EKICWEKA EKY’OKWEGA 42
Hamira aha Mazima Otarikubangaanisa
“Mugyeze byona, muhamire aha kirungi.”—1 TES. 5:21.
EKYESHONGORO 142 Okuhamira aha Matsiko Gaitu
EBIRAAGAMBWEHO *
1. Ahabw’enki abantu baingi bashobeirwe?
HARIHO abantu baingi abarikweyeta Abakristaayo, kandi nibagira ngu nibaramya Ruhanga omu muringo ogu arikusiima. Tikirikutangaaza kureeba ngu abantu baingi bashobeirwe! Nibabuuza bati: “Mbwenu shi hariho ediini emwe ey’amazima, nari ediini zoona nizishemeza Ruhanga?” Mbwenu shi nituhamiza kimwe omu biteekateeko byaitu ngu niitwe abarikwegyesa amazima, kandi ngu omuringo ogu Abajurizi ba Yehova barikuramyamu obunaku obu nigwo Ruhanga arikusiima? Buzima nikibaasika kugira obwesigye nk’obwo? Ka tureebe obuhame.
2. Kurugiirira aha 1 Abatesalonika 1:5, ahabw’enki entumwa Paulo yaabaire naahamiza kimwe ngu aine amazima?
2 Entumwa Paulo akaba naahamiza kimwe ngu aine amazima. (Shoma 1 Abatesalonika 1:5.) Obuhame bwe bukaba butarikurugiirira aha nyehurira ze. Paulo akaba ari omwegi murungi w’Ekigambo kya Ruhanga. Akaba naikiriza ngu ‘Ebyahandiikirwe byona bikahandiikisiibwa omwoyo gwa Ruhanga.’ (2 Tim. 3:16) Mbwenu shi omu kweyegyesa kwe akeetegyereza ki? Paulo akatunga obuhame omu byahandiikirwe oburikworeka ngu Yesu niwe Mesia owaaraganisiibwe, obuhame obu abeebembezi b’ediini baacwiremu nkana kwehuzya. Abeebembezi b’ediini abo endyarya bakaba nibeetwara nk’abarikujwekyera Ruhanga kwonka barikumwehakana omu bikorwa byabo. (Tit. 1:16) Okutaana nabo, Paulo we akaba atarikutooranamu bimwe ebi araikirize omu Kigambo kya Ruhanga. Akaba ayeteekateekire kwegyesa n’okuta omu nkora ‘enaama yoona eya Ruhanga.’—Byak. 20:27.
3. Twine kutunga eby’okugarukamu by’ebibuuzo byaitu byona shi kubaasa kuhamiza kimwe amazima tutarikubangaanisa? (Reeba akabokusi ‘ Emirimo ya Yehova n’Ebiteekateeko Bye ni Bingi “Tibirikubaasa Kubarwa.”’)
3 Abamwe nibateekateeka ngu ediini eyaabuzima eine kugarukamu buri kibuuzo, nangwa n’ebyo ebitarikugarukwamu butunu omu Baibuli. Emiteekateekyere egyo ekihikire? Teekateeka aha ky’okureeberaho kya Paulo. Akahiga Abakristaayo bagyenzi be “kugyeza byona,” kwonka akaba naamanya ngu hariho ebintu bingi ebi yaabaire atarikwetegyereza gye. (1 Tes. 5:21) “Nitumanyaho kakye,” nikwo yaahandiikire, reero akongyeraho arikugira ati: “Nitureebera omu ndeeberwamu tutarikuhweza gye.” (1 Kor. 13:9, 12) Paulo akaba atarikumanya buri kimwe, naitwe nikyo kimwe. Kwonka Paulo akaba naayetegyereza amazima makuru agarikukwata ahari Yehova. Akaba naamanya bingi kumuhamiza ngu aine amazima!
4. Nitubaasa kuhamya tuta ngu tuboine amazima, kandi nituza kwetegyereza ki aha bikwatiraine n’Abakristaayo abaabuzima?
4 Omuringo gumwe gw’okuhamiza kimwe ngu tuboine amazima n’okugyeragyeranisa okuramya oku Yesu yaatandikireho n’eki Abajurizi ba Yehova barikukora obunaku obu. Omu kicweka eki, nituza kureeba ngu Abakristaayo abaabuzima, (1) tibarikuramya barikukoresa ebishushani, (2) nibaha eiziina rya Ruhanga ekitiinisa, (3) nibakunda mazima, kandi (4) nibakundana munonga.
TITURIKURAMYA EBISHUSHANI
5. Nitwegyera ki ahari Yesu aha bikwatiraine n’okuramya Ruhanga omu muringo oguhikire, kandi nitubaasa kugyendera tuta aha bi yaayegyeise?
5 Obu Yesu yaabaire ari omu iguru n’aha omu nsi akaba naaramya Yehova wenka ahabw’okumukunda munonga. (Luk. 4:8) Kandi akegyesa abeegi be kukora nikyo kimwe. Yesu hamwe n’abeegi be abeesigwa tibarakoreise ebishushani omu kuramya. Obu Ruhanga aine omubiri gw’omwoyo, tihariho kintu eki omuntu arikubaasa kukora kugira ekitiinisa nk’ekya Yehova! (Isa. 46:5) Kandi shi okukora ebishushani by’abarikwetwa abarikwera nari okubashaba? Ekiragiro kya kabiri aha Biragiro Ikumi, Yehova akagira ati: “Otaryekorera ekishushani kyona ekibaizire, n’obu kyakuba ekishushani ky’ekintu kyona ekiri ahaiguru omu iguru nari ekiri omu nsi ahansi . . . Otaribiinamira.” (Kur. 20:4, 5) Abarikwenda kushemeza Ruhanga nibamanya gye ngu tibaine kukoresa ebishushani omu kuramya.
6. Abajurizi ba Yehova nibatooreza muringo ki ogw’okuramya?
6 Abanyabyafaayo nibaikiriza ngu Abakristaayo aba ira bakaba nibaramya Ruhanga wenka. Nk’eky’okureeberaho, ekitabo History of the Christian Church nikigira ngu Abakristaayo aba ira “bakaba nibabaasa kukangarana” omuntu yaabagira ngu bagire ebishushani omu myanya y’okuramizamu. Ebiro ebi, Abajurizi ba Yehova nibakuratira omuringo gw’okuramya ogw’Abakristaayo omu kyasha ky’okubanza. Titurikukoresa ebishushani by’abarikwera nari baamaraika omu kushaba, nangwa n’obu kwakuba okushaba Yesu. Kandi titurikuramya na kakye obumanyiso bw’eihanga. N’obu haakubaho ki, tumaririire kworobera ebigambo bya Yesu ebi: “Oramye [Yehova] Ruhanga waawe.”—Mat. 4:10.
7. Abajurizi ba Yehova nibataana bata aha madiini agandi?
7 Obunaku obu, abantu baingi nibakuratira abeebembezi b’ediini baarurangaanwa. Nibabakunda munonga bahika n’aha kwenda kubaramya. Abantu nyamwingi nibaija omu kanisa zaabo, bagura ebitabo byabo, bahayo esente nyingi kushagika ebigombe byabo. Abantu abamwe nibaikiriza byona ebi abeebembezi abo barikugamba. Ku barikureeba abeebembezi baabo, nibashemererwa munonga oshusha ngu baabonekyerwa Yesu! Okutaana n’ekyo, abaheereza ba Yehova abaabuzima tibarikukuratira abantu. N’obu turaabe nituha abarikureeberera ekibiina ekitiinisa, nitwikiriza eki Yesu yaayegyeise obu yaagira ti: “Mwena muri eishe-emwe.” (Mat. 23:8-10) Titurikuramya abantu, yaaba abeebembezi b’ediini nari ab’eby’obutegyeki. Kandi titurikushagika ebigyendererwa byabo. Kureka, nituguma tutaine rubaju omu by’obutegyeki kandi twetaaniise aha nsi. Eki, nikitureetera kuba ab’omutaano aha madiini agarikweyeta Amakristaayo.—Yoh. 18:36.
NIBAHA EIZIINA YEHOVA EKITIINISA
Abakristaayo ab’amazima nikibeesiimisa kugambira abandi ebirikukwata ahari Yehova (Reeba akacweka 8-10) *
8. Nitumanya tuta ngu Yehova naayenda ngu eiziina rye rihimbisibwe kandi rimanywe buri omwe?
8 Rimwe, Yesu akashaba ati: “Taata, himbisa eiziina ryawe.” Yehova akagarukamu okushaba kwe n’okuhinda kw’enkuba kuruga omu iguru, arikumuraganisa ngu naija kuhimbisa eiziina rye. (Yoh. 12:28) Yesu omu buheereza bwe bwona omu nsi, akahimbisisa eiziina rya Ishe. (Yoh. 17:26) N’ahabw’ekyo n’eky’oburyo kuteekateeka ngu Abakristaayo abaabuzima nikibeesiimisa kukoresa eiziina rya Ruhanga n’okurimanyisa abandi.
9. Abakristaayo omu kyasha ky’okubanza bakooreka bata ngu nibaha eiziina rya Ruhanga ekitiinisa?
9 Omu kyasha ky’okubanza Y.A.K., bwanyima y’ekibiina Ekikristaayo kutandikwaho, Yehova akata omutima aha ‘banyamahanga okutoorana abantu omuribo kuba eihanga eririkwetererwa eiziina rye.’ (Byak. 15:14) Abakristaayo omu kyasha ky’okubanza bakaba nibakunda kukoresa eiziina rya Ruhanga n’okurimanyisa abandi. Bakakoresa munonga eiziina rya Ruhanga omu kubuurira n’omu bihandiiko byabo. * Baakoreka ngu butunu ngu nibo barikumanyisa abantu eiziina rya Ruhanga.—Byak. 2:14, 21.
10. Ni buhame ki oburikworeka ngu Abajurizi ba Yehova nibo barikumanyisa abandi eiziina rya Ruhanga, Yehova?
10 Abajurizi ba Yehova shi nibo barikurangirira eiziina rya Yehova? Yetegyereze obuhame obu. Obunaku obu, amadiini maingi gakozire kyona ekirikubaasika kushereka obuhame oburikworeka ngu Ruhanga aine eiziina. Bariihire omu nvunuura zaabo eza Baibuli, kandi abandi tibarikwenda ngu eiziina eryo rikoresibwe omu kuramya kwabo. * Mbwenu shi haine orikubaasa kubangaanisa ngu Abajurizi ba Yehova nibo barikuha eiziina rya Yehova ekitiinisa ekishemeire? Nitumanyisa abandi eiziina rya Ruhanga omu nsi yoona okukira amadiini agandi goona! Omu muringo ogu, nituba nitukora ebirikuhikaana n’eiziina ryaitu, Abajurizi ba Yehova! (Isa. 43:10-12) Tushohoize kopi za Baibuli eya New World Translation of the Holy Scriptures, ezirikurenga obukaikuru 240 ezirimu eiziina Yehova ahu riihirwe omu nvunuura za Baibuli ezindi. Kandi tushohoize ebitabo ebirikwegamira ahari Baibuli omu ndimi ezirikurenga 1,000 ebirikukoresa eiziina rya Ruhanga!
NITUKUNDA AMAZIMA
11. Abakristaayo aba ira bakooreka bata ngu nibakunda amazima?
11 Yesu akaba naakunda amazima agarikukwata ahari Ruhanga n’ebigyendererwa bye. Yesu akaba naatwaza omu muringo ogurikuhikaana n’amazima, kandi akabaasa n’okumanyisa abandi amazima ago. (Yoh. 18:37) Abakuratsi ba Yesu abaabuzima nabo bakaba nibakundira kimwe amazima. (Yoh. 4:23, 24) Nangwa, n’entumwa Petero Obukristaayo akabweta “omuhanda gw’amazima.” (2 Pet. 2:2) Abakristaayo aba ira ahabw’okukunda munonga amazima, bakanga emigyenzo y’ediini y’ebishuba, emiteekateekyere, n’enyegyesa ezitarikuhikaana n’amazima. (Kol. 2:8) N’obunaku obu, Abakristaayo abaabuzima n’obwegyendesereza nibateeraho ‘kugyendera omu mazima’ barikwikiriza kandi bakatwaza omu muringo ogurikuhikaana n’ebiri omu Kigambo kya Yehova.—3 Yoh. 3, 4.
12. Abarikureeberera ekibiina baamanya ngu enyetegyereza eine kuhindurwamu nibakora ki, kandi ahabw’enki nibakora batyo?
12 Abaheereza ba Ruhanga obunaku obu tibarikugira ngu nibeetegyereza amazima goona omu bwijwire. Obumwe, babaasize kukora enshobe omu nyetegyereza z’amazima n’entebeekanisa z’ekibiina. Ekyo tikishemereire kututangaaza. Ebyahandiikirwe nibyoreka gye ngu okumanya nikweyongyera obwire bwaguma nibuhinguraho. (Kol. 1:9, 10) Yehova naatushuuruurira amazima mporampora, kandi twine kutegyereza n’okugumisiriza ekyererezi ky’amazima kwongyera kwaka gye. (Enf. 4:18) Abarikureeberera ekibiina bareeba ngu enyetegyereza y’amazima emwe eine kuhindurwamu tibarikweziriga kukikora. N’obu amadiini ga Kristendomu garikukora empinduka kushemeza abakuratsi baabo, kunywana ensi, ekibiina kya Yehova kyo nizikora kwirira haihi Ruhanga, n’okutooreza omuringo gw’okuramya ogu Yesu yaatandikireho. (Yak. 4:4) Titurikukora empinduka ezo kuhikaana n’omureebe gw’ensi nari eki abantu barikwenda, kwonka nitukikora ahabw’okwetegyereza gye Ebyahandiikirwe. Nitukunda amazima!—1 Tes. 2:3, 4.
NITUKUNDANA MUNONGA
13. Omutwarize mukuru ogw’Abakristaayo abaabuzima ni guuha, kandi nigureebekyera guta omu Bajurizi ba Yehova obunaku obu?
13 Abakristaayo omu kyasha ky’okubanza bakaba nibamanyirwa aha mutwarize mukuru gwa rukundo. Yesu akagira ati: ‘Ku muraagume nimukundana, nibwo abantu boona barikwija kumanya ku muri abeegi bangye.’ (Yoh. 13:34, 35) Obunaku obu, Abajurizi ba Yehova nibeesiimira rukundo n’obumwe obu baine omu nsi yoona. Okutashushana n’ebigombe by’ediini ebindi, rukundo yaitu y’eishe-emwe terikurugiirira aha ihanga, erangi, nari emigyenzo. Nitureeba rukundo egi eyaabuzima twaba turi omu nteerane enkye n’empango. Ekyo nikituhamiza ngu omuringo ogu turikuramyamu Yehova nigwo guhikire.
14. Kurugiirira aha Abakolosai 3:12-14, nitubaasa kworeka tuta ngu nitukundana munonga?
14 Ebyahandiikirwe nibituhiga ‘kukundana munonga.’ (1 Pet. 4:8) Nitworeka ngu nitukundana turikusaasirana kandi turikugumisiriza obutahikiirira bw’abandi. Kandi nitusherura oburyo bw’okuba efura n’okutaayaayisa boona omu kibiina, otwariiremu n’abarikutugwisa kubi. (Shoma Abakolosai 3:12-14.) Okukundana tutyo n’akamanyiso akarikworeka ngu turi Abakristaayo abaabuzima.
“OKWIKIRIZA KUMWE”
15. Omu kuramya kwaitu nitutooreza tuta Abakristaayo ba ira?
15 Nitukuratira Abakristaayo ba ira n’omu miringo endiijo oyihireho okuramya. Nk’eky’okureeberaho, entebeekanisa y’ekibiina kyaitu erikutwariramu abarikutaayaayira ebibiina, abareeberezi, n’abaheereza, neeshushana n’ey’entumwa omu kyasha ky’okubanza. (Fil. 1:1; Tit. 1:5) Emiteekateekyere ei twine aha kuteerana n’obushwere, eshagama, n’okubinga abasiisi abarikwanga kweteisa, biri nk’oku byabaire nibikorwa omu kyasha ky’okubanza.—Byak. 15:28, 29; 1 Kor. 5:11-13; 6:9, 10; Heb. 13:4.
16. Nitwegyera ki aha biri omu Abaefeso 4:4-6?
16 Yesu akagira ngu baingi bakaba nibaija kweyeta abeegi be, kwonka ti boona ngu buzima n’abakuratsi be abaabuzima. (Mat. 7:21-23) Ebyahandiikirwe bikarabura ngu omu biro by’emperu, baingi bakaba nibaija kuba “abarikuhamya emigyenzo y’ediini” nari abarikweshushaniriza nk’abarikutiina Ruhanga. (2 Tim. 3:1, 5) Kwonka, Baibuli neetworeka butunu ngu hariho “okwikiriza kumwe” oku Ruhanga arikusiima.—Shoma Abaefeso 4:4-6.
17. Ni baahi abarikukuratira Yesu hati, kandi abari omu kuramya kumwe okw’amazima?
17 Ni baahi abari omu kuramya kumwe okw’amazima obunaku obu? Twaheza kushwijuma obuhame. Twareeba omuringo gw’okuramya ogu Yesu yaayegyeise, kandi ogu Abakristaayo omu kyasha ky’okubanza baakuratiire. Mbwenu eky’okugarukamu ni kimwe kyonka, n’Abajurizi ba Yehova. Ka twine omugisha gw’omutaano kubarirwa omu baheereza ba Yehova n’okwegyesa amazima agarikumukwataho n’ebigyendererwa bye! Ka tugumizemu tuhamiire aha mazima tutarikubanganisa.
EKYESHONGORO 3 Amaani Gaitu, Amatsiko Gaitu, Obwesigye Bwaitu
^ kacw. 5 Omu kicweka eki, nituza kureeba okuramya kw’amazima oku Yesu yaatandikireho, tushwijume n’oku abeegi be aba ira baamutooreize. Kandi nituza n’okureeba obuhame oburikworeka ngu Abajurizi ba Yehova nibo Bakristaayo abaabuzima abarikutooreza omuringo gw’okuramya okwo obunaku obu.
^ kacw. 9 Reeba akabokusi “Abakristaayo Ba Ira Bakaba Nibakoresa Eiziina rya Ruhanga?” omu Watchtower, eya Gyuraayi 1, 2010, rup. 6.
^ kacw. 10 Nk’eky’okureeberaho, 2008, Paapa Benedict XVI akaragiira ngu eiziina rya Ruhanga tiriine “kukoresibwa n’obu kwakuba okwaturwa” omu kuramya kw’Abanyakaturiki, omu byeshongoro, nari omu okushaba.
^ kacw. 63 ENSHOBOORORA Y’EKISHUSHANI: Ekibiina kya Yehova kishohoize Baibuli ya New World Translation omu ndimi ezirikurenga 200 kugira ngu abantu babaase kushoma Baibuli erimu eiziina rya Ruhanga omu ndimi zaabo.
