Embeera NungI Ziri Haihi Kubaho!

‘Bwanyima yakaanya kakye omubi naija kuba atakiriho, buzima noija kumusherura aha mwanya gwe, oshangye atariho. Kwonka abacureezi nabaija kuhungura ensi beesiime ahabw’okugira obusingye bwingi.’—ZAABURI 37:10, 11.

NOOYENDA kureeba obunabi obwo aha ruguru nibuhikiirira? Hatariho kubangaanisa, ekyo nookyenda. Hariho enshonga nyingi ezirikubaasa kukureetera kukwiriza ngu nibuza kuhikiiririza juba.

Ebicweka eby’enyima birimu bumwe aha bunabi bwa Baibuli oburikutuhamiza gye ngu turi omu “biro by’aha mperu.” (2 Timoseo 3:1-5) Ruhanga akahiga abaahandiikire Baibuli kugamba aha mbeera ezo kutuhwera kugira amatsiko. (Abarooma 15:4) Okuhikiirira kw’obunabi obwo nikimanyisa ngu oburemeezi obu turikurabamu nibwija kuhendera.

Niki ekirabeho bwanyima y’ebiro by’emperu? Obukama bwa Ruhanga nibwija kutegyeka abantu boona. (Matayo 6:9) Yetegyereze eki Baibuli erikugamba oku embeera ziraabe ziri omu bwire obwo:

● Enjara neija kuba etariho. ‘Nihaija kubaho omweru mwingi omu nsi, emyaka neija kukondakonda omu misiri n’omu bibungo.’—Zaaburi 72:16.

● Endwara niziija kuhwaho. ‘Tihaine mutuuzi waayo orikwija kugira ati: Ndwaire.’—Isaaya 33:24.

● Ensi neija kugaruka kuba nungi. ‘Eihamba n’ensi eyomire nibiija kushemererwa, eihamba ry’omusheenyi niriija kushemererwa, rirabye ebirabyo nk’esheko y’ensi.’—Isaaya 35:1.

Obu ni bumwe aha bunabi bwa Baibuli oburi haihi kuhikiirira. Ahabw’enki otarikushaba Abajurizi ba Yehova kukworeka ahabw’enki barikwikiriza ngu embeera nungi ziri haihi kubaho?