Asoo Nyamenle Luale Ngakyihakyililɛ Zo A Bɔle Abɔdeɛ Ngakyile Mɔɔ Ngoane Wɔ Nu La A?
Mualɛ mɔɔ Baebolo ne fa maa la
Kyɛkyɛ. Baebolo ne maa ɔda ali wienyi kɛ Nyamenle bɔle alesama yɛɛ ɔbɔle nane nee mbaka ngakyile dɔɔnwo, ko biala ne ye “ɛsaso.” * (Mɔlebɛbo 1:12, 21, 25, 27; Yekile 4:11) Ɔka kɛ alesama amuala le Adam nee Yive mɔɔ bɛle yɛ awovolɛ mɔɔ limoa la abozoamra. (Mɔlebɛbo 3:20; 4:1) Baebolo ne ɛnlie adwenle mɔɔ menli bie mɔ lɛ kɛ Nyamenle luale ngakyihakyililɛ zo a bɔle abɔdeɛ ngakyile mɔɔ ngoane wɔ nu la ɛndo nu. Noko, nɔhalɛ ne a le kɛ, Baebolo ne ɛndendɛ ɛntia abɔdeɛ nwo nrɛlɛbɛvoma mɔɔ ka kɛ abɔdeɛ bie bahola anyia ye ɛsaso ngakyile dɔɔnwo la.
Asoo Nyamenle luale ngakyihakyililɛ zo a bɔle ninyɛne a?
Menli mɔɔ die di kɛ Nyamenle luale ngakyihakyililɛ zo a bɔle ngoane la lɛ nzuzulɛ ngakyile wɔ kɛzi ɔyɛle ɛhye la anwo. Encyclopædia Britannica ne ka kɛ, menli bie mɔ die di kɛ “Nyamenle luale abɔdeɛ bie mɔɔ kola kakyihakyi ɔ nwo yɛ abɔdeɛ fofolɛ la azo a bɔle ninyɛne mɔɔ wɔ ewiade la a.”
Menli mɔɔ die di kɛ Nyamenle luale ngakyihakyililɛ zo a bɔle ngoane la eza lɛ adwenle ɛhye mɔ:
Abɔdeɛ mɔɔ ngoane wɔ nu la amuala vi tete abɔdeɛ bie mɔ anu.
Abɔdeɛ bie mɔɔ ngoane wɔ nu la kola kakyi bɔkɔɔ yɛ abɔdeɛ fofolɛ.
Wɔ adenle bie azo, Nyamenle a maa ɛhye mɔ amuala yɛ boɛ a.
Asoo ngakyihakyililɛ nee Baebolo ne yia?
Menli mɔɔ die di kɛ Nyamenle luale ngakyihakyililɛ zo a bɔle ngoane la maa ɔda ali kɛ tɛ mɔɔ Baebolo ne ka ye wɔ abɔdeɛ nwo mɔɔ wɔ Mɔlebɛbo buluku ne anu la amuala a le nɔhalɛ a. Noko, Gyisɛse hanle kɛ edwɛkɛ mɔɔ wɔ Mɔlebɛbo buluku ne anu la le tetedwɛkɛ mɔɔ le nɔhalɛ. (Mɔlebɛbo 1:26, 27; 2:18-24; Mateyu 19:4-6) Baebolo ne ka kɛ kolaa na Gyisɛse ara azɛlɛ ye azo la, ɔ nee Nyamenle dɛnlanle anwuma na ɔboale Nyamenle ɔmaanle ɔvale “ninyɛne kɔsɔɔti” ɔrale. (Dwɔn 1:3) Yemɔti, adwenle mɔɔ menli bie mɔ lɛ ye kɛ Nyamenle luale ngakyihakyililɛ zo a bɔle abɔdeɛ ngakyile mɔɔ ngoane wɔ nu la nee mɔɔ Baebolo ne kilehile la ɛnyia.
Asoo nzenzaleɛ mɔɔ mbaka nee nane kola yɛ wɔ ɛleka mɔɔ bɛwɔ amaa bɛadɛnla ngoane nu la le ngakyihakyililɛ nwo neazo?
Baebolo ne ɛngilehile fane dodo mɔɔ abɔdeɛ bie bahola anyia ye ɛsaso ngakyile la anu. Yɛɛ eza ɔndendɛ ɔntia ngakyile mɔɔ wɔ nane nee mbaka ngakyile mɔɔ Nyamenle bɔle bɛ la ɛsaso ne mɔ anu la. Ɛhye si wɔ mekɛ mɔɔ bɛ nwo ɛlɛso anzɛɛ bɛlɛyɛ nzenzaleɛ wɔ kɛzi bɛde la anu amaa bɛahola bɛadɛnla ɛleka bie la. Bie mɔ bu nzenzaleɛ ɛhye kɛ ɔle ngakyihakyililɛ, noko abɔdeɛ fofolɛ biala ɛnvi abɔdeɛ ɛhye mɔ anu ɛmba.
^ Baebolo ne fa edwɛkɛkpɔkɛ “ɛsaso” a di gyima a na ye ndelebɛbo ne kɔ moa tɛla edwɛkɛkpɔkɛ “ekpunli” mɔɔ abɔdeɛ nwo nrɛlɛbɛvolɛma fa di gyima la. Fane dɔɔnwo ne ala, mɔɔ abɔdeɛ nwo nrɛlɛbɛvolɛma fɛlɛ ye ngakyihakyililɛ la le abɔdeɛ bie ɛsaso ngakyile, kɛ mɔɔ Mɔlebɛbo buluku ne ka la.
Bie A Eza Ɛ Nye Balie
BAEBOLO NGILEHILELƐ MƆƆ ANWO HYIA KPALƐ LA
Asoo Bɛbɔle Ewiade Ne?
Noko menli dɔɔnwo ɛnlie Baebolo nu edwɛkɛ zɔhane ɛnli yɛɛ bie mɔ bɔbɔ die di kɛ ɔle nwɔra. Asoo yɛbahola yɛalie mɔɔ Baebolo ne ka la yɛali?
KPUYA MƆƆ MENLI TA BIZA
Gyihova Alasevolɛ Die Di Kɛ Nyamenle Vale Kenle Nsia A Bɔle Ninyɛne Ɔ?
Asoo ɛze kɛ menli mɔɔ lɛ diedi kɛ Nyamenle vale kenle nsia mɔɔ ko biala le dɔnehwele 24 la a bɔle azɛlɛ ne la edwɛkɛ ne bie mɔ nee Baebolo ne ɛnyia?
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.