•  Ɛkulo bɛ edwɛkɛ noko ɔyɛ a bɛka wɔ ɛya

•  Ninyɛne nwiɔ mɔɔ ɔ ti ɔwɔ kɛ bɛtɛnla anzodwolɛ nu la

•  Mɔɔ ɛ tipɛnema ka la

 Bɛta bɛka kɛ ɛ mediema a le “agɔnwolɛ kpalɛ nee ɛtane mɔɔ ɛbahola wɔanyia a.” Ɛkulo bɛ edwɛkɛ, yɛɛ bɛdabɛ noko bɛkulo wɔ edwɛkɛ​—noko ɔdwu mekɛ ne bie a ɛngola ɛ nee bɛ ɛndɛnla anzodwolɛ nu. Helena mɔɔ ɛnyia ɛvolɛ 18 la ka kɛ, “Me diema nrenyia ne ka me ɛya. Ɔze mɔɔ ɔyɛ anzɛɛ ɔka a mebava ɛya a.”

 Bɛbahola bɛaziezie akɛsakɛsa mɔɔ ba mediema avinli la ɔlua adawubɔlɛ nee ngyehyɛleɛ kpalɛ zo. Kɛ neazo la:

•   Bie a mediema mrenyia nwiɔ mɔɔ bɛwɔ sua ko anu la bali butule. Nzɔne a baboa a? Ɔwɔ kɛ bɛsukoa kɛ bɛbapɛ zo anzɛɛ bɛbali nwolɛ gyima. Akee bɛva Baebolo ngyinlazo mɔɔ wɔ Luku 6:​31 la bɛli gyima.

•   Ngakula mraalɛ nwiɔ mɔɔ bɛle mediema la biala bahola “ava” ɔ gɔnwo tɛladeɛ awula mɔɔ ɔmbiza nwolɛ adenle a. Nzɔne a baboa a? Bɛdɛnla aze bɛzuzu nwo na bɛva ɛweɛne mɔɔ fɛta la bɛdo nwo. Bɛva Baebolo ngyinlazo mɔɔ wɔ 2 Temɔte 2:​24 la bɛli gyima.

 Ɔdwu mekɛ ne bie a, akɛsakɛsa mɔɔ wɔ mediema avinli la yɛ ɛzulolɛ yɛɛ ɔkola ɔfa ngyegyelɛ kpole ɔba. Suzu neazo nwiɔ mɔɔ wɔ Baebolo ne anu la anwo:

•   Meleam nee Aalɔn anyebolole bɛ diema Mosisi na mɔɔ vile nu rale la yɛ alɔbɔlɛ kpalɛ. Kenga nwolɛ edwɛkɛ wɔ Ɛdianlɛ 12:​1-​15. Akee biza ɛ nwo kɛ: ‘Duzu a menyɛ na me nye ambolo me mediema ne mɔ a?’

•   Keen vale ɛya kpole na ɔhunle ɔ diema Ebɛle. Kenga nwolɛ edwɛkɛ wɔ Mɔlebɛbo 4:​1-​12. Akee biza ɛ nwo kɛ: ‘Saa me nee me mediema ɛlɛdi edwɛkɛ bie a, kɛzi mebahomo me ɛya zo ɛ?’

 Ɔnvale nwo kɛ bie a ɔyɛ se kɛ ɛ nee ɛ mediema badɛnla anzodwolɛ nu la, ninyɛne nwiɔ bie ati a ɔwɔ kɛ ɛbɔ mɔdenle a.

1.   Ɔkile kɛ wɔ adwenle ɛdi. Kakula nrenyia bie mɔɔ bɛfɛlɛ ye Alex la ka kɛ: “Ɛnee mefa me mediema mraalɛ nwiɔ ne anwo ɛya ndɛndɛ. Noko kɛkala menyia bɛ nwo abotane. Bie a ɛbaha kɛ, me adwenle ɛdi.”

    Baebolo ne ka kɛ: “Sonla mɔɔ ɔkyɛ na yeava ɛya la ndelebɛbo le kpole, na mɔɔ ɛngyɛ na ye ahonle afutu la maa ye koaseayɛlɛ yɛ kpole.”​—Mrɛlɛbulɛ 14:29.

2.   Ɔtete wɔ ɔmaa kenle bie. Saa ɛngola ɛngyinla ɛ mediema sinlidɔlɛ nloa a, ɛnee kɛ ɔkɛyɛ na ɛ nee ɛ hu anzɛɛ ɛ ye, ɛ gɔnwo gyimayɛvo, wɔ gyima menle, anzɛɛ awie mɔ gyɛne adɛnla anzodwolɛ nu ɛ?

    Ɛbɛlabɔlɛ nu nɔhalɛ edwɛkɛ: Saa agɔnwolɛvalɛ mɔɔ ɛ nee awie mɔ banyia ye kenle bie la bayɛ boɛ a, ɔbagyinla kɛzi ɛ nee menli tendɛ nee kɛzi ɛsiezie edwɛkɛ la azo, na ɛleka kpalɛ mɔɔ ɛbahola wɔanyia subane ɛhye mɔ la a le wɔ abusua ne anu.

    Baebolo ne ka kɛ: “Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu.”​—Wulomuma 12:18.

 Asoo ɛbahyia moalɛ wɔ kɛzi ɛbaziezie akɛsakɛsa mɔɔ ba ɛ nee ɛ mediema avinli la ɔ? Kenga “Mɔɔ ɛ tipɛnema ka la” nee “Ɛ Nee Ɛ Mediema Ɛdɛnla Anzodwolɛ Nu” gyimayɛlɛ kɛlata ne mɔɔ boka nwo la.”