Baingi abarikubuuza ebibuuzo ebi nibaba bafeereirwe munonga, kandi nibaba batarikusherura eby’okugarukamu beitu okubasaasibwa. Abamwe nibareeba ekiita bantu nk’ekibi ekirikukirayo obubi, kandi nibagumirwa kwikiririza omu Ruhanga.

 Amazima: Abantu abaine okwikiriza babuurize Ruhanga naareka ebibi kubaho. Nk’eky’okureeberaho, nabi Habakuuki akabuuza Ruhanga ati: ‘Ahabw’enki noondeebesa okuhwerekyerera n’obubisha, entongane n’empaka’ buri hamwe. (Habakuuki 1:3) Omu mwanya gwa Ruhanga kucwera Habakuuki orubanja, Ruhanga akahamya ngu eki yaabuurize kyahandiikwa omu Baibuli.

 Amazima: Ruhanga naayanga ebikorwa bibi n’okubonabona. (Enfumu 6:16-19) Omu biro bya Noa, Ruhanga ‘akaguubwa kubi’ ahabw’obushaarizi obwabaire buri omu nsi. (Okutandika 6:5, 6) Hatariho kubangaanisa, Ruhanga akaguubwa kubi munonga ahabw’ekiita bantu.—Malaki 3:6.

 Amazima: Ruhanga akaikiriza Yerusaalemu kucwekyerezibwa Abarooma omu kyasha ky’okubanza. (Matayo 23:37–24:2) Kwonka kuruga obwo, Ruhanga tikitwara oruganda orumwe nk’orw’omutaano nari kurufubira. Ahari Ruhanga, “tihariho mutaano gw’Omuyudaaya n’Omugriika.”—Abarooma 10:12.

 Amazima: N’obu Ruhanga araabe tiwe arikureetaho okubonabona, obumwe naakwikiriza kubaho kumara akaire.—Yakobo 1:13; 5:11.

 Ruhanga akaikiriza ekyo kubaho nk’oku arekireho okubonabona kw’abantu boona omu nsi, kushoboorora enshonga ezaareetsirweho obugomi ira. Baibuli neeyoreka butunu ngu hati, Omuregi niwe mutegyeki w’ensi beitu ti Ruhanga. (Luka 4:1, 2, 6; Yohaana 12:31) Hariho obuhame bubiri omu Baibuli oburikworeka ahabw’enki Ruhanga yaikiriize ekiita bantu kubaho.

1.   Ruhanga akahanga abantu baine obugabe bw’okwecweramu. Ruhanga akagambira abantu b’okubanza Adamu na Haawa, eki yaabaire naayenda ngu bakore, kwonka tarabagyemire kumworobera. Bakareeba ngu baine kwecweramu ekirungi n’ekibi, kandi okucwamu kubi kwabo n’okw’abandi omu byafaayo, kurugiiremu abantu oburemeezi bwingi. (Okutandika 2:17; 3:6; Abarooma 5:12) Eki nikihikaana n’ebiri omu kitabo Statement of Principles of Conservative Judaism ekirikugira kiti: “Okubonabona kwingi okuri omu nsi nikuba nikuruga omu kukoresa kubi obugabe bwaitu bw’okwecweramu.” Ruhanga omu mwanya gw’okwiha obugabe bw’okwecweramu aha bantu, abahaire obwire kugira ngu bakore ebi barikwenda ahabw’abo.

2.   Ruhanga naabaasa kandi naija kwihaho akabi koona akareetsirweho ekiita bantu. Ruhanga naaraganisa kuzoora obukaikuru bw’abantu abaafiire, otwariiremu n’abafeereire omu kiita bantu. Naija n’okwihaho obusaasi bw’omu mitima y’abo abaahonokireho n’ebiteekateeko bibi ebi baine. (Isaaya 65:17; Ebyakozirwe 24:15) Rukundo ei Ruhanga ainiire abantu n’obuhame ngu naija kuhikiiriza ebi arikuraganisa.—Yohaana 3:16.

 Abaakwatsirweho ekiita bantu n’abaahonokireho nibaguma baine okwikiriza kuhami ahabw’okwetegyereza ahabw’enki Ruhanga naikiriza ebintu bibi kubaho, n’oku arikwenda kubiihaho.