EKICWEKA EKY’OKWEGA 20
EKYESHONGORO 67 ‘Buurira Ekigambo kya Ruhanga’
Higwa Rukundo Kugumizamu Noobuurira
‘[Amakuru marungi] gashemereire kubanza kubuurirwa omu mahanga goona.’—MAK. 13:10.
ENTIMA
Oku rukundo erikutuhiga kuba abeeziriki, n’okwemarira aha murimo gw’okubuurira.
1. Tukeega ki aha ruteerane rw’omwaka 2023?
AHA ruteerane rw’omwaka 2023, a tukatunga enyetegyereza ezihindwiremu ahari zimwe aha nyikiriza zaitu, kandi tukahurira n’ebirango ebirikushemeza ebirikukwata aha murimo gwaitu gw’okubuurira. Nk’eky’okureeberaho, tukeega ngu abantu abamwe nibaija kuba bakiine omugisha gw’okwikiririza omuri Yehova na bwanyima y’okucwekyerezibwa kwa Babulooni Orukuru. Kandi, tukamanyisibwa ngu kutandika na Novemba 2023, ababuurizi b’Obukama tibaraagarukye kuhayo ripoota y’eshaaha, ebitabo, n’abu bagarukiire omu buheereza. Empinduka ezi shi nizireetera omurimo gwaitu gw’okubuurira kutaba mukuru nk’oku gutwire guri? Ngaaha buzima!
2. Ahabw’enki obuheereza bwaitu nibwongyera kuba bukuru buri izooba eririkuhinguraho? (Mak. 13:10)
2 Buri kuhinguraho obwire, obuheereza bwaitu nibwongyera kuba bukuru. Ahabw’enki? Ahabw’okuba obwire buriyo nibuhwayo. Yetegyereze eki Yesu yaagambire aha murimo gw’okubuurira omu biro by’emperu. (Shoma Mako 13:10.) Kurugiirira ahari Matayo, Yesu akagira ngu amakuru marungi gakaba nigaija kubuurirwa omu nsi yoona “emperu” etakahikire. (Mat. 24:14) Ekigambo emperu nikimanyisa okumariraho kimwe entebeekanisa y’ensi embi ya Sitaane. Yehova akataho ‘ekiro n’eshaaha’ obu ekyo kiraabeho. (Mat. 24:36; 25:13; Byak. 1:7) Kandi buri izooba eririkuhingura, nitwongyera kwirira haihi n’ekiro ekyo. (Rom. 13:11) N’ahabw’ekyo, twine kugumizamu nitubuurira kuhitsya obu emperu eraabeho.
3. Niki ekirikutuhiga kubuurira?
3 Twaba nituteekateeka aha buheereza bwaitu, ni kikuru kwebuuza tuti: Ahabw’enki nitubuurira amakuru marungi? Rukundo niyo erikutuhiga kubuurira. Twabuurira nitworeka ngu nitukunda amakuru marungi, abantu, kandi okukira munonga nitukunda Yehova n’eiziina rye. Ka tushwijume buri emwe aha nshonga ezo.
NITUBUURIRA AHABW’OKUKUNDA AMAKURU MARUNGI
4. Nitutwaza tuta twatunga amakuru garikushemeza?
4 Teekateeka aha ku waayehurire obu waatunga amakuru garikushemeza. Obundi omwe aha b’eka yaanyu akazaara omwana nari okatunga omurimo ogu waabaire nooyendera kimwe. Buzima okaba oine ekihika ky’okugambira ab’eka yaawe na banywani baawe. Mbwenu shi okeehurira otyo obu waahurira amakuru marungi agarikukirirayo ag’Obukama bwa Ruhanga?
5. Okeehurira ota obu waabanza kwega amazima agari omu Kigambo kya Ruhanga? (Reeba n’ebishushani.)
5 Ijuka oku waayehurire obu waabanza kwega amazima agari omu Kigambo kya Ruhanga. Okeetegyereza ngu Sho ow’omu iguru naakukunda, naayenda oze omu ka ye ey’abarikumuramya, naaraganisa kwihaho obusaasi n’okubonabona, kandi ngu noobaasa kugira amatsiko g’okwija kureeba abakundwa baawe abaafiire ku baraazooke omu nsi ensya, n’ebindi bingi. (Mak. 10:29, 30; Yoh. 5:28, 29; Rom. 8:38, 39; Kush. 21:3, 4) Amazima ago gakakureetera kwehurira gye. (Luk. 24:32) Okakunda ebi waabaire nooyega, kandi amazima ago ag’omuhendo okaba nooyenda kugagambira buri omwe.—Gyeragyeranisa Yeremia 20:9.
Obu twabanza kwega amazima, tukaba tutarikubaasa kureka kugamba amazima ago ag’omuhendo! (Reeba akacweka 5)
6. Nooyegyera ki ahari Ernest na Rose?
6 Teekateeka aha ky’okureeberaho ky’ow’e- ishe-emwe orikwetwa Ernest bowaafeereirwe ishe obu yaabaire aine emyaka ikumi. Naagira ati: “Nkaba niinyebuuza nti: ‘Agiire omu iguru? Nari tarigaruka kubaho?’ Nkaba nyiniire eihari abaana abandi abaabaire bakiine baishebo.” Ernest butoosha akaba naaza omu irimbo, atsimba amaju aha kituuro kya ishe, ashaba ati: “Ai Ruhanga, niinyenda kumanya ahu taata ari.” Bwanyima y’emyaka nka 17 Ernest aherize kufeerwa ishe, akashabwa kwegyesibwa Baibuli, kandi akaikiriza. Akatangaara kumanya ngu abafu tihaine eki barikumanya, bari nk’omuntu ogwejegyeire munonga, kandi Baibuli neeraganisa ngu nihaija kubaho okuzooka. (Mub. 9:5, 10; Byak. 24:15) Empereruka, akatunga eby’okugarukamu by’ebibuuzo ebyabaire nibimuteganisa kumara obwire buraingwa. Akashemererwa ahabw’amazima ga Baibuli agu yaabaire naayega. Omukazi we, Rose akamwegaitaho omu kwega, kandi akakunda ebi yaayegire. Omuri 1978 bombi bakabatizibwa. Bakabuurira n’obweziriki ab’eka yaabo, banywani baabo, n’abandi amazima g’omuhendo agu baayegire. N’ekirugiremu, Ernest na Rose bahweraire abantu abarikurenga 70 kuhika aha kubatizibwa.
7. Niki ekirikubaho rukundo ei oiniire amazima ga Baibuli yaatsimba emizi omu mutima gwawe? (Luk. 6:45)
7 Amazima agu turikwega omu Baibuli gaaba gatsimbire emizi omu mitima yaitu, titurikuhunama. (Shoma Luka 6:45.) Nitwehurira nk’abakuratsi ba Yesu abaagizire bati: “Itwe titurikubaasa kuhunama kutagamba ebi twareebire, n’ebi twahuriire.” (Byak. 4:20) Ahabw’okugira ngu nitukunda amazima munonga, nituba nitwenda kugagambira abantu baingi nk’oku kirikubaasika.
NITUBUURIRA AHABW’OKUKUNDA ABANTU
8. Ahabw’enki nitubuurira abandi amakuru marungi? (Reeba akabokusi “ Kunda Abantu—Obahindure Abeegi.”) (Reeba n’ekishushani.)
8 Nka Yehova n’Omwana we, nitukunda abantu. (Enf. 8:31; Yoh. 3:16) Nitugirira esaasi ‘abataine Ruhanga n’abataine matsiko.’ (Efe. 2:12) Baine oburemeezi bwingi munonga, kwonka itwe twine ekirikubaasa kubahwera, nigo makuru marungi g’Obukama bwa Ruhanga. Ahabw’okugira ngu nitubakunda kandi tubainiire esaasi nituteeraho nk’oku kirikubaasika kubabuurira amakuru marungi. Amazima g’omuhendo ago, nigabaasa kubahwera kugira amatsiko, kugira embeera nungi hati, n’okugira omugisha gw’okwija kutunga “amagara agaabuzima,” nigo magara agatahwaho omu nsi ensya.—1 Tim. 6:19.
Ahabw’okugira ngu nitukunda abantu kandi tubainiire esaasi nikituhiga kuteeraho kubabuurira amakuru marungi (Reeba akacweka 8)
9. Niki eki turikurabura abantu aha biro by’omumaisho, kandi ahabw’enki? (Ezekieli 33:7, 8)
9 Kandi rukundo ei twiniire abantu neetuhiga kubarabura ngu emperu y’ensi egi embi eri haihi. (Shoma Ezekieli 33:7, 8.) Nitugirira esaasi abataahi n’ab’eka yaitu abatari mu mazima. Baingi nibakora emirimo yaabo ya butoosha batarikumanya ngu nihaija kubaho “okubonabona kwingi okutakabahoga okwiha aha kuhangwa kw’ensi okuhitsya hati, kandi tikuribaho.” (Mat. 24:21) Nitwenda bamanye ngu omu bwire obwo obw’okucwa orubanja, ediini z’ebishuba niziija kucwekyerezibwa, kandi bwanyima nihaija kukurataho okucwekyerera kw’entebeekanisa y’ensi egi embi ahari Haramagedoni. (Kush. 16:14, 16; 17:16, 17; 19:11, 19, 20) Nitushaba ngu abantu baingi bahurire okurabura oku, kandi batwegaiteho omu kuramya okushemeire hati. Kandi shi abatarikugyendera aha kuraburwa oku hati, otwariiremu n’ab’eka zaitu?
10. Ahabw’enki ni kikuru kugumizamu niturabura abantu?
10 Nk’oku tureebire omu kicweka eky’enyima, nikibaasa kuba kiri ekigyendererwa kya Yehova kujuna abantu abaraahindure emitwarize yaabo baareeba okucwekyerera kwa Babulooni Orukuru. Ku kiraabe nikwo kiri, ni kikuru munonga kugumizamu nitubarabura. Ahakuba, eki turikubagambira hati, nikibaasa kubahwera kugira eki baijuka omu bwire obwo. (Gyeragyeranisa Ezekieli 33:33.) Obundi nibaija kwijuka oku twabarabwire, reero kibahige kutwegaitaho omu kuramya okushemeire obwire butakahweireyo. Nk’oku omurinzi w’ekihome omuri Filipi yaahindukire obu “haabaho omutsitsa” gw’amaani, bamwe aha batarikuhurikiza hati nibaija kuhindura emiteekateekyere yaabo, ensi ku eraatengyetsibwe okucwekyerezibwa kwa Babulooni Orukuru.—Byak. 16:25-34.
NITUBUURIRA AHABW’OKUKUNDA YEHOVA N’EIZIINA RYE
11. Nituha tuta Yehova ekitiinisa, okuhimbisibwa, n’amaani gaitu? (Okushuuruurwa 4:11) (Reeba n’ebishushani.)
11 Enshonga nkuru ahabw’enki nitubuurira amakuru marungi n’ahabw’okugira ngu nitukunda Yehova Ruhanga n’eiziina rye. Nitureeba obuheereza bwaitu nk’omuringo gw’okuhimbisa Ruhanga ou turikukunda. (Shoma Okushuuruurwa 4:11.) Nitwikiriza n’omu mutima gwaitu gwona ngu, Yehova Ruhanga ashemereire kuhimbisibwa, kuheebwa ekitiinisa, n’obushoboorozi, nari amaani kuruga aha baheereza be abeesigwa. Nitumuhimbisa kandi tumuha ekitiinisa twagambira abandi obuhame oburikuhamya ngu ‘niwe yaahangire byona,’ kandi ngu niwe arikutuha amagara. Kandi nitukoresa obwire bwaitu, okubaasa kwaitu, n’ebi twine kwejumba omu kubuurira nk’embeera zaitu oku ziri. (Mat. 6:33; Luk. 13:24; Kol. 3:23) Omu bugufu, nitukunda kugamba ahari Ruhanga ou turikukunda. Kandi nituhurira turikwenda kugambira abandi aha iziina rye n’eki ririkujwekyera. Ahabw’enki?
Nituha Yehova amaani gaitu turikukoresa obwire bwaitu, okubaasa kwaitu, n’ebi twine kwejumba omu kubuurira nk’embeera zaitu oku ziri. (Reeba akacweka 11)
12. Eiziina rya Yehova nituryeza tuta omu buheereza bwaitu?
12 Rukundo ei twiniire Yehova neetuhiga kweza eiziina rye. (Mat. 6:9) Nitwenda kugira eki twakora kwihaho ekijumo eki Sitaane arikuta aha iziina rye arikumugambaho ebishuba. (Kut. 3:1-5; Yob. 2:4; Yoh. 8:44) Omu buheereza bwaitu, twine ekihika ky’okujuririra Ruhanga waitu, turikugambira boona abarikuhurikiza amazima agarikumukwataho. Nitwenda buri omwe amanye ngu omutwarize gwe omukuru ni rukundo, kandi omuringo ogu arikutegyekamu guhikire, n’ogw’oburingaaniza, kandi ngu Obukama bwe buri hakye kumariraho kimwe okubonabona, bukareetaho obusingye n’okushemererwa omu bantu. (Zaaburi 37:10,11, 29; 1 Yoh. 4:8) Twajuririra Yehova turikubuurira, nitweza eiziina rye. Kandi twine okumarwa ahabw’okumanya ngu nitukora ebirikuhikaana n’eiziina eri turikwetererwa. Ahabw’enki?
13. Ahabw’enki nikitwesiimisa kwetwa Abajurizi ba Yehova? (Isaaya 43:10-12)
13 Yehova atutooraine kuba “baakareebi” be nari Abajurizi be. (Shoma Isaaya 43:10-12.) Omu myaka y’enyima, ebaruha kuruga aha Kakiiko Akareeberezi ekagira eti: “Ekitiinisa ekirikukirayo eki buri omwe ahariitwe arikubaasa kugira n’okwetwa Omujurizi wa Yehova.” Ahabw’enki? Teekateeka aha ky’okureeberaho eki. Waaba nooyenda omujurizi ow’okukujuririra omu icwero ry’emanja, nootoorana omuntu ou orikumanya, ou orikwesiga, kandi oine eiziina rirungi, ou abantu barikwikiririzamu. Yehova okututoorana kuba Abajurizi be, nikyoreka ngu naatumanya gye, kandi atwinemu obwesigye ngu nitubaasa kumujuririra ngu niwe Ruhanga wenka ow’amazima. Ahabw’okugira ngu nitugureeba nk’omugisha gw’omutaano kuba Abajurizi be, nitukoresa buri kagisha kumanyisa eiziina rye, n’okworeka ngu ebi barikumugambaho tibihikire. Twakora tutyo, nituba nitukora ebirikuhikaana n’eiziina eriturikweteererwa.—Zab. 83:18; Rom. 10:13-15.
NITWIJA KUGUMIZAMU NITUBUURIRA KUHITSYA AHA MPERU
14.Ni bintu ki ebirikushemeza ebiraabeho omu biro by’omumaisho?
14 Twine ekihika ky’okureeba ebiraabeho omu biro by’omumaisho. Ahabw’emigisha ya Yehova, twine amatsiko g’okureeba abandi baingi barikwikiriza amazima, okubonabona kwingi kutakatandikire. Ka nikitushemeza kumanya ngu n’omu bwire oburaakireyo kuguma omu byafaayo by’abantu, obw’okubonabona kwingi, nitwija kubaasa kureeba abantu baingi barikuruga omu nsi ya Sitaane, kandi batwegaiteho kuhimbisa Yehova!—Byak. 13:48.
15-16. Twine kugumizamu nitukora ki, kandi kuhitsya ryari?
15 Ekyo kitakabaireho, twine omurimo gw’okukora. Twine omugisha gw’okwejumba omu murimo ogutarikwija kugaruka kukorwa, ogw’okubuurira amakuru marungi g’Obukama bwa Ruhanga omu nsi yoona. Kandi, twine n’okurabura abantu aha kiri hakye kubaho. Abantu baine kumanya ngu emperu y’entebeekanisa y’ensi egi embi eri haihi. Reero obunaku bw’okucwa orubanja ku buraahikye, nibaija kumanya ngu obutumwa obu twababuuriire bukaba niburuga ahari Yehova Ruhanga.—Ezk. 38:23.
16 Mbwenu shi tumariire kukora ki? Ahabwa rukundo ei twiniire amakuru marungi, abantu, kandi okukira munonga Yehova Ruhanga n’eiziina rye, nitugumizamu nitubuurira n’obweziriki, kuhitsya obu Yehova araagire ngu “murekyere aho!”
EKYESHONGORO 54 “Ogu Nigwo Muhanda”
a Oruteerane rw’omwaka rukabaho Okitoba 7, 2023, aha Kyombeko ky’Enteerane Empango Newburgh eky’Abajurizi ba Yehova, omuri New York, U.S.A. Bwanyima entebeekanisa yoona ekateebwa aha JW Broadcasting®—Ekicweka 1 omuri Novemba 2023, kandi Ekicweka 2 omuri Jenwari 2024.
b Reeba ekicweka “Baibuli Neehindura Emitwarize y’Abantu—Nkashemezibwa Eby’okugarukamu bya Baibuli Ebirikwetegyerezibwa Gye,” omu Omunaara gw’omurinzi ogwa Febwari 1, 2015.
