Ɛseta 4:1-17
4 Mɔɔ Mɔdekae+ dele mɔɔ bɛyɛ la amuala anwo bie la,+ ɔsuosuanle ye adɛladeɛ ne mɔ anu, ɔhedale ɛrele na ɔvale nzonle ɔbɔle ɔ nwo. Akee ɔhɔle suakpole ne avinli lɔ na ɔzunle kpole.
2 Ɔhɔle too ɔhɔgyinlanle belemgbunli ne anlenkɛ kpole ne anloa, ɔluakɛ ɛnee ɔnle kɛ awie keda ɛrele wolo belemgbunli ne anlenkɛ kpole ne anu.
3 Na maanzinli+ biala mɔɔ bɛdele belemgbunli ne edwɛkɛ ne nee ye mɛla ne wɔ nu la, Dwuuma mɔɔ wɔ ɛkɛ la lile nyane kpole, bɛhyele ɛhɔne+ na bɛzunle bɛyele awolɛ. Bɛ nuhua dɔɔnwo vale ɛrele nee nzonle guale azɛlɛ nwo na bɛlale zo.+
4 Mɔɔ Ɛseta azonvolɛ mraalɛ nee mrenyia* hɔhanle hilele ye la, ɔgyegyele ɔbahyema* ne kpole. Akee ɔvale adɛladeɛ ɔzoanle kɛ bɛva bɛhɔmaa Mɔdekae ɛwula na ɔye ɛrele ne, noko yeanlie.
5 Ɔti Ɛseta zoanle Hatakye,* belemgbunli azonvolɛ ne mɔ anu ko mɔɔ ɔkpale ye kɛ ɔzonle Ɛseta la, na ɔzele ye kɛ ɔhɔ Mɔdekae ɛkɛ ɔhɔbiza ye mɔɔ ɛhye kile nee mɔɔ ɛlɛsi la.
6 Yemɔti Hatakye hɔle Mɔdekae anwo ɛkɛ wɔ sua ne gua ne azo, wɔ belemgbunli ne anlenkɛ kpole ne anyunlu.
7 Mɔdekae hanle edwɛkɛ mɔɔ ɛdo ye nee ezukoa dodo+ mɔɔ Heeman ɛbɔ ɛwɔkɛ kɛ ɔbadua yeagua belemgbunli ne gya nu yeamaa bɛazɛkye Dwuuma la amuala hilele ye.+
8 Eza ɔvale mɛla mɔɔ bɛlile ye wɔ Hyuhyan*+ kɛ bɛbɔ bɛ bo zo na bɛhɛlɛ la bie ɔmaanle ye kɛ ɔva ɔhɔhile Ɛseta, ɔhilehile nuhua ɔhile ye na ɔha ɔhile ye+ kɛ ɔhɔ belemgbunli ne ɛkɛ ɔhɔkpondɛ ɔ nyunlu ɛlolɛ na ɔzɛlɛ ye ɔmaa ye menli ne.
9 Hatakye ziale rahanle mɔɔ Mɔdekae hanle la hilele Ɛseta.
10 Ɛseta zoanle Hatakye kɛ ɔhɔze Mɔdekae kɛ:+
11 “Belemgbunli ne sonvolɛma nee menli mɔɔ wɔ belemgbunli ne maanzinli ne mɔ anu la amuala ze kɛ, nrenyia anzɛɛ raalɛ biala mɔɔ bɛtɛfɛlɛle ye na ɔbahɔ belemgbunli ne suakunlu alienwo+ ɛkɛ ne la, mɛla kokye a wɔ ɛkɛ a: Ɔwɔ kɛ bɛku ye; saa belemgbunli ne tende ye nvutuke kpɔma ne+ ɔ nwo zo a yemɔ bɛnrɛhu ye. Noko mame kenle 30 ɛne, belemgbunli ne ɛtɛfɛlɛle me.”
12 Mɔɔ bɛhanle Ɛseta edwɛkɛ ne bɛhilele Mɔdekae la,
13 ɔmaanle bɛhɔzele Ɛseta kɛ: “Mmadwenle kɛ kɛmɔ ɛwɔ belemgbunli sua nu la ati, edwɛkɛ mɔɔ bado Dwuuma amuala la bakpa ɛ ti.
14 Saa ɛmua ɛ nloa wɔ mekɛ ɛhye anu a, moalɛ nee ɛlielɛ bavi ɛleka gyɛne ara amaa Dwuuma,+ noko ɛ nee wɔ papa sua nu amra bawu. Na nwane a ze saa ngyegyelɛ mɔɔ le kɛ ɛhye la ati a wɔrayɛ ɔbahyema a?”+
15 Akee Ɛseta maanle bɛhɔzele Mɔdekae kɛ:
16 “Kɔboɔboa Dwuuma mɔɔ wɔ Hyuhyan* la amuala anloa na bɛhye ɛhɔne+ bɛmaa me. Bɛmmadi aleɛ anzɛɛ bɛmmano debie biala too kenle nsa,+ alehyenlɛ nee aledwolɛ. Medame noko me nee me azonvolɛ mraalɛ ne mɔ bahye ɛhɔne. Mebahɔ belemgbunli ne ɛkɛ, ɛhye tia mɛla ɛdeɛ, noko saa ɔwɔ kɛ mewu a, mebawu.”
17 Yemɔti Mɔdekae hɔle na ɔhɔyɛle mɔɔ Ɛseta hanle hilele ye la amuala.
Ɔbodwɛkɛ
^ Hibulu aneɛ nu, “azonvolɛ mrenyia mɔɔ bɛza bɛ.”
^ Anzɛɛ “belemgbunli raalɛ.”
^ Ɔle sonvolɛ mɔɔ bɛza ye.
^ Anzɛɛ “Susa.”
^ Anzɛɛ “Susa.”
