1-2. Abamwe nibeehurira bata baaba nibeerima?

 OKURIIMA n’obwire burikushemeza. Waaba oriyo nooriima, hatariho kubangaanisa nooyenda ngu buri kimwe kigyende gye. Kandi baingi abarikuriima nibibagyendera gye. Munyaanyazi-itwe Tsion, a kuruga Ethiopia, naagira ati: “Bumwe aha bwire obwakizireyo kunshemeza, n’obu nyowe na ibanyi twabaire nitweriima. Tukaba tugamba aha nshonga nkuru, kandi tusheka hamwe. Nkashemererwa munonga ku naamanyire ngu mbwine omuntu ou ndikukunda, kandi orikunkunda.”

² Kwonka, ow’eishe-emwe Alessio, kuruga Netherlands, naagira ati: “Nkashemererwa munonga kwongyera kumanya gye omukazi wangye obu twabaire nitweriima, kwonka omu bwire obwo tukaba twine n’oburemeezi.” Omu kicweka eki, nituza kugamba aha bureemezi bumwe obu abarikuriima barikubaasa kugira, n’emisingye ya Baibuli erikubaasa kubahwera kugira okuriima kurungi. Nituza n’okureeba oku abandi omu kibiina barikubaasa kushagika abarikuriima.

EKIGYENDERERWA KY’OKURIIMA

3. Ekigyendererwa ky’okuriima niki? (Enfumu 20:25)

³ N’obu okuriima kuraabe nikushemeza, n’eidaara rikuru eririkubaasa kuhitsya aha bushwere. Omutsigazi n’omwishiki aha izooba ryabo ry’okugaitwa, nibarahira omu maisho ga Yehova ngu nibaija kukundana, kandi bahaane ekitiinisa obwire bwona obu baraamare bahuriire. Tutakaragaine omu muringo gwona, twine kuteekateeka aha nshonga n’obwegyendesereza. (Shoma Enfumu 20:25.) Nikyo kimwe n’okuragaana okw’obushwere. Okuriima nikuhwera abarikwenda kutaaha omu bushwere kumanyana gye, n’okucwamu gye. Obumwe okucwamu  okwo nikubaasa kuba okw’okutaaha omu bushwere nari okuhendera okuriima kwabo. Abarikweriima baacwamu kukuhendera, tikirikumanyisa ngu bashobize. Kureka, okuriima nikuba kuhikiriize ekigyendererwa kyakwo eky’okubahwera kucwamu ekihikire.

4. Ahabw’enki twine kugira emiteekateekyere ehikire aha kuriima?

⁴ Ahabw’enki ni kikuru kugira emiteekateekyere ehikire aha kuriima? Abatari mu bushwere baaba baine emiteekateekyere ehikire, tibarikwija kuriima bataine kigyendererwa ky’okubutaahamu. Kwonka, tibo bonka abaine kugira emiteekateekyere ehikire. Twena twine kugigira. Nk’eky’okureeberaho, abamwe nibateekateeka ngu omutsigazi n’omwishiki baaba nibeeriima baine kutaaha hamwe omu bushwere. Emiteekateekyere egyo neekwata eta aha Bakristaayo abatari mu bushwere? Melissa, otari mu bushwere kuruga United States, naagira ati: “Ab’eishe-emwe na banyaanyazi-itwe abarikuba nibariima nibagyemeserezibwa munonga. N’ekirikurugamu abarikweriima nibagumirwa kuhendera okweriima kwabo n’obu barikuba nibareeba ngu tibarikubaasikana. Abamwe nibeetantarira kimwe okuriima. Buzima nibatunga okugyemeserezibwa kwingi.”

MUTEEREHO KUMANYANA GYE

5-6. Abarikweriima baine kuteeraho kumanya ki? (1 Petero 3:4)

⁵ Waaba nooriima niki ekiraakuhwere kucwamu kutaaha omu bushwere nari kutabuzamu? Muteereho kumanyana gye. Noobaasa kuba oine ebi waabaire noomanya aha ou orikuriima mutakatandikire kweriima. Kwonka hati oine omugisha gw’okumanya kyenyini eki ari ‘omunda omu mutima.’ (Shoma 1 Petero 3:4.) Ekyo nikitwariramu okwongyera kumanya oku ari omu by’omwoyo, emitwarize ye, n’emiteekateekyere ye. Bwanyima y’obwire, oine kuba noobaasa kugarukamu ebibuuzo ebi: ‘Omuntu ogu naija kuba murungi omu bushwere?’ (Enf. 31:​26, 27, 30; Efe. 5:33; 1 Tim. 5:8) ‘Buri omwe naabaasa kufayo aha nyehurira za mugyenzi we? Buri omwe naabaasa kwemera obweremwa bwa mugyenzi we?’ b (Rom. 3:23) Mwaba nimuteeraho kumanyana gye, mwijukye ngu: Okukwatanisa gye tikirikurugiirira aha bi murikushushanisa  byonka, beitu n’aha ku murikwikiriza ebi mutarikushushanisa.

⁶ Ni nshonga ki ezindi ezi oine kumanya ahari mugyenzi waawe mwaba nimweriima? Otakagiriire ou orikuriima enyehurira z’amaani, nikiba kiri kirungi kugaaniira aha enshonga nkuru ezirikutwariramu ebigyendererwa bye. Kandi shi ebirikukwata aha magara, oburemeezi omu by’entaatsya, nari ebintu bibi ebyamubaireho? Tikirikubeetengyesa kugamba aha nshonga zoona mwaba nimutandika kweriima. (Gyeragyeranisa Yohaana 16:12.) Waaba nooreeba ngu bukiri kare kugarukamu ebibuuzo ebimwe ebirikukukwataho, manyisa ou orikuriima. Kwonka nabwo, bwanyima y’obwire nikiija kukwetengyesa kubimumanyisa kugira ngu abaase kucwamu gye. N’ahabw’ekyo, noija kuba oine kugamba buri kimwe butunu.

7. Abarikweriima nibabaasa kumanyana gye bata? (Reeba n’akabokusi “ Okuriima Orikutuura Hare.”) (Reeba n’ebishushani.)

⁷ Noobaasa kumanya gye ota ekiri omu mutima gw’omuntu? Gumwe aha miringo mirungi, n’okugamba butunu, okaba ow’amazima, okabuuza kandi okahurikiza gye. (Enf. 20:5; Yak. 1:19) Kandi nimwija kugasirwa mwakora hamwe ebintu ebirikubabaasisa kugaaniira, nk’okurya hamwe, okugyenda hamwe omu myanya y’orweteeraine, n’okubuurira hamwe. Nimubaasa kwongyera kumanyana gye mwamara obwire n’abanywani n’abanyabuzaare. Ekindi, tebeekanisa eby’okwejumbamu ebirikubaasa kukuhwera kumanya oku arikutwaza omu mbeera ezindi, yaaba ari n’abantu abandi. Yetegyereze eki Aschwin, kuruga Netherlands, yaateireho kukora. Naagamba aha kuriima kwe na Alicia ati: “Tukakora ebyabaire nibibaasa kutuhwera kumanyana gye, nk’okuteeka hamwe, okwozya ebintu n’ebindi. Ku twabaire tuba nitukora hamwe ebintu ebyo, tukaba tureeba obweremwa n’okubaasa oku buri omwe aine.”

8. Abarikweriima nibagasirwa bata baayeyegyesa bari hamwe?

⁸ Kandi nimubaasa kwongyera kumanyana gye murikweyegyesa Baibuli. Mwataaha omu bushwere, nimwija kuba mwine kugira obwire bw’okuramya kw’eka, kworeka ngu Ruhanga aine omwanya mukuru omu bushwere bwanyu. (Mub. 4:12) Ahabw’enki mutarikutaho entebeekanisa y’okwega hamwe murikweriima? N’amazima, mwaba nimweriima nimuba mutakabaire eka, kandi ow’eishe-emwe naaba atakabaire omutwe gwa munyaanyazi-itwe. Kwonka, okwega hamwe butoosha nikiija  kubaasisa buri omwe ahariimwe kumanya embeera y’eby’omwoyo eya mugyenzi we. Max na Laysa, kuruga United States, ni bagamba omugasho ogundi oguri omu kukora ekyo. Max naagira ati: “Obu twabaire tutandikire kweriima, tukeega hamwe omu bitabo byaitu enshonga ezirikukwata aha kuriima, obushwere, n’enshonga z’eka. Ebitabo ebyo bikatubaasisa kugaaniira aha nshonga nkuru ezaabaire zigumire kugambaho.”

EBINDI EBY’OKUTEEKATEEKAHO

9. Abarikweriima baine kuteekateeka ahari ki baaba nibacwamu ou baraagambire ngu nibeeriima?

⁹ Ni baahi abu mwine kugambira ngu nimweriima? Iwe n’ou orikuriima niimwe mwine kwecweramu. Mwaba mutandikire kweriima, nimubaasa kucwamu kugambira abantu bakye. (Enf. 17:27) Mwakora mutyo, nimwetantara okugyemeserezibwa n’ebibuuzo ebitarikwetengyesa. Kwonka, mwaba mutaine ou mugambiire, nimubaasa kweriima bwesherekye mutiinire ngu abandi nibaija kukimanya. Ekyo nikibaasa kuba eky’akabi. N’ahabw’ekyo, nikiba kiri eky’obwengye kugira abu mwamanyisa, abarikubaasa kubaha obuhabuzi burungi n’obuhwezi. (Enf. 15:22) Nk’eky’okureeberaho, nimubaasa kugambiraho bamwe omu ka yaanyu, banywani baanyu abakuzire omu by’omwoyo, nari abareeberezi.

10. Abarikweriima nibabaasa kuhamya bata ngu okuriima kwabo kwaguma kushemeire? (Enfumu 22:3)

¹⁰ Nimubaasa kuhamya muta ngu okuriima kwanyu kwaguma kushemeire? Mwayongyera kumanyana gye, nimwongyera kurigirana. Niki ekirikubaasa kubahwera kuguma mushemeire omu micwe? (1 Kor. 6:18) Mwetantare kugaaniira aha bitashemeire, kuba hamwe mwenka, nari okunywa amaarwa maingi. (Efe. 5:3) Ebintu ebyo nibibaasa kwimutsya ebyetengo by’okwenda kuteerana muremwe kuhamira aha kukora ekihikire. Nikiba kiri eky’obwengye butoosha kugamba aha bi murikubaasa kukora, kuhamya ngu okuriima kwanyu kwaguma kushemeire. (Shoma Enfumu 22:3.) Yetegyereze ekyahweraire Dawit na Almaz kuruga Ethiopia. Nibagira bati: “Tukaba tumara obwire hamwe omu myanya ey’orweteeraine, nari na banywani baitu. Tukaba tutaba twenka omu motoka nari omu nju. N’ahabw’ekyo, tukeetantara embeera ezaabaire nizibaasa kutureetera kwohibwa.”

11. Abarikweriima baine kuteekateeka aha nshonga ki baaba nibacwamu oku baraayorekane rukundo?

¹¹ Kandi shi ebikorwa by’okworekana rukundo? Ebikorwa ebimwe nibibaasa kuba bishemeire, okuriima kwayongyera kukura. Kwonka, mwayongyera kurigirana nimubaasa kugumirwa kucwamu gye. (Kyesh. 1:2; 2:6) Mwarengyesereza omu kworekana rukundo nikibaasa kurugamu okukora ebitashemeire. (Enf. 6:27) N’ahabw’ekyo, mwatandika kweriima, mugaaniire aha bugarukiro obu muraateho kuhikaana n’emisingye ya Baibuli. c (1 Tes. 4:3-7) Mwebuuze muti: ‘Abantu omu kicweka kyaitu nibatwara bata omuringo ogu turikworekanamu rukundo? Mbwenu shi ebikorwa ebyo nibibaasa kutureetera kugira ebyetengo bibi?’

12. Abarikweriima baine kumanya ki baagira oburemeezi nari obutaikirizana?

¹² Nimubaasa kushoboorora muta oburemeezi n’obutaikirizana? Kandi shi mwaba nimukira kugira obutaikirizana? Mbwenu shi ekyo nikyoreka ngu okweriima kwanyu tikwine rugyendo? Ngaaha tikwo kiri, abari omu  bushwere boona nibagira obutaikirizana. Obushwere obuhami nibukorwa abantu babiri abarikubaasa kukwatanisa kusingura obutaikirizana bwabo. N’ahabw’ekyo, oku murikuteeraho kushoboorora oburemeezi bwanyu hati, nikworeka yaaba nimwija kugira obushwere burungi. Mwaba nimweriima mwebuuze muti: ‘Nitubaasa kugaaniira aha nshonga twikaikaine, kandi omu muringo gw’ekitiinisa? Nitwikiriza enshobe zaitu butunu, kandi tukora empinduka? Niturahuka kworoba, kushaba okusaasirwa, n’okusaasira?’ (Efe. 4:31, 32) Kwonka, butoosha mwaba mutarikwikirizana nari murikuhakana omu kweriima kwanyu, embeera neebaasa kutahinduka mwataaha omu bushwere. Waamanya ngu ou orikuriima takushemereire, okuhendera okuriima nikuba kuri okucwamu okuraabagasire mwembi. d

13. Abarikweriima baine kwihirira ahari ki kumanya obwire obu baraamare nibeeriima?

¹³ Okuriima kwanyu kwine kumara bwire ki? Butoosha, okurahukiiriza kucwamu nikurugamu oburemeezi. (Enf. 21:5) N’ahabw’ekyo, okweriima kwanyu kwine kutwara obwire burikumara kubaasa kumanyana gye. Kwonka timushemereire kweriima kumara obwire buraingwa kyaba kitarikwetengyesa. Baibuli neegira eti: “Amatsiko gatahwaire garusya omutima.” (Enf. 13:12) Kandi mwamara obwire buraingwa murikweriima, nimubaasa kwongyera kugumirwa kurinda ebyetengo by’okwenda kuteerana. (1 Kor. 7:9) Omu mwanya gw’okuta omutima aha bwire obu omazire nooriima, noobaasa kwebuuza oti: ‘Niki ekindi eki ndikwenda kumanya aha muntu ogu kugira ngu ncwemu gye?’

ABANDI NIBABAASA KUSHAGIKA BATA ABARIKWERIIMA?

14. Abandi nibabaasa kushagika bata abarikweriima? (Reeba n’ekishushani.)

¹⁴ Twaba nitumanya abarikweriima, nitubaasa kubahwera tuta? Nitubaasa kubeeta aha kiihuro, omu kuramya kw’eka, nari omu by’okweshemeza. (Rom. 12:13) Omu bwire obwo, nibabaasa kwongyera kwemanya gye. Nitubaasa kubashagika baaba nibenda obuhwezi bw’eby’engyenda, ow’okugyenda nabo, nari omwanya gw’okugaaniiriramu. (Gal. 6:10) Alicia, Owaaba yaagambirweho, naijuka eki we na Aschwin baakunzire. Naagira ati: “Tukashemererwa munonga ab’eishe-emwe abamwe ku baagizire ngu nitubaasa kuza owaabo twaba nitwenda omwanya gw’okugaaniiriramu,  kwonka guteehereire.” Abarikweriima baakushaba kuba nabo, gureebe nk’omugisha gw’omuhendo kubahwera. Yegyendesereze kutabatsiga bari bonka, kwonka nabwo koresa okwetegyereza kumanya yaaba nibenda obwire bw’okugamba eby’omubonano bonka.—Fil. 2:4.

15. Abanywani nibabaasa kukora ki ekindi kuhwera abarikweriima? (Enfumu 12:18)

¹⁵ Kandi nitubaasa kushagika abarikweriima omu bi turikugamba. Obumwe, nikibaasa kutwetengyesa kwezibira kugamba. (Shoma Enfumu 12:18.) Nk’eky’okureeberaho, nitubaasa kuba twine ekihika ky’okugambira abandi ngu nanka na nanka nibeeriima, kwonka abarikweriima nibabaasa kuba nibo barikwenda kubyegambira. Titwine kugambuura abarikweriima nari kubacwera orubanja. (Enf. 20:19; Rom. 14:10; 1 Tes. 4:11) Kandi, titwine kugamba nari kubuuza abarikweriima omu muringo ogurikubagyemesereza kutaaha omu bushwere. Munyaanyazi-itwe orikwetwa Elise na iba nibagira bati: “Tukaba tubwerabwera abandi baatubuuza entebeekanisa z’okugaitwa kwaitu, kandi obwo tutakazigaaniireho.”

16. Twine kutwaza tuta abarikweriima baacwamu kukuhendera?

¹⁶ Kandi shi abarikweriima baacwamu kukuhendera? Twine kwetantara kwetaatsya omu nshonga zaabo, nari kugwera orubaju. (1 Pet. 4:15) Munyaanyazi-itwe orikwetwa Lea naagira ati: “Nkahurira ngu abandi bakaba nibateebereza ahabw’enki nyowe n’ow’eishe-emwe omwe twarekyeire aho kweriima. Eki buzima kikanshaasha munonga.” Nk’oku kyaba kyagambirwe, okuhendera okuriima tikirikumanyisa ngu abarikweriima bakozire kubi. Obumwe, nikiba nikimanyisa ngu okuriima kuhikiriize ekigyendererwa kyakwo, kwabahwera kucwamu gye. Kwonka, okucwamu okwo nikubaasa kureetera bombi kugira obusaasi omu nyehurira n’eihamba. N’ahabw’ekyo, twine kusherura oburyo bw’okubagumya.—Enf. 17:17.

17. Abarikweriima baine kugumizamu nibakora ki?

¹⁷ Nk’oku twareeba, okuriima nikuba kurimu oburemeezi, kwonka nikuba kurimu n’ebirikushemeza. Jessica naagira ati: “Okuba ow’amazima, obwire bw’okweriima bukaba butoorobi. Kwonka obwire n’amaani agu naatairemu tibirafiire busha.” Mwaba muriyo nimweriima, mugumizemu nimuteeraho kumanyana gye. Mwakora mutyo, mwembi nimwija kugira okuriima kurungi okuraabahwere kucwamu gye.