1, 2. (a) Niki ekirikubaasa kuba aha muntu otaine kwerinda? (b) Ahabw’enki twine kugamba aha mutwarize gw’okwerinda?

OKWERINDA n’omutwarize ogu Yehova Ruhanga arikutuhwera kugira. (Abagalatia 5:22, 23) Okwerinda okwa Yehova kuhikiriire. Kwonka okwerinda okwaitu tikuhikiriire ahabw’okugira ngu turi abatahikiriire. Nangwa okuremwa kwerinda ni bumwe aha buremeezi obu abantu baingi baine ebiro ebi. Okuremwa kwerinda nikubaasa kureetera omuntu kweziringa kukora ebintu ebikuru, nari kukora kubi aha ishomero nari aha murimo. Omuntu otaine kwerinda naabaasa kutandika kukoresa ebigambo bibi, kusinda, kuba enshaarizi, kugaitururwa, kugira amabanja gatarikwetengyesa, emize egumire okucwa, okukomwa, okugira obusaasi omu nyehurira, endwara z’obushambani, n’okutwara enda ei atarikwenda.​—Zaaburi 34:11-14.

² Abantu abataine kwerinda nibeereetera oburemeezi hamwe n’abandi. Kandi obwire ku burikuhinguraho, okwerinda kw’abantu nikuguma nikweyongyera kutuuba. Kwonka eki tikishemereire kututangaaza, ahakuba Ekigambo kya Ruhanga kukagamba kare ngu okutagira kwerinda bukaabaire bumwe aha buhame ngu turi omu ‘biro by’emperu.’​—2 Timoseo 3:1-3.

3. Ahabw’enki twine kugira omutwarize gw’okwerinda?

 ³ Ahabw’enki twine kugira omutwarize gw’okwerinda? Hariho enshonga ebiri enkuru. Ey’okubanza, abantu abarikurinda enyehurira zaabo nibatunga oburemeezi bukye. Nikiboorobera kugira emikago mirungi kandi beetantara kugira ekiniga, okwerarikirira n’amaganya. Eya Kabiri, kubaasa kuguma turi banywani ba Ruhanga, twine kwangira okwohibwa kandi tukeerinda ebyetengo bibi. Eki nikyo Adamu na Haawa baaremirwe kukora. (Okutandika 3:6) Abantu baingi ebiro ebi bari nka Adamu, baine oburemeezi bw’amaani ahabw’okugira ngu tibaine mutwarize gw’okwerinda.

4. Niki ekirikubaasa kuhuumuriza ogwo weena orikugumirwa kwerinda?

⁴ Yehova naayetegyereza ngu turi abatahikiriire kandi ngu nikitugumira kuba abeerinzi. Kwonka naayenda kutuhwera kweyihamu ebiteekateeko bibi. (1 Abagabe 8:46-50) Ahabw’okugira ngu ni munywani waitu orikutukunda, omu muringo gw’embabazi naatugaruramu amaani obumwe twaremwa kurinda enyehurira zaitu n’ebyetengo byaitu. Omu kicweka eki, nituza kwegyera ahari Yehova aha bikwatiraine n’okwerinda. Nituza n’okureeba bamwe abarikugambwaho omu Baibuli abayerinzire n’abaaremirwe kwerinda, tureebe n’obuhabuzi oburikukora oburikubaasa kutuhwera.

5, 6. Yehova atuteeraireho ky’okureeberaho ki eky’okwerinda?

⁵ Okwerinda kwa Yehova kuhikiriire ahakuba nawe ahikiriire omuri buri kimwe. (Eky’Ebiragiro 32:4) Kwonka itwe, turi abatahikiriire. Beitu nabwo twine kushwijuma eky’okureeberaho kye eky’okwerinda kugira ngu tubaase kumutooreza gye. Eki nikiija kutuhwera kutwaza omu muringo murungi haabaho ebintu ebirikubaasa kutugwisa kubi. Ni by’okureeberaho ki ebirikworeka ngu Yehova n’omwerinzi?

⁶ Teekateeka aha ku Yehova yaatwarize obu Sitaane yaagoma omu kibanja Edeni. Obundi, ebi Omuregi yaagambire bishemereire kuba byareeteire abaheereza ba Ruhanga abeesigwa omu iguru kushoberwa, kugira ekiniga, n’okutamwa Omuregi. Naiwe obumwe noohurira otyo waateekateeka aha kubonabona oku Sitaane areetsireho. Kwonka Yehova taraikiriize ekiniga kumurenga. Akagarukamu omu muringo oguhikire kandi ogw’oburingaaniza. Yehova atwire atarikurahuka kugira ekiniga, kandi ari omuringaaniza aha bikwatiraine n’obugomi bwa Sitaane. (Okuruga 34:6; Yobu 2:2-6) Ahabw’enki? Yehova arekire obwire kuhinguraho ahabw’okuba tarikwenda muntu weena kucwekyerera, “kureka naayenda ngu boona bahikye aha kweteisa.”​—2 Petero 3:9.

7. Nitubaasa kwegyera ki ahari Yehova?

⁷ Eky’okureeberaho kya Yehova nikitwegyesa ngu twine kuteekateeka n’obwegyendesereza tutakagambire, kandi titushemereire kurahukiiriza kugira eki twakora. N’ahabw’ekyo waaba nooyenda kucwamu aha nshonga nkuru, yetware oteekateekye. Shaba obwengye kugira ngu obaase kugamba ekihikire nari okore ekishemeire. (Zaaburi 141:3) Twaba  twine ekiniga nari tugwirwe kubi, nikiba kyorobi kurahuka kutabuka. Niyo nshonga ahabw’enki abamwe nibeefuuza ebintu ebi barikugamba nari ebi barikukora batabandize kuteekateeka!​—Enfumu 14:29; 15:28; 19:2.

8. (a) Ni nkahi ahu turikushanga eby’okureeberaho by’abantu abaine okwerinda? (b) Niki ekyahwereire Yosefu kwangira okwohibwa obu muka Potifaari yaamushendashenda? (Reeba ekishushani aha kutandika.)

⁸ Ni by’okureeberaho ki eby’omu Baibuli ebirikworeka obukuru bw’okwerinda? Omwe ou orikubaasa kuteekateekaho ni Yosefu mutabani wa Yakobo. Akangira okwohibwa obu yaabaire naaheereza omu nju ya Potifaari, omukuru w’abarinzi ba Faraho. Muka Potifaari akareeba Yosefu arikushemeza ahabw’okugira ngu “akaba anyeetsire gye, aine aha maisho harungi,” kandi akateeraho kumubeihabeiha emirundi mingi. Niki ekyahwereire Yosefu kwangira okwohibwa? Naabaasa kuba yaatwaire obwire kuteekateeka aha kyabaire nikiija kubaho yaikiriza kubyama nawe. Kandi omukazi ogwo ku yaamukwatsire ngu babyame hamwe, Yosefu akairuka yaahunga. Akagira ati: “nimbaasa nta kukora ekibi ekirikwingana kityo, n’okucumura ahari Ruhanga?”​—Okutandika 39:6, 9; shoma Enfumu 1:10.

9. Noobaasa kwetebeekanisa ota kwangira okwohibwa?

⁹ Nitwegyera ki ahari Yosefu? Twayohibwa kuhenda kimwe aha biragiro bya Ruhanga, twine kwangira okwohibwa okwo. Abamwe batakabaire Abajurizi ba Yehova, bakaba nibarahuka kugira ekiniga, barikunywa amaarwa maingi, barikureetsa, barikukoresa kubi emibazi y’ekitabura bwongo, bari abashambani, nari baine obundi buremeezi. Nangwa na bwanyima y’okubatizibwa, obumwe nibabaasa kwohibwa kukora ebintu ebi. Eki kyakubaho, banza oteekateekye oku omukago gwawe na Yehova gurikubaasa kusiisikara waikiriza okagwa omu kwohibwa okwo. Manya ebintu ebirikukureetera kwohibwa reero ocwemu oku orikubaasa kubyetantara. (Zaaburi 26:4, 5; Enfumu 22:3) Kyabaho okagyezibwa, shaba Yehova kukuha obwengye n’okwerinda kubaasa kwangira okwohibwa okwo.

10, 11. (a) Niki ekirikuhika aha minyeeto mingi aha ishomero? (b) Niki ekirikubaasa kuhwera Abakristaayo eminyeeto kwangira okwohibwa kuhenda ebiragiro bya Ruhanga?

¹⁰ Ekyahikire ahari Yosefu, nikikira kuhika aha Bakristaayo baingi abato ebiro ebi. Omwe aharibo n’omwishiki orikwetwa Kim. Abu yaabaire naashoma nabo bakaba nibakira kwesimiirana ahabw’okwejumba omu kuteerana omu wiikenda. Kim akaba ataine bitebyo nk’ebyo eby’okugambira abeegi bagyenzi be. Naagira ngu okuba ow’omutaano kikaba kimureetera obumwe kuhurira ari “nk’ori wenka kandi aine eihamba” kandi abaana bagyenzi be bakaba nibamutwara nk’omushema ahabw’okutagira ou arikuriima. Kwonka Kim buzima akaba ari omunyabwengye. Akaba naamanya ngu waaba okiri muto ekyetengo ky’okuteerana nikiba kiri eky’amaani. (2 Timoseo 2:22) Abeegi bagyenzi be bakaba bakira kumubuuza yaaba ashugaine. Ekyo kikamuha  omugisha gw’okushoboorora ahabw’enki yaabaire atarikuteerana. Nitwesiima ahabw’okugira Abakristaayo abato abamaririire kwangira okugyemeserezibwa kw’okwejumba omu bushambani, kandi na Yehova naabeesiimisa!

¹¹ Omu Baibuli harimu na bamwe abaaremirwe kwangira okwohibwa kugwa omu mutego gw’obushambani. Kandi neeyoreka n’ebibi ebirikuruga omu kuremwa kwerinda. Waayeshanga omu mbeera nk’eya Kim, teekateeka aha mutsigazi omushema orikugambwaho omu Enfumu eshuura 7. Kandi teekateeka n’ahari Amunooni n’ebintu bibi ebyarugire omu micwe ye mibi. (2 Samueli 13:1, 2, 10-15, 28-32) Abazaire nibabaasa kuhwera abaana baabo kugira omutwarize gw’okwerinda n’obwengye barikugaaniira nabo aha by’okureeberaho ebi omu kuramya kwabo okw’eka.

12. (a) Yosefu akarinda ata enyehurira ze akazishereka beene ishe? (b) Ni ryari obu twine kurinda enyehurira zaitu?

¹² Ogundi murundi, Yosefu akataho eky’okureeberaho kirungi eky’okwerinda. Obu n’obu beene ishe baija Misri kugura eby’okurya. Yosefu kubaasa kumanya eki buzima baabaire nibateekateeka, tarabagambiire ngu akaba ari mwene ishebo. Kandi enyehurira ze ku zaamukirize amaani, akatsigaho beene ishe yaarira ari omu mubonano. (Okutandika 43:30, 31; 45:1) Ow’eishe-emwe yaakora ekintu kikakugwisa kubi, okutooreza eky’okureeberaho kya Yosefu eky’okwerinda nikiija kukuhwera kwetantara kugamba nari kukora ekintu ekiraakureetere kwefuuza bwanyima. (Enfumu 16:32; 17:27) Nari shi noobaasa kuba oine omunyabuzaare obingirwe omu kibiina. Kyaba nikwo kiri, oine kurinda enyehurira zaawe oyetantare kuhurizana nawe omu muringo ogutarikwetengyesa. Okwerinda omu mbeera nk’ezi tikyorobi, kwonka nikibaasa kworoba twaijuka ngu turiyo nitutooreza Ruhanga kandi ngu turiyo nitworobera obuhabuzi bwe.

13. Omugabe Daudi nitubaasa kumwegyeraho mashomo ki?

¹³ Nitubaasa n’okugasirwa omu ky’okureeberaho ky’Omugabe Daudi. Obu Saulo na Shimei baamukora kubi, Daudi taragizire kiniga nari kukoresa obushoboorozi bwe kubafubira. (1 Samueli 26:9-11; 2 Samueli 16:5-10) Kwonka Daudi obumwe akaba aremwa kwerinda. Nitumanya eki twashoma ebirikukwata aha kibi eki yaakozire na Batisheba n’oku yaatwarize obu Nabali yaagira omururu. (1 Samueli 25:10-13; 2 Samueli 11:2-4) Nitubaasa kwegyera ahari Daudi amashomo maingi. Eishomo ry’okubanza, abareeberezi baine kugira omutwarize gw’okwerinda kugira ngu batakoresa kubi obushoboorozi bwabo. Eishomo rya kabiri, tihaine oshemereire kweyesiga ekirenga, arikuteekateeka ngu tarikubaasa kugwa omu kwohibwa.​—1 Abakorinso 10:12.

14. Niki ekyahikire aha w’eishe-emwe omwe, kandi ahabw’enki okutwaza nk’oku yaatwarize kiri kikuru?

¹⁴ Noobaasa kukora ki kwongyera kuhamya omutwarize gwawe ogw’okwerinda? Teekateeka  aha kyahikire ahari Luigi. Emotoka endiijo ekatomera emotoka ye kuruga enyima. N’obu omuvugi ogwo araabe niwe yaaretsireho butandu, akatandika kutonganisa Luigi kandi yaayenda n’okurwana. Luigi akashaba Yehova kuguma aikaikaine kandi yaateeraho kwikaikanisa n’omuvugi owaamutomeire. Kwonka omushaija ogwo akagumizamu naatongana. N’ahabw’ekyo Luigi akahandiika enamba y’emotoka y’omushaija ogwo kugira ngu kimuhwere kutunga enshumbuushano, reero yaamutsigaho akiriyo naatongana. Bwanyima ya saabiiti emwe, Luigi akaba agarukireyo kureeba omukazi ou yaabuuriire. Akashanga iba w’omukazi ogwo ari omuvugi oriya owaamutomeire! Omushaija ogwo akahemuka kandi yaashaba okusaasirwa ahabw’emitwarize ye mibi. Akacwamu kumanyisa ekitongore ky’enshumbuushano ekya Luigi kugira ngu babaase kuteereza emotoka ya Luigi. Omushaija akeegaita aha mukazi we omu kugaaniira ahari Baibuli kandi akakunda okugaaniira okwo. Bwanyima y’eki, Luigi akeetegyereza ngu buzima kikaba kikuru kuguma aikaikaine bwanyima ya butandu egyo, kandi yaamanya ngu embeera ekaba neija kuba mbi ku ogire ngu akagira ekiniga.​—Shoma 2 Abakorinso 6:3, 4.

15, 16. Baibuli neebaasa kukuhwera eta n’eka yaawe kugira omutwarize gw’okwerinda?

 ¹⁵ Okwega Baibuli n’obwegyendesereza nikubaasa kuhwera Abakristaayo kugira okwerinda. Ijuka eki Ruhanga yaagambiire Yoshua: “Ekitabo eki eky’ebiragiro kitarikuruga omu kanwa; kureka ogume nookiteekateekaho nyomushana na nyekiro, obone kwerinda, ohitsye byona ebihandiikirwemu; obwo nibwo oriheebwa omugisha ei oriza yoona, okabaasa gye byona.” (Yoshua 1:8) Kwonka shi Baibuli neebaasa kukuhwera eta kugira omutwarize gw’okwerinda?

¹⁶ Twaheza kwega ngu Baibuli erimu eby’okureeberaho ebirikworeka oku turikugasirwa twayerinda n’oku turikubonabona twaremwa kwerinda. Yehova akaikiriza ngu eby’okureeberaho ebi bihandiikwe ahabw’enshonga. (Abarooma 15:4) Nikiba kiri eky’obwengye, kwega ebirikukwata aha bantu aba kandi tukabiteekateekaho n’obwegyendesereza. Teeraho kwetegyereza oku eby’okureeberaho byabo birikubaasa kukuhwera n’eka yaawe. Shaba Yehova kukuhwera kugyendera aha buhabuzi oburi omu Kigambo kye. Waamanya ngu omu miringo emwe nooremwa kuba omwerinzi, oikirize obweremwa bwawe. Shaba kandi okore munonga kureeba ngu waagira okwerinda. (Yakobo 1:5) Condooza omu bitabo byaitu kutunga obuhabuzi oburikubaasa kukuhwera.

17. Abazaire nibabaasa kuhwera bata abaana baabo kuba abeerinzi?

¹⁷ Noobaasa kuhwera ota abaana baawe kugira okwerinda? Abazaire nibamanya ngu abaana baabo tibarikuzaarwa n’omutwarize ogu. N’ahabw’ekyo baine kwegyesa abaana baabo emitwarize mirungi kurabira omu ky’okureeberaho kyabo. (Abaefeso 6:4) Waareeba ngu abaana baawe tibaine kwerinda, yebuuze yaaba noobateeraho eky’okureeberaho kirungi. Noobaasa kubateeraho eky’okureeberaho kirungi otarikwosha kuza omu kubuurira, otarikwosha enteerane, orikwebembera n’okuramya kw’eka. Kandi otakatiina obumwe kugira ngu ngaaha, abaana baawe baagira eki baashaba! Yehova akateeraho Adamu na Haawa obugarukiro. Obugarukiro obwo bukaba nibwija kubahwera kwega kuha Yehova ekitiinisa ahabw’obushoboorozi bwe. Omu muringo nigwo gumwe, abazaire baahana abaana baabo kandi bakabateeraho eky’okureeberaho kirungi, abaana nibabaasa kwega kuba abeerinzi. Okukunda obushoboorozi bwa Ruhanga n’okuha ekitiinisa emitindo ye ni bimwe aha bintu by’omuhendo ebi orikubaasa kuhwera abaana baawe kugira.​—Shoma Enfumu 1:5, 7, 8.

18. Ahabw’enki twine kutoorana banywani baitu n’obwegyendesereza?

¹⁸ Yaaba turi abazaire nari tutari bazaire, twena twine kutoorana abanywani n’obwegyendesereza. Banywani baawe baaba nibakunda Yehova, nibaija kukuhiga kutaho ebigyendererwa birungi n’okwetantara oburemeezi. (Enfumu 13:20) Eky’okureeberaho kyabo kirungi nikiija kukuhiga kuba omwerinzi nkabo. Kandi naiwe emitwarize yaawe mirungi nabo neija kubahiga. Twagira omutwarize gw’okwerinda nitwija kusiimwa Ruhanga, tugire amagara marungi, kandi tubagane ebintu birungi n’abu turikukunda.