1-3. (a) Tushemereire kutwara tuta amazima ga Baibuli? Ha eky’okureeberaho. (Reeba ekishushani aha kutandika.) (b) Nituza kugaaniira ahari ki omu kicweka eki?

OBUNAKU obu, abantu nibakira kugura ebintu omu duuka reero bwanyima babigarurayo. Kandi ku barikugura kurabira aha mukura, obwo nibwo barikukira kubigarurayo. Obundi nibashanga eki baguzire kitaboneire nk’oku baabaire nibateekateeka, nari nibabaasa kushanga kiinemu oburemeezi. Nibabaasa kucwamu ngu babahanisize, nari babagarurire esente zaabo.

² Tikwo tushemereire kutwaza tutyo aha bikwatiraine n’amazima ga Baibuli. Twaheza ‘kugura’ amazima, titushemereire kugaguza, ekirikumanyisa ngu twayega amazima titushemereire kugarugamu. (Shoma Enfumu 23:23; 1 Timoseo 2:4) Nk’oku tureebire omu kicweka ekihwaire, tukamara obwire bwingi turikwega amazima. Nitubaasa n’okuba twayefeerereize omurimo ogwabaire nigutubaasisa kutunga esente nyingi.  Kandi nitubaasa kuba twahindwire banywani baitu, emiteekateekyere n’emitwarize yaitu, nari tukarekyera aho kwejumba omu migyenzo emwe n’emikoro etarikushemeza Yehova. Kwonka twine obuhame ngu omu bintu ebi twayefeerereize tihariho ekiri eky’omuhendo kwingana n’emigisha ei turikutunga ahabw’okumanya amazima.

³ Yesu akaha eky’okureeberaho ky’omushuubuzi owaabaire naaza kusherura eruuru z’omuhendo. Omushaija ogwo ku yaaboine emwe eyaabaire eri ey’omuhendo munonga, ahonaaho akaguza buri kimwe eki yaabaire aine kubaasa kugigura. Eruuru ekaba neejwekyera amazima agarikukwata aha Bukama bwa Ruhanga. Omu muringo nigwo gumwe, Yesu akooreka oku amazima gaabaire nigaija kuba ag’omuhendo ahari abo abarikugasherura. (Matayo 13:45, 46) Obu twabanza kwega amazima agarikukwata aha Bukama bwa Ruhanga n’agandi goona agari omu Baibuli, naitwe tukaba tweteekateekire kureka ekintu kyona kugatunga. Twagumizamu nitutwara amazima nk’ag’omuhendo, titurikwija kugarugamu. Kwonka eky’obusaasi, bamwe aha baheereza ba Ruhanga barekyeire aho okutwara amazima nk’ag’omuhendo kandi baagarugamu. Buzima itwe ekyo titurikwenda kukikora! Twine kukuratira obuhabuzi bwa Baibuli obw’okuguma ‘nitugyendera’ omu mazima. (Shoma 3 Yohaana 2-4.) Eki nikimanyisa ngu twine kuta amazima omu mwanya gw’okubanza, kandi tukyorekye omu mitwarize yaitu. Kwonka shi niki ekirikubaasa kureetera omuntu kuguza amazima nari kugarugamu, kandi naakikora ata? Nitubaasa kwetantara tuta okuguza mazima? Kandi nitubaasa kwongyera tuta kumariirira kuguma ‘nitugyendera’ omu mazima?

4. Obu Yesu yaabaire ari omu nsi ahabw’enki baingi bataragumiizemu nibagyendera omu mazima?

⁴ Obu Yesu yaabaire ari omu nsi, bamwe abaikiriize amazima tibaragumire nibagagyenderamu. Nk’eky’okureeberaho, obu Yesu yaakora eky’okutangaaza akariisa abantu baingi, bakamukuratira aha rubaju orundi orw’Enyanja ya Galilaaya. Kwonka Yesu akagamba ekintu eki baabaire batarikuteekateeka. Akabagira ati: “Ku murikuba mutariire mubiri gw’Omwana w’omuntu, kandi mutanyweire shagama ye, timurikugira magara omuriimwe.” Abantu abo, omu mwanya gw’okubuuza Yesu kubashoboororera eki yaabaire naamanyisa, bakamugira bati: “Ekigambo eki nikiremeera; n’oha orikukibaasa?” N’ekyarugiremu, ‘baingi aha beegi be bakagaruka enyima, tibaagumizamu kugyenda nawe.’​—Yohaana 6:53-66.

5, 6. (a) Ahabw’enki abamwe nibaruga omu mazima obunaku obu? (b) Omuntu naabaasa kuruga ata omu mazima?

⁵ Eky’obusaasi, abamwe obunaku obu nabo barugire omu mazima. Ahabw’enki? Bakateerwa entsibo ahabw’enyetegyereza nsya y’ekyahandiikirwe, nari eki ow’eishe-emwe orikumanywa munonga agambire, nari eki akozire. Abamwe tibarikushemererwa omuntu yaabahana arikukoresa Baibuli, nari baatunga obutaikirizana bw’amaani n’ondiijo omu kibiina. Kandi abandi nibakuratira enyegyesa zigwire ez’abeehagwire aha mazima n’abandi abarikugamba ebitahikire. Ezi ni zimwe aha nshonga ezireeteire bamwe kuruga ahari Yehova n’ekibiina beekundiire. (Abaheburaayo 3:12-14) Ka kyakubaire kiri kirungi kwesiga Yesu nk’oku Petero yaakozire!  Ebigambo bya Yesu ku byateerize abandi entsibo, akabuuza entumwa ze nabo ku baraabe baabaire nibenda kugyenda. Petero akagarukamu ati: “Mukama waitu, nituza ahari oha? Ka niiwe oine ebigambo by’amagara agatahwaho.”​—Yohaana 6:67-69.

⁶ Abamwe barugire omu mazima mporampora, obundi batakimanyire ngu kiriyo nikibaho. Omuntu orikuruga omu mazima mporampora naashushanisibwa n’obwato oburikuruga aha nkungu y’enyanja mporampora bukahaba. Baibuli neeturabura kwegyendesereza kugira “ngu tutahaba tukabirugaho.” (Abaheburaayo 2:1) Obwire obwingi omuntu orikuruga omu mazima naaba atakigyendereire kugarugamu. Kwonka naareka omukago gwe na Yehova kuhwa amaani, kandi haahinguraho obwire nigubaasa kufa. Nitubaasa kwetantara tuta eki kutuhikaho?

7. Niki ekirikwija kutuhwera kutaguza amazima?

⁷ Kubaasa kugumizamu nitugyendera omu mazima, twine kwikiriza buri kimwe eki Yehova arikugamba kandi tukamworobera. Amazima twine kugahindura ekintu ekirikukirayo obukuru ahariitwe kandi tukakuratira emisingye ya Baibuli omu buri kimwe eki turikukora. Omugabe Daudi arikushaba, akaraganisa Yehova ngu ninyija “kugyendera omu mazima gaawe.” (Zaaburi 86:11) Daudi akaba amaririire kuguma naagyendera omu mazima, naitwe twine kukora nikyo kimwe. Twaba tutakozire tutyo, nitubaasa kutandika kuteekateeka aha bintu ebi twatsigire enyima kubaasa kwega amazima, twende kugaruka kubisherura. Kwonka titurikubaasa kucwamu kwikiriza amazima agamwe reero tukanga agandi. Twine kugyendera ‘omu mazima goona.’ (Yohaana 16:13) Omu kicweka ekihwaire, tugambire aha bintu bitaano ebi turikubaasa kuba twayefeerereize kwega amazima n’okukora ebirikuhikaana n’amazima. Hati nituza kureeba oku turikubaasa kumariirira kutagarukira ebintu ebi twatsigire enyima.​—Matayo 6:19.

8. Oku Omukristaayo arikukoresa obwire bwe nikibaasa kumureetera kita kuruga omu mazima mporampora? Ha eky’okureeberaho.

⁸ Obwire. Tushemereire kukoresa gye obwire bwaitu kuhamya ngu titwaruga omu mazima. Twaba tutegyendesereize, nitubaasa kumara obwire bwingi omu by’okweshemeza, okuhuumuraho, aha Intaneeti, nari okureeba tiivi. N’obu ebintu ebi biraabe bitari bibi, nitubaasa kuba nitukoresa obwire, obu tubaire nitukoresa omu kweyegyesa n’omu buheereza. Embeera nk’egi ekahika ahari Emma. * (Reeba obugambo obw’ahansi.) Kuruga obu yaabaire ari omwishiki muto, akaba naakunda embaraasi kandi akaba azivuga ahu yaayendera. Kwonka akatandika kweshinja ahabw’obwire obu yaabaire naamara arikuvuga embaraasi, kandi akacwamu kuhindura ebi arikutwara nka bikuru. Emma akeegyera n’aha byahikire ahari Cory Wells, munyaanyazi-itwe enyima owaabaire naavuga omu mpaka  z’embaraasi ez’okworeka obukodyo. * (Reeba obugambo obw’ahansi.) Emma hati naamara obwire bwingi arikuheereza Yehova, kandi naamara obwire burikumara ari n’ab’omu ka ye na banywani be abarikuheereza Yehova. Naahurira ari haihi na Ruhanga, kandi aine okushemererwa ahabw’okukoresa gye obwire bwe.

9. Niki ekirikubaasa kutureetera kutwara eby’obugaiga nka bikuru?

⁹ Eby’obugaiga. Twaba nitwenda kugumizamu nitugyendera omu mazima, titushemereire kwikiriza eby’obugaiga kuba bikuru ahariitwe. Obu twayega amazima, tuketegyereza ngu okuheereza Yehova ni kikuru munonga okukira eby’obugaiga, kandi tukaba tweteekateekire kureka eby’obugaiga ebyo kubaasa kwega amazima. Kwonka obwire bwaguma nibuhinguraho, nitubaasa kureeba abandi nibagura amasimu agari aha murembe, nari ebindi bintu. Nitubaasa kutandika kuteekateeka ngu haine eki turikufeerwa. Nitubaasa kuba tutakimarwa n’ebi twine reero tutandikye kuta omutima aha by’obugaiga omu mwanya gw’okuheereza Yehova. Eki nikitwijutsya ekyahikire ahari Deema. Akakunda “eby’ensi” munonga yaatsigaho obuheereza bwe obu yaabaire arimu n’entumwa Paulo. (2 Timoseo 4:10) Nooshanga obundi Deema akakunda munonga eby’obugaiga okukira oku yaabaire naakunda okuheereza Ruhanga. Nari akaba atakyenda kwefeerereza kubaasa kuheereza hamwe na Paulo. Eki nitukyegyeraho ki? Obundi enyima tukaba nitukunda eby’obugaiga. Twaba tutegyendesereize, nitubaasa kugaruka tubikunde, kandi rukundo egyo yaaba ey’amaani neeturemesa kukunda amazima.

10. Ni baahi abu twine kwegyendesereza kutatuhabisa?

¹⁰ Okugira omukago n’abandi. Kubaasa kugumizamu nitugyendera omu mazima, titwine kwikiriza abo abatarikuheereza Yehova kutuhabisa. Obu twayega amazima, omukago ogu twabaire twine n’abatari Bajurizi ba Yehova n’ab’omu maka gaitu gukahinduka. Obundi abamwe nibabaasa kuba baakunzire enyikiriza zaitu, kwonka abandi nibabaasa kuba baazihakaniise. (1 Petero 4:4) Amazima gari ngu, nituteeraho kukwatanisa n’ab’omu maka gaitu n’okubagirira embabazi. Kwonka titurikubaasa kwehuzya emitindo ya Yehova ahabw’okwenda kubashemeza. Kandi ebiri omu 1 Abakorinso 15:33, nibitwegyesa ngu banywani baitu ab’aha mara bashemereire kuba abarikukunda Yehova.

11. Nitubaasa kwetantara tuta ebiteekateeko bibi n’ebikorwa bibi?

¹¹ Ebiteekateeko bibi n’ebikorwa bibi. Kubaasa kugyendera omu mazima, twine kuba abarikwera, nari abashemeire omu maisho ga Yehova. (Isaaya 35:8; shoma 1 Petero 1:14-16.) Obu twayega amazima, tukakora empindahinduka kubaasa kugyendera aha mitindo ya Baibuli. Abamwe bakozire empindahinduka mpango. Kwonka nabwo, twine kwegyendesereza kugira ngu ebikorwa by’obushambani bitaza omu mwanya gw’emitwarize yaitu eshemeire. Nitubaasa kwangira tuta okwohibwa kukora ekintu kyona eky’obushambani? Teekateeka aha ki Yehova yaatuhaire kugira ngu tubaase kuba abarikwera. Akahayo amagara g’omuhendo ag’Omwana we omukundwa, Yesu Kristo! (1 Petero 1:18, 19) Kubaasa kuguma turi abarikwera omu maisho ga Yehova, butoosha twine kwijuka oku ekitambo kya Yesu kiri eky’omuhendo.

12, 13. (a) Ahabw’enki twine kwetantara emigyenzo n’emikoro ei Yehova atarikusiima? (b) Nituza kugamba ahari ki?

 ¹² Emigyenzo n’emikoro etarikushemeza Ruhanga. Ab’omu maka gaitu, abu turikukora nabo, n’abu turikwega nabo nibabaasa kuteeraho kutureetera kubeegaitaho aha mikoro yaabo. Niki ekirikubaasa kutuhwera kwangira okugyemeserezibwa kwejumba omu migyenzo n’ebiro ebi barikukuza ebitarikushemeza Yehova? Tushemereire kuguma nitwijuka gye enshonga ahabw’enki Yehova atarikusiima emikoro egyo. Nitubaasa kucondooza omu bitabo byaitu, kandi tweyijutsye oku emikoro emwe ei barikukuza yaatandikire. Twateekateeka aha misingye ya Baibuli erikutuhwera kumanya ahabw’enki tutarikukuza emikoro emwe, nitugira obuhame ngu nitukora “ebirikusiimwa Mukama.” (Abaefeso 5:10) Twaba nitwesiga Yehova n’Ekigambo kye, titurikwija kutiina eki abandi barikuteekateeka.​—Enfumu 29:25.

¹³ Twine amatsiko ngu nitwija kuguma nitugyendera omu mazima ebiro byona. Niki ekirikubaasa kutuhwera kwongyera kumariirira kuguma nitugyendera omu mazima? Hariho ebintu bishatu ebi turikubaasa kukora.

14. (a) Okugumizamu nitwega Baibuli nikwija kutuhwera kuta kumariirira kutaruga omu mazima? (b) Ahabw’enki nitwetenga obwengye, okuhana, n’okwetegyereza?

¹⁴ Eky’okubanza, gumizamu nooyega Baibuli kandi oteekateekye aha bi orikwega. Kora entebeekanisa y’okuguma nookora eki. Waayeyongyera kuguma nooyega, nooyeyongyera kukunda amazima kandi omariirira kutagarugamu. Enfumu 23:23 nihatuhiga ‘kugura amazima,’ n’okugura “obwengye, okuhaburwa n’okwetegyereza.” Tikirikumara okumanya bumanya amazima ga Baibuli. Twine kugagyenderaho omu mbeera zaitu za butoosha. Nitutunga okwetegyereza, twagaita hamwe ebi twegire n’ebi turikumanya. Obwengye nibutuhiga kugyendera aha bi turikumanya. Obumwe amazima nigaba garimu okuhana kutworeka empindahinduka ezi twine kukora. Nituba twine kurahuka kwikiriza okuhana okwo, oku Baibuli erikugira ngu n’okw’omuhendo kukira efeeza.​—Enfumu 8:10.

15. Amazima nigaturinda gata nk’orukoba rw’omuserukare?

¹⁵ Ekya kabiri, mariirira kugyendera aha mazima omu bi orikukora byona. Baibuli neegyeragyeranisa amazima n’orukoba rw’omuserukare. (Abaefeso 6:14) Ira, orukoba rukaba rurinda omuserukare omu kurwana, kandi rumuhwera kuhama yaaba arwezirikire gye ruhami. Ku rwabaire ruba rutahami, rukaba rutamuhwera. Mbwenu shi amazima nigaturinda gata nk’orukoba? Obwire bwona twaguma twine amazima ga Baibuli, nigaija kuturinda emiteekateekyere egwire, kandi gatuhwere kucwamu gye. Twatunga  oburemeezi bw’amaani nari twagyezibwa kukora ekigwire, amazima ga Baibuli nigaija kutuhwera kumariirira kukora ekihikire. Nk’oku omuserukare yaabaire ataza kurwana atajwaire orukoba rwe, naitwe titurikwenda kuruga omu mazima. Twine kuhamya ngu nitugyendera aha mazima ga Baibuli omu bi turikukora byona. Kandi omuserukare akaba ahagatira rurara ye aha rukoba. Ka tureebe oku turikubaasa kukora ekirikushushana n’ekyo.

16. Okwegyesa abandi amazima nikutuhwera kuta kuguma nitugyendera omu mazima?

¹⁶ Ekya kashatu, yegyesa abandi amazima g’omu Baibuli nk’oku orikubaasa. Baibuli neegyeragyeranisibwa na rurara. Nk’oku omuserukare murungi arikuguma ahagatiire rurara aha rukoba rwe, naitwe twine kuhamira aha Kigambo kya Ruhanga. (Abaefeso 6:17) Twena nitubaasa kuba abeegyesa barungi, “abarikushoboorora gye ekigambo ky’amazima.” (2 Timoseo 2:15) Twakoresa Baibuli kwegyesa abandi, nitweyongyera kumanya amazima n’okugakunda. Kandi nitweyongyera kumariirira kuguma nitugyendera omu mazima.

17. Ahabw’enki amazima gari ag’omuhendo ahariiwe?

¹⁷ Amazima n’ekiconco ky’omuhendo kuruga ahari Yehova. Nigatubaasisa kugira omukago guhami na Tataitwe ow’omu iguru. Eki nikyo ekirikukirayo kuba eky’omuhendo eki turikubaasa kugira. Yehova yaaherize kutwegyesa ebintu bingi, kwonka egi n’entandikwa! Naaturaganisa kugumizamu naatwegyesa ebiro byona. N’ahabw’ekyo, twara amazima nk’ag’omuhendo nk’eruuru y’obuguzi bwingi. Gumizamu noogura “amazima, kwonka otarigatunda.” Reero nka Daudi, noija kuhikiiriza eki waaraganiise Yehova ngu, ninyija “kugyendera omu mazima gaawe.”​—Zaaburi 86:11.