1-2. Kurugiirira ahari 1 Timoseo 6:20, Timoseo akaba akwatsiibwe ki?

EBINTU byaitu eby’omuhendo nitukira kubibiitsya abantu abu turikwesiga. Nk’eky’okureeberaho, nitubaasa kubiika esente zaitu omu banka. Twakora tutyo, nitumanya ngu esente zaitu zibiikirwe gye, kandi tihaine orikubaasa kuziiba. Nitwetegyereza gye eki kirikumanyisa okubiitsya abandi ekintu eki turikutwara nk’eky’omuhendo.

² Shoma 1 Timoseo 6:20. Entumwa Paulo akaijutsya Timoseo ngu akaba akwatsiibwe ekintu ky’omuhendo, nikwo okumanya okuhikire okurikukwata aha kigyendererwa eki Ruhanga ainiire abantu. Kandi Timoseo akaba akwatsiibwe n’omugisha ‘gw’obuurira ekigambo kya Ruhanga,’ n’okukora ‘omurimo gw’omubuurizi w’engiri.’ (2 Tim. 4:2, 5) Paulo akahiga Timoseo kurinda ebi yaabaire akwatsiibwe. Nka Timoseo, naitwe tukwatsiibwe ebintu eby’omuhendo. Ni bintu ki ebyo? Kandi ahabw’enki twine kurinda eby’omuhendo ebi Yehova atuhaire?

3-4. Ni nshonga ki ezimwe ezirikureetera amazima ga Baibuli kuba ag’omuhendo?

³ Yehova atuhaire okumanya okuhikire okw’amazima g’omuhendo agari omu Kigambo kye, Baibuli. Amazima aga n’ag’omuhendo ahakuba nigatwegyesa oku turikubaasa kugira omukago murungi na Yehova, kandi nigashoboorora ekirikureeta okushemererwa okwabuzima. Twayega amazima aga kandi tukagagyenderaho, nitukomoororwa kuruga omu bukwatwa bw’enyegyesa z’ebishuba n’ebikorwa by’obushambani.​—1 Kor. 6:9-11.

⁴ Enshonga endiijo ahabw’enki amazima agari omu Kigambo kya Ruhanga n’ag’omuhendo, n’ahabw’okuba Yehova naagamanyisa  abacureezi bonka abaine ekihika kihikire eky’okutunga amagara agatahwaho. (Byak. 13:48) Abantu nk’abo nibaikiriza omuhanda ogu Ruhanga ataireho kutwegyesa amazima obunaku obu. (Mat. 11:25; 24:45) Titurikubaasa kweyegyesa amazima aga ahabwaitu, kandi tihaine ekirikwingana nago omu kuba ag’omuhendo.​—Enf. 3:13, 15.

5. Ni kintu ki ekindi eki Yehova atukwatsize?

⁵ Yehova atukwatsize n’obujunaanizibwa bw’okwegyesa abandi amazima agarikumukwataho n’ebigyendererwa bye. (Mat. 24:14) Obutumwa obu turikubuurira n’obw’omuhendo, ahakuba nibuhwera abantu kwija kuba omu ka ya Yehova, kandi nibubaha n’omugisha gw’okwija kutunga amagara agatahwaho. (1 Tim. 4:16) Kyona eki turikukora omu kubuurira yaaba kikye nari kihango kurugiirira aha kubaasa kwaitu, nitushagika omurimo ogurikukirayo obukuru obunaku obu. (1 Tim. 2:3, 4) Ka n’omugisha gw’amaani kukora hamwe na Ruhanga!​—1 Kor. 3:9.

6. Niki ekyahikire ahari bamwe abaaremirwe kurinda ebi baakwatsiibwe?

⁶ Bagyenzi ba Timoseo abamwe tibarasiimire omugisha gw’okukora hamwe na Ruhanga. Ahabw’okugira ngu Demas akakunda ebintu by’ensi, akafeerwa omugisha gw’okugumizamu naakora hamwe na Paulo. (2 Tim. 4:10) Filego na Herumogene nikireebeka bakatsigaho obuheereza bwabo ahabw’okutiina ngu nibaija kuhiiganisibwa nka Paulo. (2 Tim. 1:15) Humenaayo, Alegizanda, na Fileeto bakeehagura aha mazima baarekyera aho kuheereza Yehova. (1 Tim. 1:19, 20; 2 Tim. 2:16-18) Nikireebeka, abo boona omu kubanza bakaba bahami omu by’omwoyo, beitu eki baabaire baine tibarakireebire nka kikuru.

7. Sitaane naakoresa bukoryo ki kutushendashenda?

⁷ Sitaane naateeraho ata kutureetera kutsigaho eby’omuhendo ebi Yehova atukwatsize? Yetegyereze bumwe aha bukoryo bwa Sitaane. Naakoresa eby’okweshemeza n’eby’amakuru kuhindura emiteekateekyere yaitu, emitwarize yaitu, n’ebi turikutwara nka bikuru, kutureetera kuruga omu mazima mporampora. Naakoresa ab’orwingano rwaitu kutugyemesereza, nari kutuhiiganisa kurekyera aho kubuurira. Kandi naateeraho kutushendashenda kuhurikiza ‘ebigambo ebi barikweta eby’obwengye’ eby’abeehagwire aha mazima kugira ngu tutsigyeho amazima.​—1 Tim. 6:20, 21.

8. Ekyahikire aha w’eishe-emwe Daniel nitukyegyeraho ki?

⁸ Twaba tuteegyendesereize, mporampora nitubaasa kuruga omu mazima. Teekateeka aha ky’okureeberaho kya Daniel, * owaabaire naakunda emizaano y’aha kompyuta.  Naashoboorora ati: “Nkatandika kuzaana emizaano y’aha kompyuta obu naabaire nyine emyaka nka ikumi. Omu kubanza, nkaba ninzaana emizaano etari y’akabi munonga. Kwonka mporampora nkatandika kuzaana emizaano erimu obushaarizi n’eby’obufumu.” Ekyarugiremu, akatandika kuzaana emizaano egi kumara eshaaha nka 15 buri izooba. “Aha mutima nkaba nimmanya ngu omuringo gw’emizaano ei ndikuzaana n’obwire obu ndikumara ninzaana nibinyiriza hare na Yehova. Kwonka, omutima gwangye gukaba gwagangaire ndikuteekateeka ngu emisingye ya Baibuli terikunkwataho,” nikwo Daniel arikugira. Omu muringo ogutarikurahuka kureebwa, eby’okweshemeza nibibaasa kutureetera kuruga omu mazima. Ekyo kyabaho, nitubaasa kufeerwa eby’omuhendo ebi Yehova atukwatsize.

9. Kurugiirira ahari 1 Timoseo 1:18, 19, Paulo akagyeragyeranisa Timoseo na ki?

⁹ Shoma 1 Timoseo 1:18, 19. Paulo akagyeragyeranisa Timoseo n’omuserukare kandi yaamuhiga kurwana “okurwana okurungi.” Oku kukaba kutari kurwana okwa butoosha beitu okw’eby’omwoyo. Ni miringo ki ei Abakristaayo barikushushana n’abaserukare abari omu kurwana orutaro? Ni mitwarize ki ei twine kugira nk’abaserukare ba Kristo? Ka tureebe amashomo ataano agu turikubaasa kwegyera aha ky’okureeberaho eki Paulo yaakoreise. Ebi turaayege nibiza kutuhwera kuhamira aha mazima.

10. Okutiina Ruhanga nikimanyisa ki, kandi ahabw’enki twine kugira omutwarize ogu?

¹⁰ Gira omutwarize gw’okutiina Ruhanga. Omuserukare murungi naahamira aha murimo gwe. Naarwana mashaija kurinda ou arikukunda nari ekintu eki arikutwara nk’eky’omuhendo. Paulo akahiga Timoseo kugira omutwarize gw’okutiina Ruhanga n’okumuhamiraho. (1 Tim. 4:7) Twaba nitukunda Ruhanga kandi turikumwesigira kimwe, nitwija kwongyera kuhamira aha mazima.​—1 Tim. 4:8-10; 6:6.

11. Ahabw’enki twine kugira omutwarize gw’okwehana?

¹¹ Gira omutwarize gw’okwehana. Omuserukare aine kwehana yaaba ari ow’okugumizamu naakora gye omurimo gwe. Timoseo akaguma ahami omu by’omwoyo ahabw’okuta omu nkora obuhabuzi bwa Paulo obw’okwetantara okwetenga okubi, kubaasa kugira emitwarize mirungi, n’okukwatanisa n’ab’eishe-emwe bagyenzi be. (2 Tim. 2:22) Ekyo kikaba nikiija kwetengyesa omutwarize gw’okwehana. Twine kwehana kubaasa kusingura ebyetengo by’omubiri. (Rom. 7:21-25) Okwongyera ahari ekyo, twine kwehana kubaasa kuguma nitujuura emitwarize eya ira turikujwara emisya. (Efe. 4:22, 24) Kandi twaba turuhire bwanyima y’okukora munonga, nikibaasa kutwetengyesa kwegyema kuza omu ruteerane.​—Heb. 10:24, 25.

12. Nitubaasa kwongyera kukoresa gye tuta Baibuli?

¹² Omuserukare aine kuguma naayegyeza omu kukoresa eby’okurwanisa bye. Kubaasa kumanya kubikoresa gye, aine kuguma naayegyezamu obutoosha. Omu muringo nigwo gumwe, twine kwega obukoryo bw’okukoresa Ekigambo kya Ruhanga. (2 Tim. 2:15) Bumwe aha bukoryo obu nitubwegyera omu nteerane zaitu. Kwonka twaba turi ab’okuhamiza abandi ngu amazima ga Baibuli n’ag’omuhendo, twine kuhamira aha ntebeekanisa yaitu y’okweyegyesa Baibuli. Twine kukoresa Ekigambo kya Ruhanga kuhamya okwikiriza kwaitu. Eki nikitwariramu ekirikukira aha kushoma bushoma Baibuli. Twine kuteekateeka aha bi turikushoma kandi tukacondooza omu bitabo by’ekibiina kugira ngu twetegyereze gye Ebyahandiikirwe kandi tubigyendereho. (1 Tim. 4:13-15) Obwo nitwija kubaasa kukoresa gye Ekigambo kya Ruhanga kwegyesa abandi. Kandi eki nikikira aha kubashomera ebyahandiikirwe  kuruga omu Baibuli. Nitwenda kubahwera kwetegyereza ekyahandiikirwe eki twabashomera n’oku barikubaasa kukigyenderaho. Twahamira aha ntebeekanisa yaitu y’okweyegyesa Baibuli, nitubaasa kwongyera aha kubaasa kwaitu okw’okwegyesa abandi Ekigambo kya Ruhanga.​—2 Tim. 3:16, 17.

13. Kuhikaana n’ebiri omu Abaheburaayo 5:14, ahabw’enki twine kukoresa okwetegyereza?

¹³ Koresa okwetegyereza. Omuserukare aine kuteekateeka aha kabi akarikubaasa kubaho reero akakeetantara. Nikyo kimwe, naitwe twine kumanya gye embeera ezirikubaasa kuturugiramu akabi kandi tukeega kuzeetantara. (Enf. 22:3; shoma Abaheburaayo 5:14.) Nk’eky’okureeberaho, twine kutoorana eby’okweshemeza n’obwegyendesereza. Emizaano y’aha tiivi na vidiyo nyingi nizikira kuba zirimu eby’obushambani. Emitwarize egyo terikushemeza Yehova kandi bwanyima neerugamu akabi. Twine kwetantara eby’okweshemeza ebirikubaasa kutuubya mporampora rukundo ei twiniire Yehova.​—Efe. 5:5, 6.

14. Okwetegyereza kukahwera kuta Daniel?

¹⁴ Daniel, owaaba yaagambirweho, akatandika kwetegyereza ngu okuzaana vidiyo ezirimu obushaarizi nari eby’obufumu n’eky’akabi. Akacondooza omu Watchtower Library kutunga obuhabuzi bw’okumuhwera omu buremeezi bwe. Akakwatwaho ata? Akarekyera aho kwejumba omu mizaano mibi egyo. Akashazamu okushaba kwe okw’okuguma naatunga emizaano egyo, kandi yaayecwa n’aha bu yaabaire naagizana nabo kurabira aha mukura. Daniel naagira ati: “Omu mwanya gw’okuzaana emizaano egi ey’aha kompyuta, nkatandika kukora ebintu ebindi aheeru nari kuba hamwe n’abanywani omu kibiina.” Daniel hati ni payoniya kandi omureeberezi.

15. Ahabw’enki ebitebyo ebitahikire n’eby’akabi?

¹⁵ Nka Timoseo, twine kumanya n’akabi akarikubaasa kuruga omu butumwa oburikujanjaazibwa abeehagwire aha mazima. (1 Tim. 4:1, 7; 2 Tim. 2:16) Nk’eky’okureeberaho, nibabaasa kuteeraho kushohoza ebishuba aha b’eishe-emwe kutureetera kugira okubangaanisa aha kibiina kya Yehova. Ebishuba nk’ebi nibibaasa kutuubya okwikiriza kwaitu. Twine kwetantara kuhabisibwa pokopoko egyo. Ahabw’enki? Ahakuba ebitebyo nk’ebi nibijanjaazibwa “abantu abasiisikaire obwengye, abaihiirweho amazima.” Ekigyendererwa kyabo n’okutandikaho “empaka n’okuhakana.”  (1 Tim. 6:4, 5) Nibenda ngu twikirize ebishuba byabo kandi tutandikye kwekyengyera ab’eishe-emwe.

16. Ni bintu ki ebirikutuhuzya ebi twine kwetantara?

¹⁶ Okwetantara ebirikuhuzya. Timoseo “nk’omuserukare murungi owa Kristo Yesu,” akaba aine kuta omutima aha buheereza bwe omu mwanya gw’okuhugibwa okusherura ebintu. (2 Tim. 2:3, 4) Nka Timoseo, titushemereire kwikiriza kuhugibwa ekyetengo ky’okwenda kutunga ebintu. ‘Okubeihwabeihwa eby’obutungi’ nikubaasa kwita rukundo ei twiniire Yehova, kutuubye okusiima oku twiniire Ekigambo kya Ruhanga, n’omuhimbo gwaitu gw’okubuurira abandi. (Mat. 13:22) Twine kuguma nitworobya embeera zaitu, kandi tukakoresa gye obwire bwaitu n’amaani gaitu turikwebembeza ‘okusherura Obukama.’​—Mat. 6:22-25, 33.

17-18. Nitubaasa kukora ki kwerinda kuhikwaho akabi omu by’omwoyo?

¹⁷ Ba oyeteekateekire kurahuka kugira eki waakora. Omuserukare aine kwetebeekanisa kare oku araatwaze. Twaba turi ab’okurinda ebintu ebi Yehova atukwatsize, twine kurahuka kugira eki twakora twareeba akabi. Niki ekiratuhwere kugira eki twakora ahonaaho? Twine kweteekateeka kare oku turatwaze haabaho akabi.

¹⁸ Nk’eky’okureeberaho, waaza aha mukoro, abari aha mukoro ogwo nibabooreka omuryango gw’okushohoreraho mukoro gutakatandikire. Ahabw’enki? Kugira ngu babaase kuruga omu mwanya ogwo ahonaaho haabaho akabi kitaraariire. Nikyo kimwe, nitubaasa kwegyezamu bukiri kare oku turaahungye twagwa aha bishushani by’obushambani kitaraariire, eby’obushaarizi, nari obutumwa bw’abeehagwire aha mazima twaba nitukoresa Intaneeti, nari twaba nitureeba vidiyo nari puroguraamu y’aha Tiivi. Twayetebeekanisiza ekirikubaasa kubaho, nitwija kugira eki twakora ahonaaho kuhunga akabi k’eby’omwoyo, reero tugume tushemeire omu maisho ga Yehova.​—Zab. 101:3; 1 Tim. 4:12.

19. Nitwija kutunga migisha ki twarinda eby’omuhendo ebi Yehova atuhaire?

¹⁹ Twine kurinda ebintu eby’omuhendo ebi Yehova atuhaire, ebirikutwariramu amazima ga Baibuli n’omugisha gwaitu gw’okugeegyesa abandi. Twakora tutyo, nitwija kugira omuntu w’omunda omurungi, nitwija kugira ekigyendererwa, tugire n’okushemererwa ahabw’okuhwera abandi kuhika aha kumanya Yehova. Twaba twine obuhwezi bwa Yehova, nitwija kubaasa kurinda ebi tukwatsiibwe.​—1 Tim. 6:12, 19.