Gyihova Alasevolɛ agyalɛ ta yɛ sikalɛ, enililɛ wɔ nu na bɛmaa ɛdendɛlɛ mɔɔ gyi Baebolo ne azo la wɔ ɔ bo. Saa bɛkpɔne atɔfolɛlielɛ ne a, bie a bɛkɔyia nu wɔ ɛleka bɛdie bɛ nye na bɛdi aleɛ ekyi. a Mɔɔ Gyisɛse bɔ ye ɛzonlenlɛ gyima ne abo la, ɔhɔle atɔfolɛlielɛ zɛhae bie abo wɔ Kana suakpole ne azo.​—Dwɔn 2:1-11.

•  Saa bɛlɛyɛ atɔfolɛlielɛ a, boni a kɔ zo a?

•  Nienwu a Gyihova Alasevolɛ yɛ bɛ atɔfolɛlielɛ a?

•  Nwane mɔ a kola kɔ bie a?

•  Asoo bɛlɛ anwoziezielɛ titili bie ɔ?

•  Bɛkola bɛkyɛ agyalɛma ne debie ɔ?

•  Asoo bɛbamaa tɔmɛlɛ zo bɛabɔ nwo wɔ ɛkɛ ɔ?

•  Asoo bɛbavuandi awule nee ninyɛne gyɛne bɛagua agyalɛma ne anwo ɔ?

•  Bɛbahyɛ aleɛ nee nza wɔ ɔ bo ɔ?

•  Bɛbabɔ edwɛne anzɛɛ bɛazi agole wɔ ɔ bo ɔ?

•  Asoo Gyihova Alasevolɛ di bɛ atɔfolɛlielɛ nwo ɛvoyia ɔ?

 Debie titili mɔɔ kɔ zo la a le agyalɛ ɛdendɛlɛ ne mɔɔ kpanyinli bie mɔɔ ɔle Gyihova Dasevolɛ fa mitini kɛyɛ 30 maa la. Ɛdendɛlɛ mɔɔ maa anwosesebɛ mɔɔ bɛfa wuluwuluyɛlɛ bɛmaa la si kɛzi Baebolo ne bahola aboa agyalɛma ne yeamaa bɛahulo bɛ nwo na bɛ nye alie dahuu wɔ agyalɛ ne anu la azo.​—Ɛfɛsɛsema 5:33.

 Wɔ maanle dɔɔnwo azo, arane ne maa Gyihova Alasevolɛ mgbanyima adenle ɔmaa bɛdie agyalɛ wɔ mɛla adenle zo. Ye zɔhane ati, saa ɛdendɛlɛ ne ɛlɛkɔ awieleɛ a, bɛmaa agyalɛma ne ka ndane na bie a bɛawula ngɛba. Akee kpanyinli ne bɔ ye nolo kɛ bɛle agyalɛma.

 Wɔ maanle bie mɔ noko azo, arane mɛla kile kɛ ɔwɔ kɛ arane nu mgbanyima a die agyalɛ ne wɔ mɛla adenle zo a. Wɔ ɛleka zɛhae mɔ, saa ɔka ekyi bɛtie bɛ agyalɛ ɛdendɛlɛ ne a yɛɛ bɛfa bɛ agyalɛ ne bɛfea arane bo a. Saa agyalɛma ne anga ndane wɔ arane nu a, bɛkola bɛyɛ zɔ wɔ mekɛ mɔɔ ɛdendɛlɛ ne ɛlɛba ye awieleɛ la. Noko, saa bɛhanle ndane wɔ arane nu na bɛkulo kɛ bɛka ye bieko a, ɔwɔ kɛ bɛka ye kɛ debie mɔɔ yekpa nwo. Bɛfa asɔneyɛlɛ bɛwie ɛdendɛlɛ ne na bɛsɛlɛ Nyamenle nyilalɛ bɛmaa agyalɛma fofolɛ ne.

 Alasevolɛ dɔɔnwo anye die nwo kɛ saa ɔkɛyɛ boɛ a, bɛbayɛ bɛ atɔfolɛlielɛ wɔ Belemgbunlililɛ Asalo. b Saa bɛbado ɛkponle wɔ atɔfolɛlielɛ ne anzi a, agyalɛma ne kpa ɛleka fofolɛ.

 Saa bɛbayɛ atɔfolɛlielɛ ne wɔ Belemgbunlililɛ Asalo a, awie biala, mɔɔ Alasevolɛ nee bɛdabɛ mɔɔ bɛnle Alasevolɛ boka nwo la kola kɔ bie. Saa bɛbado ɛkponle a, agyalɛma ne bado ɛsalɛ avɛlɛ menli mɔɔ bɛkulo kɛ bɛba bie la.

 Saa bɛbayɛ atɔfolɛlielɛ ne wɔ Belemgbunlililɛ Asalo a, bɛnlɛ anwoziezielɛ titili bie noko Gyihova Alasevolɛ bɔ mɔdenle dua Baebolo ngyinlazo zo fi mɛlɛbɛnwoaze nee ɛbulɛ nu siezie bɛ nwo. Saa awie biala mɔɔ bara atɔfolɛlielɛ ne bie la fa ngyinlazo ko ne ala yɛ gyima a, bɛ nye die nwo kpalɛ. (1 Timote 2:9) Saa agyalɛma ne bɛado ɛkponle a, ɔwɔ kɛ awie biala mɔɔ bara bie la fa ngyinlazo ko ne ala yɛ gyima.

 Baebolo ne maa yɛ anwosesebɛ kɛ yɛvi atiakunlukɛnlɛma nu yɛhyɛ debie. (Edwɛne 37:21) Gyihova Alasevolɛ anye die kɛ bɛbahyɛ awie mɔ debie wɔ atɔfolɛlielɛ bo yɛɛ saa awie mɔ kyɛ bɛ debie wɔ bɛ atɔfolɛlielɛ bo a, bɛ nye die nwo. (Luku 6:38) Noko akee, Alasevolɛ ne mɔ ɛnzɛlɛ menli kɛ bɛhyɛ bɛ debie anzɛɛ bɛmbɔ menli mɔɔ kyɛ bɛ debie la aluma wɔ bagua nu. (Mateyu 6:3, 4; 2 Kɔlentema 9:7; 1 Pita 3:8) Tɛ kɛ Baebolo ne tendɛ tia ala, emomu saa bɛyɛ ninyɛne zɛhae mɔ a, ɔkola ɔmaa menli mɔɔ wɔ ɛkɛ la ati si aze.

 Kyɛkyɛ. Gyihova Alasevolɛ ɛmmaa tɔmɛlɛ zo ɛmbɔ nwo, ɔluakɛ nyɛleɛ zɛhae abo vi awozonle ɛzonlenlɛ nu. c Alasevolɛ ne mɔ dua ndenle ngakyile zo maa agyalɛma ne nwu ye kɛ bɛkulo kɛ bɛ nye die.

 Kyɛkyɛ. Wɔ ɛleka bie mɔ, menli fuandi awule nee ninyɛne gyɛne gua agyalɛma fofolɛ ne anwo. Bɛdie bɛdi kɛ bɛyɛ ɛhye bɛfa bɛkpondɛ saleɛ (good luck), anyelielɛ nee ngoane tendenle bɛmaa agyalɛma ne. Noko, Gyihova Alasevolɛ ɛnva bɛ nwo ɛnvea nyɛleɛ mɔɔ ɛngyi Baebolo ne azo la anu. Alasevolɛ ne mɔ ɛnga saleɛ ɛngile awie mɔ ɔluakɛ Baebolo ne tendɛ tia.​—Ayezaya 65:11

 Bɛngyɛ aleɛ anzɛɛ nza wɔ atɔfolɛlielɛ mɔɔ bɛyɛ wɔ Belemgbunlililɛ Asalo la abo. Agyalɛma bie mɔ kpa kɛ bɛbado ɛkponle na bɛahyɛ aleɛ wɔ mekɛ mɔɔ bɛkɛkpɔne atɔfolɛlielɛ ne la. (Nolobɔvo 9:7) Saa bɛbahyɛ nza mɔɔ maa bɛbo la a, bɛnea kɛ bɛnrɛmaa menli mɔɔ bara la ɛnrɛnlo ɛnrɛbo zo yɛɛ bɛnea kɛ bɛdabɛ mɔɔ bɛtɛdwule kɛ bɛno nza ɛhye mɔ bie la ɛnrɛnlo bie.​—Luku 21:34; Wulomuma 13:1, 13.

 Saa agyalɛma ne kulo a, bɛbava edwɛne nee agolezilɛ bɛaboka bɛ ɛkponledolɛ ne anwo. (Nolobɔvo 3:4) Bɛbahola bɛakpa edwɛne mɔɔ bɛkulo nee mɔɔ bɛdie bɛto nu wɔ bɛ ɛkɛ ne la, noko ɔwɔ kɛ bɛnea kɛ ɔnrɛgyegye bɛ nyɛvolɛ ne mɔ. Bɛbɔ edwɛne mɔɔ gyi Ngɛlɛlera ne azo la wɔ atɔfolɛlielɛ mɔɔ bɛyɛ wɔ Belemgbunlililɛ Asalo la abo.

 Ɔluakɛ Baebolo ngyinlazo biala ɛnle atɔfolɛlielɛ nwo ɛvoyia mɔɔ bɛdi anwo la ati, Alasevolɛ agyalɛma ne a bazi kpɔkɛ kɛ bɛbali anzɛɛ bɛnrɛli a. Saa bɛkpa kɛ bɛbali a, bie a bɛ ngomekye bɛbali anzɛɛ bɛbado ɛsalɛ bɛavɛlɛ bɛ gɔnwo mɔ nee bɛ mbusuafoɔ.