Nkazaarwa omuri 1983. Omu buto nkaba nyine amagara marungi nk’abandi baana, kwonka ku naahikize emyaka ikumi nkatandika kuhururwa omubiri gwona. Bwanyima y’emyaka nk’ebiri, nkaza kwimuka omu kasheeshe ntarikubaasa kugyenda. N’obu naabaire nteeraho munonga kwimutsya amaguru gangye, nkaba tarikubaasa kugyenda ahabw’okutagira maani na kakye. Kuruga obwo, tinkagarukaga kugyenda. Kandi endwara egi ekandeetera kushinya. Na hati nindeebeka nk’omwana muto.

Nkaba mmazire ameezi ntaine ahu ndikubaasa kuza obu Abajurizi ba Yehova babiri baataayaaya omuka. Abagyenyi ku baabaire baija omuka, butoosha nkaba nteeraho kweshereka, kwonka eizooba eryo nkaikiriza abakazi abo baagamba naanye. Ku baagambire ahari Paradiso, nkaijuka ebi naabaire naahuriireho enyima obu naabaire nyine emyaka nk’etaano. Omu bwire obwo, omumiisani orikwetwa Jethro, owaabaire naatuura omuri Suriname, akaba naataayaayira ekyaro kyaitu omurundi gumwe buri kwezi, kandi akaba naayegyesa tata Baibuli. Jethro akaba naantwariza omu muringo gw’embabazi. Nkaba niimukunda munonga. Kandi, tatenkuru na maawenkuru bakaba nibagyenda naanye omu nteerane z’Abajurizi ba Yehova, ezaabaire nizibaho omu kyaro kyaitu. N’ahabw’ekyo, omwe aha bakazi abaizire omuka eizooba eryo orikwetwa Florence, ku yaambuurize naaba niinyenda kwega ebirikukiraho, nkagira ngu eego.

Florence akagaruka na iba orikwetwa Justus, bombi hamwe baatandika kunyegyesa Baibuli. Ku baayetegyereize ngu tindikubaasa kushoma gye, bakampwera kwega kushoma. Bwanyima y’obwire bukye, nkaba nimbaasa kushoma. Eizooba rimwe, omushaija n’omukazi we bakangira ngu boohereziibwe kuheereza omuri Suriname. Eky’obusaasi, omuri Orealla hakaba hatarimu n’omwe owaabaire naabaasa kugumizamu naanyegyesa Baibuli. Kwonka ekirikushemeza, Yehova akaguma naanyijuka.

Bwanyima y’obwire bukye, payoniya orikwetwa Floyd akaija omuri Orealla, kandi akambona obu yaabaire naabuurira akafuuha aha kafuuha. Ku yaagambire naanye aha ky’okwega Baibuli, nkamwenya. Akambuuza ati: “Ahabw’enki waamwenya?” Nkamugira ngu nkaba naayegireho akatabo Ruhanga Naatwenza Ki? Kandi nkaba naatandikire kwega ekitabo Okumanya Okurikwebembera Okuhitsya omu Magara Agatahwaho. * Nkamugambira ahabw’enki naarekyeire aho. Floyd akanyegyesa akatabo Okumanya naakaheza, kwonka nawe  akooherezibwa ahandi kuheerezayo. Nkagaruka naaguma ntaine orikunyegyesa Baibuli.

Kwonka, omu 2004, Granville na Joshua, baapayoniya babiri ab’omutaano bakooherezibwa kuheereza omuri Orealla. Bakaba nibabuurira akafuuha aha kafuuha reero baambona. Ku baambuurize naaba niinyenda kwega Baibuli, nkamwenya. Nkabashaba kunyegyesa ekitabo Okumanya kuruga aha kutandika kukiheza. Nkaba niinyenda kureeba baaba nibaija kunyegyesa ebintu nibyo bimwe ebi abeegyesa bangye ab’okubanza baanyegyeise. Granville akangira ngu omu kyaro kyaitu nihabamu enteerane. N’obu ndaabe naabaire mmazire emyaka nka ikumi ntarikuruga muka, nkaba niinyenda kuzayo. N’ahabw’ekyo Granville akaija yaanyakiira yaanta omu kagaari yaantsindika yaampitsya aha Kyombeko ky’Obukama.

Bwanyima, Granville akampiga kuza omu Ishomero ry’Obuheereza. Akagira ati: “Omugire, kwonka noobaasa kugamba. Eizooba rimwe, noija kuha orubazo rwa boona. Buzima nikiija kubaho.” Ebigambo bye by’embabazi bikampwera kwegiramu obwesigye.

Nkatandika kwejumba omu kubuurira hamwe na Granville. Kwonka, enguuto nyingi ez’ekyaro kyaitu zikaba zirimu ebiina bingi akagaari katarikugyendamu gye. N’ahabw’ekyo nkashaba Granville kuntsindika omuri kahuuba. Entebeekanisa egyo ekakora gye. Omu Kwakana 2005, nkabatizibwa. Ahonaaho mperize kubatizibwa, ab’eishe-emwe bakantendeka kukora aha byoma by’amaraka eby’Ekyombeko ky’Obukama.

Reero eky’obusaasi omu 2007 tata akafeera omuri butandu y’obwato. Eka yaitu ekagwerwa akagwe. Granville akaguma naashaba naitwe kandi arikutushomera Ebyahandiikirwe ebirikuhuumuriza. Bwanyima y’emyaka ebiri, tukagwerwa akagwe akandi, Granville nawe akafeera omuri butandu y’obwato.

Ekibiina kyaitu ekyabaire kirimu ababuurizi bakye, kikatsigara kiine omuheereza omwe hatarimu mureeberezi weena. Okufa kwa Granville kukankora kubi munonga ahabw’okuba akaba ari munywani wangye ow’aha mara. Akaba naampwera omu by’omwoyo n’omu by’omubiri. Omu ruteerane orwabaire nirukurataho bwanyima y’okufa kwa Granville, nkaba nyine kushoma obucweka omu kwega Omunaara gw’Omurinzi. Bwanyima y’okushoma obucweka bubiri obw’okubanza, nkatandika kurira, amarira gaaguma nigafukunkuka. Nkacwamu kuruga aha puratifoomu.

Ab’eishe-emwe kuruga omu kibiina ekindi ku baizire kutuhwera omuri Orealla nkatandika kubamu gye. Kandi na ofiisi y’eitaagi ekoohereza Kojo, payoniya ow’omutaano. Nkashemererwa munonga, ahakuba maawe na murumuna wangye bakatandika kwega Baibuli kandi baabatizibwa. Omu Kwakashatu 2015, nkatooranwa kuba omuheereza. Bwanyima y’obwire, nkaha orubazo rwa boona orw’okubanza. Eizooba eryo, nkareeba enyima nyine okushemererwa naarira ahabw’ebi Granville yaabaire yaangambiire emyaka y’enyima ati: “Eizooba rimwe, noija kuha orubazo rwa boona. Buzima nikiija kubaho.”

Kurabira aha JW Broadcasting^®, mbaasize kwega ebirikukwata aha Bajurizi ba Yehova abari omu mbeera nk’eyangye. Kwonka n’obu baraabe baine obumuga, babaasize kukora ebintu bingi kandi bashemereirwe. Naanye nyine ebi ndikubaasa kukora. Ekyetengo kyangye ky’okuheereza Yehova nk’oku ndikubaasa kikampiga kuba payoniya ow’obutwire. Kandi omu Kwamwenda 2019 nkatunga amakuru agu naabaire ntarikuteekateeka! Omu kwezi okwo nkatooranwa kuba omureeberezi omu kibiina kyangye eky’ababuurizi nka 40.

Ninsiima ab’eishe-mwe na banyaanyazi abakundwa abaanyegyeise kandi bakampwera kuhikiiriza obuheereza bwangye. Okukira byona, ninsiima Yehova kureeba ngu akaguma naanyijuka.