Abajurizi ba Yehova Nibatendekwa Bata Kuhikiiriza Obuheereza Bwabo?

TANDIKA

Abajurizi ba Yehova nibagumizamu nibatendekwa omu miringo yoona ey’Ekikristaayo, otwariiremu n’obuheereza bwabo. Obuheereza nigwo murimo ogu Yesu yaatsigire abakuratsi be, ogurikutwariramu okubuurira abantu amakuru marungi g’Obukama n’okubeegyesa. (Matayo 24:14; 28:19, 20) Nitutunga okutendekwa okwo omu nteerane zaitu eza buri saabiiti n’omu nteerane empango eza buri mwaka. Abajurizi ba Yehova abaine obujunaanizibwa omu kibiina, nibatunga okutendekwa okundi omu mashomero g’Obukama.

Omu kicweka eki

Abajurizi ba Yehova nibatunga kutendekwa ki?

Enteerane z’ekibiina. Buri saabiiti, nituza omu nteerane omu maramizo gaitu agarikwetwa Ebyombeko by’Obukama. Aha gati omu saabiiti nihabaho oruteerane rumwe, orundi nirubaho omu wiikenda. Buri muntu naikirizibwa kwija omu nteerane zaitu, kandi tihariyo kushorooza sente.

Oruteerane rw’aha gati ya saabiiti. Nitwegyesibwa okushoma gye, okugaaniira gye n’abantu, okugamba gye omu rweteeraine, okubuurira gye, n’okwegyesa. Nitutendekwa kurabira omu mbazo, okuhikaanisa ebiteekateeko, eby’okureeberaho, na zaavidiyo. Okutendekwa oku nikutuhwera kukora gye twaba nitubuurira abantu obutumwa bwa Baibuli, na twaba nitwegyesa Baibuli abarikusiima. Boona abarikwija omu nteerane nibagasirwa omu kutendekwa oku. Okukira ebindi byona, enteerane zaitu nizihamya okwikiriza kwaitu omuri Ruhanga, rukundo ei tumwiniire, n’ei twiniire abaheereza bagyenzi baitu.
Oruteerane rwa wiikenda. Oruteerane oru orw’ebicweka bibiri nirutandika n’orubazo orurikwegamira ahari Baibuli orw’abantu boona. Ekicweka kya kabiri eky’oruteerane oru n’eby’ebibuuzo n’eby’okugarukamu okurikwegamira aha kicweka ky’Omunaara gw’Omurinzi a ogw’okwega. Ekicweka nikiba nikikwata aha nshonga za Baibuli n’emisingye ebirikutuhwera omu buheereza bwaitu n’omu mbeera zaitu eza butoosha.

Enteerane empango za saketi n’eza disiturikiti. Buri mwaka nitugira enteera ishatu empango, kandi buri rumwe aharizo niruba rurimu ebibiina bingi. Enteerane ezi ez’okushemererwa kwingi niziba ziine emitwe erikwegamira ahari Baibuli, otwariiremu embazo, eby’okureeberaho, okubuuzibwa, na zaavidiyo. Nk’enteerane zaitu ez’ekibiina, n’empango ezi nizituhwera kwongyera kumanya gye Baibuli, n’okwongyera kuba ababuurizi barungi b’amakuru marungi. Kandi, abantu boona nibeetwa kwija omu nteerane ezi, kandi tiharikubayo okushorooza sente.

Amashomero g’Obukama ag’Abajurizi ba Yehova

Abajurizi ba Yehova abamwe nibeetwa omu kutendekwa okundi omu mashomero g’Obukama gatari gamwe na gamwe. Ni mashomero ki aga? N’aga kigyendererwa ki, kandi nigatwara obwire burikwingana ki? Kandi ni baahi abarikubaasa kugazamu?

Ishomero ry’Obuheereza Erya Baapayoniya

Ekigyendererwa: N’okutendeka abari omu buheereza obw’obutwire abarikwetwa baapayoniya, b kwongyera kuba barungi omu murimo gw’okubuurira n’okwegyesa. Okutendekwa oku nikutwariramu okuhikaanisa ebiteekateeko, eby’okureeberaho, embazo, n’okwegyezamu.
Obwire obu Ririkumara: Ebiro mukaaga.
Abarikurizamu: Abo abaaherize omwaka gwabo gw’okubanza bari baapayoniya ab’obutwire nibeetwa kurizamu. Abatwire bari baapayoniya nibabaasa kwetwa kugarukayo bwanyima ya buri mwaka etaano.

Eishomero ry’Ababuurizi b’Obukama

Ekigyendererwa: N’okutendeka omu muringo gw’omutaano ababuurizi abari omu buheereza obw’obutwire. Abeegi nibongyera aha bukoryo bwabo bw’okubuurira n’okwegyesa, kandi nibongyera kucondooza aha nshonga za Baibuli. Abarikuruga omu ishomero eri abaingi nibatwarwa omu myanya ahu ababuurizi barikwendwa munonga.
Obwire obu Ririkumara: Ameezi abiri.
Abarikurizamu: Baapayoniya nibabaasa kushaba kurizamu baaba nibahikiiriza ebirikwetengyesa ebimwe, kandi embeera zaabo zirikubabaasisa kuheereza hoona ahu ababuurizi barikwendwa munonga.

Eishomero ry’Abareeberezi b’Ekibiina

Ekigyendererwa: N’okuhwera abareeberezi kuhikiiriza gye obujunaanizibwa bwabo omu kibiina, nk’okwegyesa n’okuriisa obusyo, n’okwongyera ahari rukundo ei bainiire Ruhanga n’ab’eishe-emwe bagyenzi baabo.—1 Petero 5:2, 3.
Obwire obu Ririkumara: Ebiro bitaano.
Abarikurizamu: Abareeberezi abaherize kutooranwa juba n’abamazire obwire bari abareeberezi nibabaasa kwetwa kugarukayo bwanyima ya buri mwaka etaano.

Eishomero ry’Abareeberezi ba Saketi n’Abakazi Baabo

Ekigyendererwa: N’okutendeka abarikutaayaayira ebibiina abarikwetwa abareeberezi ba saketi, c kubaasa kuhikiiriza gye obujunaanizibwa bwabo. (1 Timoseo 5:17) Okutendeka oku nikuhwera abareeberezi aba n’abakazi baabo kwongyera kwetegyereza gye Ebyahandiikirwe.
Obwire obu Ririkumara: Okwezi kumwe.
Abarikurizamu: Abareeberezi ba saketi abasya n’abakazi baabo nibeetwa kurizamu bwanyima y’omwaka gumwe omu buheereza bwabo. Bwanyima nibagaruka kwetwa buri kuhinguraho emyaka etaano.

Eishomero ry’Obuheereza bw’Obukama

Ekigyendererwa: N’okuhwera abareeberezi n’abaheereza d kuhikiiriza gye obujunaanizibwa bwabo bw’ekibiina kuhikaana n’embeera ezirikuba ziriho, omuhango, n’ebyetengo. (2 Timoseo 3:1) Eishomero eri niribaho buri bwanyima y’emyaka mikye.
Obwire obu Ririkumara: Nikirugiirira, kwonka obwire obwingi n’eizooba rimwe.
Abarikurizamu: Abareeberezi ba saketi, abareeberezi b’ekibiina, n’abaheereza.

Eishomero ry’Obuheereza bwa Beseeli

Ekigyendererwa: N’okuhwera Ababeseeli e kuba abasinguzi omu buheereza bwabo n’okwongyera kukunda Ruhanga n’okukundana.
Obwire obu Ririkumara: Ebiro bitaano n’ekicweka.
Abarikurizamu: Ababeseeli abasya nikibeetengyesa kurizamu. Ababeseeli abamazire obwire buraingwa aha Beseeli nibabaasa kwetwa kugarukayo bwanyima ya buri mwaka etaano.

Eishomero rya Gileadi

Ekigyendererwa: N’okuhwera abeegi kwongyera kwetegyereza gye Ekigambo kya Ruhanga, n’okugyendera aha bi barikwega. (1 Abatesalonika 2:13) Abashaija n’abakazi Abakristaayo abakuzire omu by’omwoyo abarikuza omu ishomero rya Gileadi nibabeera kimwe ab’omugasho omu kibiina kya Yehova, n’omu murimo gw’okwegyesa omu nsi yoona. Abarikuza omu ishomero eri nibabaasa kwoherezibwa omu buheereza nari aha ofiisi y’eitaagi omu mahanga gaabo, nari omu mahanga agandi.
Obwire obu Ririkumara: Ameezi ataano.
Abarikurizamu: Ofiisi y’eitaagi neetoorana bamwe aha bari omu buheereza bw’obutwire kushaba kurizamu. Eishomero eri niriba omuri United States omu mwanya gw’okwegyesezamu ogwa Patterson, New York.

Eishomero Ry’ab’akakiiko k’Eitaagi n’Abakazi Baabo

Ekigyendererwa: N’okutendeka ab’Akakiiko k’Eitaagi f kureeberera omurimo ogurikukorwa aha ofiisi y’eitaagi n’emirimo y’Obukama ey’Abajurizi ba Yehova omu ihanga nari amahanga agarikureebererwa ofiisi egyo.
Obwire obu Ririkumara: Ameezi abiri.
Abarikurizamu: Ofiisi Enkuru ey’Abajurizi ba Yehova neetoorana ab’Obukiiko bw’Amataagi n’abakazi baabo kuza omu ishomero eri, eririkuba omuri Patterson, New York.

Okutendekwa okurikuheebwa Abajurizi ba Yehova nikwegamira ahari ki?

Baibuli nikyo kikoreso kikuru omu kutendekwa oku Abajurizi ba Yehova barikutunga. Nitwikiriza ngu Baibuli ekahandiikisibwa Ruhanga, kandi ngu erimu obuhabuzi oburikukirayo oburungi omu mbeera z’Ekikristaayo zoona.—2 Timoseo 3:16, 17.

Abajurizi ba Yehova shi nibashashurira okutendekwa kwabo?

Ngaaha. Okwegyesibwa ti kw’okushashurira. Emirimo y’Abajurizi ba Yehova neeshagikwa abarikuhayo beekundiire.—2 Abakorinso 9:7.

a Baibuli n’ebirikugishoboorora, otwariiremu zaavidiyo, biri aha mukura gwaitu, jw.org.

b Payoniya n’omubuurizi obatiziibwe ori eky’okureeberaho kirungi, yaaba mushaija nari mukazi orikwehayo kugira eshaaha ezi yaamara buri kwezi omu kubuurira abandi obutumwa bwa Baibuli.

c Omureeberezi wa saketi n’ow’eishe-emwe orikuba ari omu buheereza bw’obutwire, buri saabiiti orikutaayaayira ekibiina kimwe omu saketi ye. Naahiga ab’eishe-emwe na banyaanya arikuha embazo ezirikwegamira ahari Baibuli, kandi arikugyenda nabo omu buheereza.

d Abaheereza nibeejumba omu buheereza butari bumwe na bumwe kuhwera ab’eishe-emwe na banyaanyabo. Eki nikibaasisa abareeberezi kutunga obwire bw’okwegyesa n’okuriisa obusyo.

e Beseeli n’eiziina rya ofiisi z’amataagi ez’Abajurizi ba Yehova. Abari omu buheereza bw’obutwire abarikuheerezayo nibashagika emirimo y’Abajurizi ba Yehova omu ihanga eri barikuba barimu.

f Akakiiko k’Eitaagi nikaba kariho abashaija bashatu nari n’okukiraho abakuzire omu by’omwoyo.

Abajurizi ba Yehova nibagasirwa bata omu kutendekwa kwabo?

“Ahabw’okugira enshoni, ningumirwa kugamba n’abu ntarikumanya ahari Baibuli. Kwonka okutendekwa oku ndikutunga omu ruteerane rw’aha gati ya saabiiti kumpweraire kweyikiririzamu n’okuboneza obukoryo bw’okwegyesa. Nyegire n’okugaaniira n’abandi omu kibiina n’aha murimo gwangye.”—Natasha, United States.
“Okuza omu Ishomero ry’Ababuurizi b’Obukama kimpweraire kugira emitwarize y’Ekikristaayo, nka rukundo, okugumisiriza, n’embabazi. N’ekirugiremu, nindeeba ngu mbaire Omukristaayo murungi, omunywani, kandi omutaahi murungi. Kandi eishomero eri rikanyegyesa n’okucondooza aha nshonga ezirikukwata ahari Baibuli, n’okushoboorora Ekigambo kya Ruhanga omu muringo ogurikuhika abantu aha mutima.”—Stephen, Nigeria.
“Eishomero ry’Abareeberezi b’ekibiina rikampwera kugira obucureezi oburikwetengyesa kuheereza nk’omureeberezi. Embazo omu ishomero eryo zikooreka gye ngu niinye kutooreza Yesu.”—Luca, Italy.
“Eishomero ry’Obuheereza bw’Obukama rikanyegyesa obukuru bw’okuba oyorobi kuhikwa, omunyambabazi, n’okuba orikushemererwa naaba ninkoragana n’abandi. Nkeega ngu naaba ninza kugira ebi naakorera abandi, nyine kuhigwa rukundo, beitu butari bujunaanizibwa bwonka.”—Samuel, United Kingdom.
“Eishomero rya Gileadi rikatuhwera kwereeba omu ndeeberwamu y’Ekigambo kya Ruhanga. (Yakobo 1:22-25) N’ahabw’ekyo tukareeba ahu twine kukora empinduka omu mitwarize yaitu, n’omu kuheereza Yehova kwaitu. Kandi tukeega n’okuteekateeka aha bandi omu mwanya gw’okweteekateekaho, kandi n’okureka rukundo ekaba niyo yaayebembera byona ebi turikugamba n’ebi turikukora.”—Elnathan na Princess Philippines.