Abantu abamwe nibateekateeka ngu okushaba n’okushiisha obwire, ngu tihariho orikuhurikiza. Abamwe bateireho kushaba kwonka nibateekateeka ngu tibarikugarukwamu. Omuntu omwe otarikwikiriza ngu hariho Ruhanga akatebeereza oku Ruhanga ari, reero yaamushaba ati: “Ngarukamu omu kihama nkuhurire.” Kwonka naagira ngu Ruhanga “akaguma ahunami.”

Kwonka, Baibuli neetuhamiza ngu hariho Ruhanga kandi ngu naahurira okushaba. Baibuli erikugamba aha bantu ba ira ekagira ngu Ruhanga “ku arihurira eiraka ry’okutaka kwawe, taribura kukugirira mbabazi. Ku arikuhurira aryakugarukamu.” (Isaaya 30:19) Ekyahandiikirwe ekindi nikigira kiti: “Okushaba kw’ow’omutima ogugororokire nikwo ashemerererwa.”—Enfumu 15:8.

Baibuli neegamba n’ahari bamwe abu okushaba kwabo kwagarukirwemu. Ekyahandiikirwe ekindi nikigira ngu Yesu ‘akatakira Ogwo owaabaasize kumukiza okufa; yaahurirwa.’ (Abaheburaayo 5:7) Eby’okureeberaho ebindi nibishangwa omuri Danieli 9:21 na 2 Obusingye 7:1.

Mbwenu shi ahabw’enki abantu abamwe nibateekateeka ngu okushaba kwabo tikurikugarukwamu? Kubaasa kugarukwamu, twine kushaba Ruhanga orikugambwaho omu Baibuli, Yehova, * beitu atari ruhanga ondiijo nari aba ira abaafiire. Kandi Ruhanga naayenda ngu ‘tushabe ekintu kyona nk’oku akunda,’ ekirikumanyisa ebintu ebi arikusiima. Naatuhamiza ngu twashaba omu muringo ogu, ‘naatuhurira.’ (1 Yohaana 5:14) N’ahabw’ekyo, okushaba kwaitu kubaasa kugarukwamu, twine kumanya Ruhanga orikugambwaho omu Baibuli kandi tukamanya ekigyendererwa kye.

Abantu baingi nibaikiriza ngu okushaba ti kikorwa ky’ediini kwonka, beitu ngu Ruhanga naahurira okushaba kwabo kandi akugarukamu. Isaac, kuruga Kenya, naagira: “Nkashaba obuhwezi kwetegyereza gye Baibuli. Bwanyima, omuntu akaija yaantayaayira yaanshaba kunyegyesa yaampa obuhwezi obu naashabire.” Omuri Philippines, Hilda akaba naayenda kucwa okureetsa. Bwanyima y’okuguma naateeraho akaremwa, iba akamuha obwengye ngu ashabe Ruhanga obuhwezi. Akagyendera aha bwengye obwo kandi naagira ati: “Nkatangaara oku Yaampwereire. Okaba nooshusha ngu ekyetengo kyangye ky’okureetsa kyatandika kufa. Nkabaasa kukucwa.”

Ruhanga aine ekihika ky’okukuhwera waamushaba omu muringo ogurikuhikaana n’ebi arikukunda.