1. Ahabw’enki abamwe nibaba nibahurira bataine geeyegyesa?

NIKYETENGYESA okukora munonga kubaasa kutunga esente z’okwebaisaho ebiro ebi. Ab’eishe-emwe baingi nibakora eshaaha nyingi kubaasa kutunga eby’okubaisaho amaka gaabo byonka. Abandi nibamara eshaaha nyingi barikuza aha murimo kukora n’okugaruka omuka. Abamwe nibakora emirimo y’emikono egumire munonga kwebaisaho. Aha muheru gw’eizooba, ab’eishe-emwe na banyaanyazi-itwe aba abarikukora n’amaani nibaba baruhire munonga! N’ahabw’ekyo nibaba bataine maani g’okweyegyesa.

2. Nookoresa bwire ki kweyegyesa?

² Kwonka amazima gari ngu, twine kutunga obwire bw’okwega ebiri omu Kigambo kya Ruhanga n’omu bitabo byaitu, kutari kubishoma bushoma beitu kubyega tutaireho omutima. Eki buzima nikyetengyesa twaba nitwenda kuhamya omukago gwaitu na Yehova! (1 Tim. 4:15) Abamwe nibaimuka kare buri kasheeshe kwega hatariho birikuyomba n’ebiteekateeko byabo bikiri gye bwanyima y’okuhuumura nyekiro. Abamwe nibakoresa obwire bw’omu mwabazyo obucureire kweyegyesa n’okuteekateeka aha by’okurya by’omwoyo.

3-4. Habaireho mpinduka ki omu bi ekibiina kirikushohoza, kandi n’ahabw’enki?

³ Hatariho kubangaanisa noikiriza ngu ni kikuru kutunga obwire bw’okweyegyesa. Kwonka shi tushemereire kwega ki? Noobaasa kugira ngu ‘hariho bingi by’okushoma.’ Kandi ‘ninshanga kigumire kubishoma byona.’ Ab’eishe-emwe abamwe nibashoma ebitabo kandi nibareeba na vidiyo ezi turikutunga, kwonka abandi nibashanga kigumire kukikora. Akakiiko Akareeberezi eki nikakimanya. Ahabw’enshonga egi, enyimaho tukamanyisibwa  ngu nibaza kutuubya ebirikushohozibwa ebiteirwe n’ebiri aha mukura.

⁴ Nk’eky’okureeberaho, tihaakishohozibwa Yearbook of Jehovah’s Witnesses, obu eby’okureeberaho bingi ebirikushemeza birikuba biri aha jw.org^® n’omu puroguraamu za JW Broadcasting^® ezi turikureeba buri kwezi. Omunaara gw’Omurinzi ogw’okukoresa omu kubuurira na Awake! hati nizishohozibwa emirundi eshatu omu mwaka. Empinduka ezi tizikozirwe kugira ngu tutungye obwire bw’okukora ebintu ebindi ebitari by’omwoyo. Kureka zikozirwe kutubaasisa kuta omutima aha bintu “ebirikukira” obukuru. (Fil. 1:10) Ka tushwijume tureebe oku turikubaasa kwebembeza ebirikukira obukuru, n’oku orikubaasa kugasirwa omu bwijwire omu kweyegyesa Baibuli.

5-6. Ni bintu ki ebi twine kuhamya ngu twayega n’obwegyendesereza?

⁵ Ni bintu ki ebi twine kwebembeza omu kweyegyesa? Twine kutunga obwire buri izooba kwega Ekigambo kya Ruhanga. Emishororongo ya Baibuli ey’okushoma buri saabiiti okw’ekibiina bakagituubya kutubaasisa kutunga obwire burikumara kuteekateeka aha bi twashoma n’okwongyera kucondooza. Ekigyendererwa kyaitu tikishemereire kuba okushoma emishororongo egyo kugiheza kyonka, beitu twine kwikiriza obutumwa oburimu kutuhika aha mutima n’okutuhwera kwirira haihi Yehova Ruhanga.​—Zab. 19:14.

⁶ Niki ekindi eki twine kwega n’obwegyendesereza? Nituba twine kutebeekanisa Omunaara gw’Omurinzi, ekicweka ky’Okwega Baibuli okw’Ekibiina, n’ebicweka by’oruteerane rw’aha gati ya saabiiti ebindi. Twine n’okushoma buri Omunaara gw’Omurinzi ogw’okukoresa omu kubuurira na Awake!

7. Mbwenu shi twine kuhwamu amaani twaba tutarikubaasa kushoma nari kureeba buri kimwe ekiri aha mukura gwaitu n’aha JW Broadcasting?

⁷ Noobaasa kugira ngu ‘kare, ekyo tikiine nshonga, kandi shi ebintu byona ebiri aha mukura gwaitu, jw.org, n’ebiri aha JW Broadcasting? Ebi ka ni bingi!’ Teekateeka aha ky’okureeberaho eki: Ka tugire ngu omu hoteeri baataho eby’okurya by’emiringo mingi, reero abantu baine kwegaburira. Abarikugura eby’okurya omu hoteeri egyo tibarikubaasa kurya buri ky’okurya ekiriho. N’ahabw’ekyo nibatooranaho emiringo y’eby’okurya ei barikwenda. Nikyo kimwe, waaba otarikubaasa kushoma nari kureeba buri kimwe ekiri aha mukura, otahwamu amaani. Shoma nari oreebe ebi orikubaasa. Hati ka tureebe ekirikutwarirwa omu kweyegyesa, n’oku turikubaasa kugasirwa omu kweyegyesa kwaitu.

8. Noobaasa kukuratira madaara ki waaba nootebeekanisa ekicweka ky’Omunaara gw’Omurinzi, kandi eki nikiija kukugasira kita?

⁸ Okwega nikimanyisa okushoma otaireho omutima oine ekigyendererwa ky’okugasirwa. Ti kushoma ebintu orikurahukiiriza kandi okata omusitaari aha ky’okugarukamu. Nk’eky’okureeberaho waaba nootebeekanisa ekicweka ky’Omunaara gw’Omurinzi eky’okwega, banza oshome akacweka k’ebiraagambweho akari aha kutandika kw’ekicweka. Bwanyima, shoma omutwe gw’ekicweka, emitwe emikye, n’ebibuuzo by’okweijutsya. Waaheza, shoma ekicweka mporampora n’obwegyendesereza. Yetegyereze sentensi erikushoboorora eki akacweka koona karikugambaho, obwire obwingi niyo erikuba neebanza. Sentensi egyo neekuhwera kumanya amakuru g’akacweka. Waaba nooshoma ekicweka kyona, teekateeka aha ku buri kacweka karikushagika emitwe emikye, n’omutwe gw’ekicweka kyona. Yetegyereze ebigambo ebi otarikumanya n’enshonga ezindi ezi  oine kubanza waacondoozaho kubaasa kuzeetegyereza gye.

9. (a) Twine kushwijuma tuta ebyahandiikirwe twaba nitwega Omunaara gw’Omurinzi, kandi n’ahabw’enki? (b) Nk’oku kirikworekwa omuri Yoshua 1:8, twine kukora ki ekindi oyihireho okushoma ebyahandiikirwe?

⁹ Twaba nitwega Omunaara gw’Omurinzi, nituba nitwega Baibuli. N’ahabw’ekyo, ta omutima aha byahandiikirwe, na munonga ebyo ebiraashomwe omu kibiina twaba nitwega. Fayo aha ku ebigambo bikuru ebiri omu kyahandiikirwe birikuhikaana n’enshonga erikugambwaho omu kacweka. Kandi twara obwire oteekateekye aha byahandiikirwe ebi waashoma, n’oku orikubaasa kubigyenderaho.​—Shoma Yoshua 1:8.

10. Kuhikaana n’Abaheburaayo 5:14, ahabw’enki abazaire baine kumara obwire barikutendeka abaana baabo oku baine kweyegyesa n’okucondooza?

¹⁰ N’eky’amazima, abazaire nibaba nibenda ngu abaana baabo batungye okushemererwa omu Kuramya kw’Eka buri saabiiti. Kwonka, n’obu abazaire baraabe nibaba baine kutebeekanisa eki baraayegye omu kuramya kw’eka, tikirikubeetengyesa kuguma nibatebeekanisa ebintu by’omutaano buri saabiiti. N’obu baraabe nibabaasa kureeba puroguraamu ya JW Broadcasting eya buri kwezi omu Kuramya kwabo okw’Eka, nari kukora ebintu by’omutaano nk’okuteeraho kukora emeeri ya Noa, ni kikuru kutendeka abaana oku baine kweyegyesa. Nk’eky’okureeberaho baine kwega kutebeekanisiza enteerane z’ekibiina, nari kucondooza aha kibuuzo eki bababuurize aha ishomero. (Shoma Abaheburaayo 5:14.) Baamara obwire nibeeyegyesa bari omuka, nikiija kubahwera kutahuga omu nteerane z’ekibiina, omu nteerane empango n’obu zaakuba zitarimu vidiyo. N’amazima, obwire bw’okwega tiburikwingana kurugiirira aha mbeera n’emyaka y’abaana.

11. Ahabw’enki ni kikuru kutendeka abeegi baitu ba Baibuli kumanya kweyegyesa omu muringo murungi?

¹¹ N’abeegi baitu ba Baibuli baine kumanya kweyegyesa. Baaba bari basya, nitushemererwa kureeba nibata omusitaari aha by’okugarukamu byabo baaba nibeetebeekanisiza okwega Baibuli nari enteerane z’ekibiina. Kwonka nituba twine kubatendeka kwega kucondooza n’okweyegyesa omu muringo murungi. Twakora tutyo, haabaho oburemeezi omu mwanya gw’okwirukira aha bandi omu kibiina kubahwera, nibaija kuba nibamanya kwetungira obuhabuzi omu bitabo byaitu oburikubaasa kubahwera.

12. Nitubaasa kugira bigyendererwa ki twaba nitweyegyesa?

¹² Waaba otarikukunda kweyegyesa, noobaasa kuteekateeka ngu okweyegyesa tikurikureeta okushemererwa. Kwonka nikibaasika. Tandika orikwega kumara obwire bugufu, reero ogume nooyongyeraho. Yega oine ekigyendererwa. Kwonka ekigyendererwa kyaitu ekikuru munonga  kishemereire kuba okwongyera kwirira haihi Yehova. Ekigyendererwa eky’ahonaaho nikibaasa kuba okugarukamu ekibuuzo eki omuntu abuurize, nari okucondooza aha buremeezi obu twine.

13. (a) Eminyeeto nibabaasa kukuratira madaara ki kushoboororera abandi aha ishomero ebi barikwikiriza? (b) Noobaasa kugyendera ota aha biri omu Abakolosai 4:6?

¹³ Nk’eky’okureeberaho, ori omunyeeto orikushoma? Abeegi bagyenzi baawe boona nibabaasa kuba nibaikiriza ngu ebintu bikabaho birikuruga omu bindi. Noobaasa kuba nooyenda kubooreka ahabw’enki enyikiriza yaabo egwire kurugiirira ahari Baibuli, kwonka nootiina kukikora. Ekyo nikyetengyesa okweyegyesa! Oshemereire kweyegyesa oine ebigyendererwa bibiri: (1) okwongyera aha buhame bwawe ngu Ruhanga niwe yaahangire ebintu byona (2) okwega kushoboorora gye amazima. (Rom. 1:20; 1 Pet. 3:15) Noobaasa kubanza kwebuuza oti: ‘Abeegi bagyenzi bangye nibaha nshonga ki erikubareetera kwikiriza ngu ebintu bikaruga omu bindi?’ Reero orikukoresa ebitabo byaitu, condooza n’obwegyendesereza. Nikibaasa kukworobera kushoboorora ebi orikwikiriza okukira oku orikuteekateeka. Abantu baingi nibaikiriza ngu ebintu bikaruga omu bindi ahabw’okugira ngu omuntu ou barikuha ekitiinisa akabagambira ngu kihikire. Waatunga enshonga emwe nari ibiri, noobaasa kugarukamu gye owaabuuza ayetegyereze.​—Shoma Abakolosai 4:6.

14-16. (a) Noobaasa kwetegyereza ota ekitabo kya Baibuli eki otarikumanya gye? (b) Orikukoresa ebyahandiikirwe ebijuriziibwe, shoboorora oku orikubaasa kwongyera kwetegyereza ekitabo ky’Amosi. (Reeba n’akabokusi “ Reetera Baibuli Kuba Eyaabuzima Ahariiwe.”)

¹⁴ Ka tugire ngu omu ruteerane rw’ekibiina orurikwija nituza kushoma kimwe aha bitabo by’obunabi ebigufu obundi eki otarikwetegyereza gye, kandi tukigaaniireho. Eidaara ry’okubanza n’okukunda ebi nabi ogwo yaahandiikire. Eki nitubaasa kukikora tuta?

¹⁵ Banza oyebuuze oti: ‘Niki eki ndikumanya aha muhandiiki w’ekitabo eki? Akaba ari muntu wa muringo ki, akaba naatuura nkahi, kandi akaba naakora murimo ki?’ Twayetegyereza ebirikukwata aha muhandiiki, nitubaasa kumanya gye ahabw’enki yaakoreise ebigambo n’eby’okureeberaho ebiri omu kitabo eki yaahandiikire. Waaba nooshoma Baibuli, teekateeka aha bigambo ebirikukuhwera kwetegyereza gye omuhandiiki.

¹⁶ Ekindi, noija kushanga kirikuhwera kumanya obu ekitabo kyahandiikwa. Ekyo noobaasa kurahuka kukimanya orikushwijuma ekicweka, “Oku Ebitabo bya Baibuli Birikukuratana” ekiri enyima ya New World Translation of the Holy Scriptures. Okwongyeraho, noobaasa kushwijuma ebirikukwata ahari baanabi n’abagabe ebiri omu Byongyeirweho A6. Ekitabo kya Baibuli eki orikushoma kyaba kiri eky’obunabi, nikibaasa kukuhwera kumanya embeera eyaabaire eriho omu bunaku obu ekitabo ekyo kyahandiikwa. Abandi bakaba baine miteekateekyere ki emibi na bikorwa ki ebi nabi yaabaire aine kubahwera kureka? Ni baahi abaabaire bariho hamwe na nabi ogwo? Kubaasa kumanya gye embeera, nooba oine kushwijuma ebitabo ebindi ebya Baibuli. Nk’eky’okureeberaho, kubaasa kwetegyereza gye ekyabaire kiriho omu bwire bwa nabi Amosi, nikibaasa kukuhwera kushwijuma ebiri omu 2 Abagabe na 2 Obusingye, ebijuriziibwe ahari Amosi 1:1. Noobaasa n’okushwijuma ebiri omu kitabo kya Hosea, owaabaire ariho omu bunaku bumwe na Amosi. Waashwijuma ebitabo ebindi, noobaasa kwetegyereza gye embeera ezi Amosi yaabaire arimu.​—2 Bag. 14:25-28; 2 Bus. 26:1-15; Hos. 1:1-11; Amo. 1:1.

17-18. Orikukoresa eby’okureeberaho ebiri omu bucweka nari eky’okureeberaho ekyawe, yoreka oku okuta omutima aha bushonshorekye bukye kurikureetera okweyegyesa Baibuli kushemeza.

¹⁷ Ni kirungi kushoma Baibuli oine ekihika ky’okwenda kwongyera kumanya. Nk’eky’okureeberaho, ka tugire ngu oriyo nooshoma eshuura ya 12 ey’obunabi bwa Zekaria, erikugamba aha kufa kwa Mesia. (Zek. 12:10) Waahika aha mushororongo gwa 12, nihagira ngu “oruganda rw’enju ya Nasani” rukaba nirwija kucura ahabw’okufa kwa Mesia. Omu mwanya gw’okwehuzya akashonshorekye ako, noobaasa kwemereramu oyebuuze oti: ‘Oruganda rw’enju ya Nasani rwine kakwate ki na Mesia? Hariho omuringo gwona oku ndikubaasa kumanya ebirikukiraho?’ Noobaasa kucondooza aha nshonga egyo. Kimwe aha byahandiikirwe ebijuriziibwe aha mushororongo ogwo omu Baibuli ey’Orunyankore ni 2 Samueli 5:14, aharikworeka ngu Nasani akaba ari omwe ahari batabani b’Omugabe Daudi. Ekya kabiri ekijuriziibwe ni Luka 3:31, aharikworeka ngu Yesu akaba ari mwijukuru wa Nasani kurabira omu Mariamu. (Reeba Omunaara gw’Omurinzi, ogw’Okwamunaana 2017, rup. 32, kacw. 4) Buzima waaheza kumanya enshonga egi, nootunga okushemererwa! Otwire noomanya ngu obunabi nibworeka ngu Yesu akaba ari mwijukuru wa Daudi. (Mat. 22:42) Kwonka Daudi akaba aine abatabani abarikurenga 20. Mbwenu shi tikirikushemeza kureeba ngu Zekaria naayoreka butunu ngu oruganda rw’enju ya Nasani nirwo rwabaire nirwija kucurira okufa kwa Yesu?

¹⁸ Teekateeka aha ky’okureeberaho ekindi. Omu shuura ey’okubanza ey’ekitabo kya Luka, nitushomamu ngu maraika Gaburieli akataayaayira Mariamu, kandi yaamugira ngu naija kuzaara omwana, arikumugira ati: ‘Naija kuba mukuru, ayetwe Omwana wa Rukira-boona; kandi [Yehova] Ruhanga naija kumuta aha kiteebe ky’obugabe bwa ishenkuru Daudi, ategyekye enju ya Yakobo ebiro byona.’ (Luka 1:32, 33)  Nikibaasa kukworobera kuta omutima aha kintu ky’okubanza eki Gaburieli yaagambire ngu, Yesu naija kwetwa “Omwana wa Rukira-boona.” Kwonka Gaburieli akagira ngu Yesu akaba naija ‘kutegyeka’ nk’Omugabe. N’ahabw’ekyo nitubaasa kwebuuza oku Mariamu yaatwaire ebigambo bya Gaburieli. Mbwenu shi Mariamu akeetegyereza ngu Yesu akaba naija kuhungurira Omugabe Heroode, nari omwe aha bagabe abandi omuri Israeli? Yesu ku yaakubaire omugabe omuri Israeli, Mariamu akaabaire nyina w’omugabe, kandi eka ye ekaatwire omu kikaari ky’omugabe. Kwonka Baibuli terikugira ngu Mariamu akagambira Gaburieli ekintu nk’ekyo, n’obu kwakuba okushaba omwanya gw’ahaiguru omu Bukama, nk’oku abeegi ba Yesu babiri baakozire. (Mat. 20:20-23) Akashonshorekye aka nikongyera kutuhamiza ngu Mariamu akaba ari omucureezi munonga!

19-20. Nk’oku kirikworekwa omuri Yakobo 1:22-25 na 4:8, nitweyegyesa twine kigyendererwa ki?

¹⁹ Twine kwijuka ngu ekigyendererwa kyaitu ekikuru eky’okwega ekigambo kya Ruhanga n’ebitabo byaitu n’okwenda kwirira haihi Yehova. Kandi nituba nitwenda n’okureeba gye eki turi n’empinduka ezi twine kukora kubaasa kushemeza Ruhanga. (Shoma Yakobo 1:22-25; 4:8.) N’ahabw’ekyo buri kuza kutandika kweyegyesa, twine kushaba Yehova kutuha omwoyo gwe gurikwera. Twine kumweshengyereza kutuhwera kugasirwa omu bwijwire ebi turikuza kwega, kubaasa kuhinduka abantu barungi abu arikwenda.

²⁰ Twena ka tuteereho kuba nk’omuheereza wa Ruhanga omwesigwa ou omuhandiiki wa zaaburi yaagambireho ngu, ‘naashemerererwa Ebiragiro bya [Yehova,] kandi Ebiragiro ebyo, nibyo arikuteekateekaho nyomushana na nyekiro. Ebi arikukora byona nibigyenda gye.’​—Zab. 1:2, 3.