Asoo Awulae Nzɛlɛlɛ Ne Ala A Le Adenle Kpalɛ Mɔɔ Bɛdua Zo Bɛyɛ Asɔne A?
Baebolo ne bua kɛ
Awulae nzɛlɛlɛ ne kile yɛ kɛzi ɔwɔ kɛ yɛyɛ asɔne nee ninyɛne mɔɔ ɔwɔ kɛ yɛyɛ nwolɛ asɔne la. Gyisɛse a hilele ye ɛdoavolɛma ne a wɔ mekɛ mɔɔ bɛzele ye kɛ: “Awulae, kile yɛ kɛzi bɛyɛ asɔne” la. (Luku 11:1) Noko, tɛ Awulae Nzɛlɛlɛ ne anzɛɛ Yɛ Ze Mɔɔ Wɔ Anwuma la angome a le asɔneyɛlɛ mɔɔ Nyamenle die to nu a. * Emomu, Gyisɛse vale yɛle asɔneyɛlɛ mɔɔ Nyamenle tie la anwo neazo.
Wɔ edwɛkɛ ɛhye anu
Duzu a Awulae Nzɛlɛlɛ ne fale nwo a?
Awulae Nzɛlɛlɛ ne wɔ Mateyu 6:9-13, na asolo edwɛkɛ agbɔkɛ mɔɔ Baebolo ngilebɛbo dɔɔnwo vale lile gyima wɔ ɛkɛ a. Bɛ nuhua nwiɔ ɛne.
Ewiade Fofolɛ Ngilebɛbo: “Yɛ Ze mɔɔ wɔ anwuma, wɔ duma nwo ɛde. Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la. Maa yɛ ɛnɛ aleɛ wɔ alehyenlɛ ɛhye anu; na fa yɛ kakɛ kyɛ yɛ kɛ mɔɔ yɛdayɛ noko yɛva yɛhyɛ menli mɔɔ tua yɛ kakɛ la. Mmafa yɛ ɛkɔ sɔnea nu, emomu die yɛ fi amumuyɛnli ne asa anu.”
BAEBOLO: Yɛ Ze mɔɔ wɔ anwuma: Wɔ duma nwo ɛde; Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la. Maa yɛ ɛnɛ yɛ dahuu aleɛ, Na fa yɛ ɛtane kyɛ yɛ, Kɛmɔ yɛfa yɛkyɛ bɛdabɛ mɔɔ bɛfo yɛ la; Mmamaa yɛkɔ ngyegyelɛ nu, Ye yɛ fi munzule nu.”
Duzu a Awulae Nzɛlɛlɛ ne kile a?
Gyisɛse ngilehilelɛ ne nee edwɛkɛ mɔɔ wɔ Ngɛlɛlera ne anu la amuala le ko, ɔti yɛze kɛ edwɛkɛ gyɛne mɔɔ wɔ Baebolo ne anu la baboa yɛ yɛamaa yɛade Awulae Nzɛlɛlɛ ne abo.
“Yɛ Ze mɔɔ wɔ anwuma”
Ɔfɛta kɛ yɛfɛlɛ Nyamenle kɛ “yɛ Ze” ɔluakɛ ɔdaye a ɔbɔle yɛ na ɔmaanle yɛ ngoane a.—Ayezaya 64:8.
“Wɔ duma nwo ɛde”
Ɔwɔ kɛ bɛdi Nyamenle duma Gyihova ne eni na bɛyɛ ye nwuanzanwuanza. Saa alesama ka Nyamenle subane ne mɔ anwo edwɛkɛ na bɛmaa menli nwu ye bodane ne mɔ a, ɛnee bɛlɛte ye duma nwo.—Edwɛne 83:18; Ayezaya 6:3.
“Wɔ Belemgbunlililɛ ɛrɛla”
Nyamenle Belemgbunlililɛ ne le anwuma arane mɔɔ Gyisɛse a le zolɛ Belemgbunli a. Gyisɛse hilehilele kɛ yɛyɛ asɔne yɛmaa arane ɛhye ɛli tumi wɔ azɛlɛ ye kɔsɔɔti azo.—Daneɛle 2:44; Yekile 11:15.
“Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la”
Kɛmɔ ninyɛndane anzɛɛ ewule ɛnle anwuma la ati, Nyamenle ɛhulolɛdeɛ a le kɛ alesama badɛnla aze dahuu wɔ anzodwolɛ nu na bɛanyia banebɔlɛ.—Edwɛne 37:11, 29.
“Maa yɛ ɛnɛ aleɛ wɔ alehyenlɛ ɛhye anu”
Ɔwɔ kɛ yɛkakye kɛ yɛhyia yɛ Bɔvolɛ ne anwo amaa yɛ sa aha ninyɛne mɔɔ yɛhyia na yɛadɛnla aze la.—Gyima ne 17:24, 25.
“Fa yɛ kakɛ kyɛ yɛ kɛ mɔɔ yɛdayɛ noko yɛva yɛhyɛ menli mɔɔ tua yɛ kakɛ la.”
Wɔ edwɛkɛ ɛhye anu, “kakɛ” mɔɔ bɛva bɛli gyima la kile ɛtane. (Luku 11:4) Alesama kɔsɔɔti yɛ ɛtane yɛɛ bɛhyia ɛtanefakyɛ. Noko, saa yɛkulo kɛ Nyamenle fa yɛ ɛtane kyɛ yɛ a, ɔwɔ kɛ yɛnyia ɛhulolɛ kɛ yɛbava ɛtane mɔɔ awie mɔ yɛ tia yɛ la yɛahyɛ bɛ.—Mateyu 6:14, 15.
“Mmafa yɛ ɛkɔ sɔnea nu, emomu die yɛ fi amumuyɛnli ne asa anu”
Gyihova Nyamenle ɛnva ɛtane ɛnzɔ yɛ ɛnnea. (Gyemise 1:13) Emomu, “amumuyɛnli ne,” Seetan Abɔnsam mɔɔ eza bɛfɛlɛ ye “Sɔneavolɛ ne” la a sɔ yɛ nea a. (1 Dwɔn 5:19; Mateyu 4:1-4) Yɛsɛlɛ kɛ Gyihova ɛboa yɛ na saa bɛsɔ yɛ bɛnea a yɛanyɛ ɔ nwo anzosesebɛ.
Asoo Awulae Nzɛlɛlɛ ne ala a le adenle mɔɔ bɛdua zo bɛyɛ asɔne a?
Gyisɛse vale Awulae Nzɛlɛlɛ ne yɛle neazo ala. Ɔnle kɛ yɛkye yɛgua yɛ ti anu na yɛka ye pɛpɛɛpɛ. Kolaa na Gyisɛse aha Awulae Nzɛlɛlɛ ne la, ɔbɔle kɔkɔ kɛ: “Saa ɛlɛyɛ asɔne a, mmaka edwɛkɛ ko ne ala fane dɔɔnwo.” (Mateyu 6:7) Mekɛ mɔɔ ɔlɛka asɔneyɛlɛ ko ne ala anwo edwɛkɛ wɔ mekɛ fofolɛ nu la, yeanva edwɛkɛ agbɔkɛ ko ne ala yeanli gyima.—Luku 11:2-4.
Adenle kpalɛ mɔɔ yɛbahola yɛalua zo yɛayɛ asɔne la a le kɛ yɛbaha yɛ ahonle nu edwɛkɛ.—Edwɛne 62:8.
Kɛzi ɔwɔ kɛ yɛyɛ asɔne ɛ?
Awulae Nzɛlɛlɛ ne le neazo mɔɔ maa yɛnwu kɛzi ɔwɔ kɛ yɛyɛ asɔne amaa Nyamenle adie yɛ la. Nea kɛzi ɔ nee Baebolo tɛkese gyɛne mɔɔ fale asɔneyɛlɛ nwo la le ko la.
Sɛlɛ Nyamenle angomekye
Ngɛlɛlera: “Wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu.”—Felepaema 4:6.
Mɔɔ ɔkile: Ɔwɔ kɛ yɛfa yɛ asɔneyɛlɛ yɛto Nyamenle anyunlu na tɛ Gyisɛse, Mɛle anzɛɛ anwodelɛma. “Yɛ Ze” mɔɔ yɛfa yɛbɔ Awulae Nzɛlɛlɛ ne abo la kilehile yɛ kɛ ɔwɔ kɛ yɛsɛlɛ Gyihova Nyamenle angomekye.
Yɛ ninyɛne mɔɔ nee Nyamenle ɛhulolɛdeɛ yia la anwo asɔne
Ngɛlɛlera: “Debie biala mɔɔ yɛkɛbiza ye wɔ ye ɛhulolɛ zo la, ɔtie yɛ.”—1 Dwɔn 5:14.
Mɔɔ ɔkile: Yɛbahola yɛayɛ debie biala mɔɔ nee Nyamenle ɛhulolɛdeɛ yia la anwo asɔne. Gyisɛse luale edwɛkɛ “wɔ ɛhulolɛdeɛ ɛyɛ ɛkɛ” mɔɔ wɔ Awulae Nzɛlɛlɛ ne anu la azo maanle yɛnwunle kɛzi Nyamenle ɛhulolɛdeɛ nwo hyia la. Saa yɛsukoa Baebolo ne a, yɛbanwu Nyamenle ɛhulolɛdeɛ mɔɔ ɔlɛ ɔmaa azɛlɛ ye nee alesama la.
Yɛ ninyɛne mɔɔ hyia wɔ la anwo asɔne
Ngɛlɛlera: “Fuandi wɔ adesoa to Gyihova anwo zo, na ɔbazɔ wɔ nu.”—Edwɛne 55:22.
Mɔɔ ɔkile: Nyamenle dwenle yɛ ngyianlɛ nwo. Kɛmɔ Gyisɛse hanle ninyɛne mɔɔ hyia yɛ anwo edwɛkɛ wɔ Awulae Nzɛlɛlɛ ne anu la ati, yɛdayɛ noko yɛbahola yɛayɛ ninyɛne mɔɔ yɛhyia nwo alehyenlɛ biala, adehilelɛ mɔɔ yɛbava yɛazi kpɔkɛ mɔɔ anwo hyia, debie mɔɔ baboa yɛ wɔ ngyegyelɛ mekɛ nu nee ɛtanefakyɛ nwo asɔne. *
^ Kɛ neazo la, Gyisɛse nee ye ɛdoavolɛma yɛle asɔne ngakyile mɔɔ bɛanga edwɛkɛ mɔɔ wɔ asɔneyɛlɛ nwo neazo ne anu la pɛpɛɛpɛ a.—Luku 23:34; Felepaema 1:9.
^ Bie a bɛdabɛ mɔɔ bɛze kɛ bɛhyia Nyamenle ɛkɛ ne ɛtanefakyɛ la adwenle babua bɛ fɔlɛ kɛ bɛbayɛ asɔne. Noko, Gyihova ɛlɛka ahile menli zɛhae mɔ kɛ: “Bɛmaa yɛziezie yɛ avinli.” (Ayezaya 1:18) Ɔnrɛkpo awie biala mɔɔ fi ye ahonle nu sɛlɛ ɛtanefakyɛ la.
Bie A Eza Ɛ Nye Balie
BAEBOLO KPUYA MƆƆ BƐBUA
Ninyɛne Boni Mɔ A Mebahola Meayɛ Nwolɛ Asɔne A?
Sukoa deɛmɔti yɛdayɛ mumua ne yɛ ngyegyelɛ nwo hyia Nyamenle la.
ƐZINZALƐ ARANE
“Wɔ Belemgbunlililɛ Ɛrɛla”—Asɔneyɛlɛ Mɔɔ Menli Dɔɔnwo Ze
Nyamenle Belemgbunlililɛ ne anwo kpuya boni mɔ a ɔwɔ kɛ yɛnwu nwolɛ mualɛ amaa yɛade asɔneyɛlɛ ɛhye abo a?
YƐ NWO EDWƐKƐ
Kɔ Debiezukoalɛ
Kpondɛ yɛ debiezukoalɛ ne mɔ anwo edwɛkɛ. Kpondɛ ɛleka mɔɔ bɛyɛ debiezukoalɛ mɔɔ bikye wɔ la.