Baibuli neegamba ahari tatu nari engondo omurundi gumwe gwonka omu Abaleevi 19:28, aharikugira hati: “Mutaricwa engondo.” Ruhanga akaha ekiragiro eki eihanga rya Israeli kubataanisa aha bantu abandi abaabaire nibaramba emibiri yaabo barikutaho amaziina n’obumanyiso bwa baruhanga baabo. (Eky’Ebiragiro 14:2) N’obu Abakristaayo baraabe batakari hansi y’ekiragiro eki ekyahairwe Abaisraeli, ni kikuru okushwijuma omusingye ogurimu.

Omukristaayo shi ashemereire kwetaho tatu nari kuramba omubiri gwe?

 Emishororongo eri ahaifo neebaasa kutuhwera kushwijuma gye enshonga egi:

•   “Abakazi bo bagume beecume . . . baine obucureezi.” (1 Timoseo 2:9, Baibuli ya New American) Omusingye ogu nigukwata aha bashaija n’abakazi. Twine kuha ekitiinisa enyehurira z’abandi kandi tukeetantara kwetaho omutima.

•   Abamwe nibaba nibenda kworeka eki bari nari kutunga obugabe, abandi nibeetaho tatu kworeka ngu nibategyeka emibiri yaabo. Kwonka, Baibuli neyehanangiriza Abakristaayo eti: ‘Muheyo emibiri yaanyu kuba ebitambo ebihuriire, ebirikwera, kandi ebirikusiimwa Ruhanga, nikwo kuheereza kwanyu oku mushemereire kumuha.’ (Abarooma 12:1) Koresa okubaasa kwawe kw’okwetegyereza kushwijuma enshonga ahabw’enki nooyenda kwetaho tatu. Enshonga yaawe yaaba eri ey’okukuratira omuhango nari okwegaita aha kigombe nanka, ijuka ngu enyehurira zaawe ti z’obutwire nka tatu. Okushwijuma ekigyendererwa kyawe nikibaasa kukuhwera kucwamu gye.—Enfumu 4:7.

•   ‘Ebi omweziriki arikuteekateeka kukora [nibirugamu obusinguzi], kwonka weena orikurahukiiriza, naayereetera obukyene.’ (Enfumu 21:5) Abarikuta tatu aha mibiri yaabo nibakira kucwamu ahonaaho, kwonka nikibaasa kukwata aha mikago yaabo n’emirimo obwire buraingwa. Kandi okweihaho tatu nikibaasa kutwara esente nyingi nikireeta n’obusaasi bwingi. Abacondooza n’abarikukora aha by’okwihaho tatu nibooreka ngu baingi abarikwetaho tatu bwanyima nibahika beefuuza ahabw’enki baazeetaireho.