Ruhanga naagarukamu okushaba kw’abantu b’amahanga goona. (Zaaburi 145:18, 19) Ekigambo kye Baibuli nikituhiga kumushaba aha bikwatiraine na buri kimwe ekirikutwerarikiriza. (Abafilipi 4:6, 7) Kwonka nabwo, okushaba okumwe tarikukusiima. Nk’eky’okureeberaho, okukwata ebigambo omu mutwe okaguma noobigarukagarukamu omu kushaba tikirikumushemeza.​—Shoma Matayo 6:7.

Kandi Yehova tarikusiima okushaba kw’abantu abarikwanga nkana kworobera ebiragiro bye. (Enfumu 28:9) Nk’eky’okureeberaho, omu bunaku bw’okuhandiikwa kwa Baibuli, Ruhanga akanga kuhurikiza okushaba kw’Abaisraeli abaabaire nibasheesha eshagama. Buzima twine kugira ebi twahikiiriza twaba nitwenda ngu Ruhanga ahurire okushaba kwaitu.​—Shoma Isaaya 1:15.

Titurikubaasa kushaba Ruhanga twaba tutaine kwikiriza. (Yakobo 1:5, 6) Twine kuba nitwikiriza ngu ariho kandi ngu naatufaho. Nitubaasa kuhamya okwikiriza kwaitu turikwega Baibuli, ahabw’okuba okwikiriza okwabuzima nikurugiirira aha buhame oburi omu Kigambo kya Ruhanga.​—Shoma Abaheburaayo 11:1, 6.

Twine kushaba omu mazima n’obucureezi. Nangwa n’omwana wa Ruhanga Yesu, akaba ashaba omu bucureezi. (Luka 22:41, 42) N’ahabw’ekyo, omu mwanya gw’okugambira Ruhanga eki ashemereire kukora, twine kuteeraho kwetegyereza ebi arikutwenza turikushoma Baibuli. Bwanyima nitubaasa kushaba ebirikuhikaana n’ebi akunda.​—Shoma 1 Yohaana 5:14.