Tihariho muntu orareebire ruhanga butunu. (Okuruga 33:20; Yohaana 1:​18; 1 Yohaana 4:​12) Baibuli neegira ngu “Ruhanga n’omwoyo,” amagara agu abantu batarikubaasa kureeba.​—Yohaana 4:​24; 1 Timoseo 1:​17.

 Baamaraika nibabaasa kureeba Ruhanga ahakuba baine emibiri y’omwoyo. (Matayo 18:10) Kandi, abantu abamwe abarikufa nibazooka n’emibiri y’omwoyo kandi nibaija kuba nibabaasa kureeba Ruhanga.​—Abafilipi 3:​20, 21; 1 Yohaana 3:2.

 Baibuli neekira kukoresa ekigambo okureeba omu muringo gw’akamanyiso, kandi ekirikumanyisa okwetegyereza gye. (Isaaya 6:​10; Yeremia 5:​21; Yohaana 9:​39-​41) Omu muringo nk’ogu, omuntu naabaasa kureeba Ruhanga ‘n’amaisho g’omu mutima’ arikugira okwikiriza kandi akooreka ngu naasiima emitwarize ye. (Abaefeso 1:​18) Baibuli neeyoreka ebi twine kukora kubaasa kugira okwikiriza nk’okwo.

•   Yega aha mitwarize ya Ruhanga nka rukundo, obufura, obwengye, n’amaani ge, kurabira omu bi yaahangire. (Abarooma 1:​20) Bwanyima ya Yobu omushaija omwesigwa kuteekateeka aha bi Ruhanga yaahangire, akeehurira nk’orikureeba Ruhanga butunu.​—Yobu 42:5.

•   Manya gye Ruhanga orikushoma Baibuli. Baibuli neetuhamiza eti: ‘Waamusherura, noija kumubona.’​—1 Obusingye 28:9; Zaaburi 119:2; Yohaana 17:3.

•   Yega ahari Ruhanga orikushwijuma ebirikukwata ahari Yesu. Ahabw’okugira ngu Yesu akooreka emitwarize yenyini nk’eya Ishe akaba naabaasa kugira ati: “Ondeebire, biri areebire Isheboona.”​—Yohaana 14:9.

•   Twaza omu muringo ogurikushemeza Ruhanga, reero oreebe oku arikukuhwera. Yesu akagira ati: ’[Baine okushemererwa] abashemeire omu mutima, ahabw’okuba abo nibaija kureeba Ruhanga.’ Nk’oku turikumanya, abamwe abarikukora ebirikushemeza Ruhanga nibaija kuzooka baze omu iguru ‘bareebe Ruhanga.’​—Matayo 5:8; Zaaburi 11:7.

 Omu Baibuli ahu kirikworekwa ngu abantu bakareeba Ruhanga butunu, waashwijuma Ebyahandiikirwe byona noija kwetegyereza ngu Ruhanga akaba aba ajwekyeirwe maraika nari bakaba bamureeba omu kworekwa.

 Baamaraika.

Ira Ruhanga akaba naayohereza baamaraika be kweyoreka abantu kugamba omu ziina rye. (Zaaburi 103:20) Nk’eky’okureeberaho, rimwe Ruhanga akagamba na Musa naayema aha gati y’orushaka, kandi Baibuli neegira eti: ‘Musa akeekwata aha maisho, ahakuba akatiina kureeba Ruhanga.’ (Okuruga 3:​4, 6) Musa tarareebire Ruhanga butunu, ahakuba ekyahandiikirwe omu shuura niyo emwe nikyoreka ngu akareeba “Maraika wa” Yehova.​—Okuruga 3:2.

 Omu muringo nigwo gumwe, Baibuli ku erikugira ngu Ruhanga akaba agamba na Musa “nibareebana,” nikimanyisa ngu akagamba nawe nk’abantu abarikugaaniira hamwe. (Okuruga 4:​10, 11; 33:11) Musa tarareebire Ruhanga butunu, ahakuba obutumwa obu yaatungire bukaba niburuga ahari “baamaraika” abarikujwekyera Ruhanga. (Abagalatia 3:​19; Ebyakozirwe 7:​53) Kwonka nabwo okwikiriza kwa Musa omuri Ruhanga kukaba kuhami, kandi Baibuli ekagira ngu akaguma ‘ataire amaisho ahari ogwo otarikureebwa.’​—Abaheburaayo 11:27.

 Nk’oku Ruhanga yaagambire na Musa kurabira omuri baamaraika, nikwo yaabaire naagamba n’Abrahamu. N’amazima, waashoma Baibuli otarikufayo nikibaasa kureebeka ngu Abrahamu akareeba Ruhanga butunu. (Okutandika 18:​1, 33) Kwonka ebyahandiikirwe ebindi nibyoreka ngu abashaija bashatu abaizire ahari Abrahamu, bakaba bari baamaraika abu Ruhanga yaabaire ayoohereize. Abrahamu akaba naamanya ngu nibajwekyera Ruhanga, kandi omuringo ogu yaabaire naagambamu nabo akaba ari nk’orikugaaniira na Yehova butunu.​—Okutandika 18:​2, 3, 22, 32; 19:1.

 Okworekwa.

Obumwe Ruhanga akaba naayeyoreka abantu kurabira omu kworekwa, nari nk’oku omuntu arikuba naateera akashushani omu mutwe. Nk’eky’okureeberaho, Baibuli ku erikugira ngu Musa n’abandi Abaisraeli bakareeba Ruhanga, eki baabaire nibareeba n’okworekwa kuruga ahari Ruhanga. (Okuruga 24:​9-​11) Nikyo kimwe, Baibuli obumwe neegira ngu baanabi ‘bakareeba’ Yehova. (Isaaya 6:1; Danieli 7:9; Amosi 9:1) Kwonka waashwijuma emishororongo eyetooroire ebyahandiikirwe ebyo, nooreeba ngu kukaba kuri okworekwa beitu kutari kureeba Ruhanga butunu.​—Isaaya 1:1; Danieli 7:2; Amosi 1:1.