Abajurizi ba Yehova nibaha ekitiinisa gavumenti z’abantu n’obumanyiso bw’eihanga. Nitumanya ngu abamwe nibabaasa kucwamu kurahira kuhamira aha ihanga, kuteerera ebendera entamaamu, nari kweshongora ekyeshongoro ky’eihanga.

 Kwonka, Abajurizi ba Yehova nitucwamu kuteejumba omu mikoro egi, ahakuba terikuhikaana n’enyegyesa za Baibuli. Nituba nitwenda ngu naitwe enyikiriza zaitu ziheebwe ekitiinisa, nk’oku naitwe turikuha abandi ekitiinisa baacwamu omu muringo gw’omutaano.

Omu kicweka eki

•  Ni nyegyesa za Baibuli ki ezirikutwarirwamu?

•  Kandi shi twaba nituragiirwa kwejumbamu?

•  Abajurizi ba Yehova shi nibahakanisa enshonga z’abantu n’eby’obutegyeki?

 Enyegyesa za Baibuli ibiri nkuru ezi nizikwata aha kucwamu kwaitu:

•   Ruhanga wenka niwe twine kuramya. Baibuli neegira eti: “Oramye [Yehova] Ruhanga waawe, obe niwe waaheereza wenka.” (Luka 4:8) Endahiro z’okuhamira aha ihanga zirimu ebigambo by’okuraganisa kuhamira aha ihanga okukira ekindi kyona. N’ahabw’ekyo Abajurizi ba Yehova omuntu waabo w’omunda tarikubaikiriza kwejumba omu mikoro nk’egyo.

   Kandi Abajurizi ba Yehova nibamanya ngu okuteerera ebendera entamaamu n’ekikorwa ky’okuramya, kandi nikiingana n’okuramya ebishushani, eki Baibuli erikugira ngu kigwire. (1 Abakorinso 10:14) Ab’ebyafaayo abamwe nibamanya ngu ebendera z’amahanga nikyo kimwe n’obumanyiso bw’ediini. “Akamanyiso kakuru k’okuhamira aha ihanga n’omu kuramya, n’ebendera,” omunyabyafaayo Carlton J. H. Hayes nikwo yaahandiikire. a Omuhandiiki Daniel P. Mannix arikugamba aha Bakristaayo akagira ati: “Abakristaayo bakanga . . . kuha omutegyeki [Omurooma] ebitambo ahabw’obwengye bwe ekirikwingana n’okuteerera ebendera entamaamu.” b

  N’obu Abajurizi ba Yehova turaabe tutarikuteerera ebendera entamaamu, titurikubaasa kugitaagura, kugyotsya nari kugigaya omu muringo gwona, n’obu bwakuba obumanyiso bw’eihanga obundi bwona.

•   Abantu boona nibaingana omu maisho ga Ruhanga. (Ebyakozirwe 10:34, 35) Baibuli neegira ngu Ruhanga “akahanga amahanga goona ag’abantu, naabakomoora aha muntu omwe.” (Ebyakozirwe 17:26) Ahabw’enshonga egi, Abajurizi ba Yehova nibaikiriza ngu nikiba kigwire kutwara abantu b’oruganda orumwe nari eihanga erimwe nk’abarikukira abandi. Nituha abantu boona ekitiinisa tutarikwihirira aha bukomooko bwabo nari ei barikutuura.—1 Petero 2:17.

 Abajurizi ba Yehova tibarikuhakanisa gavumenti z’abantu. Nitumanya ngu gavumenti ezi n’entebeekanisa ya Ruhanga ei aikiriize kuba ekiriho. (Abarooma 13:1-7) Kandi nitumanya ngu Abakristaayo baine kworobera ab’obushoboorozi.—Luka 20:25.

 Kandi shi ebiragiro by’abantu byahakanisa ebya Ruhanga? Obumwe, nikibaasika kuhayo okushaba omu butongore ngu gavumenti ehindure omu biragiro byayo. c Kyaba kitarikubaasika kuhinduramu, Abajurizi ba Yehova omu muringo gw’ekitiinisa nibacwamu “kworobera Ruhanga okukira abantu.”—Ebyakozirwe 5:29.

 Ngaaha. Abajurizi ba Yehova tibarikwejwanzya omu nshonga z’abantu n’eby’obutegyeki. Okwanga kwaitu kurahira kuhamira aha ihanga, okuteerera ebendera entamaamu, nari kweshongora ekyeshongoro ky’eihanga, ti ahabw’okugira ngu nituhakanisa eby’obutegyeki. Kureka, nituhamira aha nyikiriza zaitu ezirikwegamira ahari Baibuli aha bikwatiraine n’emikoro egi.