Watch Tower Bible and Tract Society of Pennsylvania ne le ahyehyɛdeɛ mɔɔ bɛnva bɛmkpondɛ ezukoa mɔɔ bɛgyinlanle mɛla mɔɔ wɔ Commonwealth of Pennsylvania, U.S.A la azo a bɛvale bɛziele ɛkɛ wɔ 1884 a. Gyihova Alasevolɛ fa di gyima amaa yeaboa bɛ wɔ bɛ ewiade amuala gyimayɛlɛ ne mɔɔ bie a le Baebolo nee mbuluku la ɛyɛlɛ nu.

 Ahyehyɛdeɛ ɛhye bodane a le kɛ “ɔfa ɛzonlenlɛ nu ngilehilelɛ, ndetelɛ nee moalɛ yeamaa amaa bɛaha na bɛahilehile edwɛkpa ne mɔɔ fale Nyamenle Belemgbunlililɛ ne mɔɔ Kelaese Gyisɛse ɛlɛdi zolɛ tumi la anwo.” Tɛ ezukoa mɔɔ awie baye la a bɛgyinla zo bɛfɛlɛ ye bɛmaa ɔbaboka ahyehyɛdeɛ ne anwo a. Menli mɔɔ wɔ nu la nee bɛ adekilevolɛma boa Gyihova Alasevolɛ Neazo Eku ne.

 Saa ɛye Watch Tower Bible and Tract Society of Pennsylvania ne ɛsie ahane a, Gyihova Alasevolɛ fa mɛla adenle zo ngyehyɛleɛ dɔɔnwo di gyima wɔ maanle dɔɔnwo anu. Maanle bie mɔ fa “Watch Tower,” “Watchtower,” anzɛɛ ye ngilebɛbo boka bɛ duma mɔɔ bɛfa bɛfɛlɛ bɛ la anwo.

 Bɛdele mɛla adenle zo ngyehyɛleɛ ɛhye mɔ la yeboa yemaa yɛyɛ ninyɛne dɔɔnwo. Bie mɔ a le:

•   Mbuluku ɛhɛlɛlɛ nee bɛ ɛyɛlɛ. Yɛyɛ Baebolo kɛyɛ mgbe 220 yɛɛ mbuluku kɛyɛ mgbe mgbe 40 wɔ aneɛ mɔɔ bo 900 la anu. Menli kola kenga Baebolo ne wɔ jw.org wɛbsaete ne azo wɔ aneɛ mɔɔ bo 160 la anu mɔɔ bɛndua ɛhwee a na eza bɛnyia Baebolo nu kpuya le kɛ, “Nyamenle Belemgbunlililɛ Ne A Le Duzu?” la anwo mualɛ.

•   Ndetelɛ. Yɛlɛ sukulu ngakyile mɔɔ yɛdua zo yɛfa Baebolo nu ngilehilelɛ yɛmaa a. Kɛ neazo la, ɔvi 1943 mɔɔ ba la, Gyihova Alasevolɛ kɛyɛ 9,000 la ɛnyia ndetelɛ mɔɔ Ɛzinzalɛ Arane Geleade Baebolo Sukulu ne fa maa la azo nvasoɛ. Ɛhye ɛboa bɛ ɛmaa bɛlɛsonle kɛ edwɛkpatɛlɛvolɛma anzɛɛ bɛlɛboa wɔ ewiade amuala edwɛkɛhanlɛ gyima ne anu. Dapɛne biala menli mgbe dɔɔnwo mɔɔ bie mɔ ɛnle Alasevolɛ la nyia ngilehilelɛ wɔ yɛ ayia mɔɔ yɛyɛ ye wɔ asafo ko biala anu la abo. Eza yɛyɛ mbuluku mɔɔ yɛfa yɛkilehile awie mɔ ɛgengalɛ nee ɛhɛlɛlɛ la wɔ aneɛ 120 anu.

•   Moalɛ. Yɛva nwonane afoa nu moalɛ yɛmaa menli mɔɔ esiane ɛdo bɛ la​—le kɛ menli ɛhunlɛ mɔɔ zile Rwanda wɔ 1994 yɛɛ azɛlɛkpusulɛ mɔɔ zile wɔ Haiti wɔ 2010 la.

 Ɔwɔ nuhua kɛ ahyehyɛdeɛ ne nee mɛla adenle zo ngyehyɛleɛ ngakyile ɛmaa yɛhola yɛyɛ ninyɛne dɔɔnwo ɛdeɛ noko tɛ yemɔ titili a yɛ gyima ne gyi zo a. Kilisienenli ko biala di ye ɛzonlelilɛ mɔɔ Nyamenle ɛva ɛmaa ye mɔɔ yemɔ a le edwɛkpa ne ɛhanlɛ nee ye ngilehilelɛ la anwo gyima. (Mateyu 24:14; 28:19, 20) Yɛdie yɛdi kɛ Nyamenle gyi yɛ nzi na ɔbahɔ zo ‘yeamaa yeanyi.’​—1 Kɔlentema 3:6, 7.