Asoo Nyamenle Wɔ Ɛleka Biala?

BƆ

Baebolo ne bua kɛ

Nyamenle kola nwu debie biala yɛɛ ɔkola ɔyɛ debie biala wɔ ɛleka biala mɔɔ ɔkulo la. (Mrɛlɛbulɛ 15:3; Hibuluma 4:13) Noko akee, Baebolo ne ɛnga kɛ Nyamenle wɔ ɛleka biala—kile kɛ ɔwɔ abɔdeɛ biala anu wɔ ɛleka biala. Emomu ɔkile kɛ ɔwɔ ɛkɛ yɛɛ ɔlɛ ɛleka mɔɔ ɔde a.

Kɛzi Nyamenle de la: Nyamenle le sunsum. (Dwɔn 4:24) Alesama ɛnrɛhola ɛnrɛnwu ye. (Dwɔn 1:18) Nyamenle anwo ɛnyelɛzodeɛnwunlɛ mɔɔ wɔ Baebolo ne anu la ka kɛ Nyamenle de ɛleka kpɔtee bie. Ɔnga kɛ ɔwɔ ɛleka biala.—Ayezaya 6:1, 2; Yekile 4:2, 3, 8.
Ɛleka mɔɔ Nyamenle de la: Nyamenle de sunsum nu ɛleka mɔɔ nee abɔdeɛ mɔɔ ɛnyelɛ nwu bɛ la ɛnle ko la. Wɔ sunsum nu ɛleka ɛhye a Nyamenle ‘sua wɔ wɔ anwuma lɔ’ a. (1 Arelemgbunli 8:30) Baebolo ne ka mekɛ bie mɔɔ sunsum nu abɔdeɛ ‘hɔle Gyihova * anyunlu kɛ bɛkava bɛ nwo bɛahile ye’ la anwo edwɛkɛ. Ɛhye kile kɛ Nyamenle de ɛleka kpɔtee bie.—Dwobu 1:6.

Saa Nyamenle ɛnle ɛleka biala a, ɛnee ɔbahola yeaboa me ɔ?

Ɛhɛe. Nyamenle boa awie biala. Ɔwɔ nuhua kɛ Nyamenle de sunsum nu ɛleka ɛdeɛ, noko ɔnwu menli mɔɔ wɔ azɛlɛ ye azo mɔɔ bɛkulo kɛ bɛyɛ ye ɛhulolɛdeɛ la na ɔboa bɛ. (1 Arelemgbunli 8:39; 2 Edwɛkɛsisilɛ 16:9) Suzu kɛzi Gyihova da ye ali kɛ ɔdwenle ye nɔhalɛ azonvolɛ nwo la anwo:

Mekɛ mɔɔ ɛbayɛ asɔne la: Saa ɛyɛ asɔne a, Gyihova kola te ye ɛkɛ ne ala.—2 Edwɛkɛsisilɛ 18:31.
Mekɛ mɔɔ ɛ sa nu kɛdo la: ‘Gyihova bikye mɔɔ nyane ɛha ye la, na ɔdie mɔɔ ye anyelazo ɛwie la.’—Edwɛndolɛ 34:18.
Mekɛ mɔɔ ɛhyia adehilelɛ la: Gyihova ‘badu wɔ folɛ na yeahilehile wɔ’ ɔlua ye Edwɛkɛ Baebolo ne azo.—Edwɛndolɛ 32:8.

Ɛleka mɔɔ Nyamenle wɔ la anwo adalɛ edwɛkɛ

Adalɛ edwɛkɛ: Nyamenle de ye abɔdeɛ nu wɔ ɛleka biala.

Nɔhalɛ edwɛkɛ: Nyamenle ɛnde azɛlɛ ye azo anzɛɛ abɔdeɛ mɔɔ ɛnyelɛ wu ye la anu. (1 Arelemgbunli 8:27) Ɔle nɔhalɛ kɛ nwɔlɔra ne mɔ nee abɔdeɛ ngakyile “ɛlɛkile Nyamenle anyunlunyia ne.” (Edwɛndolɛ 19:1) Noko akee, Nyamenle ɛnde ye abɔdeɛ bie anu kɛ mɔɔ awie mɔɔ dolɔ debie la ɛnde deɛ ne mɔɔ ɔdolɔ la anu la. Noko, yɛbahola yɛalua deɛ ne mɔɔ ahenle ɛdolɔ la azo yɛanwu ɔ nwo debie. Zɔhane ala a, abɔdeɛ mɔɔ ɛnyelɛ nwu bɛ la maa yɛnwu ahenle mɔɔ bɔle la “subane ne mɔ mɔɔ ɛnyelɛ ɛnnwu bɛ la,” le kɛ ye tumi, ye nrɛlɛbɛ nee ye ɛlɔlɛ.—Wulomuma 1:20.

Adɛlɛ edwɛkɛ: Ɔwɔ kɛ Nyamenle yɛ awie mɔɔ ɔwɔ ɛleka biala a amaa yeanwu ninyɛne kɔsɔɔti na yeayɛ tumivolɛ.

Nɔhalɛ edwɛkɛ: Nyamenle sunsum nwuanzanwuanza ne anzɛɛ ye gyimayɛlɛ tumi ne le tumi mɔɔ ɔfa ɔyɛ gyima a. Nyamenle sunsum nwuanzanwuanza ne maa ɔkola ɔnwu na ɔyɛ debie biala wɔ ɛleka biala nee mekɛ biala mɔɔ ɔngyia kɛ ɔbahɔ ɛleka zɔhane a.—Edwɛndolɛ 139:7.

Adalɛ edwɛkɛ: Edwɛndolɛ 139:8 kilehile kɛ Nyamenle wɔ ɛleka biala, ɔka kɛ: ‘Saa mekɔ anwuma a, ɛwɔ ɛkɛ! Saa mekɔda Nla nu a, ɛwɔ ɛkɛ!’

Nɔhalɛ edwɛkɛ: Tɛ ɛleka mɔɔ Nyamenle de la a ngɛlɛlera ɛhye ka nwolɛ edwɛkɛ a. Ɔkilehile kɛ ɛleka biala ɛnle ɛkɛ ne mɔɔ saa yɛwɔ a Nyamenle ɛnrɛhola ɛnrɛlie yɛ a.

^ Baebolo ne maa yɛnwu kɛ Nyamenle duma a le Gyihova.