Gyihova Alasevolɛ die di kɛ ngyinlazo nee mɛla mɔɔ wɔ Baebolo ne anu la maa yɛsi kpɔkɛ mɔɔ Nyamenle anye die nwo na ɔboa yɛ la. (Ayezaya 48:17, 18) Tɛ yɛdayɛ a yɛhyehyɛle ngyinlazo nee mɛla ɛhye mɔ a, noko yɛfa yɛbɔ yɛ ɛbɛla. Suzu kɛzi ngyinlazo ɛhye mɔ bie fale ɛdulɛ mɔɔ li agyalɛ nyunlu anwo la anwo. a

•   Ɔwɔ kɛ agyalɛ tɛnla ɛkɛ dahuu. (Mateyu 19:6) Ɔluakɛ Gyihova Alasevolɛ ze kɛ ɛdulɛ mɔɔ li agyalɛ nyunlu kɔwie agyalɛ nu la ati, bɛbu ye kɛ anyebolo wɔ nu.

•   Ɔwɔ kɛ menli mɔɔ bɛnyi na bɛkola bɛgya la ala a tu kɛ bɛgya a. Menli zɛhae ‘ɛnle ngakula somaa,’ anzɛɛ bɛ nla nu atiakunluwɔzo ne ɛha aze.​—1 Kɔlentema 7:36.

•   Ɔnle kɛ menli mɔɔ ɛnlɛ adenle gya la tu kɛ bɛgya. Menli bie mɔ ɛbɔ ewole wɔ mɛla adenle zo, noko wɔ Nyamenle anye zo bɛtɛde agyalɛma na yemɔti bɛnlɛ adenle bɛgya bieko ɔluakɛ adwɔmane ɛbɛla ala a Nyamenle ɛmaa adenle kɛ bɛkola bɛgyinla zo bɛbɔ ewole a.​—Mateyu 19:9.

•   Bɛdu Kilisienema mɔɔ bɛkulo kɛ bɛgya la folɛ kɛ, bɛgya bɛ gɔnwo diedinli ala. (1 Kɔlentema 7:39) Gyihova Alasevolɛ ɛnde nganeɛ kɛ saa awie lɛ ɛbulɛ maa bɛ diedi ne a bɛkola bɛgya ye, emomu ɔwɔ kɛ ɔyɛ awie mɔɔ bɛ nee ye lɛ diedi ko na bɛzɔne ye kɛ Dasevolɛ la. (2 Kɔlentema 6:14) Ɔvi tete ne amuala, Nyamenle ɛmaa ye azonvolɛ mɛla kɛ bɛgya menli mɔɔ bɛ nee bɛ lɛ diedi ko la ala. (Mɔlebɛbo 24:3; Malakae 2:11) Neɛnleanu mɔɔ bɛyɛ ye kenle nsa ye la kile kɛ nvasoɛ tɛbɔ mɛla ɛhye azo. b

•   Ngakula ɛdie bɛ awovolɛ. (Mrɛlɛbulɛ 1:8; Kɔlɔsaema 3:20) Saa kakula de ye awovolɛ anwo a, ɔwɔ kɛ ɔtie ye awovolɛ wɔ adehilelɛ mɔɔ bɛbava bɛamaa ye wɔ ɛdulɛ mɔɔ li agyalɛ nyunlu anwo la. Bie a bɛbaha kɛ kakula ne ɛtɛnyinle anzɛɛ bɛbava ninyɛne bie mɔɔ ɔnle kɛ ɔyɛ ye wɔ ɛdulɛ ne anu la anwo mɛla bɛamaa ye.

•   Gyihova Dasevolɛ ko biala fa Baebolo ngyinlazo si ɔ ti anwo kpɔkɛ kɛ ɔbava ɔ nwo yeawula ɛdulɛ mɔɔ li agyalɛ nyunlu anu anzɛɛ ɔnrɛyɛ zɔ. Ɛhye nee ngyinlazo mɔɔ se: “awie biala ɔdaye ɔbazoa ye gyimalilɛ nwo adesoa” la yia. (Galeehyeama 6:5, ɔ bo ɛkɛ edwɛkɛ) Noko akee, saa ɔbaye ye wɔ ɛdulɛ mɔɔ li agyalɛ nyunlu la anwo a, menli dɔɔnwo kpondɛ moalɛ fi Alasevolɛ mɔɔ bɛnyi wɔ sunsum nu mɔɔ bɛkulo bɛ la ɛkɛ.​—Mrɛlɛbulɛ 1:5.

•   Nyɛleɛ bie mɔ mɔɔ kɔ zo wɔ ɛdulɛ mɔɔ li agyalɛ nyunlu anu la le ɛtane mɔɔ anyebolo wɔ nu. Kɛ neazo la, Baebolo ne ka kile yɛ kɛ yɛkpo nla nu ɛbɛlatane. Tɛ nla nu ngitanwolilɛ ala, emomu awie mɔɔ ɔnle bɛ agyalɛ bokavolɛ awodeɛ mɔɔ bɛfa bɛdi nwɔhoa anzɛɛ bɛtafe nwo yɛɛ bɛ nzi mɔɔ bɛfa la boka nwo. (1 Kɔlentema 6:9-11) Nyɛleɛ bie mɔ mɔɔ maa bɛ adwenle kɔ nla zo wɔ mekɛ mɔɔ bɛtɛgyale la bɔbɔ boka nwo ɔluakɛ ɔle “evinli nyɛleɛ” mɔɔ Nyamenle kyi a. (Galeehyeama 5:19-21) Eza Baebolo ne tendɛ tia adawubɔlɛ mɔɔ maa bɛ adwenle kɔ nla zo la, ɔluakɛ ɔle “edwɛkɛ ɛtane” mɔɔ fi bɛ nloa anu finde a.​—Kɔlɔsaema 3:8.

•   Ahonle ne anzɛɛ kɛzi yɛde wɔ yɛ nu la le mɛlɛbɛla. (Gyɛlɛmaya 17:9) Ɔkola ɔmaa yɛyɛ debie mɔɔ yɛze kɛ ɔnle kpalɛ la. Amaa menli nwiɔ mɔɔ ɛlɛtu kɛ bɛgya ahonle ambɛlɛbɛla bɛ la, ɔnle kɛ bɛ ngome bɛfea ɛleka mɔɔ le koonwu la amaa adwenle ɛtane amba bɛ ti anu. Saa bɛkɔ ɛleka bie a, bɛbahola bɛ nee agɔnwolɛma mɔɔ bɛ subane le kpalɛ la abɔ nu ahɔ anzɛɛ bɛbamaa awie ahɔzoho bɛ. (Mrɛlɛbulɛ 28:26) Ɔwɔ kɛ Kilisienema mɔɔ ɛlɛkpondɛ agyalɛ la kakye kɛ, esiane wɔ nu kɛ bɛ nee awie badu wɔ yintanɛte ne azo, ɔluakɛ ɔbamaa bɛava awie mɔɔ bɛnze ye kpalɛ la agɔnwolɛ.​—Edwɛndolɛ 26:4.