Ruhanga ku yaaherize kuhanga omushaija n’omukazi ab’okubanza, akabagaita omu bushwere. Akaba naayenda ngu omushaija n’omukazi bagire omukago gw’omutaano omu bushwere bwabo, n’eka yaabo.—Okutandika 1:27, 28; 2:18.

 Ruhanga naayenda ngu abashweraine bashemererwe. (Enfumu 5:18) Omu Baibuli akatamu engyenderwaho y’obushwere n’emisingye erikubaasa kuhwera obushwere kusingura.

Omu kicweka eki

•  Emitindo ya Ruhanga ey’obushwere n’eha?

•  Baibuli neegamba ki aha kutaana n’okugaitururwa?

•  Obushwere shi bwine kuhandiikisibwa kubaasa kusiimwa Ruhanga?

•  Omushaija n’omukazi baine bujunaanizibwa ki kurugiirira ahari Baibuli?

•  Ruhanga shi hati naaragiira abashweraine kuzaara abaana?

•  Baibuli neebaasa kuhwera eta obushwere bwangye?

•  Ebyahandiikirwe ebirikukwata aha bushwere

 Ruhanga akatandikaho obushwere kuba obw’omushaija omwe n’omukazi omwe. (Okutandika 2:24) Ruhanga naayangira kimwe okuza omu bushwere n’abantu baingi, obutingwa, n’abarikutuura hamwe batari mu bushwere obuhikire. (1 Abakorinso 6:9; 1 Abatesalonika 4:3) Yesu akeegyesa abeegi kuhamira aha mutindo gw’obushwere ogw’okubanza.—Mako 10:6-8.

 Obushwere omu maisho ga Ruhanga n’entebeekanisa y’obutwire. Omwojo n’omwishiki baataaha omu bushwere, nibaragaana kuhamiranaho, n’okuguma hamwe ebiro byona eby’amagara gaabo. Ruhanga naayenda ngu bahamire aha kiragaano kyabo.—Mako 10:9.

 Haine obu omushaija n’omukazi we barikubaasa kuruganaho akaire kakye, nk’obu omushaija arikuba aine ahu agiire kushoboorora enshonga z’eka. Kwonka Baibuli neeyanga okutaana okurikureetwaho enshonga z’obushwere. Kureka, neebahiga kutereeza embeera bakagarukana.—1 Abakorinso 7:10.

 Obushambani niyo nshonga yonka ey’omu Byahandiikirwe eshemereire kurugiirirwaho okugaitururwa. (Matayo 19:9) N’ahabw’ekyo omushaija n’omukazi baacwamu kutaana nari kugaitururwa ahabw’enshonga endiijo butari bushambani, bombi nibaba bataine obugabe bw’okutaaha omu bushwere obundi.—Matayo 5:32; 1 Abakorinso 7:11.

 Ruhanga naayenda ngu Abakristaayo boorobere ebiragiro by’ensi ebirikukwata aha bushwere. (Tito 3:1) Kyabaasika abashweraine bakahandiikisa obushwere bwabo, nikyoreka ngu nibaha ab’obushoboorozi ekitiinisa n’omutindo gwa Ruhanga ngu abashweraine baine kuhamiranaho obutwire. a

•   Okubagana obujunaanizibwa. Abashweraine baine kutwarizana omu muringo gwa rukundo n’ekitiinisa. (Abaefeso 5:33) Baine kufaanaho omu nshonga y’okuteerana omu muringo gwa rukundo, barikwetantara obutari bwesigwa obw’emiringo yoona. (1 Abakorinso 7:3; Abaheburaayo 13:4) Baaba baine abaana, bombi nibaboorora hamwe.—Enfumu 6:20.

   Baibuli terikugamba omu bwijwire oku abashweraine baine kubagana emirimo y’okwebaisaho n’ey’aha ka. Nibabaasa kucwamu hamwe ekiraakore gye omu ka yaabo.

•   Obujunaanizibwa bw’omushaija. Baibuli neegira ngu “omushaija niwe mutwe gw’omukazi.” (Abaefeso 5:23) N’omutwe ekirikumanyisa ngu niwe arikwebembera kandi akacwamu ebiraagasire omukazi we n’abaana.

   Aine kuhamya ngu yaareeberera eka ye omu by’omubiri n’eby’omwoyo. (1 Timoseo 5:8) Naayoreka ngu naatwara emitwarize y’omukazi we n’okubaasa kwe nka bikuru arikukora nawe, kandi arikufayo aha nyehurira ze n’ebitenso bye omu kucwamu. (Enfumu 31:11, 28) Baibuli neegira ngu omushaija aine kuhikiiriza obujunaanizibwa bwe omu muringo gwa rukundo.—Abakolosai 3:19.

•   Obujunaanizibwa bw’omukazi. Baibuli neegira ngu “omukazi ashemereire” kuha iba ekitiinisa. (Abaefeso 5:33) Ruhanga naashemererwa, omukazi yaaha ekitiinisa obujunaanizibwa bwa iba.

   Obujunaanizibwa bwe n’okuhwera iba omu kucwamu gye, n’okumushagika nk’omutwe gw’eka. (Okutandika 2:18) Baibuli neegamba gye aha mukazi orikuhikiiriza obujunaanizibwa bwe bukuru omu bushwere.—Enfumu 31:10.

 Ngaaha. Ira, Ruhanga akaragiira bamwe aha baheereza be kuzaara abaana. (Okutandika 1:28; 9:1) Kwonka Abakristaayo tibari hansi y’ekiragiro eki. Yesu tararagiire abakuratsi be kuzaara abaana. Kandi n’abeegi be tibaragizire ngu abari omu bushwere baine kuzaara abaana. Abashweraine nibo baine kwecweramu yaaba baraazaare abaana.

 Baibuli erimu emisingye erikubaasa kuhwera abashweraine kutandika gye obushwere bwabo. Emisingye ya Baibuli neebaasa n’okuhwera abashweraine kwetantara oburemeezi nari kubusingura.

 Emisingye ya Baibuli neebaasa kuhwera abashweraine . . .

•   kworekana rukundo eyaabuzima.—1 Abakorinso 13:4-7; Abakolosai 3:14.

•   kushoboorora obutaikirizana bwabo.—1 Abakorinso 10:24.

•   kuba abahurikiza barungi.—Yakobo 1:19.

•   kuhaana ekitiinisa.—Abarooma 12:10.

•   kusaasirana.—1 Petero 4:8.

•   kuhamiranaho.—Mako 10:9.

•   kugumisiriza.—Abaefeso 4:2, 3.

•   kukorera hamwe nka tiimu.—Omubuurizi 4:9.

•   kuhamya okumariirira kwabo.—Ekyeshongoro kya Sulemaani 8:7.