Samoɛle Mɔɔ Limoa 14:1-52
14 Kenle ko bie, Sɔɔlo ara Dwɔnatan+ zele sonvolɛ ne mɔɔ soa ye konle ninyɛne la kɛ: “Bɛla maa yɛpɛ yɛhɔ Filisitiama azokoɛleɛ lɔ.” Noko yeanga yeangile ye papa.
2 Ɛnee Sɔɔlo wɔ Gebeya+ kandiba na ɔde pɔmegelanate baka ne mɔɔ gyi Megelɔn la abo, yɛɛ mrenyia kɛyɛ 600 wɔ ɔ nwo ɛkɛ.+
3 (Yilae+ mɔɔ ɛnee le Gyihova ɛsɔfo wɔ Hyaelo+ la ara Fenɛhaze+ ara Yekabɔdo+ adiema Ahaetɛbe+ ara Ahaegya a ɛnee yifɔdo ne wɔ ɔ sa nu a.)+ Na ɛnee menli ne ɛnze kɛ Dwɔnatan ɛhɔ.
4 Ɛleka mɔɔ Dwɔnatan hɔvale kɛ ɔbɔ mɔdenle yeapɛ yeahɔ Filisitiama azokoɛleɛ ne la, ɛnee bodane bie mɔɔ yɛ nla kɛ egyele la wɔ ye foa ko nee foa ko; bɛfɛlɛ ko Bozɛze yɛɛ bɛfɛlɛ ko ne noko Sina.
5 Ɛnee bodane ne ko wɔ ye sɔlɔ, na ɔ nee Mekemahye anye bɔ zo, yɛɛ ko ne noko wɔ nyiakɛ, na ɔ nee Giba+ anye bɔ zo.
6 Ɔti Dwɔnatan zele ye sonvolɛ ne mɔɔ soa ye konle ninyɛne ne la kɛ: “Bɛla maa yɛpɛ yɛhɔ menli ɛhye mɔɔ bɛtɛpɛle bɛ mrenyiazo la azokoɛleɛ ne.+ Bie a Gyihova bali aboa yɛ, ɔluakɛ debie biala ɛngola ɛnzi Gyihova adenle kɛ ɔkɛlua menli dɔɔnwo anzɛɛ ekyi anwo azo ɔkɛlie ngoane.”+
7 Na ye sonvolɛ ne zele ye kɛ: “Yɛ debie biala mɔɔ wɔ ahonle kɛha wɔ kɛ ɛyɛ la. Kɔ ɛleka biala mɔɔ ɛkulo la, na ɛleka biala mɔɔ wɔ ahonle kɛha wɔ kɛ ɛhɔ la, mebali ɛ nzi.”
8 Akee Dwɔnatan hanle kɛ: “Yɛbapɛ yɛahɔ menli ɛhye mɔ anwo lɔ na yɛamaa bɛanwu kɛ yɛra ɛkɛ.
9 Saa bɛka bɛkile yɛ kɛ, ‘Bɛgyinla ɛkɛ kɔkpula kɛ yɛkɛra bɛ nwo lɔ!’ a, yɛbagyinla ɛleka mɔɔ yɛwɔ la na yɛnrɛhɔ bɛ nwo lɔ.
10 Noko saa bɛka kɛ, ‘Bɛrɛla yɛ nwo zo!’ a, yɛbahɔ, ɔluakɛ Gyihova bava bɛ awula yɛ sa nu. Ɛhye a bayɛ sɛkɛlɛneɛ amaa yɛ a.”+
11 Yemɔti bɛ mu nwiɔ bɛmaanle Filisitiama nwunle kɛ bɛra bɛ azokoɛleɛ ne. Filisitiama ne hanle kɛ: “Bɛnlea! Hibuluma ne vi adokule ne mɔ mɔɔ bɛveɛvea nu la anu ɛlɛfinde.”+
12 Yemɔti menli mɔɔ wɔ azokoɛleɛ ɛkɛ ne la zele Dwɔnatan nee ye sonvolɛ ne kɛ: “Bɛrɛla yɛ nwo ɛke na yɛbahile bɛ nrɛlɛbɛ!”+ Ɛkɛ ne ala Dwɔnatan zele ye sonvolɛ ne kɛ: “Di me nzi, ɔluakɛ Gyihova bava bɛ awula Yizilayɛma asa anu.”+
13 Na Dwɔnatan vale ɔ sa nee ɔ gyakɛ vole, ɛnee ye sonvolɛ ne li ɔ nzi; na Filisitiama bɔle ɔ bo kɛ bɛte bɛagua Dwɔnatan anyunlu, na ɛnee ye sonvolɛ ne noko li ɔ nzi ɛlɛku bɛ.
14 Mekɛ mɔɔ Dwɔnatan nee ye sonvolɛ ne limoale hɔle bɛ nwo zo la, bɛhunle mrenyia kɛyɛ 20 wɔ ɛleka ekyi bie.*
15 Ɛzulolɛ hanle azokoɛleɛ ɛkɛ ne amra nee sinzavolɛma ne amuala, na sogyama ne bɔbɔ mɔɔ bɛzoanle bɛ+ kɛ bɛhɔho la ahonle dule. Azɛlɛ kpusule na Nyamenle maanle ɛzulolɛ hanle bɛ.
16 Sɔɔlo sinzavolɛma mɔɔ wɔ Bɛngyamanema sua Gebeya+ azo la nwunle kɛ anyezota ne ɛlɛtɛlɛ ahɔ ɛleka biala.+
17 Sɔɔlo zele menli mɔɔ wɔ ɔ nwo ɛkɛ ne la kɛ: “Mesɛlɛ bɛ, bɛdia menli ne na bɛnwu mɔɔ ɛvi yɛ nwo ɛke la.” Mɔɔ bɛdianle la, bɛnwunle kɛ Dwɔnatan nee ye sonvolɛ ne mɔɔ soa ye konle ninyɛne ne la ɛnle ɛkɛ.
18 Akee Sɔɔlo zele Ahaegya kɛ:+ “Fa nɔhalɛ Nyamenle ne Ɛlɛka ne bikye ɛke!” (Mekɛ zɔhane,* ɛnee nɔhalɛ Nyamenle ne Ɛlɛka ne wɔ Yizilayɛma anwo ɛkɛ.)
19 Mɔɔ Sɔɔlo nee ɛsɔfo ne ɛlɛtendɛ la, ɛnee anyezota mɔɔ ɛlɛkɔ zo wɔ Filisitiama azokoɛleɛ ne la ɛlɛyɛ kpole. Akee Sɔɔlo zele ɛsɔfo ne kɛ: “Gyakyi mɔɔ ɛlɛyɛ la.”*
20 Ɔti Sɔɔlo nee menli kɔsɔɔti mɔɔ boka ɔ nwo la boɔboale bɛ nloa na bɛhɔle konle ne anloa, na bɛnwunle kɛ Filisitiama ne ɛpɛ bɛ nwo ɛlɛkuhu bɛ nwo, na ɛnee anyezota ne ɛyɛ kpole kpalɛ.
21 Hibuluma noko mɔɔ dɛba ne hɔle Filisitiama afoa na bɛ nee bɛ hɔle azokoɛleɛ ɛkɛ ne la ziale hɔle Yizilayɛma mɔɔ Sɔɔlo nee Dwɔnatan li bɛ ti la afoa.
22 Yizilayɛma kɔsɔɔti mɔɔ hɔveale+ Yifelaem awoka ne mɔ azo la dele kɛ Filisitiama ɛnriandi, na bɛdabɛ noko bɛrabokale nwo bɛmaanle bɛvoanle bɛ ndinlizo wɔ konle ne anu.
23 Yemɔti Gyihova liele Yizilayɛ wɔ kenle zɔhane,+ na konle ne hɔdwule Bɛte-eevɛn.+
24 Noko kenle zɔhane, Yizilayɛma vɛle kpalɛ ɔluakɛ ɛnee Sɔɔlo ɛha ndane ɛdo menli ne anwo kɛ: “Munzule ɛha awie biala mɔɔ kɛli aleɛ* kolaa na aleɛ adwo kɔkpula kɛ mekɛli me kpɔvolɛma nzenralɛ la!” Ɔti awie biala anli aleɛ.+
25 Na menli* ne amuala hɔle kpɔkɛ ne anu, na ɛnee wolɛ wɔ azɛlɛ ne anwo.
26 Mɔɔ menli ne hɔle kpɔkɛ ne anu la, bɛnwunle kɛ wolɛ ne ɛlɛpepe, noko awie biala anva ɔ sa angɔ ɔ nloa, ɔluakɛ ɛnee bɛsulo ndane ne.
27 Noko Dwɔnatan ande kɛ ye papa ɛha ndane ɛdo menli ne anwo,+ yemɔti ɔdendenle ye kpɔma ne mɔɔ ɔlɛ ye ɔ sa nu la na ɔvale ɔ ti ɔwɔle wolɛ ndɛlamoa ne anu. Mɔɔ ɔvale ɔ sa ɔhɔle ɔ nloa la, ɔ nye zo lale ɛkɛ.
28 Na menli ne anu ko hanle kɛ: “Wɔ papa ɛha ndane ɛsesebɛ ɛdo menli ne anwo kɛ, ‘Munzule ɛha awie biala mɔɔ kɛli aleɛ ɛnɛ la!’+ Ɛhye ati a menli ne ɛwie fɛ la.”
29 Noko Dwɔnatan hanle kɛ: “Me papa ɛva ngyegyelɛ* kpole ɛra azɛlɛ ne azo. Nea kɛzi wolɛ ekyi mɔɔ meli la ɛmaa me nye zo ɛla ɛkɛ ne a.
30 Saa menli ne nyianle adenle lile+ bɛ kpɔvolɛma ninyɛne mɔɔ bɛnyianle bɛ ɛnɛ la bie a, nea kɛzi anrɛɛ ɔle kpalɛ a! Anrɛɛ ɔbamaa bɛahu Filisitiama dɔɔnwo kpalɛ.”
31 Kenle zɔhane, bɛhunle Filisitiama ɔvi Mekemahye too ɔhɔdwule Ayegyalɔn,+ na menli ne vɛle kpole kpalɛ.
32 Ɔti menli ne anye bolole ninyɛne mɔɔ bɛnyianle la na bɛnriandile bɛhɔvale mboane nee nlankɛ yɛɛ nlankɛ mralɛ na bɛhunle bɛ wɔ azɛlɛ nwo, na bɛlile mogya ne bɛbokale nane ne anwo.+
33 Ɔti bɛbɔle Sɔɔlo amaneɛ kɛ: “Nea! Menli ne ɛlɛdi nane aboka ye mogya ne anwo+ ayɛ ɛtane atia Gyihova.” Ɔti ɔhanle kɛ: “Bɛanli nɔhalɛ. Bɛhundo bolɛ kpole bɛrɛlɛ me kɛkala.”
34 Akee Sɔɔlo hanle kɛ: “Bɛhɔ menli ne anu na bɛhɔha bɛhile bɛ kɛ, ‘Awie biala ɛva ye ɛnlankɛ nee ye boane ɛrahu ye wɔ ɛke na bɛli. Bɛmmadi nane bɛboka ye mogya ne anwo+ na bɛyɛ ɛtane bɛtia Gyihova.’” Yemɔti bɛ nuhua ko biala vale ye ɛnlankɛ rale nɔe ne na ɔhunle ye wɔ ɛkɛ.
35 Na Sɔɔlo zile afɔlemokyea maanle Gyihova.+ Ɛhye a le ye afɔlemokyea mɔɔ ɔlimoale ɔzile ɔmaanle Gyihova a.
36 Nzinlii, Sɔɔlo hanle kɛ: “Bɛmaa yɛhɔ Filisitiama anwo zo nɔsolɛ yɛhɔsesa bɛ ninyɛne too alehyenlɛ wienyi. Yɛnrɛmaa bɛ nuhua ko bɔbɔ ɛnrɛha.” Na bɛhanle kɛ: “Yɛ debie biala mɔɔ le kpalɛ wɔ ɛ nye zo la.” Akee ɛsɔfo ne hanle kɛ: “Bɛmaa yɛbiza nɔhalɛ Nyamenle ne wɔ ɛke.”+
37 Na Sɔɔlo bizale Nyamenle kɛ: “Mengɔ Filisitiama anwo zo ɔ?+ Ɛbava bɛ wɔawula Yizilayɛ asa anu ɔ?” Noko Nyamenle ambua ye wɔ kenle zɔhane.
38 Ɔti Sɔɔlo hanle kɛ: “Bɛmɛ menli ne mgbanyima kɔsɔɔti, bɛrɛla ɛke, na bɛrakpondɛ ɛtane mɔɔ bɛyɛ ye ɛnɛ la.
39 Ɔluakɛ mekɛ ala mɔɔ Gyihova mɔɔ liele Yizilayɛ la de aze la, saa me ra Dwɔnatan bɔbɔ a, ɔwɔ kɛ ɔwu.” Na menli ne anu ko bɔbɔ ambua ye.
40 Akee ɔzele Yizilayɛma kɔsɔɔti kɛ: “Bɛgyinla foa ko na medame nee me ra Dwɔnatan noko ɛgyinla foa ko.” Na menli ne zele Sɔɔlo kɛ: “Yɛ debie biala mɔɔ le kpalɛ wɔ ɛ nye zo la.”
41 Akee Sɔɔlo zele Gyihova kɛ: “O Yizilayɛ Nyamenle, dua Tɛmem ne azo bua me!”+ Ɔbɔle Dwɔnatan nee Sɔɔlo, na menli ne yele bɛ nwo vile nu.
42 Akee Sɔɔlo hanle kɛ: “Bɛgua medame nee me ra Dwɔnatan anwo ma.”*+ Na ɔdɔle Dwɔnatan anwo zo.
43 Na Sɔɔlo zele Dwɔnatan kɛ: “Ka kile me, duzu a wɔyɛ a?” Ɔti Dwɔnatan zele ye kɛ: “Menvale me kpɔma ne mɔɔ melɛ ye me sa nu la ati menganle wolɛ ekyi mentafele ala.+ Medame ɛne! Bɛhu me!”
44 Na Sɔɔlo hanle kɛ: “Dwɔnatan, saa wɔanwu a, Nyamenle ɛdua me kakɛ na ɔgua me bie zo.”+
45 Noko menli ne zele Sɔɔlo kɛ: “Ɔwɔ kɛ Dwɔnatan mɔɔ ɛmaa Yizilayɛ ɛli konim* kpole ɛhye+ la wu ɔ? Ɔnrɛzi zɔ ɛlɛ! Mekɛ ala mɔɔ Gyihova de aze la, ɔ ti enrinli ko bɔbɔ ɛnrɛdɔ aze, ɔluakɛ Nyamenle a maanle ɔyɛle ɛhye ɛnɛ a.”+ Yemɔti menli ne liele Dwɔnatan ngoane na yeanwu.
46 Yemɔti Sɔɔlo gyakyile Filisitiama ɛvoanlɛ, na Filisitiama hɔle bɛ azɛlɛ zo.
47 Sɔɔlo maanle ye belemgbunlililɛ ne gyinlanle wɔ Yizilayɛ na ɔhonle ɔtiale ye kpɔvolɛma kɔsɔɔti, ɔhonle ɔtiale Mowabema,+ Amɔnoma,+ Yidɔmma,+ Zoba arelemgbunli+ yɛɛ Filisitiama;+ na ɛleka biala mɔɔ ɔhɔle la, ɔlile bɛ nwo zo konim.
48 Na ɔhonle akɛnrasesebɛ zo na ɔlile Amalɛkema anwo zo konim+ na ɔliele Yizilayɛma ɔvile bɛ kpɔvolɛma asa anu.
49 Sɔɔlo amra mrenyia a le Dwɔnatan, Yehyevae yɛɛ Malekae-hyua.+ Ɛnee ɔlɛ ɔ mra mraalɛ nwiɔ; bɛfɛlɛ kpanyinli ne Milabe,+ yɛɛ bɛfɛlɛ ekyi ne Maekale.+
50 Bɛfɛlɛ Sɔɔlo aye ne Ahenoam, ɔle Ahaemaze ara raalɛ. Bɛfɛlɛ ye ɛlɔnema kpanyinli ne Abenɛɛ,+ ɔle Sɔɔlo papa adiema nrenyia Nɛɛ ara.
51 Sɔɔlo papa a le Kehye,+ yɛɛ Abenɛɛ papa Nɛɛ+ le Abayɛle ara.
52 Sɔɔlo ngoane mekɛ kɔsɔɔti anu,+ ɔ nee Filisitiama honle ɛsesebɛ. Mekɛ biala mɔɔ Sɔɔlo kɛnwu nrenyia mɔɔ anwo yɛ se anzɛɛ ɔlɛ akɛnrasesebɛ la, ɔfa ye wɔ ye gyima nu.+
Ɔbodwɛkɛ
^ Anzɛɛ “wɔ azɛlɛ mɔɔ nlankɛ nyinli nwiɔ bahola ayɛ zolɛ gyima kenle ko la foa ko.”
^ Hibulu aneɛ nu, “Kenle zɔhane.”
^ Hibulu aneɛ nu, “Twe ɛ sa sia.”
^ Hibulu aneɛ nu, “paano.”
^ Hibulu aneɛ nu, “Azɛlɛ.”
^ Anzɛɛ “amaneɛnwunlɛ.”
^ Nea Edwɛkɛbohilelɛ.
^ Anzɛɛ “ɛnyia ngoanelielɛ.”
