1. Ahabw’enki okutooreza Yesu kurikutwiriza haihi Yehova?

NITUKIRA kwenda kutooreza abo abaine emitwarize ei turikwegomba. Aha bantu boona abaatwireho omu nsi, tihaine ou turikubaasa kutooreza kukira Yesu Kristo. Ahabw’enki? Yesu akagira ati: “Ondeebire, biri areebire Isheboona.” (Yoh. 14:9) Yesu naayorekyera kimwe emitwarize nk’eya Ishe, kugira ngu waamwetegyereza nooba ori nk’owaareeba Ishe. N’ahabw’ekyo, twatooreza Yesu nitwirira haihi Yehova, orikukirayo omu nsi n’omu iguru. Ka n’omugisha gw’amaani kuteeraho kugira emitwarize nk’ey’Omwana we!

2, 3. (a) Ahabw’enki Yehova yaatuhaire bingi ebirikukwata aha Mwana we, kandi naayenda ngu tukore ki? (b) Nituza kushwijuma ki omu kicweka eki n’ekirikukurataho?

² Kwonka shi nitubaasa kumanya tuta emitwarize ya Yesu? Yehova ataire omu Baibuli bingi ebirikushoboorora ahari Yesu. Yehova atuhaire byona ebirikukwata ahari Yesu, ahakuba naayenda ngu tumanye gye Omwana we tubaase kumutooreza. (Shoma 1 Petero 2:21.) Yesu akatuteeraho eky’okureeberaho ngu tumutooreze. Yehova naaba ari nk’orikutugira ngu tukuratire Yesu turikugyendera omu bigyere bye. Hatariho kubanganisa, Yesu akatuteeraho eky’okureeberaho ekihikiriire, kwonka  itwe tituhikiriire. N’ahabw’ekyo, Yehova tarikuteekateeka ngu nitubaasa kutooreza Yesu omu muringo oguhikiriire. Kureka, naayenda ngu tumutooreze nk’oku turikubaasa ahabw’okugira ngu tituhikiriire.

³ Ka tushwijume emwe aha mitwarize ya Yesu erikushemeza. Omu kicweka eki, nituza kugamba aha bucureezi bwe n’embabazi ze, kandi omu kirikukurataho, nituza kugamba aha bumanzi bwe n’okwetegyereza kwe. Aha bikwatiraine na buri mutwarize, nituza kugarukamu ebibuuzo bishatu ebi: Omutwarize ogu nigumanyisa ki? Yesu akagworeka ata? Nitubaasa kumutooreza tuta?

4. Noobaasa kushoboorora ota obucureezi?

⁴ Obucureezi niki? Omu nsi egi erimu abantu abaine amaryo, abamwe nibateekateeka ngu okuba omucureezi n’obweremwa nari obuteyesiga. Kwonka shi ekyo kihikire? Okuba omucureezi nikyetengyesa obumanzi. Obucureezi nibugambwaho “nk’omutwarize ogurikutaana aha maryo n’omwehuriro.” Obucureezi nibutandikira aha muringo ogu omuntu arikweteekateekaho. Kashoboorozi emwe erikushoboorora ebigambo bya Baibuli neegira eti: “Obucureezi n’okumanya ngu buzima turi ab’ahansi omu maisho ga Ruhanga.” Twaba turi abacureezi omu maisho ga Ruhanga, nitwija n’okwetantara kwetwara nk’abarikukira bagyenzi baitu. (Rom. 12:3; Fil. 2:3) Tikyorobi abantu abatahikiriire kuba abacureezi. Kwonka nitubaasa kwega kuba abacureezi twateekateeka aha mukago gwaitu na Ruhanga kandi tukatooreza n’Omwana we.

5, 6. (a) Mikaeli maraika omukuru n’oha? (b) Mikaeli akooreka ata ngu n’omucureezi?

⁵ Yesu akooreka ata obucureezi? Ebyafaayo nibyoreka ngu Omwana wa Ruhanga akaba ari omucureezi obu yaabaire akiri omu iguru nk’ekihangirwe eky’omwoyo, n’obu yaizire omu nsi. Teekateeka aha by’okureeberaho ebi.

⁶ Emiteekateekyere ye. Omuhandiiki wa Baibuli Yuda, akahandiika aha ky’okureeberaho kya Yesu obu yaabaire atakaizire mu nsi. (Shoma Yuda 9.) Yesu maraika omukuru orikwetwa Mikaeli, akagira obutaikirizana na “Sitaane” arikumuhakanisa. Obutaikirizana bwabo bukaba nibukwata aha ‘mubiri gwa Musa.’ Ijuka ngu Musa ku yaafiire, Yehova akaziika omubiri gwe omu mwanya ogutarikumanywa. (Bir. 34:5, 6) Noobaasa kushanga ngu Omuregi akaba naayenda kukoresa omubiri gwa Musa kwenegyeza okuramya kw’ebishuba. Eki Omuregi yaabaire agyendereire kyona, Mikaeli akooreka obumanzi yaamuzibira. Ekitabo kimwe nikigira ngu ebigambo “okurwanisa” hamwe “n’okuhakana” nibibaasa n’okukoresibwa kumanyisa “okuhakanisa okuhikire” ekirikworeka ngu “Mikaeli akahakanisa Omuregi ngu taine bushoboorozi bw’okutwara omubiri gwa Musa.” Kwonka, Maraika Omukuru akamanya ngu bukaba butari bushoboorozi bwe kucwera Omuregi orubanja. Kureka, enshonga akagireka omu mikono y’Omuramuzi Orikukirayo, Yehova. N’ahabw’ekyo, Mikaeli akeetantara kurenga aha bushoboorozi bwe n’obu araabe yaabaire aine ekiniga. Ka yaabaire ari omucureezi!

7. Yesu akooreka ata ngu n’omucureezi omu migambire ye n’ebikorwa bye?

⁷ Yesu obu yaabaire naaheereza omu nsi, akaba agamba kandi akora ebintu omu muringo ogurikworeka ngu n’omucureezi. Emigambire ye. Yesu akaba atakora bintu kwehimbisa. Kureka, akaba akora byona kuhimbisisa Ishe. (Mak. 10:17, 18; Yoh. 7:16) Akaba atagambira beegi be omu muringo  ogurikworeka ngu n’abashema nari ngu n’ab’ahansi. Kureka, akaba agamba nabo omu muringo ogurikworeka ngu naabaha ekitiinisa, kandi ku baabaire bakora ebirungi, akaba abasiima kworeka ngu naabeesiga. (Luk. 22:31, 32; Yoh. 1:47) Ebikorwa bye. Yesu akacwamu kutuura omu nsi ataine bintu bingi. (Mat. 8:20) Akacwamu kukora emirimo y’ahansi ayekundiire. (Yoh. 13:3-15) Akataho eky’okureeberaho ekihikire eky’obucureezi n’okworoba. (Fil. 2:5-8) Okutashushana n’abantu abandi abaabaire baine omwehuriro n’amaryo batarikwenda kworoba, Yesu akakora ebi Ruhanga arikukunda “yaayoroba okuhika aha kufa.” Hatariho kubanganisa, Yesu Omwana w’omuntu akaba ari “omucureezi omu mutima.”—Mat. 11:29.

8, 9. Nitubaasa kworeka tuta ngu turi abacureezi?

⁸ Nitubaasa kutooreza Yesu tuta omu kworeka obucureezi? Emiteekateekyere yaitu. Twaba turi abacureezi, nitwija kumanya ngu obushoboorozi bwaitu bwine obugarukiro. Nitwija kumanya ngu titwine bushoboorozi bw’okucwera abandi orubanja. Kandi titurikwija kubanganisa ebigyendererwa byabo. (Luk. 6:37; Yak. 4:12) Obucureezi nibutuhwera kwetantara ‘kurengyesereza okuhikiirira,’ n’okureeba abo abatarikubaasa kukora nk’ebi turikukora nari abataine bujunaanizibwa nk’obwaitu nk’ab’ahansi. (Mub. 7:16) Abareeberezi abacureezi tibarikwereeba nk’abarikukira abaheereza ba Ruhanga bagyenzi baabo. Kureka, abariisa abo nibatwara abandi nk’abarikubakira kandi beetwara nk’ab’ahansi.—Fil. 2:3; Luk. 9:48.

⁹ Teekateeka ahari W. J. Thorn, owaabaire naaheereza nk’omureeberezi orikutaayaayira ebibiina, kutandika na 1894. Bwanyima y’okumara emyaka mingi omu buheereza obwo, bakamweta aha ofiisi y’eitaagi omuri New York kuza kukora omu kiju ky’enkoko. Akagira ati: ‘Ku naabaire ntandika kweteekateekaho nk’ow’ahaiguru, nkaba ngira nti: Iwe katontori k’omucuucu we, oine ki ekirikukwehuriza?’ (Shoma Isaaya 40:12-15.) Buzima egyo ka n’emiteekateekyere y’obucureezi!

10. Nitubaasa kworeka tuta ngu turi abacureezi omu migambire yaitu n’omu bikorwa byaitu?

¹⁰ Emigambire yaitu. Twaba turi abacureezi, ebigambo byaitu nibiija kukyoreka. (Luk. 6:45) Omu kugaaniira n’abandi, nitwetantara kugamba munonga aha businguzi n’obujunaanizibwa bwaitu. (Enf. 27:2) Omu mwanya gw’ekyo, tushemereire kureeba ebirungi omu b’eishe-emwe, reero tubasiime ahabw’emitwarize mirungi ei baine, n’ahabw’ebi barikubaasa kukora. (Enf. 15:23) Ebikorwa byaitu. Abakristaayo abacureezi tibarikuteeraho kwenda kurangaanwa omu nsi egi. Omu mwanya gw’ekyo, nibamarwa n’ebi baine, kandi bakora n’emirimo erikureebeka nk’ey’ahansi kugira ngu babaase kuheereza gye Yehova nk’oku kirikubaasika. (1 Tim. 6:6, 8) Ekikuru munonga, nitubaasa kworeka ngu turi abacureezi turikworoba. Nikyetengyesa obucureezi kworobera abareeberezi omu kibiina, n’okwikiriza obuhabuzi obu turikuheebwa kurabira omu kibiina kya Yehova.—Heb. 13:17.

11. Embabazi nikimanyisa ki?

¹¹ Embabazi niki? Ekigambo “embabazi” nikivunuurwa “nk’enyehurira y’okutwaza gye n’okufayo.” Embabazi ziine akakwate na rukundo n’okusaasibwa abandi. Ebyahandiikirwe nibigamba aha ‘kusaasira kwa Ruhanga n’aha mbabazi ze.’ (Luk. 1:78; 2 Kor. 1:3;  Fil. 1:8) Ekitabo kimwe ekirikushoboorora ahari Baibuli kirikugamba aha mbabazi, nikigira ngu okworeka embabazi nikikira aha kusaasibwa abo abaine eki bakyenire. Nikigira ngu okugirira omuntu embabazi nikimanyisa ngu twine “kumufaho munonga, tukamuhwera” turikugira eki twakora kuhindura embeera ze kuba nungi.” Embabazi nizo zirikuhiga omuntu kugira eki yaakora kuhindura embeera z’abandi.

12. Niki ekirikworeka ngu Yesu akaba agirira abandi embabazi, kandi ekyo kikamuhiga kukora ki?

¹² Yesu akooreka ata embabazi? Akaba aine omutima gw’embabazi kandi arikuzooreka n’omu bikorwa. Yesu akaba agirira abandi embabazi. Ku yaareebire munywani we Mariamu n’abu yaabaire aine nibarira ahabw’okufa kwa Laazaaro, nawe ‘akarira.’ (Shoma Yohaana 11:32-35.) Bwanyima, ahabw’esaasi akazoora Laazaaro nk’oku yaabaire yaasaasiibwe omukazi efaakazi akazoora omwana we. (Luk. 7:11-15; Yoh. 11:38-44) Yesu ahabwʼekikorwa ekyo ekyʼembabazi, naabaasa kuba yaabaasiise Laazaaro kuba omwe aha baraatungye amagara agatahwaho omu iguru. Enyimaho, Yesu akaba yaagiriire “esaasi” nari embabazi abantu baingi abaizire ahu ari. Embabazi zikamuhiga, “yaatandika kubeegyesa bingi.” (Mak. 6:34) Ekikorwa ekyo ka kyahindwire embeera za buri omwe owaikiriize ebi yaabeegyeise! Yetegyereze ngu embabazi za Yesu zikaba nizikira aha kugira enyehurira, kureka zikaba zimuhiga kuba niwe yaabanza kugira eki yaakorera abandi.—Mat. 15:32-38; 20:29-34; Mak. 1:40-42.

13. Yesu akaba agamba ata n’abandi omu muringo gw’embabazi? (Reeba ekishushani aha kutandika.)

¹³ Ebigambo bye eby’embabazi. Embabazi za Yesu zikaba zimuhiga kugambira gye abandi, na munonga abaine obusaasi. Entumwa Matayo arikujuriza ebigambo bya Isaaya akagamba ahari Yesu ati: “Orubingo orushatukire tariruhenda, n’orumuri orurikwaka kubi tariruraaza.” (Isa. 42:3; Mat. 12:20) Yesu akaba agamba omu muringo ogurikugaruramu amaani abo abari nk’orubingo rushatukire nari abari nk’orutambi rw’etaara oruri haihi kuraara. Akaba abuurira amakuru agarikureeta amatsiko “kushemba abacwekire emitima.” (Isa. 61:1) Akeeta abo abaabaire ‘baruhire n’abaremereirwe’ kwija ahariwe, arikubahamiza ngu nibaija kutunga “okuhuumura omu mitima” yaabo. (Mat. 11:28-30) Akahamiza abakuratsi be ngu Ruhanga naagirira embabazi buri omwe orikumuramya, otwariiremu ‘n’abato’ abarikureebeka nk’abataine mugasho kurugiirira aha ndeeba y’abantu omu nsi.—Mat. 18:12-14; Luk. 12:6, 7.

14. Nitubaasa kugirira tuta abandi embabazi?

¹⁴ Nitubaasa kutooreza tuta Yesu omu kugirira abandi embabazi? Omutima gw’embabazi. Baibuli neetugambira kugira “omutima gw’esaasi,” n’obu guraabe gutarikwija bwija. Okugira omutima gw’embabazi ni kimwe aha bintu ebi Yehova arikwenda ngu Abakristaayo boona bagire. (Shoma Abakolosai 3:9, 10, 12.) Noobaasa kugirira ota abantu embabazi? Shashaanura omutima gwawe. (2 Kor. 6:11-13) Hurikiza gye omuntu yaaba naakugambira oku arikwehurira n’ebirikumwerarikiriza. (Yak. 1:19) Noobaasa kwebuuza oti: ‘Ku ogire ngu niinye ndi omu mbeera nk’eye, nkaayehuriire nta? Nkaayenzire ki?’—1 Pet. 3:8.

15. Nitubaasa kukora ki kuhwera abari nk’orubingo rushatukire n’abari nk’orutambi orutarikwaka gye?

¹⁵ Ebikorwa byaitu eby’embabazi. Embabazi nizituhiga kwenda kugira eki twakora kuhindura embeera z’abandi, na munonga  abo abarikuba bari nk’orubingo rushatukire nari nk’orutambi rutarikwaka gye. Nitubaasa kubahwera tuta? “Murire hamwe n’abarikurira,” nikwo Abarooma 12:15 harikugira. Abaine obusaasi nibaba nibenda ngu tubagirire embabazi okukira okugarukamu ebibuuzo byabo. Munyaanyazi-itwe omwe owaahumuriziibwe ab’eishe-emwe bagyenzi be bwanyima y’okufeerwa omuhara akagira ati: “Nkasiima munonga banywani bangye ku baizire bakarira naanye.” Nitubaasa kworeka ngu nitufayo aha bandi turikubakorera eby’embabazi. Haine omufaakazi ou orikumanya orikwenda kuhwerwa kuhunduuza enju ye? Hariho Omukristaayo okuzire oine kutwarwa omu nteerane, kutwarwa omu kubuurira, nari kutwarwa aha mushaho? Nangwa n’ekikorwa kikye ky’embabazi nikikora kihango kuhindura embeera y’ow’eishe-emwe oine eki akyenire. (1 Yoh. 3:17, 18) Ekirikukira obukuru, nitubaasa kworeka ngu nitufayo aha bandi turikwejumbira kimwe omu kubuurira. Ogu nigwo muringo ogurikukirayo obukuru ogw’okuhindura embeera z’abantu.

16. Nitubaasa kugamba ki kuhuumuriza abaine amaganya?

¹⁶ Ebigambo byaitu eby’embabazi. Okufayo aha bandi nikutuhiga kugumya “abahahaire emitima.” (1 Tes. 5:14) Nitubaasa kugamba ki kubagaruramu amaani? Nitubaasa kubahwera kugarukamu amaani turikworeka ngu nitubafaho. Nitubaasa kubasiima twihire aha mutima kubahwera kureeba emitwarize mirungi ei baine n’ebi barikubaasa kukora. Nitubaasa kubaijutsya ngu Yehova akabahitsya haihi n’Omwana we, n’ahabw’ekyo bashemereire kuba bari ab’omuhendo omu maisho ge. (Yoh. 6:44) Nitubaasa kubahamiza ngu Yehova naafayo munonga aha baheereza be “ab’emitima ehendekire” nari “ab’omutima ogweteisiize kimwe.” (Zab. 34:18) Ebigambo byaitu eby’embabazi nibibaasa kukiza abo abarikwenda kuhuumurizibwa.—Enf. 16:24.

17, 18. (a) Yehova naayenda ngu abareeberezi batwarize bata entaama ze? (b) Nituza kugamba ahari ki omu kicweka ekirikukurataho?

¹⁷ Abareeberezi, Yehova naayenda ngu mutwarize entaama ze omu muringo gw’embabazi. (Byak. 20:28, 29) Mwijukye ngu n’obujunaanizibwa bwanyu kuriisa, kuhuumuriza, n’okugaruramu amaani entaama ze. (Isa. 32:1, 2; 1 Pet. 5:2-4) N’ahabw’ekyo, omureeberezi oine embabazi tarikubategyeka, arikutaho ebiragiro nari kubagyemesereza kukora kihango kandi obwo embeera zaabo zitarikubabaasisa. Omu mwanya gw’ekyo, naabareetera okushemererwa omu mutima, arikwesiga ngu rukundo ei bainiire Yehova neija kubahiga kumuheereza gye nk’oku kirikubaasika.—Mat. 22:37.

¹⁸ Twaba abacureezi kandi abanyambabazi nka Yesu, hatariho kubanganisa nitwija kugumizamu nitugyendera omu bigyere bye. Omu kicweka ekirikukurataho, nituza kugamba aha mitwarize mirungi ya Yesu endiijo ebiri, obumanzi n’okwetegyereza.