1-2. Maraika akagambira ki abakazi abaagiire aha kituuro kya Yesu, kandi Yesu akabatuma kukora ki?

BUKABA buri omu kasheeshe kare munonga, ahari Nisani 16, 33 Y.A.K. Abakazi bamwe abarikukunda Ruhanga abaabaire baine obusaasi bwingi, bakagyenda baaza aha kituuro kya Yesu Kristo Mukama waabo bwanyima y’eshaaha ezirengire 36 aherize kuziikwa. Barikwenda kuta emigaju n’amajuta aha mutumbi gwe, bakashoberwa ku baashangire ekituuro kirimu busha! Maraika akabagira ngu Yesu azookire omu bafu, kandi yaayongyeraho ati: ‘Naija kubabandiza Galilaaya, okwo niyo muraamureebere.’​—Mat. 28:1-7; Luk. 23:56; 24:10.

² Bwanyima y’abakazi abo kuruga aha kituuro, Yesu akabeeyoreka yaabatuma ati: “Mugyende, mugambire bagyenzi bangye baze Galilaaya, okwo niyo barandeebere.” (Mat. 28:10) Yesu ashemereire kuba yaabaire aine obuhabuzi bukuru obu arikwenda kuha abeegi be, ahakuba oru nirwo ruteerane rw’okubanza oru yaatebeekaniise bwanyima y’okuzooka!

3-4. Ahabw’enki turikubaasa kugira ngu ekiragiro ekiri omuri Matayo 28:19, 20 tikirahairwe entumwa zonka? (Reeba ekishushani ekiri aha mutwe.)

³ Shoma Matayo 28:16-20. Omu ruteerane oru Yesu yaatebeekaniise, akagamba omurimo mukuru ogu abeegi be baabaire baine kukora omu kyasha ky’okubanza kyona, kandi naitwe nigwo turikukora na hati. Akagira ati: ‘N’ahabw’ekyo mugyende omu mahanga goona, muhindure abantu abeegi, mubeegyese kworobera byona ebi naabaragiire.’

⁴ Yesu naayenda abakuratsi be boona babuurire. Ekiragiro eki akaba atakihaire entumwa ze 11 abeesigwa bonka. Eki nitubaasa  kukihamya tuta? Mbwenu shi entumwa bonka nibo baabaire bariho obu yaaha ekiragiro eki aha rushozi omuri Galilaaya? Ijuka ngu maraika akagambira abakazi ngu nibaza kumureebera omuri Galilaaya. N’ahabw’ekyo abakazi abeesigwa nabo bashemereire kuba baabaire bariho aha ruteerane orwo. Kwonka orwo ti rwo rwabaire oruteerane rw’aha muheru. Entumwa Paulo naagira ngu Yesu akeeyoreka “ab’eishe-emwe okukira ahari magana ataano” bari hamwe. (1 Kor. 15:6) Bakaba bari hamwe nkahi?

5. Niki eki turikwega omu 1 Abakorinso 15:6?

⁵ Twine enshonga nungi ezirikutureetera kuteekateeka ngu Paulo akaba naamanyisa oruteerane rwa Galilaaya orurikugambwaho omuri Matayo eshuura ya 28. Ni nshonga ki ezo? Ey’okubanza, baingi aha beegi ba Yesu bakaba nibaruga Galilaaya. N’ahabw’ekyo ahabw’abantu kuba baingi kikaba kyorobi kuta oruteerane aha rushozi omuri Galilaaya omu mwanya gw’okuruta omu ka y’omuntu. Eya kabiri, Yesu ku yaaherize kuzooka akabugana entumwa ze 11 omu ka y’omuntu omuri Yerusaalemu. Ku ogire ngu Yesu akaba naayenda kugambira entumwa ze kuba nibo bonka abaabuurira n’okuhindura abantu abeegi, ekyo akaba naabaasa kukikorera omuri Yerusaalemu omu mwanya gw’okubeeta hamwe n’abakazi n’abandi kumubugana omuri Galilaaya.​—Luk. 24:33, 36.

6. Ebiri omuri Matayo 28:20 nibyoreka bita ngu ekiragiro ky’okuhindura abantu abeegi nikikwata n’aha bunaku bwaitu, kandi abantu nibakyorobera bata?

⁶ Yetegyereze enshonga ya kashatu enkuru. Ekiragiro kya Yesu eky’okuhindura abantu abeegi kikaba kitari ky’Abakristaayo b’omu kyasha ky’okubanza bonka. Eki nitukimanya tuta? Yesu akahendera obuhabuzi bwe obu yaahaire abakuratsi be n’ebigambo ebi: ‘Ndi hamwe naimwe ebiro byona okuhitsya obu ensi egi erihwaho.’ (Mat. 28:20) Kuhikaana n’ebigambo bya Yesu, omurimo gw’okuhindura abantu abeegi nigukorwa omu bwijwire obunaku obu. Kiteekateekyeho! Haihi abantu nka 300,000 buri mwaka nibabatizibwa kuba Abajurizi ba Yehova kandi abeegi ba Kristo!

7. Hati nituza kushwijuma ki, kandi ahabw’enki?

⁷ Baingi abarikwega Baibuli nibatunguuka bahika aha kubatizibwa. Kwonka, abamwe nibeeziringa kuhinduka abeegi ba Yesu. Nibakunda kwega Baibuli, kwonka tibarikutunguuka kuhika aha kubatizibwa. Twaba nitwegyesa abantu Baibuli, nituba twine amatsiko g’okubahwera kuta omu nkora ebi barikwega, reero bahindukye abeegi ba Kristo. Ekicweka eki nikiza kworeka oku turikubaasa kuhika abeegi ba Baibuli aha mutima, n’oku turikubaasa kubahwera kutunguuka omu by’omwoyo. Ahabw’enki twine kugamba aha nshonga egi? Ahakuba nitubaasa kuhitsya obwire tucwemu yaaba turaagumizemu nitwegyesa omuntu Baibuli nari kurekyera aho.

8. Ahabw’enki obumwe kigumire kuhika abeegi baitu ba Baibuli aha mutima?

⁸ Yehova naayenda ngu abantu bamuheereze ahabw’okumukunda. N’ahabw’ekyo ekigyendererwa kyaitu n’okuhwera abeegi ba Baibuli kwetegyereza ngu Yehova naabafaho munonga, kandi ngu naabakunda munonga. Nitwenda kubahwera kureeba ngu Yehova “n’ishe w’efuuzi kandi omucwi w’emanja w’abafaakazi.” (Zab. 68:5) Abeegi baawe ba Baibuli baaheza kureeba ngu Ruhanga naabakunda, emitima yaabo neebaasa kukwatwaho kandi rukundo ei bamwiniire eyeyongyere. Abeegi ba Baibuli abamwe nibabaasa kugumirwa kureeba Yehova nka Ishebo orikubakunda ahabw’okugira ngu baishebo ab’omubiri bakaba batarikubakunda kandi batarikubafaho. (2 Tim. 3:1, 3) N’ahabw’ekyo waaba noobeegyesa Baibuli, gamba aha mitwarize mirungi ya Yehova. Hwera abeegi baawe ba Baibuli kwetegyereza ngu Ruhanga waitu oine rukundo naayenda batungye amagara agatahwaho,  kandi naaba ayeteekateekire kubahwera kuhika aha kigyendererwa kyabo. Niki ekindi eki turikubaasa kukora?

9-10. Ni butabo ki obu twine kukoresa omu kwegyesa abeegi ba Baibuli, kandi ahabw’enki nibwo twine kukoresa?

⁹ Koresa obutabo “Niki Eki Turikwega omu Baibuli?” na “Mwerindire omu Kukunda kwa Ruhanga.” Obutabo obwo okukira munonga butebeekanisiibwe kutuhwera kuhika abeegi baitu ba Baibuli aha mitima. Nk’eky’okureeberaho, eshuura 1 ey’akatabo Eki Turikwega neegarukamu ebibuuzo ebi: Mbwenu shi Ruhanga naatufaho nari taine saasi?, Ruhanga naayehurira ata abantu baaba nibabonabona?, na Noobaasa kuba munywani wa Yehova? Kandi shi akatabo Okukunda kwa Ruhanga? Akatabo aka nikahwera omwegi wa Baibuli kwetegyereza ngu yaagyendera aha misingye ya Baibuli embeera ze niziba nungi kandi nairira haihi Yehova. N’obu oraabe waayegire obutabo obu n’abandi, tebeekanisa gye buri kuza kwegyesa omwegi wa Baibuli, kandi ta omutima aha byetengo bya buri mwegi.

 ¹⁰ Kandi shi omwegi wa Baibuli ku yaakuba naayenda kumanya enshonga erikugambwaho omu kitabo kyaitu ekindi ekitari omu by’Okukoresa omu Kwegyesa. Noobaasa kumuhiga kushoma ekitabo ekyo ahabwe kugira ngu ogumizemu noomwegyesa omu butabo bw’okukoresa kwegyesa abeegi ba Baibuli obu twaheza kugambaho.

11. Ni ryari obu twine kutandika n’okushaba kandi tukahendera nakwo, kandi noobaasa kushoboororera ota omwegi wa Baibuli enshonga egi?

¹¹ Buri kuza kwega mutandikye n’okushaba. Obwire obwingi, ni kirungi kutandika kushaba n’omwegi wa Baibuli ahonaaho, bwanyima ya saabiiti nkye otandikire kumwegyesa. Twine kuhwera omwegi wa Baibuli kumanya ngu nitubaasa kwetegyereza Ekigambo kya Ruhanga turikuhwerwa omwoyo gurikwera. Ababuurizi abamwe nibashoboorora enshonga y’okushaba barikushomera omwegi wa Baibuli Yakobo 1:5, aharikugira hati: ‘Ku haraabe hariho obuzirwe obwengye, abushabe Ruhanga.’ Reero omubuurizi naabuuza omwegi wa Baibuli ati: “Nitubaasa kushaba tuta Ruhanga kutuha obwengye?” Omwegi wa Baibuli obundi naija kwikiriza ngu twine kushaba Ruhanga.

12. Noobaasa kukoresa ota Zaaburi 139:2-4 kuhwera omwegi wa Baibuli kuboneza omuringo ogu arikushabamu?

¹² Yegyesa omwegi wa Baibuli kushaba. Muhamize ngu Yehova naayenda kuhurira okushaba kwe okurikuruga aha mutima. Shoboorora ngu twaba nitushaba turi twenka, nitugambira Yehova ebiri omu mutima gwaitu byona, obundi ebi turikugumirwa kugambira ondiijo muntu. Ijuka ngu Yehova naaba naamanya ebiri omu biteekateeko byaitu. (Shoma Zaaburi 139:2-4.) Nitubaasa n’okuhiga abeegi baitu ba Baibuli kushaba Ruhanga kubahwera kuhindura emiteekateekyere yaabo egwire, n’okusingura emize mibi. Nk’eky’okureeberaho, omuntu omazire obwire naayega Baibuli, naabaasa kuba naakikunda ekiro kikuru ekiine obukomooko bw’ekikaafiire. Naamanya ngu kigwire, kwonka nabwo naakikunda ebikorwa bimwe eby’ekiro kikuru ekyo. Muhige kugambira Yehova enyehurira ze zenyini, kandi amweshengyereze kumuhwera kukunda ebi Yehova arikukunda.​—Zab. 97:10.

13. (a) Ahabw’enki twine kweta abeegi baitu ba Baibuli kwija omu nteerane ahonaaho nk’oku kirikubaasika? (b) Nitubaasa kureetera tuta omwegi wa Baibuli kuhurira aikaikaine yaija aha Kyombeko ky’Obukama?

¹³ Yeta ou orikwegyesa Baibuli kwija omu nteerane ahonaaho nk’oku kirikubaasika. Ebi arikuhurira omu nteerane z’Ekikristaayo nibibaasa kumuhika aha mutima kandi bimuhwere kutunguuka. Mworekye vidiyo Niki Ekirikukorerwa aha Kyombeko ky’Obukama? kandi mwete n’omuhimbo kwija naiwe omu nteerane. Kyaba nikibaasika muhwere aha by’engyenda. Ni kirungi kuguma noogyenda n’ababuurizi batari bamwe na bamwe waaba nooza kwegyesa omwegi waawe wa Baibuli. Omu muringo ogwo, omwegi naija kumanya abandi omu kibiina, kandi ahurire aikaikaine yaija omu nteerane zaitu.

14. Niki ekirikubaasa kuhiga omwegi wa Baibuli kutunguuka omu by’omwoyo?

¹⁴ Ekigyendererwa kyaitu n’okuhwera omwegi wa Baibuli kutunguuka omu by’omwoyo. (Efe. 4:13) Omuntu yaikiriza kwega Baibuli, naabaasa kuba naayenda kureeba oku okwega kuraamugasire nk’omuntu. Kwonka yaaguma naayeyongyera kukunda Yehova, naabaasa kutandika kuteekateeka aha ku arikubaasa kuhwera abandi, otwariiremu n’ab’omu kibiina. (Mat. 22:37-39) Omu bwire buhikire, oteeziringa kumugambira aha ntebeekanisa y’okushagika omurimo gw’Obukama omu by’esente.

15. Nitubaasa kuhwera tuta omwegi wa Baibuli kukora ekihikire haabaho oburemeezi?

 ¹⁵ Yegyesa omwegi waawe wa Baibuli kumanya eki aine kukora haabaho oburemeezi. Nk’eky’okureeberaho, ka tugire ngu omwegi waawe wa Baibuli otakabatiziibwe yaakugira ngu haine omugwisize kubi omu kibiina. Omu mwanya gw’okugira orubaju oru waashagika, noobaasa kumworeka eki Ebyahandiikirwe birikumuhiga kukora. Naabaasa kucwamu kusaasira ow’eishe-emwe, nari yaaba atarikubaasa kwehuzya ekyabaireho, naaba aine kugaaniira n’omuntu ogwo omu muringo gwa rukundo kandi ogw’embabazi aine ekigyendererwa ‘ky’okubona mwene ishe.’ (Gyeragyeranisa Matayo 18:15.) Hwera omwegi kutebeekanisa ebi arikuza kugamba. Mworekye oku arikubaasa kukoresa JW Library^®, Akatabo k’Okucondooza ak’Abajurizi ba Yehova, na jw.org^® kumanya emiringo y’okusinguramu oburemeezi. Oku arikweyongyera kutendekwa atakabatiziibwe, nikwo arikwija kweyongyera kukoragana gye n’abandi omu kibiina bwanyima.

16. Ahabw’enki ni kirungi kweta ababuurizi abandi kugyenda naiwe kwegyesa omuntu Baibuli?

¹⁶ Twara ababuurizi abandi n’omureeberezi orikutaayaayira ebibiina aha mwegi waawe wa Baibuli. Ahabw’enki? Oyihireho enshonga ezi twaheza kugamba, ababuurizi abandi nibabaasa kuhwera omwegi waawe wa Baibuli omu miringo ei iwe otarikubaasa. Nk’eky’okureeberaho, ka tugire ngu omwegi wa Baibuli ateireho emirundi mingi kucwa omuze gw’okureetsa kwonka yaaremwa. Gyenda n’Omujurizi wa Yehova owaasingwire omuze ogwo bwanyima y’okugaruka enyima emirundi mingi. Omujurizi wa Yehova ogwo naabaasa kuha omwegi waawe obuhabuzi obuhikire. Waaba nooyetiina kwegyesa omwegi waawe wa Baibuli hariho ow’eishe-emwe orikumanya kwegyesa gye, mushabe abe niwe yaamwegyesa eizooba eryo. Teeraho nk’oku kirikubaasika kuguma nootwara ababuurizi abandi aha mwegi waawe wa Baibuli kugira ngu agasirwe omu by’okureeberaho byabo. Ijuka ngu, ekigyendererwa kyaitu n’okuhwera omwegi wa Baibuli kutunguuka omu by’omwoyo.

17-18. Oine kuteekateeka ahari ki waaba nooyenda kurekyera aho kwegyesa omuntu Baibuli?

¹⁷ Omwegi waawe wa Baibuli yaaba atarikutunguuka, bwanyima y’obwire nooba oine kwebuuza oti: ‘Mbwenu shi nyine kurekyera aho kumwegyesa?’ Omu mbeera egi, nooba oine kuteekateeka aha kubaasa kw’omuntu. Abantu abamwe nikibatwarira obwire buraingwa kutunguuka kukira abandi. Yebuuze oti: ‘Omwegi wangye wa Baibuli naatunguukira aha rurengo oruhikire kuhikaana n’embeera ye?’ ‘Mbwenu shi yaatandikire “kworobera” ebintu ebi arikwega nari kubigyenderaho?’ (Mat. 28:20) Omwegi naabaasa kuba naatunguuka mporampora, kwonka ashemereire kuba naakora empindahinduka ezirikureebwa butunu.

¹⁸ Kandi shi omuntu omazire obwire arikwega kwonka hatariho ekirikworeka ngu naasiima  ebi arikwega? Teekateeka aha mbeera egi: Omwegi waawe yaaherize kwega akatabo Eki Turikwega, kandi obundi yaatandikire n’akatabo Mwerindire omu Kukunda kwa Ruhanga, kwonka takaizire omu ruteerane rw’ekibiina na rumwe, nangwa n’Ekiijutsyo! Kandi naakira kushazamu okwega ahabw’obushonga bukye. Omu mbeera nk’egi, nikiba kiri kirungi kugamba n’omwegi waawe wa Baibuli butunu otarikumushereka. *

19. Noobaasa kugambira ki omwegi orikureebeka nk’otarikusiima ebi arikwega, kandi nooba oine kuteekateeka aha nshonga ki?

¹⁹ Noobaasa kutandika orikumubuuza oti: ‘Nooteekateeka ngu ni nshonga ki ey’amaani erikubaasa kukuremesa kuba omwe aha Bajurizi ba Yehova?’ Omwegi naabaasa kugarukamu ati: ‘Nimbaasa kwega Baibuli, kwonka tindikwija kuba omwe aha Bajurizi ba Yehova!’ Egi yaaba niyo miteekateekyere ei aine bwanyima y’okumwegyesa kumara obwire, mbwenu shi nihaba hariho enshonga yoona erikukureetera kugumizamu noomwegyesa? Kwonka, omwegi naabaasa kukugambira enshonga etwire neemuremesa kutunguuka kwonka oshangye ngu iwe waagihurira omurundi gw’okubanza. Nk’eky’okureeberaho, naabaasa kuba naateekateeka ngu tarikubaasa kubuurira enju aha nju. Hati ahabw’okumanya enyehurira ye, nikibaasa kukuhwera kwetegyereza oku oraamuhwere gye.

20. Nitubaasa kuhwerwa tuta Ebyakozirwe 13:48 kucwamu yaaba twine kugumizamu nitwegyesa omuntu Baibuli nari kurekyera aho?

²⁰ Eky’obusaasi, abeegi abamwe bari nk’Abaisraeli ab’omu bunaku bwa Ezekieli. Yehova arikubagambaho, akagambira Ezekieli ati: “Reeba, iwe aharibo ori nk’orikweshongora ekyeshongoro kirungi n’eiraka rirungi naateera gye enanga; ahabw’okuba nibahurira ebi orikugamba, kwonka batarikwija kubikora.” (Ezk. 33:32) Nikibaasa kutugumira kugambira omuntu ngu nituza kurekyera aho kumwegyesa Baibuli. Kwonka, “hatsigaire” obwire bukye. (1 Kor. 7:29) Omu mwanya gw’okumara obwire bwingi aha beegi ba Baibuli abatarikutunguuka, twine kusherura abarikworeka butunu ngu baine ekihika ky’okutunga amagara agatahwaho.​—Shoma Ebyakozirwe 13:48.

21. Ekyahandiikirwe kyaitu ky’omwaka 2020 ni kiiha, kandi nikiza kutuhwera kukora ki?

²¹ Omu 2020, ekyahandiikirwe kyaitu ky’omwaka nikiza kutuhwera kuta omutima aha kwongyera kukora gye omurimo gwaitu ogw’okuhindura abantu abeegi. Kirimu ebigambo ebi Yesu yaagambire omu ruteerane rw’omutaano aha rushozi omuri Galilaaya. Akagira ati: ‘Mugyende, muhindure abantu abeegi.’​—Mat. 28:19.