“Menli mɔɔ me nee bɛ tu la ala meze bɛ a, na ɔyɛ se ɔmaa me kɛ mebava awie gyɛne agɔnwolɛ.”​—Alan.

 “Me gɔnwo mɔ anzo yɛɛ mekulo ye zɔ. Me nee menli mɔɔ menze bɛ la ɛndendɛ.”​—Sara.

 Ɛte nganeɛ kɛ Alan nee Sara ɔ? Asoo menli ekpunli bie ala a wɔva bɛ agɔnwolɛ a na ɔyɛ se ɔmaa wɔ kɛ ɛbava awie mɔ gyɛne noko agɔnwolɛ ɔ?

 Saa ɔle zɔ a, ɛnee edwɛkɛ ɛhye baboa wɔ!

•  Menli ekpunli bie ala agɔnwolɛvalɛ nwo ngyegyelɛ

•  Mɔɔ ɛbahola wɔayɛ la

•  Mɔ ɛ tipɛnema ka la

 Nvonleɛ biala ɛnle nwo kɛ ɛbava menli ekpunli bie ala agɔnwolɛ. Saa ɛfa menli ekpunli ekyi bie ala agɔnwolɛ a, ɔmaa ɛte nganeɛ kɛ ɛ nwo hyia yɛɛ bɛdie wɔ bɛto nu ɔnva nwo sinlidɔlɛ mɔɔ ɛlɛ la.

 “Saa ɛwɔ ekpunli bie anu na bɛdie wɔ bɛto nu a, ɔmaa ɛ nye die. Saa ɛle kakula a mɔɔ ɛkpondɛ la a le kɛ bɛbalie wɔ bɛado nu.”​—Karen, 19.

 Ɛze ɔ? Ɛnee ɛzoanvolɛma 12 ne boka Gyisɛse agɔnwo mɔ anwo, noko ɛnee bɛ nuhua nsa​—Pita, Gyemise, yɛɛ Dwɔn​—a bikye ye kpalɛ a.​—Maake 9:2; Luku 8:​51.

 Noko akee, saa yɛ nee menli ekpunli ekyii bie ala tu na yɛtwe yɛ nwo yɛfi menli mɔɔ ɛha la anwo a​—ɔkola ɔfa ngyegyelɛ ɔba. Kɛ neazo la:

•   Bie a ɔnrɛmaa ɛnrɛva menli gyɛne mɔɔ lɛ subane mgbalɛ la agɔnwolɛ.

   “Saa ɛfa menli mɔɔ le kɛ ɛdawɔ la ala agɔnwolɛ a, ɛnrɛnyia anwubielɛ fofolɛ​—yɛɛ ɔnrɛmaa ɛnrɛbikye menli mɔɔ lɛ subane kpalɛ la.”​—Evan, 21.

•   Ɔkola ɔmaa ɛnyia adwenle kɛ ɛle kpalɛ ɛtɛla awie mɔ.

   “Saa ɛfa menli ekpunli bie ala agɔnwolɛ a ɔbamaa awie mɔ anyia adwenle kɛ ɛngulo kɛ ɛ nee bɛ tendɛ.”​—Sara, 17.

•   Ɔbahola yeamaa wɔava ɛ nwo wɔawula apobɔlɛ nu.

   “Bie a ɛnrɛbɔ awie apo, noko saa ɛ gɔnwo mɔ yɛ a, ɔbadwu mekɛ ne bie la ɛnrɛnwu ye kɛ ɔle ɛtane​—ɛ nye baralie nwo bɔbɔ.”​—James, 17.

•   Ɔbahola yeamaa wɔayia ngyegyelɛ titili saa ɛkulo kɛ ɛyɛ debie mɔɔ bamaa ɛ gɔnwo mɔ ahulo wɔ edwɛkɛ la a.

   “Saa ɛ gɔnwo mɔ ko da subane ɛtane ali a ɔbamaa bɛdabɛ mɔɔ bɛha la amuala ayɛ bie.”​—Martina, 17.

•   Neɛnlea wɔ ngyinlazo ne mɔ anu.

   Biza ɛ nwo kɛ: ‘Ngyinlazo boni mɔ a mebɔ mɔdenle kɛ mebava meabɔ me ɛbɛla a? Asoo me gɔnwo mɔ maa ɔyɛ se ɔmaa me kɛ mebava ngyinlazo ɛhye mɔ meayɛ gyima anzɛɛ bɛmmaa ɔnyɛ se? Asoo mebahɔ zo meava menli ɛhye mɔ agɔnwolɛ wɔ adenle biala azo ɔ?’

   Baebolo ngyinlazo: “Agɔnwolɛ ɛtane sɛkye subane kpalɛ.”​—1 Kɔlentema 15:33, ɔbodwɛkɛ.

   “Saa ɛfa menli mɔɔ nee wɔ ɛnlɛ ngyinlazo ko la agɔnwolɛ a, bie a ɛ nye kara ɛ nwo zo la ɛnee ɛlɛyɛ debie mɔɔ ɛngulo kɛ ɛyɛ la.”​—Ellen, 14.

•   Neɛnlea mɔɔ hyia wɔ la anu.

   Biza ɛ nwo kɛ: ‘Asoo me gɔnwo mɔ anwo hyia me somaa mɔɔ ɔti mebagyakyi me ngyinlazo ne mɔ anu amaa bɛalie me bɛado nu? Saa me gɔnwo bie yɛ debie ɛtane a duzu a mebayɛ a?’

   Baebolo ngyinlazo: “Bɛdabɛ mɔɔ mekulo bɛ edwɛkɛ la amuala, metwi bɛ nyunlu.”​—Yekile 3:19.

   “Saa ɛ gɔnwo bie nyia edwɛkɛ na ɛnwu ye kɛ yeanyɛ ye boɛ ɔti ɔnle kɛ ɛgyinla ɔ nzi a, bie a ɛbade nganeɛ kɛ saa ɛka ɛkile ye a ɔbahile kɛ wɔye ye wɔmaa.”​—Melanie, 22.

•   Fa menli gyɛne agɔnwolɛ.

   Biza ɛ nwo kɛ: ‘Saa mefa menli mɔɔ menze bɛ la agɔnwolɛ a asoo ɔbahola yeaboa me ɔ?’

   Baebolo ngyinlazo: “Bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”​—Felepaema 2:4.

   “Bie a ngakula mɔɔ bɛtɛdiele duma la yia ngyegyelɛ wɔ sua nu. Fane dɔɔnwo ne ala saa ɛbikye bɛ a ɛbanwu debie titili bie mɔɔ bamaa ɛ nye alie bɛ nwo a.”​—Brian, 19.

 Nɔhalɛ edwɛkɛ: Nvonleɛ biala ɛnle nwo kɛ ɛbava menli ekpunli bie ala agɔnwolɛ. Mekɛ ko ne ala, saa ɛfa awie mɔ gyɛne agɔnwolɛ a ɔbaboa wɔ. Baebolo ne ka kɛ: “Mɔɔ maa awie mɔ anwo tɔ bɛ la noko anwo badɔ ye.”​—Mrɛlɛbulɛ 11:25, New World Translation.