Oku n’okuragaanisa omu bigambo nari omu buhandiikye kwezibira kuteerana okuhitsya omuntu yaaza omu bushwere.

 Endahiro y’okuguma oshugaine ekarangaanwa omuri 1990 aha ruteerane ruhango “Rukundo Eyaabuzima Neetegyereza”​—orwabaire rwegami aha mitindo ya Baibuli erikuhiga eminyeeto kwetantara okugyemeserezibwa kuteerana kuhitsya baaza omu bushwere.

 Bwanyima y’obwire bukye hakabaho oruteerane orundi, orwabaire rurimu abantu abaahairwe empeta y’efeeza kuba akamanyiso akarikubaijutsya ngu tibaine kuteerana okuhitsya baaza omu bushwere.

 Eky’okugarukamu nikirugiirira aha muntu ou waabuuza.

•   Kurugiirira aha mucondooza Christine C. Kim na Robert Rector, “okucondooza okwingi kushangire ngu okurahira kw’okuguma oshugaine kukatuubya aha kuteerana kw’emishogoyo.”

•   Kurugiirira aha kucondooza kw’eitendekyero rya Guttmacher, nikworeka ngu “emishogoyo abarikurahira kuguma bashugaine nibabaasa kwejumba omu kuteerana nk’abo abatararahiire.”

 Niki ekirikureetaho entaaniso egi omu kucondooza?

•   Abacondooza abamwe nibagyeragyeranisa abaarahiire n’abatararahiire abatarikwikiriza ebirikushushana aha kuteerana.

•   Abacondooza abandi nibagyeragyeranisa abaarahiire n’abatararahiire abarikwikiriza ebirikushushana aha kuteerana.

 Kwonka okucondooza okwa bwanyima kukooreka ki? Omushaho.  Janet Rosenbaum, orikukora aha magara g’emishogoyo, naagira ngu bwanyima y’emyaka etaano, “abaarahiire n’abatararahiire nibaba nibatwaza omu muringo gurikushushana aha bikwatiraine n’okuteerana.”

 Endahiro z’okuguma oshugaine ziine ekigyendererwa kirungi. Oburemeezi buri ngu endahiro ezo tizirikuhikiiriza ekigyendererwa kyazo. Baingi abarikurahira kuguma bashugaine “tibarikuteekateeka aha ndahiro egyo,” nikwo Omushaho. Rosenbaum arikugira. “Okwezibira okwo nikurugiirira aha kumariirira kw’omuntu beitu kutari kukuratira entebeekanisa etairweho.”

 Baibuli neegira ngu omuntu aine kwecweramu, beitu kutari kuhandiika endahiro nari kugigamba, kureka aine kuhwerwa “kukoresa okubaasa kwe ‘okw’okutaanisa ekirungi n’ekibi.’ (Abaheburaayo 5:​14) Nangwa, okuguma oshugaine tikirikumanyisa okwetantara endwara nari okutwara enda, kureka n’okworeka ngu nooha ekitiinisa Owaatandikireho obushwere.​—Matayo 5:​19; 19:​4-6.

 Emitindo ya Baibuli n’ey’oburungi bwaitu. (Isaaya 48:17) Buzima, abantu boona ab’emyaka yoona nibabaasa kumariirira kworobera ekiragiro kya Ruhanga ‘eky’okwetantara obushambani.’ (1 Abakorinso 6:​18) Bwanyima omu bushwere, nibaija kwesiimira omu kiconco ky’okuteerana, batarikwerarikirira nari kwefuuza ebirikukira kugirwa abarikuteerana batakahikize emyaka.