Kɛmɔ Abɔnsam le sunsum nu abɔdeɛ la ati, ɔwɔ sunsum nu ɛleka bie mɔɔ ɛnyelɛ ɛnnwu ye la. Noko ɛhye ɛnle senle mɔɔ Abɔnsam maa ɛtanevolɛma nwu amaneɛ wɔ ɛkɛ a, kɛ mɔɔ bɛhile ye wɔ nvoninli ne anu la.

“Konle zile anwuma”

 Ɛnee Seetan Abɔnsam kola kɔ anwuma mekɛ biala mɔɔ ɔkulo la, ɔhɔle Nyamenle nee anwumabɔvolɛ nɔhavoma anyunlu. (Dwobu 1:6) Noko, Baebolo ne hanle dole ɛkɛ ne kɛ ‘konle bazi anwuma’ na ‘bɛbavuandi Seetan bɛado azɛlɛ ye azo.’ (Yekile 12:7-9) Baebolo mgbondabulɛ nee ninyɛne mɔɔ ɛlɛsisi ewiade la kile kɛ konle ɛhye ɛzi anwuma dɛbadɛba. Kɛkala Abɔnsam ɛngola ɛngɔ anwuma ɔwɔ azɛlɛ ye azo ala.

 Asoo ɛhye kile kɛ Abɔnsam de azɛlɛ ye azo ɛleka kpɔtee bie ɔ? Kɛ neazo la, bɛhanle kɛ ɛnee “Seetan ebia ne gyi” tete suakpole Pɛgamɛm azo. (Yekile 2:13) Edwɛkɛ ɛhye kile kɛ, menli mɔɔ wɔ suakpole zɔhane azo la anye die awozonle ɛzonlenlɛ nwo. Baebolo ne ka kɛ “azɛlɛ ye azo arelemgbunlililɛ kɔsɔɔti” le Abɔnsam ɛdeɛ, ɔti ɔngile kɛ ɔde ɛleka kpɔtee bie wɔ azɛlɛ ye azo noko ɔwɔ azɛlɛ ye azo.​—Luku 4:​5, 6.