Omukundwa waawe shi akugambiire ngu eminywere yaawe neemwerarikiriza? Kyaba nikwo kiri, hariho ebi oine kuteekateekaho.

Omu kicweka eki

•  Okukoresa kubi amaarwa n’obushwere tibirikujwangana

•  Ohindukire omuhuuku w’amaarwa?

•  Yegyendesereze okwehakana

•  Eki orikubaasa kukora

 Okukoresa kubi amaarwa nikubaasa kureeta endwara z’emiringo yoona, otwariiremu endwara z’omutima, enkojo z’ekine, n’ekookoro. Kwonka okukoresa kubi amaarwa nikikira aha kurugamu endwara kyonka, nikureeta n’oburemeezi omu bushwere nk’obushaarizi omu ka, obworo, obutari bwesigwa, n’okugaitururwa.

 Baibuli neegira ngu amaarwa, ‘nigaruma nk’enjoka, gatema nk’empiri.’ (Enfumu 23:32) Noomanya ota yaaba ohindukire omuhuuku w’amaarwa?

 Ebibuuzo ebirikukurataho nibibaasa kukuhwera kumanya oku oyemereire:

•   Noogumirwa kutegyeka eminywere yaawe?

•   Nookira kuba nooteekateeka aha bu oraagarukye kunywa?

•   Noogaruka onywa amaarwa na bwanyima y’okukureetera oburemeezi otwariiremu obushwere bwawe?

•   Noohurira otari gye waateeraho kuruga aha maarwa?

•   Ku orikunywa amaarwa nibwo orikutongana n’ou nawe omu bushwere?

•   Hati noonywa amaarwa maingi otaine ku obaire kukira enyima?

•   Noonywa bwesherekye nari nooreeta amaarwa omuka nari aha murimo bwesherekye?

 Waagarukamu ngu eego kimwe aha bibuuzo ebi nari bingi, noobaasa kuba ohindukire omuhuuku w’amaarwa. Hati noobaasa kuba nootegyekwa amaarwa nari obaire omusinzi.

 Omukundwa waawe shi akugambiire ngu eminywere yaawe neemwerarikiriza? Kyaba nikwo kiri, noobaasa kuba waateireho kuhorereza eminywere yaawe. Noobaasa kuba waataire orubanja aha bandi, otwariiremu omukundwa waawe, orikugamba ebintu nka:

•   “Kuri noontwariza gye, tinkubaire niinywa amaarwa.”

•   “Ku ogire ngu niiwe orikukorera mukama wangye, naiwe okaabaire noonywa amaarwa.”

•   “Niimanya abantu baingi abarikunywa amaarwa kunkiza.”

 Ku oraabe noogamba ebigambo nk’ebyo, torikubaasa kuba oriyo nooyebembeza ebyetengo byawe kukira ekyetengo ky’okugira obushwere burungi? Ekishemereire kuba kiri kikuru niki?

 Omusingye gwa Baibuli: ‘Oine omukazi ata omutima aha ku araagwise gye omukazi we.’—1 Abakorinso 7:33.

•   Fayo aha kwerarikirira kw’omukundwa waawe. N’obu omukazi waawe yaakuba naarengyesereza okwerarikirira, nabwo noobaasa kukora empinduka. Waayangisiriza okagumizamu noonywa n’obu kiraabe nikyerarikiriza omukundwa waawe, ekyo kyonka nikibaasa kworeka ngu amaarwa gakuhindukiire oburemeezi.

   Omusingye gwa Baibuli: “Omuntu weena arekye kwesherurira ebye ahabwe, kureka asherure eby’okuhwera mutaahi we.”—1 Abakorinso 10:24.

•   Manya eki. Omuserukare kubaasa kusingura okurwana, naaba aine kumanya obukoryo bw’omuzigu we. Nikyo kimwe, kubaasa kusingura omuzigu waawe, oine kumanya ebirikukwata aha businzi n’oku burikugwisa abantu omu mutego. Kandi nooba oine n’okumanya ebi oine kukora kukuhwera kwecwa aha maarwa n’okwetantara kugaruka enyima okaba omusinzi.

   Omusingye gwa Baibuli: “Mwerinde okwetenga okubi okw’omubiri okutuura nikurwanisa amagara gaanyu.”—1 Petero 2:11.

•   Tunga obuhwezi. Hariho entebeekanisa nyingi ez’eby’amagara ezigyendereire kuhwera abasinzi, nk’obuhwezi bw’okucwa amaarwa, emyanya y’okuragurirwamu, n’amarwariro. Noobaasa n’okugaaniira n’omunywani okuzire orikubaasa kukuhwera kumanya enshonga zenyini ezirikukureetera kutegyekwa amaarwa. Reero ogume noogamba nawe waahurira waayenda kugarukirwa omuze gwawe.

   Omusingye gwa Baibuli: ‘Omunywani owaabuzima naayoreka rukundo obwire bwona, kandi n’ow’eishe-emwe ozaariirwe obwire bw’amaganya.’—Enfumu 17:17.

 Okushoma ekicweka kimwe kigufu tikirikubaasa kureetera omuntu kurekyera aho kukoresa kubi amaarwa, ahakuba n’enshonga egumire. Kandi nabwo torikubaasa kusingura omuze ogu orikugira ngu, “ninza kuteeraho kunywa kakye.” Kwonka, oine kumanya ngu omuringo ogu oraakwatemu enshonga egi, nikiija kukwata aha magara gaawe n’obushwere bwawe.

 Okumanya ebirikukiraho: Shoma ebicweka ebi kureeba oku abandi baasingwire okukoresa kubi amaarwa.

 “I Am No Longer a Cruel Man”

 “I No Longer Feel Ashamed of Myself”

 “The Streets Became My Home”

 Reeba na vidiyo, ‘Nkahitsya Obwire Naatamwa Emitwarize Yangye’