Dasanli biala ɛtɛfale ɔ nye ɛtɛnwunle Nyamenle ɛlɛ. (Adendulɛ 33:20; Dwɔn 1:18; 1 Dwɔn 4:12) Baebolo ne ka kɛ “Nyamenle le Sunsum,” ɔti sonla ɛngola ɛnva ɔ nye ɛnnwu ye.​—Dwɔn 4:24; 1 Timote 1:17.

 Noko anwumabɔvolɛ ne mɔ kola nwu Nyamenle ɔluakɛ bɛle sunsum nu abɔdeɛ. (Mateyu 18:10) Eza bɛbadwazo menli bie mɔ bɛavi ewule nu na bɛamaa bɛ sunsum nu sonlabaka bɛamaa bɛahɔ anwuma, na akee bɛbahola bɛanwu Nyamenle.​—Felepaema 3:20, 21; 1 Dwɔn 3:2.

 Baebolo ne ta fa debie mɔɔ awie nwu ye la di gyima wɔ sɛkɛlɛneɛ adenle zo kile kɛ yede edwɛkɛ bie abo. (Ayezaya 6:10; Gyɛlɛmaya 5:21; Dwɔn 9:39-41) Ɛhye kile kɛ awie kola dua diedi mɔɔ ɔlɛ la azo fa ye ‘ahonle ne anye’ nwu Nyamenle ɛnɛ amaa yeanwu Ye boɛ na ɔ nye alie Ye subane ne mɔ anwo. (Ɛfɛsɛsema 1:18) Baebolo ne kile ndenle mɔɔ bɛdua zo bɛnyia diedi ɛhye la.

•   Dua Nyamenle abɔdeɛ zo sukoa Nyamenle subane ne mɔ, mɔɔ bie a le ɛlɔlɛ nee ahunlunyele yɛɛ ye nrɛlɛbɛ nee ye tumi ne anwo debie. (Wulomuma 1:20) Mekɛ mɔɔ Nyamenle hakyele nɔhavo Dwobu wɔ ninyɛne mɔɔ yebɔ la anwo la, akee ɔdele nganeɛ kɛ asɛɛ Nyamenle gyi ɔ nyunlu ɛkɛ ne la.​—Dwobu 42:5.

•   Sukoa Baebolo ne na dua zo nwu Nyamenle. Baebolo ne maa yɛ anwosesebɛ kɛ: “Saa ɛkpondɛ ye a, ɔbamaa wɔanwu ye.”​—1 Edwɛkɛsisilɛ 28:9, NW; Edwɛndolɛ 119:2; Dwɔn 17:3.

•   Dua Gyisɛse ɛbɛlabɔlɛ zo sukoa Nyamenle anwo debie. Kɛmɔ Gyisɛse lale ɔ Ze, Gyihova Nyamenle subane ne ali pɛpɛɛpɛ la ati, ɔholale ɔhanle kɛ: “Mɔɔ ɛnwu me la ɛnwu Selɛ ne noko.”​—Dwɔn 14:9.

•   Bɔ wɔ ɛbɛla wɔ adenle mɔɔ sɔ Nyamenle anye la azo na nwu kɛzi ɔboa wɔ la. Gyisɛse hanle kɛ: “Anyelielɛ a le bɛdabɛ mɔɔ bɛ ahonle nu te la, ɔluakɛ bɛbanwu Nyamenle.” Kɛ mɔɔ yɛnwu ye la, bɛbadwazo menli mɔɔ yɛ mɔɔ sɔ Nyamenle anye la bie mɔ bɛavi ewule nu bɛahɔ anwuma na “bɛbanwu Nyamenle” wɔ ɛkɛ.​—Mateyu 5:8; Edwɛndolɛ 11:7.

 Wɔ kɛlɛtokɛ mɔɔ ɔzɔho kɛ Baebolo ne ka kɛ menli vale bɛ nye nwunle Nyamenle la anu, ɛkenga edwɛkɛ ne amuala a ɔmaa ɛnwu kɛ anwumabɔvolɛ bie gyinlanle Nyamenle agyakɛ anu anzɛɛ ɔluale ɛnyelɛzodeɛnwunlɛ zo.

Anwumabɔvolɛma.

Tete ne, Nyamenle zoanle anwumabɔvolɛma kɛ ɔ gyakɛ anu gyinlavolɛma wɔ menli ɛkɛ na bɛdendɛle wɔ ye duma nu. (Edwɛndolɛ 103:20) Kɛ neazo la, Nyamenle dendɛle hilele Mosisi mekɛ bie wɔ kpɔkɛ mɔɔ ɛlɛsɔ la anu, na Baebolo ne ka kɛ “Mosisi hedale ɔ ti zo, ɔluakɛ ɔsulo kɛ ɔkɛnlea Nyamenle.” (Adendulɛ 3:4, 6) Noko Mosisi anva ɔ nye annwu Nyamenle ɔluakɛ kɛlɛtokɛ ne maa ɔda ali kɛ ɔnwunle Gyihova “soanvolɛ.”​—Adendulɛ 3:2.

 Zɔhane ala a saa Baebolo ne ka kɛ Nyamenle “dendɛle hilele Mosisi, kɛmɔ sonla si tendɛ kile ɔ gɔnwo ala la” a, ɔkile kɛ Nyamenle nee Mosisi dendɛle kɛ ɔ gɔnwo la. (Adendulɛ 4:10, 11; 33:11) Mosisi annwu Nyamenle anyunlu ɔluakɛ Nyamenle ‘maanle anwumabɔvolɛma’ a rahanle edwɛkɛ ne hilele ye a. (Galeehyeama 3:19; Gyima ne 7:53) Noko Mosisi ɛnee lɛ diedi kpole wɔ Nyamenle anu ɔti Baebolo ne hanle ɔ nwo edwɛkɛ kɛ “yenwu Ahenle ne mɔɔ bɛnnwu ye la.”​—Hibuluma 11:27.

 Zɔhane ala a Nyamenle luale anwumabɔvolɛma anwo zo nee Ebileham dendɛle kɛ mɔɔ ɔdendɛle ɔhilele Mosisi la. Noko saa ɛkenga Baebolo ne ala a ɔbamaa wɔanyia adwenle kɛ Ebileham vale ɛ nye nwunle Nyamenle. (Mɔlebɛbo 18:1, 33) Noko akee, kɛlɛtokɛ ne maa ɔda ali kɛ “menli nsa” ne mɔɔ rale Ebileham anwo ɛkɛ ne la le anwumabɔvolɛma mɔɔ Nyamenle zoanle bɛ a. Ebileham nwunle bɛ kɛ bɛle Nyamenle agyakɛnugyinlavolɛma na ɔdendɛle ɔhilele bɛ kɛ asɛɛ ɔlɛtendɛ yeahile Gyihova ala la.​—Mɔlebɛbo 18:2, 3, 22, 32; 19:1.

Ɛnyelɛzodeɛnwunlɛ.

Eza Nyamenle luale ɛnyelɛzodeɛnwunlɛ zo yele ɔ nwo hilele menli anzɛɛ ɔmaanle bɛpɛle ninyɛne nwo nvoninli wɔ bɛ adwenle nu. Kɛ neazo la, mekɛ mɔɔ Baebolo ne hanle kɛ Mosisi nee Yizilayɛma mɔɔ ɛha la ‘nwunle Yizilayɛ Nyamenle ne’ la, nɔhalɛ ne a le kɛ “bɛnwunle nɔhalɛ Nyamenle ne wɔ ɛnyelɛzodeɛnwunlɛ nu.” (Adendulɛ 24:9-11, NW) Zɔhane ala a ɔyɛ a Baebolo ne ka kɛ ngapezoma ‘nwunle Gyihova’ a. (Ayezaya 6:1; Daneɛle 7:9; Emɔso 9:1) Wɔ edwɛkɛ ne ko biala anu, kɛlɛtokɛ ne maa yɛnwu kɛ bɛnwunle Nyamenle wɔ ɛnyelɛzodeɛnwunlɛ nu na bɛanva bɛ nye bɛannwu ye.​—Ayezaya 1:1; Daneɛle 7:2; Emɔso 1:1.