Ekicweka ekiri omu magaziini erikwetwa Biblical Archaeology Review nikigira ngu okubaho kw’abantu “nka 50” abarikugambwaho omu Byahandiikirwe eby’Oruheburaayo hati nikubaasa kuhamibwa ebizoirwe omu itaaka. Bamwe aharibo n’abagabe 14 ba Yuda na Israeli, otwariiremu abantu abarikumanywa gye nka Daudi na Hezekia, n’abaabaire batarikumanywa nka Menahemu na Peka. Aba nibatwariramu na Baafaraho 5 n’abagabe 19 Abaasiria, Babulooni, Moabu, Buperesi, na Siria. Kwonka, abagabe b’ensi tibo bonka abarikushangwa omu Baibuli n’ebizoirwe omu itaaka. Nikyo kimwe n’abaabaire batari b’amaani munonga nk’abanyamurwa, abahandiiki, n’abakuru abandi.

Abantu abo boona abaagambwaho, “abarikuzoora eby’omu itaka nibabaikirizanaho” nikwo ekicweka kya magaziini egyo kyagizire. N’amazima, Ebyahandiikirwe by’Orugriika nibigamba aha bantu baingi abaabaireho, kandi hariho n’obuhame kuruga omu bizoirwe omu itaaka oburikuhamya ngu abantu aba bakabaho nka Herodia, Pontio Pilaato, Tiberia, Kayaafa, na Serugio Paulo.

N’obu omu mahamba g’amahanga agu Baibuli yaahandiikiirwemu haraabe hatarimu entare obunaku obu, Ebyahandiikirwe nka 150 nibizigambaho, ekirikworeka ngu zikaba nizimanywa gye. N’obu bingi ebirikugamba aha ntare biri eby’akamanyiso, kwonka ebyahandiikirwe ebindi nibigamba aha ntare zenyinye. Nk’eky’okureeberaho, Samusooni, Daudi, na Benaaya nibagambwaho ngu bakaita entare. (Abaramuzi 14:5, 6; 1 Samueli 17:34, 35; 2 Samueli 23:20) Abandi bakaitwa entare.—1 Abagabe 13:24; 2 Abagabe 17:25.

Ira, entare ya Asia (Panthera leo persica) ekaba neemanywa omuri Asia, Greece, Palestine, Syria, Mesopotamia, n’omuri India. Ekirikworeka ngu bakaba nibatiina enyamaishwa egi kandi bagiha ekitiinisa nikireebekyera omu bi baabaire nibahuuga. Ebishushani by’entare ekibumbirwe bakaba babikoresa omu kuhuunda Babulooni eya ira.

Abamwe bakaba nibahiiga entare omuri Palestine ekyasha kya 12 Yesu aherize kuzaarwa kiri haihi kuhwa. Entare zaine kuba zaahwaire omu mwanya ogwo bwanyima ya 1300. Kwonka, zikaba nizikigambwaho omu Mesapotamia na Asria kuhika omu kyasha kya 19 n’omuri Iran na Iraq omu kyasha kya 20.