziina gaabo waaba oyehereire omu kushaba? Nitworeka ngu twine rukundo y’eishe-emwe turikushaba Yehova ngu abahwere.
16. Ahabw’enki twine kushabira abatoorainwe kureeberera ekibiina?
16 Abatoorainwe kureeberera ekibiina nibagasirwa omu kushaba kw’abandi. Okushaba nk’oku kukagasira entumwa Paulo. Akahandiika ati: “Kandi naanye munshabire, mbone kuheebwa okugamba n’obumanzi, hoona ahi ndyashamiza akanwa kangye okumanyisa enaama y’engiri.” (Efe. 6:19) Naitwe ebiro ebi, twine ab’eishe-emwe baingi abeeziriki abatoorainwe kutureeberera. Nitworeka ngu nitubakunda twashaba Yehova kuha omugisha ebi barikukora.
WAABA NOOJWEKYERA ABANDI OMU KUSHABA
17-18. Ni ryari obu turikubaasa kujwekyera abandi omu kushaba, kandi tushemereire kuguma nitwijuka ki?
17 Obumwe, nituba twine kujwekyera abandi omu kushaba. Nk’eky’okureeberaho, munyaanyazi-itwe orikwegyesa omwegi wa Baibuli naabaasa kugambira ondiijo ou ari nawe kushaba. Munyaanyazi-itwe owaagambirwa kushaba obundi tarikumanya gye omwegi, n’ahabw’ekyo nikibaasa kumwetengyesa kushaba aha muheru gw’okwega. Omu muringo ogu, naabaasa kushaba ebirikuhikaana n’embeera y’omwegi.
18 Ow’eishe-emwe naabaasa kujwekyera abandi omu kushaba aha ruteerane rw’okuza omu kubuurira nari orw’ekibiina. Ab’eishe-emwe abahairwe omugisha ogu baine kwijuka ekigyendererwa ky’oruteerane orwo. Okushaba tikushemereire kukoresibwa kuhana abandi nari kuranga ebirango. Omu nteerane nyingi ez’ekibiina, ekyeshongoro n’okushaba nibitwara edakiika itaano, n’ahabw’ekyo ow’eishe-emwe orikushaba tashemereire kukoresa ‘ebigambo bingi,’ na munonga aha kutandika kw’oruteerane.—Mat. 6:7.
TWARA OKUSHABA NKA KIKURU AHARIIWE
19. Niki ekiraatuhwere kwetebeekanisiza ekiro kya Yehova eky’okucwa orubanja?
19 Tushemereire kutwara okushaba nk’ekintu kikuru okukira munonga obu ekiro kya Yehova eky’okucwa orubanja kiri haihi kuhika. Aha bikwatiraine n’enshonga egi, Yesu akagira ati: “Mugume nimureeba obutwire bwona, nimushaba ngu mubaase kukira ebyo byona ebiribaho.” (Luk. 21:36) Eego, okushaba obutoosha nikutubaasisa kuguma nitureeba omu by’omwoyo kugira ngu ekiro kya Ruhanga kitatugwaho tuteteekateekire.
20. Okushaba kwaitu nikubaasa kuba kuta nk’obubaane bw’omugaju murungi?
20 Twayega ki? Nitutwara omugisha gwaitu gw’okushaba nk’ogw’omuhendo munonga. Omu kushaba kwaitu tushemereire kwebembeza ebiine akakwate n’ekigyendererwa kya Yehova. Kandi nitusiima n’Omwana wa Ruhanga, n’obutegyeki bw’Obukama bwe, kandi nitushabira n’ab’eishe-emwe bagyenzi baitu. N’ekindi, nitubaasa kushaba Yehova kutuha eby’omubiri n’eby’omwoyo. Twateekateeka munonga aha bi turikuza kugambaho omu kushaba kwaitu, nitworeka ngu nitusiima omugisha ogu ogw’omuhendo. Ebigambo byaitu nibiija kuba nk’obubaane bw’omugaju murungi ahari Yehova, kandi eki ‘nikimushemeza.’—Enf. 15:8.
EKYESHONGORO 45 Okuteekateeka kw’Omutima Gwangye
^ Nitusiima munonga omugisha gw’okushaba ogu Yehova atuhaire. Nitwenda ngu okushaba kwaitu kube nk’obubaane bw’omugaju murungi. Omu kicweka eki nituza kureeba ebi turikubaasa kugambaho omu kushaba kwaitu. Kandi nituza n’okureeba enshonga ezi twine kwijuka twaba nitujwekyera abandi omu kushaba.
^ ENSHOBOORORA Y’EBISHUSHANI: Omushaija n’omukazi we nibashabira omwana waabo ori aha ishomero, omuzaire waabo orwaire, n’okutunguuka kw’omwegi waabo.
^ ENSHOBOORORA Y’EBISHUSHANI: Ow’eishe-emwe muto naashaba arikusiima Yehova ahabw’ekitambo kya Yesu, ensi nungi, n’eby’okurya birungi..
^ ENSHOBOORORA Y’EBISHUSHANI: Munyaanyazi-itwe naashaba ngu Yehova ahe Akakiiko Akareeberezi omwoyo gurikwera, kandi ahwere n’abo abahikirweho ebihikiirizi n’abarikuhiiganisibwa.
