1, 2. Kurugiirira aha ntumwa Yohaana, Ruhanga atworekire ata oku turikubaasa kumukunda?

OMURINGO murungi gw’okwegyesa abaana n’okubateeraho eky’okureeberaho. Entumwa Yohaana akahandiika ngu “itwe nitukunda, ahakuba [Ruhanga] akabanza kutukunda.” (1 Yoh. 4:19) N’ahabw’ekyo, nikyeyoreka butunu ngu Yehova atuteereireho eky’okureeberaho ekirikukirayo, kutuhwera kumukunda.

² Ni mu muringo ki ogu Ruhanga ‘yaabandize kutukunda’? Entumwa Paulo akagira ati: “Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.” (Rom. 5:8) Yehova ahabw’okwefeerereza munonga akahayo Omwana we nk’ekitambo ahabw’abantu abaine okwikiriza, ayorekire rukundo eyaabuzima. Akooreka rukundo ye arikugira eki yaahayo, kandi akeefeerereza munonga. Ekikorwa kya Ruhanga eky’obufura nikitubaasisa kumwirira haihi kugasirwa omuri rukundo ye, kandi turikwihirira ahari ekyo, naitwe nitubaasa kumukunda.—1 Yoh. 4:10.

3, 4. Tushemereire kworeka tuta ngu nitukunda Ruhanga?

³ Rukundo nigwo mutwarize gwa Yehova ogurikukirayo, n’ahabw’ekyo nitubaasa kwetegyereza ahabw’enki Yesu yaagarukire omwe owaamubuurize, ngu ekiragiro ky’okubanza ekya Ruhanga  ni: “Okunde Mukama Ruhanga waawe n’omutima gwawe gwona, n’obwengye bwawe bwona, kandi n’amaani gaawe goona.” (Mak. 12:30) Kurugiirira aha bigambo bya Yesu, nitwega ngu rukundo ya Ruhanga okubanza neetwariramu, omutima gwaitu. Twaba tutarikukundira kimwe Yehova, tikirikumushemeza. Kwonka, nitwetegyereza ngu rukundo ya Ruhanga neetwariramu n’amagara gaitu goona, ebiteekateeko byaitu byona, n’amaani gaitu goona. Eki nikimanyisa ngu okukunda Ruhanga tutaine buryarya nikikira aha nyehurira y’omu mutima. Oyihireho okuhurira ngu nitukunda Ruhanga omu mutima gwaitu, tushemereire kuba nitumukunda omu biteekateeko n’omu bikorwa. Kurugiirira ahari nabi Miika, eki nikyo Yehova arikutwenza.—Shoma Miika 6:8.

⁴ Nitubaasa kworeka tuta ngu buzima nitukunda Tataitwe ow’omu iguru? Tushemereire kumukunda tutarikwesaasira. Nk’oku Yesu yaayorekire, omubiri gwaitu gwona, enyehurira zaitu zoona, n’amagara gaitu goona bishemereire kuba nibimukunda. Omu kicweka ekihweire, tureebire emiringo ena oku Yehova ayorekire ngu naakundira kimwe abaana be. Hati ka tushwijume oku turikubaasa kworeka ngu nitukunda Yehova, kandi tukahamya rukundo ei tumwiniire omu miringo ei arikusiima.

5. Tushemereire kukora ki ahabw’ebi Yehova atukoreire?

⁵ Ku orikutunga ekiconco, nookora ki? Obundi nooyoreka ngu waakisiima. Kandi, nookikoresa gye, otarikukizaanazaanisa. Yakobo akagira ati: “Engabirano yoona enungi n’ekiconco kyona ekihikire biruga omu iguru, nibishuuma okuruga ahari Isheboona, Omuhangi w’ebirikwaka, otahindahinduka na kakye, n’obu kwakuba okugira ekicuucu ekireetwa okuhinduka.” (Yak. 1:17) Yehova naatuha ebikuru ebirikwetengyesa kubaasa kubaho kandi tukashemererwa. Mbwenu shi eki tikishemereire kutuhiga naitwe kumukunda?

6. Abaisraeli bakaba baine kukora ki kubaasa kugumizamu nibatunga emigisha ya Yehova?

⁶ Yehova akareeberera Abaisraeli kumara emyaka mingi kandi yaabaha n’emigisha mingi, omu by’omubiri n’eby’omwoyo. (Bir. 4:7, 8) Kwonka kubaasa kugumizamu nibatunga emigisha egyo, bakaba baine kworobera Ebiragiro bya Ruhanga ebyabaire nibitwariramu okumuha “omuganuro gw’ebirikubanza kwera omu” nsi yaabo. (Kur. 23:19) Omu muringo ogu, Abaisraeli bakaba booreka ngu tibarikuzaanazaanisa rukundo ya Yehova n’emigisha ye.—Shoma Eky’Ebiragiro 8:7-11.

7. Nitubaasa kukoresa tuta ‘ebintu byaitu’ eby’omuhendo kworeka ngu nitukunda Yehova?

⁷ Kandi shi itwe? N’obu kiraabe kitarikwetengyesa kuhayo ebitambo hati, nikiba kihikire kworeka ngu nitukunda Ruhanga turikumuha ekitiinisa turikukoresa ‘ebintu byaitu’ eby’omuhendo. (Enf. 3:9) Ni miringo ki ei turikubaasa kukikoramu? Nitubaasa kukoresa ebintu byaitu kushagika omurimo gw’Obukama omu ihanga ryaitu n’omu nsi yoona. Ogu buzima nigwo muringo murungi gw’okworeka ngu nitukunda Yehova, yaaba twine ebintu bingi nari bikye. (2 Kor. 8:12) Kwonka, hari emiringo endiijo ei turikubaasa kworekamu ngu nitukunda Yehova.

8, 9. Okwesiga ekiraganiso kya Yehova kiine kakwate ki na rukundo ei tumwiniire? Ha eky’okureeberaho.

⁸ Ijuka ebi Yesu yaagambiire abakuratsi be ngu tibashemereire kwerarikirira eki baraarye n’eki baraajware, beitu ngu bagume nibeebembeza okusherura eby’Obukama. Akagira ngu Tataitwe naamanya ebi turikwetenga buzima. (Mat. 6:31-33) Oku  turikwesiga ekiraganiso ekyo, nikurugiirira ahari rukundo ei twiniire Yehova, ahakuba rukundo n’obwesigwa nibigyenda hamwe. Titurikubaasa kukunda omuntu buzima twaba tutarikumwesiga. (Zab. 143:8) N’ahabw’ekyo nitubaasa kwebuuza tuti: ‘Ebigyendererwa ebi ntaireho nibyoreka ngu ninkunda Yehova buzima? Ebikorwa byangye buri izooba nibyoreka ngu nimwesiga ngu naija kumpa ebi ndikwetenga?’

⁹ Omukristaayo orikwetwa Mike akooreka ngu aine rukundo n’obwesigwa nk’obwo. Obu Mike yaabaire ari muto, akatandika kugira ekyetengo ky’okuheereza Ruhanga omu ihanga erindi. Akaija yaashwera kandi yaazaara abaana babiri, kwonka ekyetengo kye tikirarugireho. Mike n’eka ye barikuhigwa ebiri omu bitabo byaitu ebirikukwata aha kuheereza ahu ababuurizi barikwetangwa munonga, bakacwamu kutsigaza ebintu bikye ebitarikubaremesa. Bakaguza enju yaabo baaza omu y’empangisano. Bwanyima Mike akatuubya aha muhendo gw’abantu abu yaabaire naaboneza enju zaabo yaatsigaza bakye abu yaabaire naabaasa kuhwera kurabira aha Intaneeti ari omu ihanga erindi. Eka yoona ekaza omu ihanga erindi, bwanyima y’okuheerezayo emyaka ebiri bashemereirwe, Mike akagira ati: “Tukareeba amazima agari omu bigambo bya Yesu ebiri omuri Matayo 6:33.”

10. Nka Daudi, okuteekateeka aha mazima agarikukwata ahari Yehova nikibaasa kutuhwera kita?

¹⁰ Emyaka nka 3,000 enyima, Omugabe Daudi akashemezibwa ebirikureebwa ebiri ahaiguru. Akahandiika ati: “Eiguru rimanyisa ekitiinisa kya Ruhanga, n’omwanya gw’ahaiguru gworeka emirimo y’emikono ye.” Reero, arikugamba aha bwengye oburi omu Biragiro bya Ruhanga, akagira ati: “Ekiragiro kya MUKAMA kihikire, kigarura omutima omunda; ebi MUKAMA yaahamize n’eby’okwesigwa, biha obwengye otabwine.” Niki ekyarugire omu kuteekateeka nk’okwo? Daudi naagumizamu ati: “Ebigambo by’omu kanwa kangye, n’okuteekateeka kw’omu mutima gwangye bisiimwe omu maisho gaawe, Ai MUKAMA, orukiri rwangye, kandi omucunguzi wangye.” Hatariho kubanganisa, Daudi akagira omukago murungi na Ruhanga we.—Zab. 19:1, 7, 14.

11. Okukunda Ruhanga kushemereire kutuhiga kukoresa tuta amazima ga Baibuli agu atuhaire? (Reeba ekishushani aha kutandika.)

¹¹ Obunaku obu, twine omugisha gw’okumanya bingi ebirikukwata aha bihangirwe bya Yehova n’oku arikuhikiiriza ekigyendererwa kye. Ensi neehiga abantu kutunga obwegyese bw’ahaiguru. Kwonka, ebibaireho nibyoreka ngu okutunga obwegyese nk’obwo, nikubaasa kuremesa abantu kukunda Ruhanga n’okugira okwikiriza. Kwonka, Baibuli neetuhiga kutunga okumanya, obwengye, n’okwetegyereza. Eki nikimanyisa ngu twine kwega kukoresa obwengye obu Ruhanga atuhaire kubaasa kwegasira tukagasira n’abandi. (Enf. 4:5-7) Ekigyendererwa kya Ruhanga naayenda “ngu abantu boona bajunwe, bamanyire kimwe amazima.” (1 Tim. 2:4) Nitworeka ngu nitukunda Yehova twayebembeza omurimo gw’okugambira abantu b’emiringo yoona amakuru marungi g’Obukama kandi tukabahwera kwetegyereza ekigyendererwa kya Ruhanga ekikuru ahabw’abantu.—Shoma Zaaburi 66:16, 17.

12. Omwishiki omwe omuto akooreka ata ngu naasiima eby’omwoyo kuruga ahari Yehova?

¹² N’abato nibabaasa kworeka ngu nibakunda Yehova barikusiima eby’omwoyo. Omwishiki orikwetwa Shannon naashoboorora ngu obu yaabaire aine emyaka 11, we n’omurumuna bari n’abazaire baabo  bakaza aha Ruteerane Oruhango orw’Ebiro bishatu orwabaire rwine omutwe “Okuhamira Ahari Ruhanga.” Omu kicweka kimwe eky’oruteerane orwo, abato bakashabwa kushutama omu mwanya gw’omutaano. Shannon akaba atiinire, kwonka akazayo. Bwanyima akatangaara munonga buri omwe ku baamuhaire ekiconco ky’akatabo Questions Young People Ask—Answers That Work. Eki kikakwata kita aha ku Shannon yaabaire naatwara Yehova? Naagira ati: “Obwo nibwo naamanyire ngu Yehova n’owaabuzima kandi ngu naankunda munonga.” Shannon naayongyeraho ati: “Ka nitushemererwa munonga kumanya ngu Ruhanga waitu Yehova, naatuha ebiconco birungi kandi ebihikire!”

13, 14. Oku turikutwara okuhana kwa Yehova nikworeka kuta rukundo ei tumwiniire?

¹³ Baibuli neegira ngu ou Yehova “akunda, amuhana, nk’oku ishe w’omwana ahana omwana we ou ashemerererwa.” (Enf. 3:12) Mbwenu shi tushemereire kutwaza tuta? Entumwa Paulo akooreka emiteekateekyere etagwereire rubaju obu yaagira ati: “Omuntu ku aba naakihanwa, tashemererwa kureka ashaasha.” Paulo okugamba ebyo, akaba atarikugaya obukuru bw’okuhanwa, ahakuba akongyeraho ati: “Kwonka abamanyiziibwe okuhanwa, bwanyima kubarugiramu ebyana by’okuhikiirira ebirikureeta obusingye.” (Heb. 12:11) Twaba nitukunda Yehova, tushemereire kwetantara okugira ekiniga omuntu yaatuhana. Ahari bamwe, ekyo nikibaasa kuguma munonga. Okukunda Ruhanga nikibaasa kutuhwera munonga.

¹⁴ Omu biro bya Malaki, Abayudaaya baingi tibarasiimire obuhabuzi bwa Ruhanga. Bakaba nibamanya Ebiragiro ebirikukwata aha kuhayo ebitambo kwonka bakabyehuzya, n’ekyarugiremu Yehova akabahana munonga. (Shoma Malaki 1:12, 13.) Enshobe egyo ekaba eri ey’amaani eta? Yetegyereze ebigambo bya Yehova ebi: “Niinyija kubooherereza omukyeeno, n’emigisha yaanyu ngikyeene; kandi buzimazima naaherize kugikyeena, ahabw’okuba mwangire kukita aha mutima.” (Mal. 2:1, 2) Buzima, okuguhindura omuze nari okwanga kworobera obuhabuzi bwa Yehova nkana, nikurugamu embeera mbi munonga.

15. Ni miteekateekyere ki eri omu nsi obunaku obu ei twine kwetantara?

¹⁵ Omu murembe ogu ogw’okweyendeza, tikyorobi kuhana omuntu okamuha n’obuhabuzi akasiima. Nangwa n’abo abarikureebeka nk’abarikwikiriza obuhabuzi n’okuhana, nibaba bari nk’abagyemirwe. Kwonka Abakristaayo, nibahigwa ‘kutashushanisibwa n’ab’obusingye obu.’ Twine kumanya kandi tukakuratira ebya Ruhanga “ebihikire buzima.” (Rom. 12:2) Yehova kurabira omu kibiina kye, naatuha obuhabuzi omu miringo mingi, nk’oburikukwata aha bu twine  kunywana, eby’okweshemeza n’oku twine kutwariza abu tutarikushushanisa nabo buhangwa. Twikiriza kandi tukagyendera aha buhabuzi obwo, nitworeka ngu nitusiima kandi ngu nitukunda Yehova kuruga aha mutima.—Yoh. 14:31; Rom. 6:17.

16, 17. (a) Ahabw’enki tushemereire kuteekateeka ha bi Yehova arikukunda twaba nitucwamu? (b) Abaisraeli bakooreka bata ngu tibarikukunda Ruhanga kandi ngu tibarikumwesiga?

¹⁶ Abaana bato ku barikureeba akabi, batarikweziringa nibahungira aha bazaire baabo. Abaana ku barikugumizamu nibakura, nibaguma nibeeyongyera kweyesiga n’okwecweramu. Eki ni kimwe aha birikworeka ngu bariyo nibakura. Kwonka, abo abaine omukago murungi n’abazaire baabo, baaba haine eki barikwenda kucwamu nibabanza baabuuza abazaire baabo. N’omu by’omwoyo nikyo kimwe. Yehova atuhaire omwoyo gwe gurikwera, ogurikutuhwera kugira ekyetengo, ‘ky’okukunda ebi asiima n’okubikora.’ Kwonka, nikiba nikyorekyera kimwe ngu titurikumukunda kandi ngu titurikumwesiga twacwamu tutateekateekire aha bi arikukunda.—Fil. 2:13.

¹⁷ Eizooba rimwe omu biro bya Samueli, Abaisraeli bakasingurwa Abafilistia kubi munonga omu rugamba. Abantu ba Ruhanga bakaba nibeetenga obuhwezi n’oburinzi. Bakakora ki? Bakacwamu bati: “Ka tuze kwenda eshanduukye y’endagaano ya MUKAMA, tugiihe Shiilo, tugireete aha; ku eraatuhikyemu, etujune omu mikono y’abazigu baitu.” Niki ekyarugiremu? “Abaisraeli bakafamu abantu abarikugyendesa ebigyere obukumi bushatu [30,000.] Kandi eshanduukye ya Ruhanga yaanyagwa.” (1 Sam. 4:2-4, 10, 11) Abaisraeli nibabaasa kuba bateekateekire ngu baagyenda n’eshanduukye y’endagaano, nibaba bashaba Yehova obuhwezi. Kwonka buzima, bakaba batariyo nibashaba Yehova obuhabuzi, kureka bakaba nibakuratira emiteekateekyere yaabo, kandi eki kikarugamu akabi k’amaani.—Shoma Enfumu 14:12.

18. Okushaba Yehova obuhwezi tushemereire kukutwara tuta?

¹⁸ Omuhandiiki wa Zaaburi akooreka emiteekateekyere mirungi obu yaahandiika ati: “Ta amatsiko ahari Ruhanga; ahakuba ndyagaruka mmuhimbise, niwe Muhwezi wangye kandi Ruhanga wangye. Ai Ruhanga wangye, amagara gangye geehweire amatsiko; nikyo ndikwijukira.” (Zab. 42:5, 6) Ka yaayorekire ngu naakundira kimwe Yehova! Naiwe nookunda otyo Tataitwe ow’omu iguru kandi omwesiga? N’obu oraabe noobaasa kugarukamu ngu eego, noobaasa kwongyera aha ku orikumwesiga nk’oku Baibuli erikutuhiga eti: “Yesigye MUKAMA n’omutima gwawe gwona, orekye kwegamira okwetegyereza kwawe ahabwawe; omwemere omu mitwarize yaawe yoona, nawe aryaguma naatebeekanisa emihanda yaawe yoona.”—Enf. 3:5, 6.

19. Nooyenda kuteeraho kworeka ota ngu nookunda Yehova?

¹⁹ Yehova ahabw’okubanza kutukunda, atworekire oku turikubaasa kumukunda. Butoosha ka tugume nitwijuka eky’okureeberaho kye erikukirayo. Kandi ka twongyere kworeka ngu nitumukunda ‘n’omutima gwaitu gwona, n’obwengye bwaitu bwona, kandi n’amaani gaitu goona.’—Mak. 12:30.